Numbers 27

Ilonggo (Ang Biblia (1982))

← Chapter 26 Jump to: Chapter 28 →

1Niyan nagpalapit ang babayi nga mga anak ni Zelofehad nga anak nga lalaki ni Hefer, ang anak nga lalaki ni Galaad, ang anak nga lalaki ni Maquir, ang anak nga lalaki ni Manases, gikan sa mga panimalay ni Manases nga anak nga lalaki Jose. Ini sila amo ang mga ngalan sang iya mga anak nga babayi: si Mala, si Noa, si Hogla, si Milca, kag si Tirsa.

2Kag nagtindug sila sa atubangan ni Moises, kag ni Eleazar nga sacerdote, kag sa atubangan sang mga principe kag sang bug-os nga katilingban, sa ganhaan sang layanglayang nga tiliponan, nga nagasiling,

3“Ang amon amay napatay sa kamingawan; wala sia sa kabon sang mga nagtilipon batok sa Ginoo sa kabon ni Core, apang napatay sia sa iya kaugalingon nga sala; kag wala sia sing mga anak nga lalaki.

4Ngaa bala panason ang ngalan sang amon amay sa tunga sang iya panimalay, bangud bala nga wala sia sing anak nga lalaki? Hatagi kami sing panublion sa tunga sang mga utud nga lalaki sang amon amay.”

5Gindala ni Moises ang ila pangayo sa atubangan sang Ginoo.

6Kag ang Ginoo nagpamolong kay Moises,

7“Nagpamolong sing matarung ang babayi nga mga anak ni Zelofehad; hatagan mo sila sing kaugalingon nga panublion sa tunga sang mga utud sang ila amay kag ipaliton mo sa ila ang panublion sang ila amay.

8Kag ipamolong mo sa katawohan sang Israel, ‘Kon ang isa ka tawo mapatay, kag wala sing anak nga lalaki, niyan ipaliton ninyo ang iya panublion sa iya anak nga babayi.

9Kag kon wala sia sing anak nga babayi, niyan ihatag ninyo ang iya panublion sa iya mga utud.

10Kag kon wala sia sing mga utud, niyan ihatag ninyo ang iya panublion sa mga utud sang iya amay.

11Kag kon ang iya amay wala sing mga utud, niyan ihatag ninyo ang iya panublion sa iya himata nga madason sa iya sa iya panimalay, kag sia magatag-iya sini. Kag ini mangin-isa ka palatukuran kag pagsolondan sa katawohan sang Israel, sono sa ginsogo sang Ginoo kay Moises.’”

12Ang Ginoo nagsiling kay Moises, “Taklad ka sa sini nga bukid sang Abarim, kag lantawa ang duta nga ginhatag ko sa katawohan sang Israel.

13Kag kon makita mo ini, ikaw man isimpon sa imo katawohan, subong nga ginsimpon si Aaron nga imo utud nga lalaki,

14bangud nga nagmabinatoon kamo sa akon polong sa kamingawan sang Zin sa pagsuay sang katilingban, sa pagpakabalaan sa akon sa mga tubig sa atubangan sang mga mata nila.” (Ini sila amo ang mga tubig sang Meriba sa Cades sa kamingawan sang Zin.)

15Si Moises nagpamolong sa Ginoo,

16“Patangdoa ang Ginoo, ang Dios sang mga espiritu sang tanan nga unud, sing isa ka lalaki sa ibabaw sang katilingban,

17nga maggowa sa una nila kag magsulud sa una nila, kag magtuytuy sa ila pagowa kag magpasulud sa ila; agud nga ang katilingban sang Ginoo indi manginsubong sang mga carnero nga wala sing manugpahalab.”

18Kag ang Ginoo nagsiling kay Moises, “Kuhaa si Josue nga anak ni Nun, isa ka lalaki nga yara sa iya ang Espiritu, kag ipandong ang imo kamut sa iya;

19kag ibutang sia sa atubangan ni Eleazar nga sacerdote kag sa atubangan sang bug-os nga katilingban, kag tulinan sia sa ila itololok.

20Butangi sia sang imo kadungganan, agud nga ang bug-os nga katilingban sang katawohan sang Israel magtuman.

21Kag magatindug sia sa atubangan ni Eleazar nga sacerdote, nga magapakiana nga sa iya paagi sa paghukom sang Urim sa atubangan sang Ginoo; sa iya polong magagowa sila, kag sa iya polong magasulud sila, sia kag ang tanan nga katawohan sang Israel upud sa iya, bisan ang bug-os nga katilingban.”

22Kag ginhimo ni Moises sono sa ginsogo sang Ginoo sa iya; ginkuha niya si Josue, kag ginbutang sia sa atubangan ni Eleazar nga sacerdote kag sa atubangan sang bug-os nga katilingban,

23kag gintakdungan niya sia sang iya mga kamut kag gintulinan, sono sa pamolong sang Ginoo kay Moises.

← Chapter 26 Jump to: Chapter 28 →