1 Kings 19

Ika 2018 Bible

← Chapter 18 Jump to: Chapter 20 →

1Ehabụ nọ gwachanrịn nwunyẹ ẹ wụ Jezibẹlụ ihiẹn ile Ẹlaịja mẹ, gwa a k'o dọn gi ọpịa-agha gbuchanrịn ndị-amụma Baalụ.

2Ya Jezibẹlụ nọ zi onyẹ-ozi d'a sị Ẹlaịja, “Mmọn ndị ẹnyi e fe wẹ mẹ m ihiẹn, mẹshi m'ẹ ikẹn, omẹni o ru mgbeni ekile nị m'e ke mẹ yụ nwẹn ihiẹn i mẹ wẹ.”

3Ya kẹ egun nọ tụma Ẹlaịja, ọ nọ gba ọsọ-ndụn. Ọ gbaru obodo Biẹshẹba rị alị Juda, ọ nọ la odibo ẹ tọ ebẹhụ,

4ya nwẹn nọ shi imẹ atụ, jẹn ijẹn akp'ọhịn ohu. O ru ukun ẹfịfịa brum ohu, ọ nọ nọdị alị okpuru ẹ, rịọma Osolobuẹ n'o weri ndụn a: “Euu, Osolobuẹ ọnwan e higụọ. Weri nwan ndụn m; akanị m ndị nẹdi m wẹ mma!”

5Ya ọ nọ dinẹ okpuru osisi hụ, ranhịn. Ozigbo hụ, mmọn-ozi nọ mẹtụ a ẹka, sị, “Lihi n'i ri ihiẹn-oriri.”

6O lehunmẹ ẹnya, e lee brẹdi wẹ gi ikeke ọkụn shi lẹ ẹgbo-mirin ibẹka isi ẹ ebẹhụ o dinẹ! Ọ nọ ri brẹdi hụ, ra mirin, ọ nọ dinẹzi.

7Mmọn-ozi Osolobuẹ hụ nọ bịa nke mgbe ẹbụọ, mẹtụzị a ẹka, sị, “Lihi n'i ri ihiẹn-oriri, nị ebe i jẹnkọ e tekẹ.”

8Ya kẹ Ẹlaịja nọ lihi, ri, ra. Ọ nọ gi ihiẹn-oriri hụ o ri hụn ndụn o gi jẹn ijẹn uhinhin lẹ efinnaị ọrọgbọ akp'ọhịn ọgụnnaị, n'o d'e ru Horẹbụ, Ugu Osolobuẹ.

9Ọ nọ banye okporo ohu rị ebẹhụ, dịnọ ebẹhụ uhinhin ahụn. Osolobuẹ nọ sị a, “Ẹlaịja, k'ị rị e mẹ ebeni?”

10Ẹlaịja nọ sị, “M hụ a lụ ọnwụn makẹ Osolobuẹ wụ Chuku hụn nwọn ikẹn ile, makẹni ndị Izrẹlụ a latọgụọ Iwu i ye wẹ; e tikpọgụọ wẹ ukpo nchụn-ẹjan ị ile, gi ọpịa-agha gbu ndị-amụma ị. Mmẹ sụọ họdụ; wẹ rị nwan a chọ nị wẹ gbu mmẹ nwẹn!”

11Osolobuẹ nọ sị a, “Pụha imẹ okporoni d'e wuzo elu-uguni ihun Osolobuẹ.” Osolobuẹ nọ ghafe: okẹn ufere nọ buruni Osolobuẹ ụzọ, e tiwa ugu hụ, e tikpọsọnmẹ ọmụma, kanị Osolobuẹ arị imẹ ufere hụ; ufere a kpọgụ, alị nọ mẹhunmẹ, kanị Osolobuẹ arịkwọ alị-ọmahihie hụ;

12alị e mẹhunmẹgụ, ọkụn nọ pụha, kanị Osolobuẹ arị imẹ ọkụn ahụn; ọkụn ahụn a ghafegụ, olu rị e ku ẹkẹrẹ-ẹkẹrẹ nọ bịa.

13Ẹlaịja a nụ olu hụ, ọ nọ dọ ẹwuru ẹ kpumẹ ihun, jẹn d'e wuzo ọnụ okporo hụ. Idẹnmizi, olu ohu nọ sị a, “Ẹlaịja, k'ị rị ebeni e mẹ?”

14Ẹlaịja nọ sị, “M hụ a lụ ọnwụn makẹ Osolobuẹ wụ Chuku hụn nwọn ikẹn ile. Kanị ndị Izrẹlụ a latọgụọ Iwu i hụn ye wẹ; e tikpọgụọ wẹ ukpo nchụn-ẹjan ị ile, gi ọpịa-agha gbu ndị-amụma ị. Mmẹ sụọ họdụ; wẹ rị nwan a chọ nị wẹ gbu mmẹ nwẹn!”

15Osolobuẹ nọ sị a, “Gha ụzọ ị gha bịa kin azụụn, y'e shi alị ọkpọ-nkụn Damaskọsụ. I ru ebẹhụ, y'e hu udẹn-ntumẹ kpu Hazaẹlụ gi tumẹ ẹ eze alị Aram,

16y'e huzi udẹn-ntumẹ kpu Jehu nwa Nimshi gi tumẹ ẹ eze ndị Izrẹlụ, huzi udẹn-ntumẹ kpu Ẹlaịsha nwa Shafatị onyẹ Ebẹlụ-Mehola tumẹ ẹ onyẹ-amụma n'ọ nọkin ẹnya ị.

17Jehu nwọn gbu onyẹ ọwụlẹ wanahịn ọpịa-agha Hazaẹlụ; Ẹlaịsha nwọn gbu onyẹ ọwụlẹ wanahịn ọpịa-agha Jehu.

18Kanị, m jẹnkọ d'e dọnmẹ madụ nnụ-uku ẹsa (7,000) imẹ ndị Izrẹlụ ndụn — ndị ile gbutulẹnini mmọn wụ Baalụ osekpu mọbụ susutu ẹ ọnụ.”

19Ya kẹ Ẹlaịja nọ gha ebẹhụ pụ, ọ nọ hụn Ẹlaịsha nwa Shafatị. Ẹlaịsha gi okẹn-efin ẹnọ kwasị ọgụn wẹ gi a rụn ugbo rị a dụkpọ alị ugbo, okẹn-efin wẹ kẹngbama ẹbụọ-ẹbụọ. Ya nwẹn kikọ ẹbụọ ikpanzụụn rịn'a. Ya kẹ Ẹlaịja nọ jẹnburu Ẹlaịsha, yọ ẹkwa ya nwẹn kpu ẹ.

20Ẹlaịsha nọ la okẹn-efin ndị hụ tọ, gbaburu Ẹlaịja, sị a, “Dodo, nị m d'a gwagụ nẹdi m lẹ nnẹ m nọdị ọhụnma, a bịa m d'e sọnrin i.” Ẹlaịja nọ sị a, “E jẹn nwan, kị m te gi nwan kwọndọn i?”

21Ẹlaịsha nọ la Ẹlaịja tọ, kin azụụn; o weri okẹn-efin ẹ ẹbụbụọ hụ gbu, gi osisi wẹ gi kpọma wẹ lẹ hụn a dụkpọ alị rịn'a kpashimẹ ọkụn, shi efin ndị ahụn. Ọ nọ ye ndị alị anụ hụ ri, wẹ ile nọ ri. Ya ọ nọ buli, jẹnmẹ d'e sọnmẹ Ẹlaịja, họnrin onyẹ nsọnmazụụn a.

← Chapter 18 Jump to: Chapter 20 →