Numbers 3

Ilonggo (Ang Biblia (1982))

← Chapter 2 Jump to: Chapter 4 →

1Ini sila amo ang mga kaliwatan ni Aaron kag ni Moises sang adlaw nga ang Ginoo nagpamolong kay Moises sa Bukid nga Sinai.

2Ini sila amo ang mga ngalan sang mga anak nga lalaki ni Aaron: si Nadab nga panganay, kag si Abiu, si Eleazar, kag si Itamar;

3ini sila amo ang mga ngalan sang mga anak ni Aaron, ang mga sacerdote nga hinaplas, nga ginhalad niya sa pag-alagad sa pagkasacerdote.

4Apang si Nadab kag si Abiu napatay sa atubangan sang Ginoo sang paghalad nila sang dibalaan nga kalayo sa atubangan sang Ginoo sa kamingawan sang Sinai; kag wala sila sing mga anak. Gani si Eleazar kag si Itamar nag-alagad sa pagkasacerdote sa atubangan ni Aaron nga ila amay.

5Kag ang Ginoo nagpamolong kay Moises,

6“Papalapita ang kabikahan ni Levi, kag paatubanga sila kay Aaron nga sacerdote, agud nga mag-alagad sila sa iya.

7Magtatap sila sang tinulin sa iya kag sang tinulin sang bug-os nga katilingban sa atubangan sang layanglayang nga tiliponan, sa paghimo sang pag-alagdan sang kayangkayang;

8tatapon nila ang tanan nga gamit sang layanglayang nga tiliponan, kag ang tinulin sang katawohan sang Israel sa paghimo sang pag-alagdan sang kayangkayang.

9Kag ihatag mo ang mga Levinhon kay Aaron kag sa iya mga anak nga lalaki; ginhatag sila sa iya sing bug-os gikan sa katawohan sang Israel.

10Kag itangdo mo si Aaron kag ang iya mga anak, kag magtatap sila sang ila pagkasacerdote; apang ang dumuloong nga nagapalapit, patyon sila.”

11Kag ang Ginoo nagsiling kay Moises,

12“Yari karon, ginkuha ko ang mga Levinhon sa tunga sang katawohan sang Israel sa baylo sang tanan nga panganay nga una maggowa sa taguangkan sa katawohan sang Israel. Mangin-akon ang mga Levinhon,

13kay ang tanan nga panganay akon; sang adlaw nga akon ginpatay ang tanan nga panganay sa duta sang Egipto, ginpakabalaan ko nga sa akon ang tanan nga panganay sa Israel, sa tawo kag sapat; akon sila: Ako amo ang Ginoo.”

14Kag ang Ginoo nagsiling kay Moises sa kamingawan sang Sinai.

15“Isipa ang mga anak ni Levi, sono sa ila mga kabaranggayan kag sono sa ila mga panimalay; isipon mo ang tagsa ka lalaki kutub sa isa ka bulan kag pa ibabaw.”

16Gani gin-isip sila ni Moises sono sa polong sang Ginoo, sono sa ginsogo sa iya.

17Kag ini sila amo ang mga anak nga lalaki ni Levi sono sa ila mga ngalan: si Gerson kag si Coat kag si Merari.

18Kag ini sila amo ang mga ngalan sang mga anak nga lalaki ni Gerson sono sa ila mga panimalay: si Libni kag si Simei.

19Kag ang mga anak nga lalaki ni Coat sono sa ila mga panimalay: si Amram, si Izhar, si Hebron, kag si Uziel.

20Kag ang mga anak nga lalaki ni Merari sono sa ila mga panimalay: si Mahali kag si Musi. Ini sila amo ang mga panimalay sang mga Levinhon, sono sa ila mga kabaranggayan.

21Gikan kay Gerson amo ang panimalay sang mga Libninhon kag ang panimalay sang mga Simeinhon; ini sila amo ang mga panimalay sang mga Gersonhon.

22Ang mga naisipan sa ila sono sa kadamuon sang tanan nga lalaki kutub sa isa ka bulan kag pa ibabaw pito ka libo kag lima ka gatus.

23Ang mga panimalay sang mga Gersonhon magpahamtang sing dologan sa likod sang kayangkayang nayon sa katundan,

24ang pangolo sang kabaranggayan sang mga Gersonhon amo si Eliasaf nga anak ni Lael.

25Kag ang tinulin sa mga anak ni Gerson sa layanglayang nga tiliponan amo ang kanyangkanyang, kag ang Layanglayang, ang iya taklap, ang iya lipon sa gawang sang layanglayang nga tiliponan,

26ang mga bungbung sang luwang, ang lipon sa ganhaan sang luwang nga sa luyo sang kayangkayang kag sa luyo sang halaran palibut, kag ang iya mga banting; ang tanan nga pag-alagdan nahanungud sini.

27Gikan kay Coat ang panimalay sang mga Amramnon, kag ang panimalay sang mga Izharnon, kag ang panimalay sang mga Hebronhon, kag ang panimalay sang mga Uzielnon; ini sila mga panimalay sang mga Coatnon.

