1 Kings 16

Ika 2018 Bible

← Chapter 15 Jump to: Chapter 17 →

1Osolobuẹ nọ zi Jehu nwa Hanani d'a gwa Baasha ihiẹn o jẹnkọ d'e mẹ Baasha; ya sị a,

2“Mmẹ gha imẹ uzunzun ị rị weshi i elu, tumẹ i n'ị kị ndị nke m wụ Izrẹlụ ndị rị azụụnnị. Kanị y'e sọnmẹ nzọmụkụ Jerobụam, dọ ndị nke m wụ Izrẹlụ ye imẹ njọ, e gi wẹ njọ wẹ kpasu m iwe.

3Lee ẹ, m jẹnkọ nwan d'a zapụ Baasha lẹ ikpụlọ a; m k'e mẹ ikpụlọ ị ihiẹn m mẹ nke Jerobụam nwa Nebatị.

4Nkitẹ k'e ri ndị nke Baasha hụn k'a nwụntọ imẹ obodo, udele e ri ndị hụn k'a nwụntọ ọfịa.”

5Ihiẹn ndị ọzọ ile mẹni ogẹn Baasha gi rị a kị lẹ ihiẹn o mẹ lẹ ihiẹn ndị ọ rụn rị imẹ ẹkụkwọ w'e detọ ihiẹn mẹ ogẹn ndị-nze hụn kịsọnmẹ Izrẹlụ Ẹbamịn-ugu.

6Baasha a nwụnhụn, laburu ndị nẹdi ẹ, wẹ nọ li ẹ ye obodo Tẹza, nwa a wụ Ẹla nọ rikin ẹ eze.

7Osolobuẹ ku ihiẹnni o gi onyẹ-amụma wụ Jehu nwa Hanani ku banyeni Baasha lẹ ikpụlọ a yeni ihiẹn ile rịlẹni mma ẹnya Osolobuẹ hụn Baasha mẹ; ihiẹn ndịnị k'o gi kpasu Osolobuẹ iwe, makẹni o mẹ ihiẹn ikpụlọ Jerobụam mẹ lẹ makẹni o tikpọ ezi-lẹ-ụlọ Jerobụam.

8Ọ rị ahụa isin kwasị ọgụn Asa kịma Juda kẹ Ẹla nwa Baasha họnrin eze Izrẹlụ; ahụa ẹbụọ k'ọ kị; Tẹza k'ọ nọ kị.

9Zimri, ọkị-agha a hụn a kị ahanmahan ụgbọ-ẹshin agha a, nọ zun'ẹ eje-umẹ. Ụhụọhịn ohu, ebe Ẹla rị Tẹza, iwe Aza, onyẹ hụn obi-eze ẹ rị ẹka a, a ra manya a ragbu enwẹn,

10Zimri nọ banhan, gbu ẹ. Hụn mẹ ahụa ẹsa kwasị ọgụn Asa kịma Juda kẹ Zimri gbu Ẹla. Zimri nọ wụrụ eze, nọkin ẹnya Ẹla.

11Hụn Zimri gihụ kịma, werigụ ọnọdị ukpo-eze, ọ nọ gbupụ ikpụlọ Baasha ile, onwọnni akpụ okẹnnyẹ ohu o gbuhọdụ, kẹ umunẹ ẹ kẹ ndị ọwụ a.

12Ẹrịra kẹ Zimri dọn gbupụ ndị ikpụlọ Baasha ile; ya kẹ ihiẹn Osolobuẹ gi onyẹ-amụma wụ Jehu ku gi mẹzu,

13makẹ njọ ile Baasha lẹ nwa a wụ Ẹla mẹ, njọ hụn wẹ dọ ndị Izrẹlụ ye imẹ ẹ, gi mmọn nwọnlẹni isi wẹ kọmasọnmẹ kpasu Osolobuẹ wụ Chuku Izrẹlụ iwe.

14Ihiẹn ndị ọzọ ile mẹni ogẹn Ẹla gi rị a kị lẹ ihiẹn ile o mẹ rị imẹ ẹkụkwọ wẹ detọ ihiẹn mẹ ogẹn ndị-nze hụn kịsọnmẹ ndị Izrẹlụ.

15Ọ rị ahụa ẹsa kwasị-ọgụn Asa kịma Juda kẹ Zimri kịma Izrẹlụ Ẹbamịn-ugu, akpọhịn ẹsa k'ọ kị; Tẹza k'ọ nọ kị. Ndị-agha Izrẹlụ arị ụlọ ogẹn ahụn, wẹ kehunmẹ Gibẹtọnụ, obodo rị alị ndị Filistia.

16Mgbe ndị-agha hụ gi nụ nị Zimri e zugụọnị eze eje-umẹ, gbu ẹ, wẹ nọ weri Omri hụn a kị ndị-agha ile kin ẹ eze Izrẹlụ, ụhụọhịn ahụn daị, ebẹhụ wẹ rị ọgbọ agha.

17Ya kẹ Omri lẹ ndị-agha Izrẹlụ ile nọ gha Gibẹtọnụ kin azụụn, kehunmẹ isi-alị wẹ wụ Tẹza, ebẹhụ Zimri rị.

