Numbers 4 — Ilonggo (Ang Biblia (1982))

1Ang Ginoo nagsiling kay Moises kag kay Aaron,

2“Isipa ang kadamuon sang mga anak ni Coat gikan sa tunga sang mga anak ni Levi, sono sa ila mga panimalay, sono sa ila mga kabaranggayan,

3kutub sa katloan ka tuig kag pa ibabaw tubtub sa kalim-an ka tuig, ang tanan nga nagasulud sa pag-alagdan, sa paghimo sang buluhaton sa layanglayang nga tiliponan.

4Amo ini ang pag-alagdan sang mga anak ni Coat sa layanglayang nga tiliponan: nahanungud sa labi gid kabalaan nga mga butang.

5Kon magtaliwan ang dologan, magsulud si Aaron kag ang iya mga anak kag magpalus sila sang kumbung sang bungbung, kag tabonan sini ang kaban sang pagpamatuud;

6niyan taklapan ini sing mga panit sang kanding, kag taklapan sing panapton nga pulus asul, kag goloan sang iya mga yayongan.

7Kag sa ibabaw sang latok sang tinapay nga pahayag ihumlad nila ang panapton nga asul, kag ibutang sa iya ang mga pinggan, ang mga luwag, ang mga yahong, kag ang mga saro nga inugbobo; ang tinapay nga dalayon sa ibabaw sini;

8niyan humlaran nila sa ibabaw nila sang panapton nga escarlata, kag taklapan ini sang panit sang kanding, kag goloan sang iya mga yayongan.

9Kag magkuha sila sing panapton nga asul, kag taklapan nila ang candelero sang kapawa, ang iya mga suga, ang iya mga inugpapalong, ang iya mga yahongyahong, kag ang tanan niya nga suludlan sang lana nga ginagamit sa pag-alagad sa sini:

10kag ibutang nila ini pati ang tanan niya nga gamit sa sulud sang tabon nga panit sang kanding kag ibutang ini sa ibabaw sang yayongan.

11Kag sa ibabaw sang halaran nga bulawan ihumlad nila ang panapton nga asul, kag taklapan ini sing panit sang kanding, kag goloan sang iya mga yayongan;

12kag kuhaon nila ang tanan nga gamit sang pag-alagdan nga ila ginagamit sa pag-alagad sa santuario, kag isulud sila sa panapton nga asul, kag taklapan sila sing panit sang kanding, kag ibutang sila sa ibabaw sang yayongan.

13Kag kuhaan nila sing mga abo ang halaran, kag ihumlad sa ibabaw niya ang panapton nga purpura;

14kag ibutang nila sa ibabaw sini ang tanan nga gamit nga ila ginagamit sa pag-alagdan sa sini, ang mga bagahan, ang mga kaw-it sa unud, ang mga pala, kag ang mga batiya, ang tanan nga gamit sang halaran; kag taklapan ini sing panit sang kanding, kag goloan sang iya mga yayongan.

15Kag kon si Aaron kag ang iya mga anak makatapus sa pagputus sang santuario kag sang tanan nga kasangkapan sang santuario, sa buut na mataliwan ang dologan, sa tapus sina magpalapit ang mga anak ni Coat sa pagdala sini, apang dili sila magtandug sang santuario, basi nga mapatay sila. Ini nga mga butang amo ang lulan sang mga anak ni Coat sa layanglayang nga tiliponan.

16“Kag ang talatapon ni Eleazar nga anak ni Aaron nga sacerdote amo ang lana nga sa suga, ang maamyon nga incienso, ang dalayon nga halad-nga-kalan-on, kag ang lana nga ihalaplas, ang talatapon sang bug-os nga kayangkayang kag sang tanan nga yara sa sini, ang santuario kag ang iya mga kasangkapan.”

17Ang Ginoo nagsiling kay Moises kag kay Aaron,

18“Dili ninyo pag-utdon ang kabikahan sang mga panimalay sang mga Coatnon sa tunga sang mga Levinhon;

19kondi amo ini ang himoon ninyo sa ila, agud nga mabuhi sila kag indi mapatay kon magpalapit sila sa labi gid ka balaan nga mga butang: si Aaron kag ang iya mga anak magsulud kag magtangdo sang tagsatagsa sa ila sa iya pag-alagdan kag sa iya lulan,

20apang dili sila magsulud sa pagtan-aw bisan sa diotay nga tion sang santuario, basi mapatay sila.”

21Ang Ginoo nagsiling kay Moises,

22“Isipa man ang mga anak nga lalaki ni Gerson, sono sa ila mga kabaranggayan, sono sa ila mga panimalay;

23kutub sa katloan ka tuig kag pa ibabaw tubtub sa kalim-an ka tuig isipon mo sila, ang tanan nga nagasulud sa pag-alagdan, sa paghimo sang buluhaton sa layanglayang nga tiliponan.

24Amo ini ang pag-alagdan sang mga panimalay sang mga Gersonhon, sa pag-alagad kag sa pagdala sang mga lulan:

25magdala sila sang mga kumbung sang kayangkayang, kag sang layanglayang nga tiliponan lakip ang iya atop, kag sang taklap nga panit sang carnero nga yara sa ibabaw sini, kag sang lipon nga sa ganhaan sang layanglayang nga tiliponan,

26kag sang mga bungbung sang luwang, kag sang lipon nga sa ganhaan sang gawang sang luwang nga yara sa luyo sang kayangkayang kag sa luyo sang halaran sa palibut, kag sang ila mga banting, kag sang tanan nga gamit sa ila pag-alagdan; kag sang bisan ano nga himoon sa ila didto sa sulud mag-alagad sila.

