Numbers 21

Ilonggo (Ang Biblia (1982))

← Chapter 20 Jump to: Chapter 22 →

1Sang nakabati ang Canaanhon, ang hari sang Arad, nga nagpuyo sa Bagatnan, nga ang Israel nag-abut paagi sa dalanon sang Atarim, nagpakig-away sia batok sa Israel, kag ginbihag ang iban sa ila.

2Kag ang Israel nagsaad sing saad sa Ginoo, kag nagsiling, “Kon sa pagkamatuud itugyan mo ini nga katawohan sa akon kamut, niyan laglagon ko sing bug-os ang ila kabanwaanan.”

3Kag ginpamatian sang Ginoo ang tingug sang Israel, kag gintugyan ang mga Canaanhon; kag ginlaglag nila sing bug-os sila kag ang ila kabanwaanan; gani ginhingalanan ang duug Horma.

4Nagpanlakatan sila kutub sa Bukid nga Hor paagi sa dalanon pakadto sa Dagat nga Mapula, sa paglibut sang duta sang Edom; kag gintalawan sing tama ang katawohan bangud sang dalanon.

5Kag ang katawohan nagpamolong batok sa Dios kag batok kay Moises, “Ngaa bala ginpataklad ninyo kami gikan sa Egipto agud nga mapatay sa kamingawan? Kay wala sing kalan-on kag wala sing tubig, kag ang amon kalag nasum-uran sini nga kalan-on nga talamayon.”

6Niyan ang Ginoo nagpadala sa katawohan sing mga man-ug nga dalitan, kag ginkagat nila ang katawohan, sa bagay nga napatay ang madamu nga katawohan sang Israel.

7Kag ang katawohan nagkadto kay Moises, kag nagsiling, “Nakasala kami, bangud nga nagpamolong kami batok sa Ginoo kag batok sa imo; ipangamuyo sa Ginoo, nga kuhaon niya sa amon ang mga man-ug.” Gani si Moises nagpangamuyo tungud sa katawohan.

8Kag ang Ginoo nagsiling kay Moises, “Himo ka sing man-ug nga dalitan, kag itakud ini sa ukbung sang tukon; kag ang tagsatagsa nga ginkagat, kon makakita sini, magakabuhi.”

9Gani si Moises naghimo sing man-ug nga saway, kag gintakud ini sa ukbung sang tukon; kag kon ang isa ka man-ug nakakagat sa bisan kay sin-o nga tawo, kon makatolok sia sa man-ug nga saway mabuhi sia.

10Kag ang katawohan sang Israel nagpanlakatan, kag nagpahamtang sing dologan sa Obot.

11Kag nagpanlakatan sila kutub sa Obot, kag nagpahamtang sing dologan sa Iye-abarim, sa kamingawan nga yara sa atubang sang Moab, nayon sa bulutlakan.

12Gikan didto nagpanlakatan sila, kag nagpahamtang sing dologan sa Nalupyakan sang Zared.

13Gikan didto nagpanlakatan sila, kag nagpahamtang sing dologan sa tabok sang Arnon, nga yara sa kamingawan, nga nagagowa sa dulunan sang mga Amornon; kay ang Arnon amo ang dulunan sang Moab, sa ulut sang Moab kag sang mga Amornon.

14Busa ginasiling sa Tolon-an sang Mga Inaway sang Ginoo, “Vaheb sa Sufa, kag ang mga nalupyakan sang Arnon,

15kag ang bakilid sang mga nalupyakan nga nagapadulhog nayon sa puluy-an sang Ar, kag nagasandig sa dulunan sang Moab.”

16Kag gikan didto nagpanlakatan sila pa Beer; nga amo ang bobon nga ginsiling sang Ginoo kay Moises, “Tipona ang katawohan sing tingub, kag hatagan ko sila sing tubig.”