18Ogẹn Zimri gi hụn a nị obodo hụ a bangụọ wẹ ẹka, ọ nọ shi ebẹhụ kachanrịn e ze w'a warị imẹ obi-eze, ọ nọ mụ ọkụn ye obi-eze hụ ọ rị imẹ ẹ, ọkụn hụ a dụngbu ẹ,

19makẹ njọ ndị o mẹ, e mẹ ihiẹn rịlẹni mma ẹnya Osolobuẹ, e sọn nzọmụkụ Jerobụam, e mẹ njọ hụn Jerobụam mẹ hụn ọ dọ Izrẹlụ ye imẹ ẹ.

20Ihiẹn ndị ọzọ Zimri mẹ lẹ eje-umẹ hụ o zu wẹ gi gbu eze rị imẹ ẹkụkwọ wẹ detọ ihiẹn ndị mẹ ogẹn ndị-nze hụn kịsọnmẹ Izrẹlụ Ẹbamịn-ugu.

21Ya kẹ ndị Izrẹlụ rị azụụn hụ nọ kebe: azụụn ohu hụ a kwadọn Tibni nwa Ginatị n'ọ wụrụ eze, azụụn hụn ẹbọ hụ a kwadọn Omri.

22Kanị ndị itu Omri nọ karị ndị itu Tibni nwa Ginatị ẹka. Ya Tibni nọ nwụnhụn, Omri nọ họnrin eze.

23Ọ rị ahụa mmanaị kwasị ọgụn Asa kịma Juda kẹ Omri họnrin eze ndị Izrẹlụ rị azụụn hụn ẹbọ; ahụa mmẹbụọ k'ọ kị: isin imẹ wẹ k'ọ nọ obodo Tẹza kị,

24ọ nọ nwan gi akpụrụ siliva nnụ-uku isin wụ talẹnti ẹbụọ, ṅọnnarịn Shẹma ugu Sameria, pumẹ obodo elu ugu hụ, gi ẹfan Shẹma ahụn te nwọn ugu hụ kpọ a “Sameria”.

25Kanị Omri mẹ ihiẹn rịlẹni mma ẹnya Osolobuẹ, mẹ njọ mẹkarị ndị ile bun'ẹ ụzọ:

26O sọnchanrịn nzọmụkụ Jerobụam nwa Nebatị, mẹsọnmẹ njọ hụn Jerobụam mẹ, hụn ọ dọ ndị Izrẹlụ rị azụụn nke wẹ ye imẹ ẹ, e gi wẹ mmọn nwọnlẹni isi wẹ kọmasọnmẹ kpasu Osolobuẹ wụ Chuku Izrẹlụ iwe.

27Ihiẹn ndị ọzọ ile mẹni ogẹn Omri gi rị a kị, ihiẹn ile o mẹ, rị imẹ ẹkụkwọ wẹ detọ ihiẹn mẹ ogẹn ndị-nze hụn kịsọnmẹ Izrẹlụ.

28Omri a nwụnhụn, laburu ndị nẹdi ẹ, wẹ nọ li ẹ ye obodo Sameria, nwa a wụ Ehabụ nọ họnrin eze, nọkin ẹnya a.

29Ọ rị ahụa ẹbụọ arịa ọgụnnaị Asa kịma Juda kẹ Ehabụ nwa Omri họnrin eze ndị Izrẹlụ; Sameria k'ọ nọ kị; ahụa ẹbụọ kwasị ọgụn k'ọ kị.

30Ehabụ nwa Omri mẹ ihiẹn rịlẹni mma ẹnya Osolobuẹ, mẹkarịdẹ onyẹ ọwụlẹ imẹ ndị bun'ẹ ụzọ.

31Onwọndẹni ihiẹn ọ kpọ a n'ọ rị e mẹ njọ hụn Jerobụam nwa Nebatị mẹ; ọ nọzị jẹn d'a lụrụ Jezibẹlụ nwa Ẹt'baalụ eze ndị alị Sidọnụ, femẹ mmọn wẹ wụ Baalụ, kpọman'a isi alị.

32Ọ tụn ukpo wẹ a nọ chụnnị Baalụ ẹjan imẹ ụlọ-mmọn Baalụ hụn ọ tụn imẹ obodo Sameria.

33O tumẹzighọ osisi mmọn Ashẹra. Ehabụ mẹ ihiẹn kpasu Osolobuẹ wụ Chuku Izrẹlụ iwe karị ndị-nze ile bun'ẹ ụzọ kị Izrẹlụ.

34Ogẹn Ehabụ kẹ Hiẹlụ onyẹ obodo Bẹtẹlụ gi tụndọnzi obodo Jẹriko. O gbegụ iyetọ a, okẹnnyẹ ibuzọ a wụ Abiram nọ nwụnhụn; o yikingụ ọnụ-mgbọn ẹ, okẹnnyẹ ikpanzụụn a wụ Sẹgubu nọ nwụnhụn, ihiẹn Osolobuẹ gi Joshụa nwa Nọnụ ku e mẹzu.

← Chapter 15 Jump to: Chapter 17 →