Numbers 36

Ilonggo (Ang Biblia (1982))

← Chapter 35 Jump to:

1Ang mga pangolo sang mga kabaranggayan sang panimalay sang mga anak ni Galaad nga anak ni Maquir, ang anak ni Manases, gikan sa mga panimalay sang mga anak ni Jose, nagpalapit kag nagpamolong sa atubangan ni Moises kag sa atubangan sang mga principe, ang mga pangolo sang mga kabaranggayan sang katawohan sang Israel;

2nagsiling sila, “Ang Ginoo nagsogo sa akon ginoo sa paghatag paagi sa papalad sang duta nga panublion sa katawohan sang Israel; kag ang Ginoo nagsogo sa akon ginoo sa paghatag sang panublion ni Zelofehad nga amon utud nga lalaki sa iya mga anak nga babayi.

3Apang kon pangasaw-on sila sang bisan sin-o sang mga anak sang iban nga mga kabikahan sang katawohan sang Israel niyan ang panublion nila kuhaon sa panublion sang aton mga ginikanan, kag idugang sa panublion sang kabikahan nga ila matapikan; sa amo kuhaon ini sa ginpapalaran nga aton panublion.

4Kag kon mag-abut ang paghinugyaw sang katawohan sang Israel, niyan ang panublion nila idugang sa panublion sang kabikahan nga ila matapikan; sa amo ang panublion nila kuhaon sa panublion sang kabikahan sang aton mga ginikanan.”

5Kag si Moises nagsogo sa katawohan sang Israel sono sa polong sang Ginoo, nga nagasiling, “Ang kabikahan sang mga anak ni Jose nagapamolong sing matarung.

6Ini amo ang butang nga ginasogo sang Ginoo nahanungud sa babayi nga mga anak ni Zelofehad, ‘Ipaasawa sila sa bisan kay sin-o nga ginapakamaayo gid nila; lamang, magpamana sila sa panimalay sang kabikahan sang ila ginikanan.

7Gani ang panublion sang katawohan sang Israel indi maglatonlaton sa kabikahan pa kabikahan; kay ang katawohan sang Israel magpabilin ang tagsatagsa sa panublion sang kabikahan sang iya mga ginikanan.

8Kag ang tagsa ka anak nga babayi nga may panublion sa tunga sang mga kabikahan sang katawohan sang Israel, mangin-asawa sa isa sang panimalay sang kabikahan sang iya ginikanan, agud nga ang katawohan sang Israel makatag-iya ang tagsa ka tawo sang panublion sang iya mga ginikanan.

9Gani indi maglaton ang panublion gikan sa kabikahan pa kabikahan; kay ang kabikahan sang katawohan sang Israel magpabilin ang tagsatagsa sa iya kaugalingon nga panublion.’”

10Sono sa ginsogo sang Ginoo kay Moises, amo ini ang ginhimo sang mga anak ni Zelofehad;

11kay si Maala, si Tirsa, si Hogla, si Milca, kag si Noa, ang mga babayi nga anak ni Zelofehad, nangin-asawa sila sang mga anak sang ila mga tiyo.

12Nagpamana sila sa mga panimalay sang mga anak ni Manases nga anak ni Jose, kag ang panublion nila nabilin sa kabikahan sang panimalay sang ila ginikanan.

13Ini sila amo ang mga sogo kag mga pagsolondan nga ginsogo sang Ginoo paagi kay Moises sa katawohan sang Israel sa kapatagan sang Moab sa ubay sang Jordan sa atubang sang Jerico.

← Chapter 35 Jump to: