1 Kings 10

Ika 2018 Bible

← Chapter 9 Jump to: Chapter 11 →

1Ogẹn okpoho wụ eze Shẹba gi nụ otiti Solomọnụ lẹ ẹfan Osolobuẹ ọ rị e ye ọghọ, ọ nọ bịa d'e gi ajụjụ ndị zeni lele ẹ.

2Ọ nọ bịa Jerusalẹm, ya lẹ igunrun sọnkọn'a; o gi anyịnyan-mkpukpuke ndị busọnmẹ ihiẹn bu ọda e shin ọhụnma lẹ goru bugbu enwẹn ẹ ọda lẹ ihiẹn-mma ṅanrannị w'a chọ achọ bịa. Ọ nọ bịa d'e kunrun Solomọnụ d'e du ẹ ku; wẹ nọ kuchanrịn ihiẹn ile okpoho hụ chọ nị wẹ ku oku ẹ.

3Eze wụ Solomọnụ a zachanrịn a ajụjụ ile ọ jụ a; onwọnni hụn eze salẹni ẹka za mọbụ kọwan'a.

4Ogẹn okpoho hụ wụ eze Shẹba gi hụngụ amamihiẹn Solomọnụ lẹ obi-eze ọ tụn

5lẹ ihiẹn-oriri a rị teburu ẹ, hụn kẹ o dọnmẹsọnmẹ ịhaịmẹ ẹ, kẹ ndị e jẹnn'ẹ ozi dọn a rụn ọrụn wẹ lẹ ẹkwa wẹ yisọnmẹ; kẹ ndị e buye ẹ manya nọ, lẹ ẹjan w'a kpọ ọkụn ọ chụnyesọnmẹ imẹ Ụlọ-nsọ Osolobuẹ, ndụn a gụ a!

6Ọ nọ sị eze wụ Solomọnụ, “Ihiẹn m nụ kẹ m rị alị m banyeni ịyụ lẹ amamihiẹn i wụ ezioku.

7Kanị e te gini m ihiẹn ndịnị dọn d'e ru ni a bịa m nwan d'e gi ẹnya m hụn. Ezioku-ezioku, agwarudẹni wẹ m ahanmahan: kẹ amamihiẹn i kẹ akụ-lẹ-ụba ị a kakẹnmẹkẹ ihiẹn wẹ gwa m.

8Ndị nke i e nwọnkẹmẹkẹ ẹwẹrẹ! Ịhaịmẹ i, hụn a rị ebe ị rị ogẹn ile a nụ ihiẹn ị rị e gi amamihiẹn i e ku, e nwọnkẹmẹkẹ ẹwẹrẹ!

9Ọjịja-mma ya rịnị Osolobuẹ wụ Chuku i, hụn ihiẹn i sụọ, ọ nọ bu i che ukpo Izrẹlụ. Ufiri ihiẹn-ọsụsụọ itẹbitẹ Osolobuẹ nwọnni Izrẹlụ k'o gi tumẹ i eze, n'ị hụn ụzọ kwadọn ezi-omumẹ lẹ imẹ ihiẹn furuni.”

10Ọ nọ ye eze goru kilo ọgụn-ẹnọ kwasị nnụ-uku-ẹnọ (4,480kg), lẹ ihiẹn e shin ọhụnma bugbu enwẹn ẹ ọda lẹ ihiẹn-mma ṅanrannị w'a chọ achọ. Onwọnzini ogẹn wẹ gi buhẹ ihiẹn e shin ọhụnma buhan ọda kẹ hụn okpoho wụ eze Shẹba ye Eze wụ Solomọnụ.

11(Ụgbọ ndịnẹi Hiram zi, hụn gha Ofiri buhẹ goru, a ghazịghọ ebẹhụ buhẹ ezigbo osisi al'mugu w'a chọ achọ bu ọda lẹ ihiẹn-mma ṅanrannị w'a chọ achọ.

12Eze gi osisi-al'mugu hụ kwọndọnsọnmẹ Ụlọ-nsọ Osolobuẹ lẹ obi-eze, gizi ẹ mẹmẹni ndị egu ụbọ mmaka lẹ ụbọ-layẹ. Kete mgbẹhụ, o ke nwọn onyẹ buhẹzi mọbụ hụndẹ osisi-al'mugu buhan ọda ẹrịra imẹ Izrẹlụ.)

13Eze wụ Solomọnụ nkẹ yechanrịn okpoho hụ wụ eze alị Shẹba ihiẹn ile ọ chọ lẹ hụn ọ rịọ, cheni ihiẹn ndị o gi ihiẹn-ẹka a ye ẹ. Ọ nọ lashi alị a, ya lẹ ndị idibo ẹ ile ya lẹ wẹ wị.

