Numbers 32

Ilonggo (Ang Biblia (1982))

← Chapter 31 Jump to: Chapter 33 →

1Karon ang mga anak ni Ruben kag ang mga anak ni Gad may tama kadaku gid nga kadam-an sang kahayupan; kag nakita nila ang duta sang Jazer kag ang duta sang Galaad, kag yari karon, ang duug bagay sa kahayupan.

2Gani nagkadto ang mga anak ni Gad kag ang mga anak ni Ruben kag nagsiling kay Moises kag kay Eleazar nga sacerdote kag sa mga principe sang katilingban,

3“Ang Atarot, Dibon, Jazer, Nimra, Hesbon, Eleale, Sebam, Nebo, kag Beon,

4ang duta nga ginlaglag sang Ginoo sa atubangan sang katilingban sang Israel, duta nga sa kahayupan; kag ang imo mga alagad may kahayupan.”

5Kag nagsiling sila, “Kon nakapahamuut kami sa imo itololok, ihatag ining duta nga panag-iyahan sang imo mga alagad; dili kami pagdalha sa tabok sang Jordan.”

6Apang si Moises nagsiling sa mga anak ni Gad kag sa mga anak ni Ruben, “Magakadto bala ang inyo mga utud sa inaway samtang kamo magalingkod diri?

7Ngaa bala nga ginapatalaw ninyo ang tagiposoon sang katawohan sang Israel sa pagtabok pasulud sa duta nga ginhatag sang Ginoo sa ila?

8Amo ini ang ginhimo sang inyo mga ginikanan, sang ginpadala ko sila kutub sa Cades-barnea sa pagtan-aw sang duta.

9Kay sang nakataklad sila sa Nalupyakan sang Escol, kag nakakita sang duta, ginpatalaw nila ang tagiposon sang katawohan sang Israel nga indi sila magsulud sa duta nga nahatag sa ila sang Ginoo.

10Kag ang kaakig sang Ginoo nagdabdab sadtong adlaw, kag nagsumpa sia, nga nagasiling,

11‘Sa pagkamatuud wala sing bisan sin-o sang mga tawo nga nagtaklad gikan sa Egipto, kutub sa duha ka pulo ka tuig kag pa ibabaw, nga makakita sang duta nga ginsumpa ko kay Abraham, kay Isaac, kag kay Jacob, bangud nga wala sila magsonod sing bug-os sa akon;

12luwas si Caleb nga anak ni Jefone nga Cenisnon kag si Josue nga anak ni Nun, bangud nga nagsonod sila sing bug-os sa Ginoo.’

13Kag ang kaakig sang Ginoo nagdabdab batok sa Israel, kag ginpadalangdalang niya sila sa kamingawan sing kap-atan ka tuig, tubtub nga napapas ang bug-os nga kaliwatan nga naghimo sing malaut sa itololok sang Ginoo.

14Kag yari karon, nagabangon kamo nga tal-us sa inyo mga ginikanan, nga dugang sang makasasala nga mga tawo, sa pagdugang pa sang masingkal nga kaakig sang Ginoo batok sa Israel!

15Kay kon kamo magtalikod sa olihi niya, magabiya pa sia liwat sa ila sa kamingawan; kag kamo magalaglag sining bug-os nga katawohan.”

16Niyan nagpalapit sila sa iya, kag nagsiling, “Magapatindug kami diri sing mga palasudlan sa amon kahayupan, kag kabanwaanan nga sa amon mga magamay,

17apang kami amon manginhanda nga lupit sa hinganiban, sa pag-una sa katawohan sang Israel, tubtub nga mapasulud namon sila sa ila duug; kag ang amon mga magamay magapuyo sa kabanwaanan nga napamakuran bangud sang mga pamuluyo sang duta.

18Indi kami magpauli sa amon mga balay tubtub nga ang katawohan sang Israel makapanubli ang tagsa ka tawo sang iya panublion.

19Kay indi kami magpanubli upud sa ila sa tabok sang Jordan kag sa unhan; kay ang amon panublion naigo sa amon sa sining pihak sang Jordan nayon sa sidlangan.”