28Sono sa kadamuon sang tanan nga lalaki, kutub sa isa ka bulan kag pa ibabaw, may walo ka libo kag anum ka gatus, nga nagatatap sang tinulin sang santuario.

29Ang mga panimalay sang mga anak nga lalaki ni Coat magpahamtang sing dologan sa kilid sang kayangkayang nayon sa bagatnan,

30ang pangolo sang kabaranggayan sang mga panimalay sang mga Coatnon amo si Elizafan nga anak ni Uziel.

31Kag ang tinulin sa ila amo ang kaban, ang latok, ang candelero, ang mga halaran, ang mga gamit sang santuario nga ginagamit nila sa pag-alagad, kag ang lipon; kag ang tanan nga pag-alagdan nahanungud sini.

32Kag ang puno sang mga principe sang mga Levinhon amo si Eleazar nga anak ni Aaron nga sacerdote, kag manugtatap sang mga nagatatap sang santuario.

33Gikan kay Merari amo ang panimalay sang mga Mahalinhon kag ang panimalay sang mga Musinhon: ini sila amo ang mga panimalay ni Merari.

34Ang naisipan sa ila sono sa kadamuon sang tanan nga lalaki kutub sa isa ka bulan kag pa ibabaw anum ka libo kag duha ka gatus.

35Kag ang principe sang kabaranggayan sang panimalay ni Merari amo si Zuriel nga anak ni Abihail; magpahamtang sila sing dologan sa kilid sang kayangkayang nayon sa aminhan.

36Kag ang tinangdo nga tinulin sa mga anak ni Merari amo ang mga tapi sang kayangkayang, ang iya mga balabag, ang iya mga haligi, ang iya mga boho nga palatindugan, kag ang tanan niya nga gamit; ang bug-os nga pag-alagdan nahanungud sini.

37Ang mga haligi man sa palibut sang luwang, ang ila mga boho nga palatindugan kag ang mga palpal kag ang mga banting.

38Kag ang mga nagapahamtang sing dologan sa atubangan sang kayangkayang nayon sa sidlangan, sa atubangan sang layanglayang nga tiliponan nayon sa bulutlakan sang adlaw, amo si Moises kag si Aaron kag ang iya mga anak, nga nagatatap sang santuario nga sa tinulin sang katawohan sang Israel; kag ang dumuloong nga nagapalapit patyon.

39Ang kabilogan sang mga naisipan sang mga Levinhon, nga gin-isip ni Moises kag ni Aaron sa sogo sang Ginoo, sono sa ila mga panimalay, ang tanan nga lalaki kutub sa isa ka bulan kag pa ibabaw, duha ka pulo kag duha ka libo.

40Kag ang Ginoo nagsiling kay Moises, “Isipa ang tanan nga panganay nga lalaki sang katawohan sang Israel kutub sa isa ka bulan kag pa ibabaw, kag kuhaa ang kadamuon sang ila mga ngalan.

41Kag kuhaon mo ang mga Levinhon nga sa akon—Ako amo ang Ginoo —sa baylo sang tanan nga panganay sa katawohan sang Israel, kag ang kahayupan sang mga Levinhon sa baylo sang tanan nga panganay sa kahayupan sang katawohan sang Israel.”

42Gani gin-isip ni Moises, sono sa ginsogo sang Ginoo sa iya, ang tanan nga panganay sa katawohan sang Israel.

43Kag ang tanan nga panganay nga lalaki, sono sa kadamuon sang mga ngalan, kutub sa isa ka bulan kag pa ibabaw nga naisipan duha ka pulo kag duha ka libo kag duha ka gatus kag kapitoan kag tatlo.

44Kag ang Ginoo nagsiling kay Moises,

45“Kuhaa ang mga Levinhon sa baylo sang tanan nga mga panganay sa katawohan sang Israel, kag ang kahayupan sang mga Levinhon sa baylo sang ila kahayupan; kag ang mga Levinhon mangin-akon: Ako amo ang Ginoo.

46Kag tungud sa gawad sang duha ka gatus kag kapitoan kag tatlo sang mga panganay sang katawohan sang Israel, nga labaw kag kapin sa kadamuon sang mga Levinhon,

47magkuha ka sing lima ka siclo tungud sa tagsa ka bilog; sono sa siclo sang santuario, ang siclo duha ka pulo ka gera,

48kag ihatag mo kay Aaron kag sa iya mga anak ang cuarta nga gawad sang puaki sa ila.”

49Gani ginkuha ni Moises ang cuarta nga gawad sang mga labaw kag kapin sa ila mga ginawad sang mga Levinhon;

50ginbaton niya ang cuarta gikan sa mga panganay sang katawohan sang Israel, isa ka libo kag tatlo ka gatus kag kan-uman kag lima ka siclo, sono sa siclo sang santuario;

51kag ang gawad nga cuarta ginhatag ni Moises kay Aaron kag sa iya mga anak, sono sa polong sang Ginoo, subong sa ginsogo sang Ginoo kay Moises.

← Chapter 2 Jump to: Chapter 4 →