Numbers 22

Ilonggo (Ang Biblia (1982))

← Chapter 21 Jump to: Chapter 23 →

1Niyan ang katawohan sang Israel nagpanlakatan, kag nagpahamtang sing dologan sa mga kapatagan sang Moab sa unhan sang Jordan tampad sang Jerico.

2Kag si Balac nga anak ni Zipor nakakita sang tanan nga ginhimo sang Israel sa mga Amornon.

3Kag ginhadlukan sing tama ang Moab sa katawohan, bangud nga madamu sila; kag ang Moab nalisang bangud sang katawohan sang Israel.

4Kag ang Moab nagsiling sa mga tigulang sang Madian, “Karon magadilap ini nga kadam-an sang tanan nga yara sa palibut naton, subong sang pagdilap sang baka sang hilamon sang latagon.” Gani si Balac nga anak ni Zipor, hari sang Moab sadto nga tion,

5ginpadal-an niya sing mga manugbalita si Balaam nga anak ni Beor sa Petor, nga yara sa ubay sang Suba, sa duta sang mga anak sang iya katawohan, sa pagtawag sa iya, nga nagasiling, “Yari karon, may katawohan nga naggowa gikan sa Egipto; ginahil-ob nila ang kadaygan sang duta, kag nagapuyo sila sa tampad nakon.

6Busa kari ka karon, ipanghimalaut ako sini nga katawohan, kay sila labi pa kagamhanan sa akon; ayhan magalandas ako agud nga madaug naton sila kag nga masobol ko sila gikan sa duta; kay nakahibalo ako nga ang ginapakamaayo mo pinakamaayo, kag ang ginapakamalaut mo pinakamalaut.”

7Gani ang mga tigulang sang Moab kag ang mga tigulang sang Madian nagtaliwan nga may mga sohol sang pagpamakot sa ila kamut; kag nag-abut sila kay Balaam, kag ginpamolong sa iya ang mga polong ni Balac.

8Kag nagsiling sia sa ila, “Dayon kamo diri sini nga gab-i, kag ihatag ko sa inyo ang sabat, sono sa ipamolong sa akon sang Ginoo ”; gani ang mga principe sang Moab nagpabilin kay Balaam.

9Kag ang Dios nag-abut kay Balaam kag nagsiling, “Sin-o bala ini nga mga lalaki kaupud nimo?”

10Kag si Balaam nagsiling sa Dios, “Si Balac nga anak ni Zipor, hari sang Moab, nagpadala sa akon, nga nagasiling,

11‘Yari karon, ang katawohan nga naggowa gikan sa Egipto, nagahil-ob sang kadaygan sang duta; karon kari, ipanghimalaut ako sa ila; ayhan sarang ako makapakig-away sa ila kag makasobol sa ila.’”

12Ang Dios nagsiling kay Balaam, “Dili ka mag-upud sa ila; dili ka magpakamalaut sang katawohan, kay pinakamaayo sila.”

13Gani si Balaam nagbangon sang aga, kag nagsiling sa mga principe ni Balac, “Pauli kamo sa inyo duta; kay ang Ginoo indi magtugut sa akon sa pag-upud sa inyo.”

14Gani ang mga principe sang Moab nagtindug kag nagbalik kay Balac, kag nagsiling, “Si Balaam nagapangindi sa pagkari upud sa amon.”

15Si Balac nagpadala pa liwat sing mga principe, nga madamu pa kag labi pa kadungganon sa ila.

16Kag nag-abut sila kay Balaam kag nagsiling sa iya, “Amo ini ang ginasiling ni Balac nga anak ni Zipor: ‘Dili ka magpasablag sa bisan ano sa pagkari sa akon;

17kay itib-ong ko ikaw sa tama kadaku nga kadungganan, kag ang bisan ano nga isiling mo sa akon himoon ko; busa kari, ipanghimalaut ako sini nga katawohan.’”

18Apang si Balaam nagsabat kag nagsiling sa mga alagad ni Balac, “Bisan ihatag ni Balac sa akon ang iya balay nga puno sang pilak kag bulawan, indi ako makapalabaw sa polong sang Ginoo nga akon Dios, sa paghimo sing kubus ukon kapin.

19Busa karon, ginaampo ko, pabilin man kamo diri sini nga gab-i, agud nga makahibalo ako sang ipamolong pa sang Ginoo sa akon.”

20Kag ang Dios nag-abut kay Balaam sa kagab-ihon kag nagsiling sa iya, “Kon magkari ang mga lalaki sa pagtawag sa imo, bangon ka, upud ka sa ila; apang ang polong lamang nga ipamolong ko sa imo, ina ang himoon mo.”

21Gani nagbangon si Balaam sa pagkaaga, kag nagsiya sang iya asna, kag nag-upud sa mga principe sang Moab.