17Niyan ang Israel nag-amba sini nga ambahanon: “Saka ka, O bobon!—Amba kamo sa iya!—

18ang bobon nga ginkutkut sang mga principe, nga ginpadalum sang mga dungganon sang katawohan, sa cetro kag sa ila mga sungkud.” Kag gikan sa kamingawan nagpanlakatan sila pakadto sa Matana,

19kag gikan sa Matana pakadto sa Nahaliel, kag gikan sa Nahaliel pakadto sa Bamot,

20kag gikan sa Bamot pakadto sa nalupyakan nga yara sa latagon sang Moab pakadto sa putokputokan sang Pisga nga nagatamud sa desierto.

21Niyan nagpadala ang Israel sing mga manugbalita kay Sihon nga hari sang mga Amornon, nga nagasiling,

22“Palaktura ako sa imo duta; indi kami maglipas sa latagon ukon sa ulubasan; indi kami mag-inum sang tubig sang mga bobon; magaagi kami sa Kalbangan sang Hari, tubtub nga makaligad kami sa imo dulunan.”

23Apang si Sihon indi magtugut nga ang Israel maglaktud sa iya dulunan. Gintipon sing tingub ni Sihon ang tanan niya nga katawohan, kag naggowa batok sa Israel sa kamingawan, kag nag-abut sa Jahaz, kag nagpakig-away sia batok sa Israel.

24Kag pinilas sia sang Israel sa sulab sang espada, kag nagtag-iya sang iya duta kutub sa Amon tubtub sa Jaboc, bisan tubtub sa duta sang mga anak ni Arnon; kay ang dulunan sang mga anak ni Amon malig-on.

25Kag gin-agaw sang Israel ini tanan nga banwa, kag nagpuyo ang Israel sa tanan nga banwa sang mga Amornon, sa Hesbon, kag sa tanan niya nga ginsakpan.

26Kay ang Hesbon banwa ni Sihon nga hari sang mga Amornon, nga nagpakigaway batok sa hari anay sang Moab kag nag-agaw sang bug-os niya nga duta gikan sa iya kamut, bisan tubtub sa Arnon.

27Busa ang mga nagahambal sa mga hulubaton nagasiling, “Kari kamo sa Hesbon, tukuron ini, lig-onon ang banwa ni Sihon.

28Kay ang kalayo naggowa sa Hesbon, isa ka dabdab gikan sa banwa ni Sihon, Ini naglamon sang Ar sa Moab, ang mga ginoo sang mga duug nga mataas sang Arnon.

29Kailo ka, O Moab! Tapus ka na, O katawohan ni Cemos! Ginhatag niya ang iya mga anak nga lalaki subong nga mga laaslaas, kag ang iya mga anak nga babayi sa kabihagan, kay Sihon nga hari sang mga Amornon.

30Ginpana namon sila; ang Hesbon nawala tubtub gid sa Dibon, ginhapay namon bisan tubtub sa Nofa, nga nagalambut tubtub sa Medeba.”

31Sa sini nagpuyo ang Israel sa duta sang mga Amornon.

32Kag si Moises nagpadala sa paglampitaw sang Jazer; kag gin-agaw nila ang iya mga ginsakpan, kag ginsobol ang mga Amornon nga yadto didto.

33Niyan nagliso kag nagtaklad sila sa dalan sang Basan; kag si Og nga hari sang Basan naggowa sa pagsumpung sa ila, sia kag bug-os niya nga katawohan, sa pagpakig-away sa Edrei.

34Apang ang Ginoo nagsiling kay Moises, “Dili ka magkahadluk sa iya; kay gintugyan ko sia sa imo kamut, kag ang bug-os niya nga katawohan, kag ang iya duta; kag himoon mo sa iya subong sang ginhimo mo kay Sihon nga hari sang mga Amornon, nga nagpuyo sa Hesbon.”

35Gani ginpatay nila sia, kag ang iya mga anak nga lalaki, kag ang bug-os niya nga katawohan, tubtub nga wala sing nabilin sa iya; kag nagtag-iya sila sang iya duta.

← Chapter 20 Jump to: Chapter 22 →