Numbers 23

Ilonggo (Ang Biblia (1982))

← Chapter 22 Jump to: Chapter 24 →

1Kag si Balaam nagsiling kay Balac, “Patindugi ako diri sing pito ka halaran, kag amani ako diri sing pito ka tinday nga baka nga lalaki kag pito ka carnero nga lalaki.”

2Naghimo si Balac sono sa ginpamolong sa iya ni Balaam; kag si Balac kag si Balaam nagdolot sing isa ka tinday nga baka nga lalaki kag isa ka carnero nga lalaki sa tagsa ka halaran.

3Kag si Balaam nagsiling kay Balac, “Tindug ka sa luyo sang imo halad-nga-sinonog, kag ako magalakat; ayhan ang Ginoo magapakigkita sa akon; kag ang bisan ano nga ipahayag niya sa akon isugid ko sa imo.” Kag nagkadto sia sa kataasan.

4Kag nagsugata ang Dios kay Balaam; kag nagsiling sia sa iya, “Naaman ko na ang pito ka halaran, kag sa tagsa ka halaran nagdolot ako sing isa ka tinday nga baka nga lalaki kag isa ka carnero nga lalaki.”

5Kag ang Ginoo nagbutang sing polong sa baba ni Balaam, kag nagsiling, “Balik ka kay Balac, kag amo ini ang imo ipamolong.”

6Kag nagbalik sia sa iya, kag yari karon, nagatindug sia sa luyo sang iya halad-nga-sinonog, sia kag ang tanan nga principe sang Moab.

7Kag si Balaam naggamit sang iya paanggid, kag nagsiling, “Gikan sa Aram gindala ako ni Balac, ang hari sang Moab gikan sa kabukiran sang Sidlangan: ‘Kari, ipanghimalaut ako kay Jacob, kag kari, tagudilii ang Israel!’

8Paano bala ang pagpakamalaut ko sang wala pagpakamalauta sang Dios? Paano bala ang pagtagudili ko sang wala pagtagudilii sang Ginoo?

9Kay kutub sa putokputokan sang mga igang nakita ko sia, kutub sa kabakoloran ginatolok ko sia; yari karon, sia katawohan nga nagapuyo sing isa lamang, kag indi pag-isipon sa tunga sang kapungsuran!

10Sin-o bala ang makaisip sang yab-ok ni Jacob, ukon makaisip sang ikap-at nga bahin sang Israel? Pakamatya ako sang kamatayon sang matarung, kag ang akon katapusan manginsubong sang sa iya!”

11Kag si Balac nagsiling kay Balaam, “Ano bala ang nahimo mo sa akon? Ginkuha ko ikaw sa pagpakamalaut sang akon mga kaaway, kag yari karon, ginpakamaayo mo sila tapat.”

12Kag sia nagsabat, “Indi bala ako dapat magsapak sa pagpamolong sang ginabutang sang Ginoo sa akon baba?”

13Kag si Balac nagsiling sa iya, “Upud ka sa akon sa isa pa ka duug, nga kutub didto makita mo sila; makita mo lamang ang nahigad gid nga bahin nila, kag indi makakita sa ila tanan; niyan kutub didto ipanghimalaut ako sa ila.”

14Kag gindala sia niya sa latagon sang Zofim, sa putokputokan sang Pisga, kag nagpatindug sing pito ka halaran kag naghalad sing isa ka tinday nga baka nga lalaki kag isa ka carnero nga lalaki sa tagsa ka halaran.

15Si Balaam nagsiling kay Balac, “Tindug ka diri sa luyo sang imo halad-nga-sinonog, samtang ako nagapakigkita sa Ginoo sa unhan.”

16Kag ang Ginoo nagpakigkita kay Balaam, kag nagbutang sing polong sa iya baba, kag nagsiling, “Balik ka kay Balac, kag amo ini ang ipamolong mo.”

17Kag si Balaam nag-abut sa iya, kag, yari karon, nagatindug sia sa luyo sang iya halad-nga-sinonog, kag upud sa iya ang mga principe sang Moab. Kag si Balac nagsiling sa iya, “Ano bala ang napamolong sang Ginoo?”

18Kag si Balaam naggamit sang iya paanggid, kag nagsiling, “Tindug ka, Balac kag magpamati; dungga ako, O anak ni Zipor:

19ang Dios indi tawo, nga magbutig sia, ukon anak sang tawo, nga maghinulsul sia. Nasiling bala niya, kag indi niya paghimoon? Ukon napamolong bala niya, kag indi niya pagtumanon?

20Yari karon, ako nakabaton sing sogo sa pagpakamaayo: sia nakapakamaayo, kag ako indi makabaliskad sini.

21Wala sia makakita sing kalautan kay Jacob; ukon sia makakita sing kabalingag kay Israel. Ang Ginoo nga ila Dios upud sa ila, kag ang singgit sang hari yara sa tunga nila.

22Ginapagowa sila sang Dios sa Egipto; may kakusug sia sang baka nga talonon.

23Kay walay babaylan batok kay Jacob, walay bisan ano nga pagpamakot kay Israel; karon igasiling nahanungud kay Jacob kag kay Israel, ‘Daw ano ang nahimo sang Dios!’

24Yari karon, ang katawohan! Nagabangon subong sang leon nga babayi kag subong sang leon nagatukhayaw sia; indi sia magluko tubtub nga makaon niya ang tinukub, kag mainum ang dugo sang pinatay.”

25Kag si Balac nagsiling kay Balaam, “Dili na sila pagpakamalauta, ukon pagpakamaayoha.”

26Apang si Balaam nagsabat kay Balac, “Wala bala ako magsugid sa imo, ‘Ang tanan nga ginapamolong sang Ginoo, ina himoon ko gid’?”

27Kag si Balac nagsiling kay Balaam, “Kari karon, dalhon ko ikaw sa iban nga duug; ayhan mahamuut ang Dios nga mapakamalaut mo sila tungud sa akon gikan didto.”

28Gani gindala ni Balac si Balaam sa putokputokan sang Peor, nga nagatamud sa desierto.

29Kag si Balaam nagsiling kay Balac, “Patindugi ako diri sing pito ka halaran, kag amani ako diri sing pito ka tinday nga baka nga lalaki kag pito ka carnero nga lalaki.”

30Kag ginhimo ni Balac sono sa nasiling ni Balaam, kag naghalad sing isa ka tinday nga baka nga lalaki kag isa ka carnero nga lalaki sa tagsa ka halaran.

← Chapter 22 Jump to: Chapter 24 →