27Sa sogo ni Aaron kag sang iya mga anak mangin-amo ang tanan nga pag-alagdan sang mga anak sang mga Gersonhon, sa tanan nila nga lulan, kag sa tanan nila nga pag-alagdan; kag itangdo ninyo sa ila nga natulinan ang tanan nga ila lulan.

28Amo ini ang pag-alagdan sang mga panimalay sang mga anak sang mga Gersonhon sa layanglayang nga tiliponan, kag ang tinulin sa ila yara sa idalum sang kamut ni Itamar nga anak ni Aaron nga sacerdote.

29“Nahanungud sa mga anak ni Merari, isipon mo sila sono sa ila panimalay, sono sa ila mga kabaranggayan;

30kutub sa katloan ka tuig kag pa ibabaw tubtub sa kalim-an ka tuig, isipon mo sila, ang tagsatagsa nga nagasulud sa pag-alagdan, sa paghimo sang buluhaton sang layanglayang nga tiliponan.

31Kag ini amo ang tinulin sang ila lulan, sono sa tanan nila nga pag-alagdan sa layanglayang nga tiliponan: ang mga tapi sang kayangkayang, ang mga balabag sini, ang mga haligi sini, kag ang mga boho nga palatindugan sini,

32kag ang mga haligi sang luwang palibut, ang ila mga boho nga palatindugan, ang ila mga palpal, kag ang ila mga banting, pati ang tanan nila nga gamit kag pati ang bug-os nila nga pag-alagdan; kag tungud sa ngalan isipon ninyo ang mga gamit nga tinulin sa ila lulan.

33Ini amo ang pag-alagdan sang mga panimalay sang mga anak ni Merari, sono sa bug-os nila nga pag-alagdan sa layanglayang nga tiliponan, sa idalum sang kamut ni Itamar nga anak ni Aaron nga sacerdote.”

34Kag si Moises kag si Aaron kag ang mga principe sang katilingban nag-isip sang mga anak sang mga Coatnon sono sa ila mga panimalay kag sono sa ila mga kabaranggayan,

35kutub sa katloan ka tuig kag pa ibabaw tubtub sa kalim-an ka tuig, ang tagsatagsa nga nagsulud sa pag-alagdan, sa buluhaton sa layanglayang nga tiliponan;

36kag ang naisipan sa ila sono sa ila mga panimalay duha ka libo kag pito ka gatus kag kalim-an.

37Ini sila amo ang naisipan sa mga panimalay sang mga Coatnon, ang tanan nga nag-alagad sa layanglayang nga tiliponan, nga gin-isip ni Moises kag ni Aaron sono sa sogo sang Ginoo paagi kay Moises.

38Kag ang naisipan sang mga anak ni Gerson, ang ila mga panimalay kag sono sa ila mga kabaranggayan,

39kutub sa katloan ka tuig kag pa ibabaw tubtub sa kalim-an ka tuig, ang tagsatagsa nga nagsulud sa pag-alagdan sa buluhaton sa layanglayang nga tiliponan—

40ang naisipan sa ila sono sa ila mga panimalay kag sono sa ila mga kabaranggayan duha ka libo kag anum ka gatus kag katloan.

41Ini sila amo ang naisipan sang mga panimalay sang mga anak ni Gerson, ang tanan nga nag-alagad sa layanglayang nga tiliponan, nga gin-isip ni Moises kag ni Aaron sono sa sogo sang Ginoo.

42Ang naisipan sang mga panimalay sang mga anak ni Merari kag sono sa ila mga panimalay, sono sa ila mga kabaranggayan,

43kutub sa katloan ka tuig kag pa ibabaw tubtub sa kalim-an ka tuig, ang tagsatagsa nga nagsulud sa pag-alagdan, sa buluhaton sa layanglayang nga tiliponan—

44ang naisipan sa ila sono sa ila mga panimalay tatlo ka libo kag duha ka gatus.

45Ini sila amo ang naisipan sa mga panimalay sang mga anak ni Merari, nga gin-isip ni Moises kag ni Aaron sono sa sogo sang Ginoo paagi kay Moises.

46Ang tanan nga naisipan sang mga Levinhon, nga gin-isip ni Moises kag ni Aaron kag sang mga principe sang Israel, sono sa ila mga panimalay kag sono sa ila mga kabaranggayan,

47kutub sa katloan ka tuig kag pa ibabaw tubtub sa kalim-an ka tuig, ang tagsatagsa nga nagsulud sa paghimo sang buluhaton sang pag-alagdan kag sang buluhaton sang pagdala sang mga lulan sa layanglayang nga tiliponan,

48ang naisipan sa ila walo ka libo kag lima ka gatus kag kawaloan.

49Sono sa sogo sang Ginoo gin-isip sila ni Moises, ang tagsatagsa sono sa iya pag-alagdan ukon lulan; sa amo gin-isip sila niya, subong sa ginsogo sang Ginoo kay Moises.