14Goru hụn e ru Solomọnụ ẹka ahụa-ahụa wụ drọm ẹsa lẹ mkpikpi hụn wụ kilo nnụ-uku ẹtọ-kwasị-ọgụn (23,000kg),

15cheni hụn ndị a ghaha alị a lẹ ndị-afịa a tụha lẹ hụn ndị-nze Arebịa ile lẹ ndị gọvanọ alị Izrẹlụ a tụhasọnmẹ.

16Eze wụ Solomọnụ gi goru wẹ tipịa mẹmẹ akpaịn ọgụn-iri shịanị; goru kilo isin kẹ wẹ gi mẹmẹ akpaịn ohu-ohu.

17Ọ nọ gizi goru wẹ tipịa mẹmẹ akpaịn nta ọgụn-mmisẹn. Goru kilo ohu lẹ mkpikpi lẹzi ẹkẹrẹ kẹ wẹ gi mẹmẹ ohu-ohu imẹ ndị ntanị. Eze nọ bu wẹ che imẹ obi-eze ẹ, “Obi-eze Ẹgboko Lẹbanọnụ”.

18Eze nọ mẹmẹ ẹregede ukpo-eze, gi ihiẹn eze-enyi nyan imẹ ẹ, gi ezigbo goru nyan ẹhụ a.

19Mgbanyinrin isin kẹ wẹ gi e ru ebe ocho ukpo hụ rị; ibe isi ẹ mẹ ohi-ohi. Ukpo hụ nwọn ẹka azụụnnị lẹ azụụnnị. Ẹwọrọ ohu-ohu wẹ kpụ rịsọnmẹ ẹhụ ẹka ẹbụbụọ hụ.

20Ẹwọrọ mmẹbụọ wẹ kpụ wuzosọnmẹ mgbanyinrin isin ahụn: mgbanyinrin ohu-ohu nwọnsọnmẹ ẹwọrọ ohu-ohu azụụnnị lẹ azụụnnị. Emẹmẹtuni wẹ ụdị a imẹ alị-eze ọwụlẹ.

21Ezigbo goru wẹ buchelẹni ihiẹn ọzọ kẹ wẹ gi mẹmẹ mkpu ile Eze wụ Solomọnụ nwọn; goru kẹ wẹ gi mẹmẹ arịa ile rị obi-eze ẹ, “Obi-eze Ẹgboko Lẹbanọnụ”. Onwọnni ihiẹn wẹ gi siliva mẹmẹ, makẹni w'e lelịa siliva elelịa ogẹn Solomọnụ.

22Eze nwọnsọnmẹ igunrun ụgbọ-mirin wẹ gi a zụ afịa imẹ ohimin; wẹ lẹ ndị nke Hiram gba a wị. Ahụa ẹtọ-ẹtọ kẹ wẹ gi e bulụa goru, siliva, eze-enyi lẹ ọzọ lẹ adaka.

23Eze wụ Solomọnụ kachanrịn ndị-nze ile rị ụwa ọdanfịn a wụ, kachanrịn wẹ amamihiẹn e nwọn.

24Ụwa ile hụ a chọha Solomọnụ nị wẹ d'a gọn ntịn ihiẹn ọ rị e gi amamihiẹn Osolobuẹ ye ẹ e ku.

25Ahụa-ahụa, ndị ile rị a bịanị hụ e buhẹ ihiẹn, ihiẹn siliva lẹ goru, ẹkwa, ihiẹn-ọgụn, ihiẹn-akụnkụn e shin ọhụnma lẹ ndị asụọnị, ẹshin lẹ anyịnyan-mulu.

26Solomọnụ kpọn ụgbọ-ẹshin lẹ ẹshin kpọnjun: ụgbọ-ẹshin ẹ rị nnụ kwasị nnụ-uku (1,400) ẹshin ẹ nnụ-uku mmẹbụọ (12,000). O butọsọnmẹ wẹ obodo rị ichẹn-ichẹn ọ hanrịn lẹzi imẹ Jerusalẹm ya lẹ enwẹn ẹ wụ eze bi.

27Eze wụ Solomọnụ mẹ siliva barahị imẹ Jerusalẹm nọkẹ akpụrụ-iyi, mẹ osisi sida jun ụzọ ile kẹ osisi sikamọ-figi dọn jun Shẹfẹla — ukun ugu ndị rị Juda.

28Ijiptu lẹ Kue kẹ wẹ gha e ṅọnlụanị Solomọnụ ẹshin — Kue kẹ ndị-afịa eze a nọ e ṅọnlụa wẹ.

29Akpụrụ siliva ọgụn-iri kwasị nnụ kẹ ndị-afịa eze gi e ṅọn ụgbọ-ẹshin ohu imẹ Ijiptu, ẹshin ohu akpụrụ siliva iri-kwasị ọgụn-ẹsa. Wẹ e reyezi ndị-nze alị Hẹti lẹ alị Aram ụgbọ-ẹshin lẹ ẹshin.

← Chapter 9 Jump to: Chapter 11 →