Numbers 16 — Ilonggo (Ang Biblia (1982))

1Karon si Core nga anak ni Izar, ang anak ni Coat, ang anak ni Levi, upud kay Datan kag kay Abiram nga mga anak ni Eliab, kag si On nga anak ni Pelet, mga anak ni Ruben, nagkuha sing mga tawo;

2kag nagtindug sila sa atubangan ni Moises, upud sang pila sang katawohan sang Israel, duha ka gatus kag kalim-an ka principe sang katilingban, gintawag sa pagtilipon, mga lalaki nga bantug;

3kag nagtipon sila sing tingub batok kay Moises kag kay Aaron, kag nagsiling sa ila, “Nagapalakas kamo sa inyo! Sa ginatan-aw nga ang bug-os nga katilingban balaan, ang tagsatagsa sa ila, kag ang Ginoo yara sa tunga nila; busa niyan ngaa bala nga nagapakataas kamo sa pagtilipon sang Ginoo?”

4Sang nabatian ini ni Moises, naghapa sia;

5kag nagpamolong sia kay Core kag sa bug-os niya nga kaupdanan, “Sa pagkaaga magapahayag ang Ginoo kon sin-o ang iya, kag kon sin-o ang balaan, kag papalapiton niya sia sa iya; sia nga pilion niya papalapiton niya sia sa iya.

6Himoa ninyo ini: kuha kamo sing mga incensario, si Core kag ang bug-os niya nga kaupdanan;

7butangan sila sing kalayo kag butangan sing incienso sila sa atubangan sang Ginoo buwas, kag ang tawo nga pilion sang Ginoo manginbalaan sia. Nagapalakas kamo sa inyo, mga anak ni Levi!”

8Kag si Moises nagsiling kay Core, “Pamati karon, kamo nga mga anak ni Levi:

9diotay lamang bala ini nga butang sa inyo nga ang Dios sang Israel nagpain sa inyo gikan sa katilingban sang Israel, sa pagdala sa inyo mapalit sa iya, sa paghimo sang pag-alagdan sa kayangkayang sang Ginoo, kag sa pagtindug sa atubangan sang katilingban sa pag-alagad sa ila;

10kag nga ginpapalapit ka niya sa iya, kag ang tanan mo nga utud nga mga anak ni Levi upud sa imo? Kag nagatinguha bala kamo sang pagkasacerdote man?

11Busa ikaw kag ang bug-os mo nga kaupdanan nagtipon sing tingub batok sa Ginoo; si Aaron ano bala sia nga nagakumud kamo batok sa iya?”

12Kag ginpatawag ni Moises si Datan kag si Abiram nga mga anak ni Eliab; kag nagsiling sila, “Indi kami magtaklad.

13Diotay bala ini nga butang nga ginpataklad mo kami gikan sa duta nga nagailig sing gatas kag dugus, sa pagpatay sa amon sa kamingawan, apang dapat ka bala maghimo sang imo kaugalingon man nga principe sa ibabaw namon?

14Labut pa wala mo kami madala sa duta nga nagailig sing gatas kag dugus, ukon mahatagan kami sing panublion nga mga latagon kag mga katamnan sang uvas. Buut mo bala lukaton ang mga mata sini nga mga tawo? Indi kami magtaklad.”

15Kag si Moises nagsingkal sing tama, kag nagsiling sa Ginoo, “Dili pagtamda ang ila dolot. Wala ako makakuha sing isa ka asno sa ila, ukon makasamad sang isa sa ila.”

16Kag si Moises nagsiling kay Core, “Ikaw kag ang bug-os mo nga kaupdanan mag-atubang sa Ginoo, ikaw kag sila, kag si Aaron, buwas:

17kag magdala ang tagsatagsa sa inyo sang iya incensario, kag butangi sila sing incienso, kag dalhon sang tagsa ka tawo ang iya incensario sa atubangan sang Ginoo, duha ka gatus kag kalim-an ka incensario; ikaw man, kag si Aaron, ang tagsa sang iya incensario.”

18Gani nagkuha ang tagsa ka tawo sang iya incensario, kag ginbutangan sila sing kalayo kag ginbutangan sing incienso sila, kag nagtindug sa ganhaan sang layanglayang nga tiliponan upud kay Moises kag kay Aaron.

19Niyan gintipon ni Core ang bug-os nga katilingban sa atubang nila sa ganhaan sang layanglayang nga tiliponan. Kag ang himaya sang Ginoo nagpahayag sa bug-os nga katilingban.

20Kag ang Ginoo nagpamolong kay Moises kag kay Aaron,

21“Palayo kamo gikan sa sini nga katilingban, agud nga mapapas ko sila sa isa ka tion.”

22Kag naghapa sila, kag nagsiling, “O Dios, ang Dios sang mga espiritu sang tanan nga unud, magpakasala bala ang isa ka tawo, kag magkasingkal ka batok sa bug-os nga katilingban?”

23Kag ang Ginoo nagpamolong kay Moises,

24“Ipamolong sa katilingban, Palayo kamo gikan sa palibut sang kayangkayang ni Core, ni Datan, kag ni Abiram.”

25Niyan si Moises nagtindug kag nagkadto kay Datan kag kay Abiram; kag ang mga tigulang sang Israel nagsonod sa iya.

