Numbers 13

Ilonggo (Ang Biblia (1982))

← Chapter 12 Jump to: Chapter 14 →

1Ang Ginoo nagsiling kay Moises,

2“Padala ka sing mga lalaki nga maglampitaw sila sang duta sang Canaan, nga ginahatag ko sa katawohan sang Israel; gikan sa tagsa ka kabikahan sang ila mga ginikanan magpadala kamo sing isa ka lalaki, ang tagsatagsa pangolo sa ila.”

3Gani si Moises nagpadala sa ila gikan sa kamingawan sang Paran, sono sa sogo sang Ginoo, tanan sila lalaki nga mga pangolo sang katawohan sang Israel.

4Kag amo ini ang ila mga ngalan: Gikan sa kabikahan ni Ruben, si Samua nga anak ni Zacur;

5gikan sa kabikahan ni Simeon, si Safat nga anak ni Hori;

6gikan sa kabikahan ni Juda, si Caleb nga anak ni Jefone;

7gikan sa kabikahan ni Isacar, si Igal nga anak ni Jose;

8gikan sa kabikahan ni Efraim, si Hosea nga anak ni Nun;

9gikan sa kabikahan ni Benjamin, si Palti nga anak ni Rafu;

10gikan sa kabikahan ni Zabulon, si Gadiel nga anak ni Sodi;

11gikan sa kabikahan ni Jose (nga amo sa kabikahan ni Manases), si Gad nga anak ni Susi;

12gikan sa kabikahan ni Dan, si Amiel nga anak ni Gemali;

13gikan sa kabikahan ni Aser, si Setur nga anak ni Micael;

14gikan sa kabikahan ni Neftali, si Nahabi nga anak ni Vapsi;

15gikan sa kabikahan ni Gad, si Geuel nga anak ni Maqui.

16Ini amo ang mga ngalan sang mga lalaki nga ginpadala ni Moises nga maglampitaw sang duta. Kag si Hosea nga anak ni Nun ginhingadlan ni Moises nga Josue.

17Ginpadala sila ni Moises sa paglampitaw sang duta sang Canaan, kag nagsiling sa ila, “Taklad kamo sa sining dalan paagi sa Bagatnan, kag tukad sa kabakoloran,

18kag tan-awon ang duta kon ano sia, kag ang katawohan nga nagapuyo sa iya kon mabakud ukon maluya sila, kon diotay ukon madamu sila,

19kag kon maayo ang duta nga ginapuy-an nila ukon malain, kag kon ano ang mga banwa nga ginapuy-an nila sa mga dologan ukon sa mga pamakud,

20kag kon ano ang duta kon matambok ukon maniwang, kag kon sa iya may kahoyan ukon wala. Magpakaisug kamo, kag magdala sang bunga sang duta.” Karon nga tion amo ang tion sang nahaunang loto nga mga uvas.

21Gani nagtaklad sila kag ginlampitawan ang duta kutub sa kamingawan sang Zin tubtub sa Rehob, sa salamputan sang Hamat.

22Nagtaklad sila paagi sa Bagatnan, kag nag-abut sa Hebron; kag didto si Ahiman, si Sesai, kag si Talmai, ang mga kaliwatan ni Anak. (Ang Hebron ginpasad sing pito ka tuig una sa Zoan sa Egipto.)

23Kag naglambut sila sa Nalupyakan sang Escol, kag didto nagtapas sila sing isa ka sanga nga may isa ka pinungpung sang mga uvas, kag ginyayongan ini sang duha sa isa ka yayongan; sila nagdala man sang mga granada kag sang mga higos.

24Yadtong duug ginhingalanan nga Nalupyakan sang Escol, bangud sang pinungpung nga gintapas gikan didto sang katawohan sang Israel.

25Nagbalik sila gikan sa paglampitaw sang duta sa tapus ang kap-atan ka adlaw.

26Kag sila nag-abut kay Moises kag kay Aaron kag sa bug-os nga katilingban sang katawohan sang Israel sa kamingawan sang Paran, sa Cades; sila nagbalik sing polong sa ila kag sa bug-os nga katilingban, kag nagpakita sa ila sang bunga sang duta.

27Kag nagsugid sila sa iya, “Nag-abut kami sa duta nga ginpakadtoan mo sa amon; nagailig sia sing gatas kag dugus, kag ini amo ang bunga niya.

28Apang ang katawohan nga nagapuyo sa duta makusug, kag ang mga kabanwaanan napamakuran, kag dalagku gid; kag labut pa, nakita namon didto ang mga kaliwatan ni Anak.

29Ang mga Amaleknon nagapuyo sa duta sang Bagatnan; ang mga Hethanon, ang mga Jebusnon, kag ang mga Amornon, nagapuyo sa kabakoloran; kag ang mga Canaanhon nagapuyo sa ubay sang dagat, kag sa ubay sang pangpang sang Jordan.”

30Apang ginpahipus ni Caleb ang katawohan sa atubangan ni Moises, kag nagsiling, “Magtaklad kita gilayon, kag magtag-iya sini; kay kita makasarang gid sa pagdaug sini.”

31Niyan ang mga lalaki nga nagtaklad kaupud niya nagsiling, “Indi kita makasarang magtaklad batok sa katawohan; kay sila makusug pa sa aton.”

32Gani nagdala sila sing malaut nga sugid sa katawohan sang Israel nahanungud sang duta nga ila nalampitawan, nga nagasiling, “Ang duta, nga amon ginlatas sa paglampitaw, duta nga nagalamon sang iya katawohan; kag ang tanan nga katawohan nga nakita namon sa iya mga tawo nga matag-as gid.

33Kag didto nakita namon ang mga Nefilim (ang mga anak ni Anak, nga nagikan sa mga Nefilim); kag kami sa amon kaugalingon nga itololok subong sang mga tibakla, kag subong sini kami sa itololok nila.”

← Chapter 12 Jump to: Chapter 14 →