1 Kings 5

Ika 2018 Bible

← Chapter 4 Jump to: Chapter 6 →

1Ogẹn Hiram wụ eze Taya gi nụ nị e kingụọ wẹ Solomọnụ eze gi nọkin ẹnya nẹdi ẹ wụ Defidi, ọ nọ zi idibo ẹ d'a hụn Solomọnụ, makẹni kẹ Defidi rị ndụn Defidi lẹ Hiram a sụọ asụọ.

2Solomọnụ nọ sị wẹ sị Hiram,

3“Yụ nwẹn a marịnghọ nị agha fihunmẹ Defidi nẹdi m azụụn ile anịn'a tụnnị Osolobuẹ wụ Chuku ẹ ụlọ-nsọ wẹ nọ a kpọku Ẹfan Osolobuẹ — makẹni Osolobuẹ chọ n'o bugụ ndị-iṅẹnrẹn ẹ che ẹ okpuru ụkụ.

4Kanị Osolobuẹ wụzị Chuku m e yegụọ m udọn azụụn ile, onwọnni onyẹ ọwụlẹ rị a lụsọn m ọgụn, onwọnni nsọngbu ọwụlẹ rị alị m.

5M chọ nwan nị m tụnnị Osolobuẹ wụ Chuku m Ụlọ-nsọ wẹ nọ a kpọku Ẹfan a nọkẹ kẹ Osolobuẹ dọn gwa nẹdi m wụ Defidi, ogẹn o gi sị, ‘Nwa ị hụn m jẹnkọ d'e buche ukpo i jẹnkọ d'a tụnnị m ụlọ w'a nọ a kpọku Ẹfan m.’

6“Gwa wẹ nwan, nị wẹ gbuhẹni m osisi sida ẹgboko Lẹbanọnụ. Ndị nke m jẹnkọ d'e sọn ndị nke i rụn; m k'a kụ ndị nke i ụgwọ ọwụlẹ ị sị m kụ. Y'a marịnghọ nị ẹnyi enwọn onyẹ ọwụlẹ ma gbu osisi nọkẹ ụnụ ndị Sidọnụ.”

7Ogẹn Hiram gi nwọnhẹn ozi Solomọnụ, obi nọ sụọ a ụsụọ ọda-ọda, ọ nọ sị, “Ọjịja-mma ya rịnị Osolobuẹ tannị, n'o yeọlẹ Defidi nwa nwọn uche n'ọ kị okẹn alịnị.”

8Ya Hiram nọ zi wẹ ozini jẹnni Solomọnụ: “A nụgụọ m ozi i zihẹni m; m jẹnkọ d'e mẹn'i ihiẹn ile ị chọ banyeni ogwe sida lẹ paịnị.

9Ndị ọrụn m jẹnkọ d'a gha ẹgboko alị Lẹbanọnụ buhẹ wẹ mkpẹnrẹn Ohimin Mẹditerenia, a kpagbama wẹ wẹ, nyinrin elu wẹ, nyan wẹ elu Ohimin nyanjẹn ebe ọwụlẹ i ku, ẹnyi a nọ ebẹhụ tọpụ wẹ, y'e buru wẹ. Ihiẹn m chọ, ihiẹn yụ nwẹn sikọ d'e ye m, wụ ihiẹn-oriri hụn ndị rị obi-eze m k'e ri.”

10Ya Hiram nọ buhẹchanrịn nị Solomọnụ ogwe sida lẹ paịnị ile ọ chọ,

11Ahụa-ahụa, Solomọnụ nkẹ hụ e buye Hiram ẹkpa ọka-witi uku nnụ-uku ọgụn (20,000) ndị rị obi-eze Hiram k'e ri lẹ drọm ofigbọn-olivu nnụ-uku ọgụn (20,000).

12Ya wụ, Osolobuẹ ye Solomọnụ amamihiẹn k'o dọn kwe ẹ nkwa. Ẹgbata Hiram lẹ Solomọnụ rị mma; wẹ ẹbụọ nọ kwetarị nkwa iyeni ibe wẹ ẹka.

13Ya eze wụ Solomọnụ nọ gha imẹ Izrẹlụ ile wepụha ikẹnnyẹ o jẹnkọ d'a wa ọrụn ye olu, ikẹnnyẹ nnụ-uku iri-kwasị-ọgụn (30,000).

14Ọ nọ zijẹnmẹ wẹ Lẹbanọnụ itu-itu: ifọn-ifọn madụ nnụ-uku iri (10,000) wẹ nọ ifọn ohu imẹ Lẹbanọnụ, a lụaha wẹ d'a nọ ifọn ẹbụọ ụlọ. Adoniram kị ndị ọrụnnị.

15Solomọnụ e nwọnzighọ madụ nnụ-uku iri-kwasị-ọgụn-ẹtọ (70,000) ndị e bu ibu lẹ nnụ-uku ọgụn ẹnọ (80,000) ndị a nọ elu-ugu a wa ọmụma, a tụ,

16cheni ndị-isi ọrụn ọgụn-mmisẹn kwasị nnụ-uku ẹtọ (3,300) e lepụ ọrụn ahụn ẹnya, a gwa ndị-ọrụn ahụn ihiẹn wẹ k'e mẹ.

17Kẹ eze dọn gwa wẹ, wẹ nọ bupụhasọnmẹ ezigbo ọmụma hi-ogbe nị wẹ gi gbe iyetọ Ụlọ-nsọ — iyetọ wẹ gi ọmụma wẹ tụ ọhụnma gbe.

18Ndị ọrụn Solomọnụ lẹ ndị nke eze Hiram lẹ ndị alị Gẹbalụ tụ ọmụma wẹ gi tụn Ụlọ-nsọ, kwademẹ ọmụma ndị ahụn lẹ osisi nị wẹ nị gi tụn ụlọ-Osolobuẹ.

← Chapter 4 Jump to: Chapter 6 →