Numbers 25

Ilonggo (Ang Biblia (1982))

← Chapter 24 Jump to: Chapter 26 →

1Sang nagpuyo ang Israel sa Sitim ang katawohan nagsugud sa pagkamahilawason sa babaying mga anak sang Moab.

2Gin-agda nila ang katawohan sa mga paghalad sa ila mga dios, kag ang katawohan nagkaon, kag nagyaub sa ila mga dios.

3Gani ang Israel nagsimpon kay Baal-peor. Kag ang kaakig sang Ginoo nagdabdab batok sa Israel;

4kag ang Ginoo nagsiling kay Moises, “Kuhaa ang tanan nga puno sang katawohan, kag bitaya sila sa atubangan sang Ginoo sa dayag sang adlaw, agud nga ang masingkal nga kaakig sang Ginoo mapalayo sa Israel.”

5Kag si Moises nagsiling sa mga hukom sang Israel, “Patyon sang tagsatagsa sa inyo ang iya mga tawo nga nagsimpon kay Baal-peor.”

6Kag yari karon, isa sang katawohan sang Israel nag-abut kag nagdala sing isa ka Madianhon nga babayi sa iya mga utud, sa itololok ni Moises kag sa itololok sang bug-os nga katilingban sang katawohan sang Israel, samtang nga nagahibi sila sa ganhaan sang layanglayang nga tiliponan.

7Sang nakit-an ini ni Finees nga anak ni Eleazar, nga anak ni Aaron nga sacerdote, nagtindug sia gikan sa tunga sang katilingban, kag nag-uyat sing bangkaw

8kag nagsonod sia sa lalaking Israelnon pasulud sa layanglayang, kag ginpalapsan sila nga duha, ang lalaki nga Israelnon kag ang babayi, paagi sa lawas sang babayi. Sa amo nagtonong ang kamatay sa katawohan sang Israel.

9Walay sapayan sila nga napatay sa kamatay duha ka pulo kag apat ka libo.

10Kag ang Ginoo nagsiling kay Moises,

11“Si Finees nga anak ni Eleazar, nga anak ni Aaron nga sacerdote, nagpapalayo sang akon kasingkal gikan sa katawohan sang Israel, nga may kaimon sia sang akon kaimon sa tunga nila, sa bagay nga wala ko pagpapasa sa akon kaimon ang katawohan sang Israel.

12Busa isiling, ‘Yari karon, ginahatag ko sa iya ang akon katipan sang paghidait;

13kag ini manginsa iya, kag sa iya mga kaliwatan sa olihi niya, ang katipan sang pagkasacerdote nga dayon, bangud nga maimon sia tungud sa iya Dios, kag naghimo sing katumbasan tungud sa katawohan sang Israel.’”

14Ang ngalan sang lalaki sa Israel nga ginpatay, nga ginpatay upud sa babayi nga Madianhon, si Zimri nga anak ni Salu, principe sang isa ka baranggay sa tunga sang mga Simeonhon.

15Kag ang ngalan sang babayi nga Madianhon nga ginpatay si Cozbi nga anak ni Zur, ang pangolo sang katawohan sang isa ka baranggay sa Madian.

16Kag ang Ginoo nagsiling kay Moises,

17“Tublaga ang mga Madianhon, kag laglaga sila;

18kay gintublag kamo nila sang ila mga pagdaya, nga tungud sa ila ginlimbongan nila kamo sa butang ni Peor, kag sa butang ni Cozbi, ang babaying anak sang principe sa Madian, nga utud nila, nga ginpatay sa adlaw sang kamatay sa butang ni Peor.”

← Chapter 24 Jump to: Chapter 26 →