Numbers 2

Ilonggo (Ang Biblia (1982))

← Chapter 1 Jump to: Chapter 3 →

1Ang Ginoo nagpamolong kay Moises kag kay Aaron,

2“Ang katawohan sang Israel magpahamtang sing dologan sa iya kaugalingon nga hayahay, nga may mga tanda sang ila mga kabaranggayan; magpahamtang sila sing dologan sa tampad sang layanglayang nga tiliponan palibut.

3Kag ang mga nagapahamtang sing dologan sa kilid nga sidlangan nayon sa bulutlakan sang adlaw amo ang mga sa hayahay sang dologan ni Juda sono sa ila mga kadam-an, kag ang principe sang katawohan ni Juda amo si Naason nga anak ni Aminadab,

4ang iya kadam-an kag ang naisipan sa ila kapitoan kag apat ka libo kag anum ka gatus.

5Ang mga nagapahamtang sing dologan madason sa iya amo ang kabikahan ni Isacar, kag ang principe sang katawohan ni Isacar amo si Natanael nga anak ni Zuar,

6ang iya kadam-an kag ang mga naisipan sa ila kalim-an kag apat ka libo kag apat ka gatus.

7Niyan ang kabikahan ni Zabulon, kag ang principe sang katawohan ni Zabulon amo si Eliab nga anak ni Helon,

8ang iya kadam-an kag ang mga naisipan sa ila kalim-an kag pito ka libo kag apat ka gatus.

9Ang tanan nga naisipan sa dologan ni Juda isa ka gatus kag kawaloan kag anum ka libo kag apat ka gatus, sono sa ila mga kadam-an. Sila magataliwan sing nahauna.

10“Sa kilid nga nabagatnan didto ang hayahay sang dologan ni Ruben sono sa ila mga kadam-an, kag ang principe sang katawohan ni Ruben amo si Elizur nga anak ni Sedeur,

11Ang iya kadam-an kag ang mga naisipan sa ila kap-atan kag anum ka libo kag lima ka gatus.

12Kag ang mga nagapahamtang sing dologan madason sa iya amo ang kabikahan ni Simeon, kag ang principe sang katawohan ni Simeon amo si Selumiel nga anak ni Zurisadai,

13ang iya kadam-an kag ang mga naisipan sa ila kalim-an kag siam ka libo kag tatlo ka gatus.

14Niyan ang kabikahan ni Gad, kag ang principe sang katawohan ni Gad amo si Eliasaf nga anak ni Reuel,

15ang iya kadam-an kag ang mga naisipan sa ila, kap-atan kag lima ka libo kag anum ka gatus kag kalim-an.

16Ang tanan nga naisipan sang dologan ni Ruben isa ka gatus kag kalim-an kag isa ka libo kag apat ka gatus kag kalim-an, sono sa ila mga kadam-an. Sila magataliwan sing ikaduha.

17“Niyan ang layanglayang nga tiliponan magataliwan, upud sa mga Levinhon sa tunga sang dologan; subong sa pagpahamtang nila sing dologan, amo ang pagtaliwan nila, ang tagsa ka tawo sa iya duug, sa ila mga hayahay.

18“Sa kilid nga nakatundan amo ang hayahay sang dologan ni Efraim sono sa ila mga kadam-an, kag ang principe sang katawohan ni Efraim amo si Elisama nga anak ni Amiud,

19ang iya kadam-an kag ang mga naisipan sa ila kap-atan ka libo kag lima ka gatus.

20Kag madason sa iya ang kabikahan ni Manases, kag ang principe sang katawohan ni Manases amo si Gamaliel nga anak ni Pedazur,

21ang iya kadam-an kag ang mga naisipan sa ila katloan kag duha ka libo kag duha ka gatus.

22Niyan ang kabikahan ni Benjamin, kag ang principe sang katawohan ni Benjamin amo si Abidan nga anak ni Gedeoni,

23ang iya kadam-an kag ang mga naisipan sa ila katloan kag lima ka libo kag apat ka gatus.

24Ang tanan nga naisipan sa dologan ni Efraim isa ka gatus kag walo ka libo kag isa ka gatus, sono sa ila mga kadam-an. Sila magataliwan sing ikatlo.

25“Sa kilid nga naaminhan amo ang hayahay sang dologan ni Dan sono sa ila mga kadam-an, kag ang principe sa katawohan ni Dan amo si Ahiezer nga anak ni Amisadai,

26ang iya kadam-an kag ang mga naisipan sa ila kan-uman kag duha ka libo kag pito ka gatus.

27Kag ang mga nagapahamtang sing dologan madason sa iya amo ang kabikahan ni Aser, kag ang principe sang katawohan ni Aser amo si Pagiel nga anak ni Ocran,

28ang iya kadam-an kag ang mga naisipan sa ila kap-atan kag isa ka libo kag lima ka gatus.

29Niyan ang kabikahan ni Neftali, kag ang principe sang katawohan ni Neftali amo si Ahira nga anak ni Enan,

30ang iya kadam-an kag ang mga naisipan sa ila kalim-an kag tatlo ka libo kag apat ka gatus.

31Ang tanan nga naisipan sa dologan ni Dan isa ka gatus kag kalim-an kag pito ka libo kag anum ka gatus. Sila magataliwan sing olihi, sono sa ila mga hayahay.”

32Ini sila amo ang mga naisipan sang katawohan sang Israel sono sa ila mga kabaranggayan; ang tanan nga naisipan sa mga dologan sono sa ila mga kadam-an anum ka gatus kag tatlo ka libo kag lima ka gatus kag kalim-an.

33Apang ang mga Levinhon wala pag-isipa sa tunga sang katawohan sang Israel, sono sa ginsogo sang Ginoo kay Moises.

34Amo ini ang ginhimo sang katawohan sang Israel. Sono sa tanan nga ginsogo sang Ginoo kay Moises, amo ang pagpahamtang nila sang dologan sa ila mga hayahay, kag amo ang pagtaliwan nila, ang tagsatagsa sa ila mga panimalay, sono sa ila mga kabaranggayan.

← Chapter 1 Jump to: Chapter 3 →