26Kag sia nagpamolong sa katilingban, “Ginaampo ko sa inyo, halin kamo gikan sa mga layanglayang sini nga mga tawo nga malaut, kag dili magtandug sing bisan ano nga ila, basi mapapas kamo sa tanan nila nga sala.”

27Gani naghalin sila gikan sa kayangkayang ni Core, ni Datan, kag ni Abiram, sa palibut; kag si Datan kag si Abiram naggowa kag nagtindug sa ganhaan sang ila layanglayang, kag ang ila asawa, ang ila mga anak nga lalaki, kag ang ila mga magamay.

28Kag si Moises nagsiling, “Sa sini makilala ninyo nga ako ginpadala sang Ginoo sa paghimo sini tanan nga buluhaton, kay wala ko sila mahimo sa akon kaugalingon nga hunahuna.

29Kon ining mga tawo mapatay sa kamatayon nga kinaugali sang tanan nga tawo, ukon paantuson sila subong sang pagpaantus sa tanan nga tawo, niyan ang Ginoo wala magpadala sa akon.

30Apang kon ang Ginoo magbuhat sing isa ka bag-ong butang, kag ang duta magbuka sang iya baba, kag maglamon sa ila, pati sang tanan nga ila, kag magpanaug sila nga buhi sa Sheol, niyan mahangpan ninyo nga ining mga tawo nagtamay sa Ginoo.”

31Kag sang nakatapus sia sa pagpamolong sini tanan nga polong, nagbuka ang duta nga yara sa idalum nila;

32kag ginbuka sang duta ang iya baba kag ginlamon sila, kag ang ila mga panimalay kag ang tanan nga tawo nga iya ni Core kag ang bug-os nilang pagkabutang.

33Gani sila kag ang tanan nga ila nagpanaug nga buhi sa Sheol; kag nagkiput ang duta sa ibabaw nila, kag nawala sila gikan sa tunga sang pagtilipon.

34Kag ang bug-os nga Israel nga sa palibut nila nagpalagyo sa singgit nila; kay nagsiling sila, “Basi lamonon kita sang duta!”

35Kag naggowa gikan sa Ginoo ang kalayo, kag naghalunhon sang duha ka gatus kag kalim-an ka tawo nga naghalad sang incienso.

36Niyan ang Ginoo nagsiling kay Moises,

37“Ipamolong kay Eleazar nga anak ni Aaron nga sacerdote nga kuhaon niya ang mga incensario gikan sa tunga sang sonog, kag laptahon mo sa unhan ang kalayo. Kay balaan sila,

38bisan ang mga incensario sining mga makasasala batok sa ila kaugalingon nga kabuhi; kag himoon sila nga mga pinanid nga pinapa nga taklap sang halaran, kay ginhalad nila sila sa atubangan sang Ginoo; busa balaan sila. Sa amo mangintanda sila sa katawohan sang Israel.”

39Gani si Eleazar nga sacerdote nagkuha sang mga incensario nga saway, nga ginhalad sang mga nasonog; kag ginpapa sila nga taklap sang halaran,

40nga manginhandumanan sang katawohan sang Israel, sa katuyoan nga wala sing dumuloong, nga indi sa mga kaliwatan ni Aaron, magpalapit sa pagsonog sing incienso sa atubangan sang Ginoo; agud nga indi sia manginsubong kay Core kag sang iya kaupdanan—sono sa ginsiling sang Ginoo kay Eleazar paagi kay Moises.

41Apang sang adlaw nga madason ang bug-os nga katilingban sang katawohan sang Israel nagkumud batok kay Moises kag kay Aaron, nga nagasiling, “Ginpatay ninyo ang katawohan sang Ginoo.”

42Kag sang nagtipon ang katilingban batok kay Moises kag kay Aaron, naglantaw sila nayon sa layanglayang nga tiliponan; kag yari karon, ang panganud nagputus sini, kag nagpahayag ang himaya sang Ginoo.

43Kag si Moises kag si Aaron nagkadto sa atubangan sang layanglayang nga tiliponan,

44kag ang Ginoo nagsiling kay Moises,

45“Palayo kamo gikan sa tunga sining katilingban, agud nga mapapas ko sila sa isa ka tion.” Kag naghapa sila.

46Kag si Moises nagsiling kay Aaron, “Kuhaa ang imo incensario, kag butangi sing kalayo gikan sa halaran, kag butangi sing incienso, kag dalha ini sing madali sa katilingban, kag maghimo sing katumbasan tungud sa ila; kay ang kasingkal naggowa gikan sa Ginoo, ang kamatay nagsugud.”

47Gani si Aaron nagkuha sono sa ginsiling ni Moises, kag nagdalagan sa tunga sang pagtilipon; kag yari karon, ang kamatay nagsugud sa tunga sang katawohan; kag ginbutangan niya sing incienso, kag naghimo sing katumbasan tungud sa katawohan.

48Kag nagpatunga sia sa mga patay kag sa mga buhi; kag nagtonong ang kamatay.

49Karon ang mga napatay sa kamatay napulog apat ka libo kag pito ka gatus, walay labut ang mga napatay sa paglalis ni Core.

50Kag si Aaron nagbalik kay Moises sa ganhaan sang layanglayang nga tiliponan, sang nagtonong ang kamatay.”