Numbers 8

Ilonggo (Ang Biblia (1982))

← Chapter 7 Jump to: Chapter 9 →

1Karon ang Ginoo nagpamolong kay Moises,

2“Ipamolong kay Aaron, Kon magpahamtang ka sang mga suga, ang pito ka suga magbanaag sa atubangan sang candelero.”

3Kag ginhimo ni Aaron ang subong sini; ginpahamtang niya ang mga suga sa atubangan sang candelero, sono sa ginsogo sang Ginoo kay Moises.

4Kag amo ini ang pagbuhat sang candelero, bulawan nga sinalsal; kutub sa iya puno tubtub sa iya mga bulakbulak, sinalsal ini; sono sa huwaran nga ginpakita sang Ginoo kay Moises, subong sini ginhimo niya ang candelero.

5Kag ang Ginoo nagpamolong kay Moises,

6“Kuhaa ang mga Levinhon gikan sa tunga sang katawohan sang Israel, kag tinloi sila.

7Kag amo ini ang himoon mo sa ila, sa pagtinlo sa ila: iwisik sa ila ang tubig nga inugpaputli, kag kiskisan sila sa bug-os nila nga lawas, kag magpamunak sila sang ila mga panapton kag magpaninlo sila.

8Niyan magkuha sila sing isa ka tinday nga ka kag sang iya halad-nga-kalan-on nga harina nga mapino nga nasamoan sing lana, kag magkuha ka sing isa pa ka tinday nga baka nga sa halad-tungud-sa-sala.

9Kag dalhon mo ang mga Levinhon sa atubangan sang layanglayang nga tiliponan, kag tiponon mo ang bug-os nga katilingban sang katawohan sang Israel.

10Kon da-hon mo ang mga Levinhon sa atubangan sang Ginoo, ang katawohan sang Israel magpandong sang ila mga kamut sa mga Levinhon,

11kag si Aaron magdolot sang mga Levinhon sa atubangan sang Ginoo nga sa halad-nga-hinabog sa pahanungdan sang katawohan sang Israel, agud nga mangin-ila ang paghimo sang pag-alagdan sang Ginoo.

12Niyan ang mga Levinhon magbutang sang ila mga kamut sa mga olo sang mga tinday nga baka; kag idolot mo ang isa nga sa halad-tungud-sa-sala kag ang isa nga sa halad-nga-sinonog sa Ginoo, sa katumbasan tungud sa mga Levinhon.

13Kag paatubangon mo ang mga Levinhon kay Aaron kag sa iya mga anak, kag idolot sila nga sa halad-nga-hinabog sa Ginoo.

14“Amo ini ang pagpain mo sang mga Levinhon gikan sa katawohan sang Israel, kag mangin-akon ang mga Levinhon.

15Kag sa tapus sina magsulud ang mga Levinhon sa paghimo sang pag-alagdan sa layanglayang nga tiliponan, sang natinloan mo na sila kag nadolot sila nga sa halad-nga-hinabog.

16Kay sila ginhatag sa akon sing bug-os gikan sa katawohan sang Israel; ginkuha ko sila nga sa akon sa baylo sang tanan nga una maggowa sa taguangkan, bisan ang tanan nga panganay sang tanan nga katawohan sang Israel.

17Kay akon ang tanan nga panganay sang katawohan sang Israel, tingub ang tawo kag sapat; sa adlaw nga ginlaglag ko ang tanan nga panganay sa duta sang Egipto ginpakabalaan ko sila nga sa akon,

18kag ginkuha ko ang mga Levinhon sa baylo sang tanan nga panganay sang katawohan sang Israel.

19Kag nahatag ko subong nga dolot ang mga Levinhon kay Aaron kag sa iya mga anak gikan sa katawohan sang Israel, sa paghimo sang pag-alagdan tungud sa katawohan sang Israel sa layanglayang nga tiliponan, kag sa paghimo sing katumbasan sa katawohan sang Israel, agud nga wala sing kalalat-an sa tunga sang katawohan sang Israel kon ang katawohan sang Israel magpalapit sa santuario.”

20Amo ini ang ginhimo ni Moises kag ni Aaron kag sang bug-os nga katilingban sang katawohan sang Israel sa mga Levinhon; sono sa tanan nga ginsogo sang Ginoo kay Moises nahanungud sa mga Levinhon, amo ini ang ginhimo sa ila sang katawohan sang Israel.

21Kag ang mga Levinhon nagpaninlo sang ila kaugalingon gikan sa sala, kag nagpamunak sila sang ila mga panapton; kag gindolot sila ni Aaron nga halad-nga-hinabog sa atubangan sang Ginoo, kag si Aaron naghimo sing katumbasan tungud sa ila sa pagtinlo sa ila.

22Kag sa tapus sadto nagsulud ang mga Levinhon sa paghimo sang ila pag-alagdan sa layanglayang nga tiliponan sa atubangan ni Aaron kag sa atubangan sang iya mga anak; sono sa ginsogo sang Ginoo kay Moses nahanungud sang mga Levinhon, amo ini ang ginhimo nila sa ila.

23Kag ang Ginoo nagpamolong kay Moises,

24“Ini amo ang naigo sa mga Levinhon: kutub sa duha ka pulo kag lima ka tuig kag pa ibabaw magsulud sila sa pag-alagad sa buluhaton sa layanglayang nga tiliponan;

25kag kutub sa kalim-an ka tuig mag-untat sila sa buluhaton sang pag-alagdan kag dili na mag-alagad,

26kondi mag-alagad kaupud sa ila mga utud sa layanglayang nga tiliponan, sa pagtatap sang tinulin, kag dili maghimo sing pag-alagad. Amo ini ang himoon mo sa mga Levinhon nahanungud sa mga tinulin sa ila.”

← Chapter 7 Jump to: Chapter 9 →