22Apang ang kaakig sang Dios nagdabdab bangud nga naglakat sia; kag ang manugtunda sang Ginoo nagpahamtang sang iya kaugalingon sa dalan nga kasumpung batok sa iya. Karon sia nagasakay sa iya asna, kag upud sa iya ang duha niya ka alagad.

23Kag ang asna nakakita sa manugtunda sang Ginoo nga nagatindug sa dalan, nga may espada nga nagabut sa iya kamut; kag naglipas ang asna sa dalan, kag nagkadto sa latagon; kag ginbunal ni Balaam ang asna, sa pagpabalik sa iya sa dalan.

24Niyan ang manugtunda sang Ginoo nagtindug sa banas nga makitid sa gin-utlan sang mga ulubasan, nga may dingding sa sini nga kilid, kag may dingding sa sina nga kilid.

25Kag sang nakita sang asna ang manugtunda sang Ginoo; nagdapiog sia sa dingding, kag naipit sa dingding ang tiil ni Balaam; gani ginbunal niya sia liwat.

26Niyan ang manugtunda sang Ginoo nagkadto sa unhan, kag nagtindug sa duug nga makitid, diin wala sing dalan nga lipasan bisan sa too ukon sa wala.

27Sang nakita sang asna ang manugtunda sang Ginoo, naglup-og sia sa idalum ni Balaam; kag nagdabdab ang kaakig ni Balaam, kag ginhanut niya ang asna sang iya sungkud.

28Niyan ginpatikab sang Ginoo ang baba sang asna, kag nagsiling sia kay Balaam, “Ano bala ang nahimo ko sa imo, nga ginbunal mo ako sini nga makatlo?”

29Kag si Balaam nagsiling sa asna, “Bangud nga gin-uligyat mo ako. Buut ko kuntani nga may espada ako sa akon kamut, kay niyan napatay ko na ikaw.”

30Kag ang asna nagsiling kay Balaam, “Indi bala ako imo asna, nga ginsakyan mo sa bug-os nga kalawigon sang imo kabuhi tubtub sini nga adlaw? Amo bala ini ang ginahimo ko sa imo?” Kag nagsiling sia, “Indi.”

31Niyan ginbuksan sang Ginoo ang mga mata ni Balaam, kag nakita niya ang manugtunda sang Ginoo nga nagatindug sa dalan, nga may espada nga nagabut sa iya kamut; kag si Balaam nagduko sang iya olo, kag naghapa.

32Kag ang manugtunda sang Ginoo nagsiling sa iya, “Ngaa bala nga ginbunal mo ang imo asna sini nga makatlo? Yari karon, naggowa ako nga kasumpung, bangud nga ang dalanon mo balingag sa atubangan ko;

33kag nakita ako sang asna, kag naglipas gikan sa akon atubangan sini nga makatlo. Kon wala sia maglipas sa akon, sa pagkamatuud napatay ko na ikaw kuntani kag naluwas sia nga buhi.”

34Niyan si Balaam nagsiling sa manugtunda sang Ginoo, “Nakasala ako, kay wala ako makahibalo nga ikaw nagtindug sa dalan batok sa akon. Busa karon, kon wala mo ini mahamut-i, magapauli ako.”

35Kag ang manugtunda sang Ginoo nagsiling kay Balaam, “Upud ka sa mga lalaki; apang ang polong lamang nga ipamolong ko sa imo, ina ipamolong mo.” Gani si Balaam nag-upud sa mga principe ni Balac.

36Sang nabatian ni Balac nga nagapakari si Balaam, naggowa sia sa pagsugata sa iya sa Banwa sang Moab, nga yara sa dulunan sang Arnon, nga yara sa ukbung gid sang dulunan.

37Kag si Balac nagsiling kay Balaam, “Wala bala ako magpadala sing hanoot sa imo sa pagtawag sa imo? Ngaa bala wala ka magkari sa akon? Indi bala ako makasarang sa pagtib-ong sa imo sa kadungganan?”

38Si Balaam nagsiling kay Balac, “Yari karon, nagkari ako sa imo! May gahum bala ako nga mas-a sa pagpamolong sing bisan ano nga butang? Ang polong nga ibutang sang Dios sa akon baba, ina ipamolong ko.”

39Niyan nag-upud si Balaam kay Balac, kag nag-abut sila sa Kiryat-huzot.

40Kag si Balac naghalad sing mga baka kag mga carnero, kag nagpadala kay Balaam kag sa mga principe nga upud sa iya.

41Kag sang pagkaaga ginkuha ni Balac si Balaam kag gindala sia patukad sa mga duug nga mataas ni Baal; kag kutub didto nakita niya ang nahigad gid nga bahin sang katawohan.

← Chapter 21 Jump to: Chapter 23 →