Numbers 19

Ilonggo (Ang Biblia (1982))

← Chapter 18 Jump to: Chapter 20 →

1Karon ang Ginoo nagsiling kay Moises kag kay Aaron,

2“Ini amo ang palatukuran sang kasogoan nga ginsogo sang Ginoo: Ipamolong sa katawohan sang Israel nga magdala sila sing dumalaga nga baka nga pula nga walay dagta, nga sa iya walay kasawayan, kag wala matakdi sing gota.

3Kag ihatag ninyo sia kay Eleazar nga sacerdote, kag dalhon niya sia sa gowa sang dologan kag ihawon sia sa atubangan niya;

4kag si Eleazar nga sacerdote magkuha sa iya dugo sa iya tudlo, kag iwisik ang iya dugo sing makapito nayon sa atubangan sang layanglayang nga tiliponan.

5Kag sonogon sang isa ang dumalaga nga baka sa iya itololok; ang iya panit, ang iya unud, kag ang iya dugo, sonogon upud ang iya ipot;

6kag ang sacerdote magkuha sang kahoy nga cedro kag hisopo kag escarlata, kag sila idap-ong sa tunga sang nagakasonog nga baka nga dumalaga.

7Niyan ang sacerdote magbunak sang iya mga bayo kag diguson niya ang iya lawas sa tubig, kag sa tapus sini magsulud sia sa dologan; kag ang sacerdote mangindimatinlo tubtub sa kahaponon.

8Ang nagasonog sang dumalagang baka magbunak sang iya bayo sa tubig kag magdigus sang iya lawas sa tubig, kag mangindimatinlo tubtub sa kahaponon.

9Kag ang tawo nga matinlo magtipon sang mga abo sang baka nga dumalaga, kag tumpokon sila sa gowa sang dologan sa duug nga matinlo; kag tagoon ini nga sa katilingban sang katawohan sang Israel nga tubig nga sa pagkadimatinlo, nga halad-tungud-sa-sala.

10Kag ang nagatipon sang mga abo sang baka nga dumalaga magbunak sang iya mga bayo, kag mangindimatinlo tubtub sa kahaponon. Kag ini manginpalatukuran nga dayon sa katawohan sang Israel, kag sa dumuloong nga nagapanlugayaw sa tunga nila.

11“Ang nagatandug sang bangkay sang bisan sin-o nga tawo mangindimatinlo sing pito ka adlaw;

12ang amo magpaninlo sang iya kaugalingon sa tubig sa ikatlo nga adlaw kag sa ikapito nga adlaw manginmatinlo sia; apang kon sa ikatlo nga adlaw wala sia magpaninlo sang iya kaugalingon, mangindimatinlo sia sa ikapito nga adlaw.

13Ang bisan sin-o nga nagatandug sang patay nga tawo, ang bangkay sang tawo nga napatay, kag wala magpaninlo sang iya kaugalingon, nagadagta sang kayangkayang sang Ginoo, kag ina nga tawo utdon gikan sa Israel; bangud nga ang tubig nga sa pagkadimatinlo wala mawisik sa iya, mangindimatinlo sia; ang iya pagkadimatinlo yara pa sa iya.

14“Ini amo ang kasogoan kon ang tawo mapatay sa layanglayang: ang tagsatagsa nga nagasulud sa layanglayang, kag ang tagsatagsa nga yara sa layanglayang, mangindimatinlo sing pito ka adlaw.

15Kag ang tagsa ka suludlan nga nabuksan, nga wala matakpi, dimatinlo.

16Ang bisan sin-o sa wayang nga nagatandug sang isa nga pinatay sa espada, ukon bangkay, ukon tul-an sang tawo, ukon lulubngan, mangindimatinlo sing pito ka adlaw.

17Nahanungud sa mga dimatinlo magkuha sila sang mga abo sang sinonog sang halad-tungud-sa-sala, kag ibutang ang tubig nga nagailig sa suludlan;

18niyan ang tawo nga matinlo magkuha sing hisopo, kag itusmog ini sa tubig, kag iwisik ini sa layanglayang, kag sa tanan nga galamiton, kag sa mga tawo nga yadto didto, kag sa nagtandug sang tul-an, ukon sang pinatay, ukon sang bangkay, ukon sang lulubngan;

19kag ang tawo nga matinlo magwisik sa dimatinlo sa ikatlo kag sa ikapitong adlaw; sa amo sa ikapitong adlaw tinloan niya sia, kag magbunak sia sang iya mga panapton, kag magpaligus sia sa tubig, kag manginmatinlo sa kahaponon.

20“Apang ang tawo nga dimatinlo kag indi magpaninlo sang iya kaugalingon, ina nga tawo utdon gikan sa tunga sang pagtilipon, bangud nga gindagtaan niya ang santuario sang Ginoo; sanglit wala mawisik sa iya ang tubig nga sa pagkadimatinlo, dimatinlo sia.

21Kag manginpalatukuran nga dayon ini sa ila. Ang nagawisik sang tubig nga sa pagkadimatinlo magbunak sang iya mga panapton; kag ang nagatandug sang tubig nga sa pagkadimatinlo mangindimatinlo tubtub sa kahaponon.

22Kag ang bisan ano nga ginatandug sang tawo nga dimatinlo mangindimatinlo; kag ang nagatandug sini mangindimatinlo tubtub sa kahaponon.”

← Chapter 18 Jump to: Chapter 20 →