Numbers 11

Ilonggo (Ang Biblia (1982))

← Chapter 10 Jump to: Chapter 12 →

1Kag ang katawohan nagkumud sa palamatin-an sang Ginoo nahanungud sang ila kalautan; kag sang nabatian ini sang Ginoo, nagdabdab ang iya kaakig, kag ang kalayo sang Ginoo nagsonog sa tunga nila, kag naglamon sang nahigad gid nga bahin sang dologan.

2Niyan ang katawohan nagpanawag kay Moises; kag si Moises nagpangamuyo sa Ginoo, kag ang kalayo nagpalong.

3Gani yadtong duug ginhingalanan Tabera, bangud nga ang kalayo sang Ginoo nagsonog sa tunga nila.

4Karon ang nagsalakut nga kadam-an nga yara sa tunga nila nagkaibog sing lakas; kag ang katawohan sang Israel man naghibi liwat, kag nagsiling, “Sin-o bala ang magapakaon sa amon sing unud!

5Nadumduman namon ang isda nga ginkaon namon nga walay bayad sa Egipto, ang mga atimon, ang mga sandiya, ang mga bawang, ang mga sebuyas, kag ang ahos;

6apang karon ang amon kalag nagakag-as, kag wala gid sing iban nga tololokon kondi ining mana.”

7Karon ang mana kaangay sang binhi nga culantro, kag ang iya dagway subong sang bedelio.

8Ang katawohan naglagaw kag nagpamolot sini, kag gingaling ini sa mga galingan ukon ginbukbuk ini sa mga losong, kag ginloto ini sa mga kolon, kag ginhimo ini nga kalan-onon; kag ang iya lalim subong sang lalim sang kalan-onon nga naloto sa lana.

9Sang nagtupa ang ton-og sa dologan sa kagab-ihon, ang mana nagtupa upud sini.

10Nakabati si Moises nga ang katawohan nagahibi sa bug-os nilang panimalay, ang tagsa ka tawo sa ganhaan sang iya layanglayang; kag ang kaakig sang Ginoo nagdabdab sing daku, kag nasaklaw si Moises.

11Si Moises nagsiling sa Ginoo, “Ngaa bala nga naghimo ka sing dimaayo sa imo alagad? Kag ngaa bala nga wala ako makapahamuut sa imo itololok, nga ginbutang mo sa akon ang lulan sini tanan nga katawohan?

12Ginpanamkon ko bala ini tanan nga katawohan? Ginpanganak ko bala sila, nga magsiling ka sa akon, ‘Kungkunga sila sa imo dughan, subong sang manuglibang nga amay nga nagakugus sang bata nga nagasoso, pakadto sa duta nga ginsumpa mo sa ila mga ginikanan?’

13Sa diin bala ako makuha sing unud nga ihatag sa sini tanan nga katawohan? Kay nagahibi sila sa akon nga nagasiling, ‘Hatagi kami sing unud, nga makaon namon.’

14Ako indi makadala nga isa lamang sini tanan nga katawohan, bangud nga tama kabug-at ini sa akon.

15Kon amo ini ang ginahimo mo sa akon, patya ako sa gilayon, kon nakapahamuut ako sa imo itololok, kag dili ako pagpatan-awa sang akon pagkakailo.”

16Kag ang Ginoo nagsiling kay Moises, “Tiponi ako sing kapitoan ka lalaki sa mga tigulang sang Israel, nga imo nahibaloan nga mga tigulang sang katawohan kag mga manugdumala sa ila; kag dalha sila sa layanglayang nga tiliponan, kag magtindug sila didto upud sa imo.

17Kag magapanaug ako kag magapakighambal sa imo didto; kag magakuha ako sang espiritu nga yara sa imo kag ibutang ini sa ila; kag magadala sila kaupud nimo sang lulan sang katawohan, agud nga indi ikaw lamang ang magdala sini.

18Kag isiling sa katawohan, ‘Pakabalaana ang inyo mga kaugalingon sa buwas, kag magakaon kamo sing unud; kay naghibi kamo sa mga idulungug sang Ginoo, nga nagasiling, “Sin-o bala ang magapakaon sa amon sing unud? Kay maayo kami sa Egipto.” Busa ang Ginoo magahatag sa inyo sing unud, kag magakaon kamo.

19Indi kamo magkaon sa isa ka adlaw, ukon sa duha ka adlaw, ukon sa lima ka adlaw, ukon sa napulo ka adlaw, ukon sa duha ka pulo ka adlaw,

20kondi sa bug-os nga bulan, tubtub nga maggowa ini sa inyo mga ilong kag butlaon kamo sini, bangud nga nagsikway kamo sa Ginoo nga yara sa tunga ninyo, kag naghibi sa atubangan niya, nga nagasiling, “Ngaa bala nga naggowa kami gikan sa Egipto?”’”

21Apang si Moises nagsiling, “Ang katawohan nga yara ako sa tunga nila anum ka gatus ka libo nga nagalakat; kag ikaw nakasiling, ‘Ako magahatag sa ila sing unud, agud nga magkaon sila sa bug-os nga bulan!’

22Ihawon bala tungud sa ila ang mga panong kag kabakahan, sa pagbusog sa ila? Ukon tiponon bala sing tingub tungud sa ila ang bug-os nga kaisdaan sang dagat, sa pagbusog sa ila?”

23Kag ang Ginoo nagsiling kay Moises, “Naglip-ot bala ang kamut sang Ginoo? Karon makit-an mo kon matuman sa imo ang akon polong ukon indi.”

24Gani si Moises naggowa, kag nagsugid sa katawohan sang mga polong sang Ginoo; kag gintipon niya ang kapitoan ka lalaki sang mga tigulang sang katawohan, kag ginpahamtang sila sa palibut sang layanglayang.

25Niyan ang Ginoo nanaug sa panganud kag nagpamolong kay Moises, kag nagkuha sa espiritu nga yara sa iya kag ginbutang ini sa kapitoan ka tigulang; kag sang pagtungtung sang espiritu sa ila, nagpanagna sila. Apang wala na sila maghimo sing subong.

26Karon may nabilin sa dologan nga duha ka lalaki, ang ngalan sang isa si Eldad, kag ang ngalan sang isa si Medad, kag nagtungtung sa ila ang espiritu; sila bahin sang mga nasulat, apang wala maggowa pakadto sa layanglayang, kag gani nagpanagna sila sa dologan.

27Kag may nagdalagan nga isa ka pamatan-on nga lalaki kag nagsugid kay Moises, “Si Eldad kag si Medad nagapanagna sa dologan.”

28Kag si Josue nga anak ni Nun, ang manug-alagad ni Moises, isa sang iya pinili nga mga tawo, nagsiling, “Ginoo ko nga Moises, dumilii sila.”

29Apang si Moises nagsiling sa iya, “Naimon ka bala tungud sa akon? Kabay kuntani nga ang bug-os nga katawohan sang Ginoo mga manalagna, agud nga ibutang sang Ginoo ang iya espiritu sa ila!”

30Kag si Moises nagbalik sa dologan, sia kag ang mga tigulang sang Israel.

31Kag may naghuyup nga hangin gikan sa Ginoo, kag nagdala sing mga pitaw gikan sa dagat, kag ginpatupa sila sa dologan, nga mga isa ka adlaw nga lalakton sa sini nga kilid kag isa ka adlaw nga lalakton sa pihak nga kilid, palibut sa dologan, kag mga duha ka maniko sa kadaygan sang duta.

32Kag ang katawohan nagtindug sadtong bug-os nga adlaw, kag sa bug-os nga gab-i, kag sa bug-os nga adlaw nga madason, kag nagtipon sang mga pitaw; ang nagtipon sing labi gid ka diotay nagtipon sing napulo ka homer; kag ginbulad nila sila nga sa ila sa palibut sang dologan.

33Samtang yara pa ang unud sa ulut sang ila mga ngipon, sa wala pa ini mausang, ang kaakig sang Ginoo nagdabdab batok sa katawohan, kag ginsakit sang Ginoo ang katawohan sing tama ka daku nga kalalat-an.

34Busa ginhingalanan yadtong duug Kibrot-hataava, bangud nga didto ginlubung nila ang katawohan nga nagkaibog.

35Gikan sa Kibrot-hataava ang katawohan nagpanlakatan tubtub sa Hazerot; kag nagpabilin sila sa Hazerot.

← Chapter 10 Jump to: Chapter 12 →