20Gani si Moises nagsiling sa ila, “Kon himoon ninyo ining butang, kon maglupit kamo sa hinganiban sa pag-una sa atubangan sang Ginoo sa inaway,

21kag ang tagsa ka tawo sa inyo nga lupit sa hinganiban magtabok sa Jordan sa atubangan sang Ginoo, tubtub nga masobol niya ang iya mga kaaway gikan sa atubangan niya

22kag madaug ang duta sa atubangan sang Ginoo; niyan sa tapus sini magpauli kamo kag mangindimalinapason sa Ginoo kag sa Israel; kag ining duta mangin-inyo kaugalingon sa atubangan sang Ginoo.

23Apang kon indi ninyo paghimoon ang subong sini, yari karon, nakasala kamo batok sa Ginoo; kag saligan ninyo nga ang inyo sala magasapo sa inyo.

24Patindug kamo sing kabanwaanan nga sa inyo mga magamay, kag mga palasudlan nga sa inyo mga carnero; kag himoa ninyo ang naggowa sa inyo baba.”

25Kag ang mga anak ni Gad kag ang mga anak ni Ruben nagsiling kay Moises, “Ang imo mga alagad magahimo sono sa ginasogo sang akon ginoo.

26Ang amon mga magamay, ang amon mga asawa, ang amon mga panong, kag ang tanan namon nga kahayupan, mangindidto sa kabanwaanan sang Galaad;

27apang ang imo mga alagad magatabok, ang tagsa ka tawo nga lupit sa hinganiban sa inaway, sa atubangan sang Ginoo sa pag-awayan, sono sa ginasiling sang akon ginoo.”

28Gani si Moises nagtulin nahanungud sa ila kay Eleazar nga sacerdote, kag kay Josue nga anak ni Nun, kag sa mga pangolo sang mga kabaranggayan sang mga kabikahan sang katawohan sang Israel.

29Kag si Moises nagsiling sa ila, “Kon ang mga anak ni Gad kag ang mga anak ni Ruben magtabok upud sa inyo sa Jordan, ang tagsa ka tawo nga lupit sa hinganiban nga sa pag-awayan sa atubangan sang Ginoo, kag ang duta madaug sa atubangan ninyo, niyan ihatag ninyo sa ila nga panag-iyahan ang duta sang Galaad;

30apang kon indi sila magtabok nga lupit sa hinganiban upud sa inyo, magabaton sila sing pagkabutang sa tunga ninyo sa duta sang Canaan.”

31Kag ang mga anak ni Gad kag ang mga anak ni Ruben nagsabat, “Sono sa ginsiling sang Ginoo sa imo mga alagad, amo ang himoon namon.

32Magatabok kami nga lupit sa hinganiban sa atubangan sang Ginoo pasulud sa duta sang Canaan, kag ang kaugalingon namon nga panublion magapabilin sa amon sa tabok sang Jordan.”

33Kag ginhatag ni Moises sa ila, sa mga anak ni Gad kag sa mga anak ni Ruben kag sa katunga sang kabikahan ni Manases nga anak ni Jose, ang ginharian ni Sihon nga hari sang mga Amornon kag ang ginharian ni Og nga hari sang Basan, ang duta sono sa iya kabanwaanan pati ang ila mga ginsakpan, ang kabanwaanan sang duta sa palibut.

34Kag ginpatindug sang mga anak ni Gad ang Dibon, ang Atarot, ang Aroer,

35ang Atrot-sofan, ang Jazer, ang Jogbeha,

36ang Bet-nimra kag ang Bet-haran, mga banwa nga napamakuran, kag mga palasudlan sang mga carnero.

37Kag ginpatindug sang mga anak ni Ruben ang Hesbon, kag ang Eleale, ang Kiryataim,

38ang Nebo, kag ang Baal-meon (gin-ilisan ang ila mga ngalan), kag ang Sibma; kag ginbutangan nila sing iban nga mga ngalan ang mga banwa nga ila ginpatindug.

39Kag ang mga anak ni Maquir nga anak ni Manases nagkadto sa Galaad kag nag-agaw sini, kag nagsobol sang mga Amornon nga yadto didto.

40Kag ginhatag ni Moises ang Galaad kay Maquir nga anak ni Manases, kag nagpuyo sia didto.

41Kag si Jair nga anak ni Manases nagkadto kag nag-agaw sang ila mga minoro, kag ginhingalanan sila nga Havot-jair.

42Kag si Noba nagkadto kag nag-agaw sang Kenat kag sang iya mga ginsakpan, kag ginhingalanan ini nga Noba, sono sa iya ngalan.

← Chapter 31 Jump to: Chapter 33 →