Numbers 5

Ilonggo (Ang Biblia (1982))

← Chapter 4 Jump to: Chapter 6 →

1Ang Ginoo nagsiling kay Moises,

2“Sogoa ang katawohan sang Israel nga pagowaon nila gikan sa dologan ang tagsa ka aroon, kag ang tagsatagsa nga ginapanggowaan, kag ang bisan sin-o nga dimatinlo tungud sa patay;

3pagowaa ninyo sila tingub ang lalaki kag babayi, sa gowa sang dologan ibutang ninyo sila, agud nga indi nila madagtaan ang ila dologan, nga sa tunga nila nagapuyo ako.”

4Kag ginhimo ini sang katawohan sang Israel, kag ginpagowa sila sa gowa sang dologan; sono sa ginsiling sang Ginoo kay Moises, amo ini ang ginhimo sang katawohan sang Israel.

5Kag ang Ginoo nagsiling kay Moises,

6“Isiling sa katawohan sang Israel, Kon ang isa ka lalaki ukon babayi maghimo sing bisan ano nga sala nga ginahimo sang mga tawo sa paglapas sa Ginoo, kag ina nga tawo malinapason,

7itu-ad niya ang iya sala nga nahimo niya; kag mag-uli sia sing bug-os tungud sang iya pagkamalinapason, kag idugang sa sini ang ikalima nga bahin sini, kag ihatag ini sa katahuran sa iya nga nalapasan niya.

8Apang kon ang tawo wala sing himata nga ulian tungud sang paglapas, ang pag-uli tungud sa paglapas nga ginahimo sa Ginoo mangin-iya sang sacerdote, luwas sang carnero nga lalaki sang katumbasan nga sa sini himoon ang katumbasan tungud sa iya.

9Kag ang tagsa ka halad-nga-binayaw sang tanan nga balaan nga mga butang sang katawohan sang Israel, nga gindala nila sa sacerdote, mangin-iya;

10kag ang pinakabalaan nga mga butang sang tagsa ka tawo mangin-iya; ang bisan ano nga ginahatag sang bisan sin-o nga tawo sa sacerdote mangin-iya ini.”

11Kag ang Ginoo nagsiling kay Moises,

12“Isiling sa katawohan sang Israel, Kon ang asawa sang isa ka lalaki maglipas kag maglapas batok sa iya,

13kon ang isa ka tawo maghulid sa pagpakighilawas sa iya, kag malipnan ini sa mga mata sang iya bana, kag malikman bisan sia madagtaan, kag wala sing saksi batok sa iya, sanglit sia wala madakpi sa buhat;

14kag mag-abut sa bana ang espiritu sang kaimon, kag mangimon sia sa iya asawa nga nadagtaan sia; ukon kon mag-abut sa iya ang espiritu sang kaimon, kag mangimon sia sa iya asawa, bisan sia wala madagtai;

15niyan ang lalaki magdala sang iya asawa sa sacerdote, kag magdala sang iya halad tungud sa iya, ang ikapulo nga bahin sang isa ka efa nga harina sang cebada; dili niya pagboboan sing lana ini kag dili pagbutangan sing incienso, kay halad-nga-kalan-on ini sang kaimon, halad-nga-kalan-on nga handumanan, nga nagapapahanumdum sang kalautan.

16“Kag papalapiton sang sacerdote ang asawa, kag ipahamtang sia sa atubangan sang Ginoo;

17kag magkuha ang sacerdote sang tubig nga balaan sa suludlan nga daga, kag magkuha sang yab-ok nga yara sa salog sang kayangkayang kag ibutang ini sa tubig.

18Kag ipahamtang sang sacerdote ang babayi sa atubangan sang Ginoo, kag bunghayon niya ang bohok sa olo sang babayi, kag ibutang sa iya mga kamut ang halad-nga-kalan-on nga handumanan sang kaimon. Kag dira sa kamut sang sacerdote ang tubig sang kapaitan nga nagahikot sang pagpakamalaut.

19Niyan ang sacerdote magpasumpa sang babayi, nga nagasiling, ‘Kon wala sing lalaki nga nakahulid sa imo, kag kon wala ka maglipas sa pagkadimatinlo, samtang nga yara ka sa gahum sang imo bana, manginhilway ka sa sining tubig sang kapaitan nga nagahikot sang pagpakamalaut.

20Apang kon nakalipas ka, bisan nga yara ka sa gahum sang imo bana, kag kon nadagtaan ka, kag ang iban nga lalaki naghulid sa imo luwas sang imo bana,

21niyan’ (ang sacerdote magpasumpa sang babayi sa sumpa sang pagpakamalaut, kag magsiling sa babayi) ‘himoon ka sang Ginoo nga pagpakamalaut kag sumpa sa tunga sang imo katawohan, kon paituson sang Ginoo ang imo paa kag pahabokon ang imo lawas;

22kabay nga ining tubig nga nagahikot sang pagpakamalaut magasulud sa imo kasudlan kag magapahabok sang imo lawas kag magapaitus sang imo paa.’ Kag ang babayi magasiling, ‘Kabay pa, Kabay pa.’

23“Niyan isulat sang sacerdote sa tolon-an ining mga pagpakamalaut, kag panason niya ini sa tubig sang kapaitan;

24kag ipainum niya sa babayi ang tubig sang kapaitan nga nagahikot sang pagpakamalaut, kag ang tubig nga nagahikot sang pagpakamalaut magasulud sa iya kag manginmapait.

25Kag kuhaon sang sacerdote sa kamut sang babayi ang halad-nga-kalan-on sang kaimon, kag habogon ang halad-nga-kalan-on sa atubangan sang Ginoo kag dalhon ini sa halaran;

26kag ang sacerdote magkuha sing isa ka tapnay sa halad-nga-kalan-on, nga handumanan sa sini, kag sonogon ini sa halaran, kag ugaling ipainum niya sa babayi ang tubig.

27Kag sang mapainum na niya sia sing tubig, niyan, kon sia nadagtaan kag naghimo sing paglapas batok sa iya bana, ang tubig nga nagahikot sang pagpakamalaut magasulud sa iya kag manginmapait, kag magahabok ang iya lawas, kag magaitus ang iya paa, kag ang babayi manginpinakamalaut sa tunga sang iya katawohan.

28Apang kon ang babayi wala madagtai kondi matinlo, niyan mahilway sia kag magapanamkon sing kaliwat.

29“Amo ini ang kasogoan sang kaimon, kon ang asawa, nga yara sa gahum sang iya bana, maglipas kag madagtaan,

30ukon kon mag-abut sa lalaki ang espiritu sang kaimon kag mangimon sia sa iya asawa; niyan ipahamtang niya ang babayi sa atubangan sang Ginoo, kag hikuton sa iya sang sacerdote ini nga bug-os nga kasogoan.

31Ang lalaki mahilway sa kalautan, apang inang babayi magaantus sang iya kalautan.”

← Chapter 4 Jump to: Chapter 6 →