Numbers 20

Ilonggo (Ang Biblia (1982))

← Chapter 19 Jump to: Chapter 21 →

1Kag ang katawohan sang Israel, ang bug-os nga katilingban, nag-abut sa kamingawan sang Zin sa bulan nga nahauna, kag nagpuyo ang katawohan sa Cades; kag didto napatay si Miriam, kag didto ginlubung.

2Karon wala sing tubig sa katilingban; kag nagtipon sila batok kay Moises kag kay Aaron.

3Kag nagpakigsuay ang katawohan kay Moises, kag nagsiling, “Kabay kuntani nga napatay kami sang pagkapatay sang amon mga utud sa atubangan sang Ginoo!

4Ngaa bala nga gindala ninyo ang katilingban sang Ginoo sa sining kamingawan, agud nga mapatay kami diri, kami kag ang amon kasapatan?

5Kag ngaa bala nga ginpataklad ninyo kami gikan sa Egipto, sa pagdala sa amon sa sining malaut nga duug? Indi ini duug sang uyas, ukon sang higos, ukon sang mga balagon sang uvas, ukon sang mga granada; kag wala sing tubig nga imnon.”

6Niyan naghalin si Moises kag si Aaron sa atubangan sang pagtilipon pakadto sa ganhaan sang layanglayang nga tiliponan, kag naghapa sila. Kag ang himaya sang Ginoo nagpahayag sa ila,

7kag ang Ginoo nagsiling kay Moises,

8“Dalha ang sungkud, kag tipona ang katilingban, ikaw kag si Aaron nga imo utud, kag hambala ninyo ang igang sa atubangan sang mga mata nila nga maghatag ini sang iya tubig; kag pagowaan mo sila sing tubig gikan sa igang; sa amo mapainum mo ang katilingban kag ang ila kahayupan.”

9Kag gindala ni Moises ang sungkud gikan sa atubangan sang Ginoo, sono sa ginsogo niya sa iya.

10Kag gintipon ni Moises kag ni Aaron ang katilingban sing tingub sa atubangan sang igang, kag nagsiling sia sa ila, “Pamati karon, kamo nga mga mabinatoon; pagowaan bala namon kamo sing tubig gikan sining igang?”

11Kag ginbayaw ni Moises ang iya kamut kag ginbunal ang igang sang iya sungkud sing makaduha; kag naggowa sing bugana ang tubig, kag nag-inum ang katilingban, kag ang ila kahayupan.

12Kag ang Ginoo nagsiling kay Moises kag kay Aaron, “Bangud nga wala kamo magtoo sa akon, sa pagpakabalaan sa akon sa mga mata sang katawohan sang Israel, busa indi kamo makapasulud sining katilingban sa duta nga ginhatag ko sa ila.”

13Ini amo ang mga tubig sang Meriba, bangud nga nagpakigsuay ang katawohan sang Israel sa Ginoo, kag sia ginpakabalaan sa ila.

14Gikan sa Cades nagpadala si Moises sing mga manugbalita sa hari sang Edom, “Amo ini ang ginasiling sang imo utud nga si Israel: Ikaw nakahibalo sang tanan nga kasakit nga nahanabu sa amon:

15kon paano nga ang amon ginikanan nagdulhog sa Egipto, kag nagpuyo kami sa Egipto sing malawig nga tion; kag ang mga Egiptohanon nagpigus sa amon kag sa amon mga ginikanan;

16kag sang nagtuaw kami sa Ginoo, ginpamatian niya ang amon tingug, kag nagpadala sing manugtunda kag ginpagowa niya kami sa Egipto; kag yari kami sa Cades, isa ka banwa sa ukbung gid sang imo dulunan.

17Karon paagiha kami sa imo duta. Indi kami maglatas sa latagon ukon sa ulubasan, kag indi kami mag-inum sang tubig sang mga bobon; magalakat kami sa Kalbangan sang Hari, indi kami maglipas sa too ukon sa wala, tubtub nga makaligad kami sa imo dulunan.”

18Apang si Edom nagsiling sa iya, “Dili ka mag-agi, basi kon maggowa ako nga may espada batok sa imo.”

19Kag ang katawohan sang Israel nagsiling sa iya, “Magataklad kami sa kalbangan; kag kon mag-inum kami sang imo tubig, ako kag ang akon kahayupan, niyan magabayad ako sang bili sini; lamang, sa walay bisan ano pa, paagiha ako sa akon tiil.”

20Apang nagsiling sia, “Dili ka mag-agi.” Kag si Edom naggowa batok sa iya upud ang madamung katawohan, kag may kamut nga makusug.

21Sa sini ang Edom nagdumili sa pagpaagi sang Israel sa iya dulunan; gani ang Israel naglikaw sa iya.

22Kag nagpanlakatan sila kutub sa Cades, kag ang katawohan sang Israel, ang bug-os nga katilingban, nag-abut sa Bukid nga Hor.

23Kag ang Ginoo nagsiling kay Moises kag kay Aaron sa Bukid nga Hor, sa dulunan sang duta ni Edom,

24“Si Aaron isimpon sa iya katawohan; kay indi sia makasulud sa duta nga ginhatag ko sa katawohan sang Israel; bangud nga nagmalalison kamo sa akon polong sa mga tubig sang Meriba.

25Kuhaa si Aaron kag si Eleazar nga iya anak, kag dalha sila patukad sa Bukid nga Hor;

26kag ubahi si Aaron sang iya mga panapton, kag isuklub sila kay Eleazar nga iya anak; kag si Aaron isimpon sa iya katawohan, kag mapatay didto.”

27Naghimo si Moises sono sa ginsogo sa iya sang Ginoo; kag nagtaklad sila sa Bukid nga Hor sa itololok sang bug-os nga katilingban.

28Kag gin-ubahan ni Moises si Aaron sang iya mga panapton, kag ginsuklub sila kay Eleazar nga iya anak; kag si Aaron napatay didto sa putokputokan sang bukid. Niyan si Moises kag si Eleazar nagdulhog sa bukid.

29Kag sang nakita sang bug-os nga katilingban nga si Aaron napatay, ang bug-os nga panimalay sang Israel naghibi tungud kay Aaron sing katloan ka adlaw.

← Chapter 19 Jump to: Chapter 21 →