Numbers 35

Ilonggo (Ang Biblia (1982))

← Chapter 34 Jump to: Chapter 36 →

1Ang Ginoo nagsiling kay Moises sa mga kapatagan sang Moab sa ubay sang Jordan sa atubang sang Jerico,

2“Sogoa ang katawohan sang Israel, nga hatagan nila ang mga Levinhon, gikan sa panublion nga ila kaugalingon, sing mga banwa nga puluy-an; kag hatagan ninyo ang mga Levinhon sing mga palahalban nga sa mga banwa sa palibut.

3Ang mga banwa puy-an nila, kag ang mga palahalban nila manginsa ila kahayupan kag sa ila mga pagkabutang kag sa tanan nilang kasapatan.

4Ang mga palahalban sang mga banwa, nga ihatag ninyo sa mga Levinhon, isa ka libo ka maniko palibut kutub sa kuta sang banwa kag pagowa.

5Kag magtakus kamo, sa gowa sang banwa, sa kilid nga nasidlangan sing duha ka libo ka maniko, kag sa kilid nga nabagatnan duha ka libo ka maniko, kag sa nakatundan duha ka libo ka maniko, kag sa kilid nga naaminhan duha ka libo ka maniko, ang banwa yara sa tunga; ini mangin-ila mga palahalban sang kabanwaanan.

6Ang mga banwa nga ihatag ninyo sa mga Levinhon amo ang anum ka banwa nga dalangpan, nga ihatag ninyo nga palalagyohan sang nakapatay sing tawo, kag luwas sa ila maghatag kamo sing kap-atan kag walo ka banwa.

7Ang tanan nga banwa nga ihatag ninyo sa mga Levinhon kap-atan kag walo ka banwa, pati ang ila mga palahalban.

8Kag nahanungud sa mga banwa nga ihatag ninyo gikan sa kaugalingon sang katawohan sang Israel, magkuha kamo sing madamu sa madamu, kag magkuha kamo sing diotay sa diotay; ang tagsatagsa maghatag sa mga Levinhon gikan sa iya mga banwa sono sa iya panublion nga iya napanubli.”

9Kag ang Ginoo nagsiling kay Moises,

10“Isiling sa katawohan sang Israel, Kon makatabok kamo sa Jordan pasulud sa duta sang Canaan,

11niyan magtangdo kamo sing mga banwa nga manginkabanwaanan nga dalangpan nga sa inyo, agud nga makapalagyo didto ang nakapatay sing bisan sin-ong tawo sing dihungud.

12Ang mga banwa mangindalangpan nga sa inyo gikan sa manugtimalus, agud nga indi mapatay ang nakapatay sing tawo tubtub nga makaatubang sia sa katilingban nga hukman.

13Kag ang kabanwaanan nga ihatag ninyo nga sa inyo anum ka banwa nga dalangpan.

14Maghatag kamo sing tatlo ka banwa sa tabok sang Jordan, kag maghatag kamo sing tatlo ka banwa sa duta sang Canaan, nga manginkabanwaanan nga dalangpan.

15Ini nga anum ka banwa mangindalangpan sa katawohan sang Israel, kag sa dumuloong kag sa manlulugayaw sa tunga nila, agud nga magpalagyo didto ang tagsatagsa nga nakapatay sing bisan sin-ong tawo sing dihungud.

16“Apang kon masamad niya sia sa hinganiban nga salsalon, sa bagay nga mapatay sia, nakapatay sing tawo sia; ang nakapatay patyon.

17Kag kon mapolpog niya sia sing bato sa kamut, nga sa sini ang tawo mapatay, kag napatay sia, nakapatay sing tawo sia; ang nakapatay patyon.

18Ukon kon malampusan niya sia sing yaming sa kamut, nga sa sini ang tawo mapatay, kag napatay sia, nakapatay sing tawo sia; ang nakapatay patyon.

19Ang manugtimalus gid sang dugo magapatay sang nakapatay; kon masugata niya sia, patyon niya sia.

20Kag kon tungud sa dumut itikwang niya sia, ukon haboyon sia, nga nagapuut, sa bagay nga mapatay sia,

21ukon sa kaawayon nila masumbag niya sia sang iya kamut, sa bagay nga mapatay sia, niyan ang nagsumbag sa iya patyon; nakapatay sing tawo sia; ang manugtimalus sang dugo magapatay sang nakapatay, kon masugata niya sia.

22“Apang kon sa hinali matikwang niya sia sa wala sing kaawayon, ukon mahaboy sia sing bisan ano nga butang sa wala pagpuut,

23ukon sa wala niya sia makit-i mahaboy niya sia sing bato, nga sa sini ang tawo mapatay, sa bagay nga napatay sia, kag indi niya sia kaaway, ukon naghingabut sang iya kasamaran;

24niyan ang katilingban maghukom sa tunga sang manughaboy kag sang manugtimalus sang dugo, sono sini nga mga pagsolondan;

25kag ang katilingban magluwas sang nakapatay sing tawo gikan sa kamut sang manugtimalus sang dugo, kag ang katilingban mag-uli sa iya sa banwa nga dalangpan niya, diin nagdangup sia, kag magpuyo sia didto tubtub nga mapatay ang pinakamataas nga sacerdote, nga hinaplas sang balaan nga lana.

26Apang kon sa bisan ano nga tion ang nakapatay sing tawo maglakbay luwas sa dulunan sang iya banwa nga dalangpan diin sia nagadangup,

27kag ang manugtimalus sang dugo makasugata sa iya sa luwas sang dulunan sang banwa nga iya dalangpan, kag ang manugtimalus sang dugo magpatay sa nakapatay sing tawo, indi sia malinapason sang dugo.

28Bangud nga dapat sia kuntani magpabilin sa iya banwa nga dalangpan tubtub nga mapatay ang pinakamataas nga sacerdote; apang sa tapus nga mapatay ang pinakamataas nga sacerdote ang nakapatay sing tawo magpauli sa iya duta nga kaugalingon.

29“Kag ini nga mga butang palatukuran kag pagsolondan sa bug-os ninyo nga mga kaliwatan sa tanan ninyo nga puluy-an.

30Ang bisan sin-o nga nagapatay sing bisan sin-o nga tawo, ang nakapatay patyon sa pagpamatuud sang mga saksi; apang ang isa ka saksi indi makapamatuud batok sa bisan kay sin-o nga tawo nga patyon sia.

31Labut pa dili kamo magbaton sing gawad tungud sa kabuhi sang nakapatay nga tinagudilian sa kamatayon; apang patyon sia.

32Kag dili kamo magbaton sing gawad tungud sa nagpalagyo sa iya banwa nga dalangpan, agud nga magpauli sia sa pagpuyo sa duta, tubtub nga mapatay ang sacerdote.

33Gani dili ninyo pagdagtaan ang duta diin kamo; kay ang dugo nagadagta sang duta, kag wala sing mahimo nga katumbasan tungud sa duta bangud sang dugo nga ginpaagay sa iya, kondi tungud sang dugo niya nga nagpaagay sini.

34Dili ninyo pagdagtaan ang duta nga inyo ginapuy-an, nga sa tunga niya nagapuyo ako; kay Ako ang Ginoo nga nagapuyo sa tunga sang katawohan sang Israel.”

← Chapter 34 Jump to: Chapter 36 →