1 Kings 8 — Ika 2018 Bible

1Ya Eze wụ Solomọnụ nọ kpọzu ndị-ichẹn Izrẹlụ ile, ndị-isi ebọn mmẹbụọ rịn'a lẹ ndị kịsọnmẹ ikpụlọ ichẹn-ichẹn rị Izrẹlụ, sị wẹ bịa d'e kunrun ẹ imẹ Jerusalẹm, nị ya lẹ wẹ hụn ụzọ jẹn Zayọnụ, Obodo Defidi tụn, d'e buhẹ Ẹkpẹti-Nkwerigbama Osolobuẹ.

5Eze wụ Solomọnụ lẹ ndị Izrẹlụ ile fihunmẹn'ẹ nọ nọ ihun Ẹkpẹti hụ gbu anụ bu ọda gi chụnyeni Osolobuẹ ẹjan, atụnrụn lẹ efin bu ọda hụn wẹ salẹni ẹka gụn mọbụ detu.

6Ya ndị nchụn-ẹjan nọ bu Ẹkpẹti-nkwerigbama Osolobuẹ hụ shi ọnọdị a imẹ mmughẹ rịchanrịn imẹ-imẹ Ụlọ-nsọ, Ebe Kachanrịn Nsọ, bu ẹ che okpuru nku chẹrobu ndị ahụn.

7Nku chẹrobu ndị hụ shịapụ elu Ẹkpẹti hụ, Ẹkpẹti hụ lẹ ẹgbe ndị wẹ gi e bu ẹ hụ okpuru nku ndị hụ.

8Ẹgbe ndị hụ sue usue ọda nke wụnị w'a a ghadẹ Ebe Rị Nsọ, ya wụ, mmughẹ rị ihun mmughẹ wẹ rị imẹ ẹ, e legha isi wẹ, kanị onyẹ rịlẹni Ebe Rị Nsọ ara legha wẹ; wẹ hụkwọ nwan ebẹhụ d'e ru tannị.

9Onwọnni ihiẹn ọzọ rị imẹ Ẹkpẹti hụ karị ibe ọmụma ẹbụọ hụ Mozizi buche imẹ ẹ ugu Horẹbụ wụ Saịnaị, ebẹhụ Osolobuẹ lẹ ndị Izrẹlụ nọ kwetarị nkwa kẹ wẹ ghagụ Ijiptu pụha.

10Ogẹn ndị nchụn-ẹjan gi gha Ebe rị Nsọ pụha, orukpu nọ jun imẹ Ụlọ-nsọ Osolobuẹ hụ.

11Ndị nchụn-ẹjan hụ asazịnị ẹka nọdị rụn ọrụn wẹ makẹ orukpu hụ; makẹni ọghọ hụ Osolobuẹ gi bịa jun Ụlọ-nsọ a.

12Ya Solomọnụ nọ sị, “Osolobuẹ e kuọl'a n'o k'e bi imẹ orukpu gitọnị.”

13“A tụngụọnị m'ị nwan Ụlọ-nsọ nwọn ọghọ, ebe i k'e bi jẹnrin ejẹn.”

14Eze wụ Solomọnụ nọ gbehutọ, gọzi ndị Izrẹlụ ile ebẹhụ wẹ ile wuzo.

15Ọ nọ sị: “Ọjịja-mma ya rịnị Osolobuẹ wụ Chuku Izrẹlụ, makẹni ẹka a e mẹzugụọ nkwa o gi ọnụ a kwe Defidi nẹdi m ebe ọ nọ sị,

16‘Kete m ghalẹ alị Ijiptu wepụha ndị nke m, ndị Izrẹlụ, onwọntuni obodo m họrị imẹ ebọn ọwụlẹ rị alị Izrẹlụ nị wẹ nọ a tụn Ụlọ-nsọ n'ọ wụrụ ebe Ẹfan m jẹnkọ d'a rị, kanị a họrịgụọ m Defidi n'ọ hụn ụzọ kị ndị nke m, ndị Izrẹlụ.’

17“Defidi nẹdi m bu ẹ obi n'ọ tụnnị Osolobuẹ Ụlọ-nsọ k'a za Ẹfan Osolobuẹ, Chuku Izrẹlụ.

18Kanị Osolobuẹ nọ sị Defidi nẹdi m, ‘Ebe ị nọ bu ẹ obi n'ị tụnnị m Ụlọ-nsọ jẹnkọ d'a za Ẹfan m, y'e mẹkẹ ebe ị nọ ro ẹ.

19K'osilẹrị, ẹlẹ ịyụ k'a tụn Ụlọ-nsọ hụ; nwa ẹfọ ị k'a tụnnị m Ụlọ-nsọ hụ k'a za Ẹfan m.’

20“Osolobuẹ e mẹzugụọ nkwa hụ o kwe: e rikingụọ m nwan Defidi nẹdi m eze: mmẹ nọdị nwan ukpo-eze, a kị Izrẹlụ nọkẹ kẹ Osolobuẹ dọn kwe nkwa; a tụngụọnị m nwan Osolobuẹ wụ Chuku Izrẹlụ Ụlọ-nsọ jẹnkọ d'a za Ẹfan a.

21E mẹmẹgụọ m ebe wẹ jẹnkọ d'e dọnmẹ Ẹkpẹti ahụn wẹ buche Iwu Osolobuẹ lẹ ndị nẹdi ẹnyi gi kwetarị nkwa ogẹn o gi gha alị Ijiptu wepụha wẹ.”

22Ya Solomọnụ nọ wuzo ihun ukpo nchụn-ẹjan Osolobuẹ, ihun ndị Izrẹlụ ile, kị ẹka zinmẹ elu-igwee,

23sị: “Euu Osolobuẹ, Chuku Izrẹlụ, onwọnni Chuku nọ kẹ yụ, kẹ imẹ elu elu-igwere kẹ alị imẹ ụwa — ịyụ hụn e gisọnmẹ ihiẹn-ọsụsụọ i kwe nkwa a e sọn idibo i ndị gi obi wẹ ile e sọn ụzọ ị:

24Y'e mẹzugụọ nkwa i kwe odibo i wụ Defidi nẹdi m; ihiẹn i gi ọnụ ị kwe nkwa kẹ i gi nwan ẹka ị mẹzu — k'ọ dọn nwan rị tannị.

25“Osolobuẹ, Chuku Izrẹlụ, dodo mẹzuni nwan odibo i wụ Defidi nẹdi m nkwa hụ i kwe ẹ ogẹn ahụn i gi sị, ‘Y'e nwọnbehikọ nwa ị k'a nọ ihun m a kịnị m elu ukpo-eze Izrẹlụ — o mẹkwọnị ụmụ ị e dọnrin ẹnya e mẹ ihiẹn ile kẹ m dọn chọ, nọkẹ k'i dọn mẹ.’

26Euu, Chuku Izrẹlụ, dodo, nị nwan oku i hụn i gi kwe odibo i wụ Defidi nẹdi m nkwa mẹzu.

27“Kanị, nị Osolobuẹ biridẹ nwan elu ụwa ra? Elu-igwere ile, kẹ elu-igwee hụn kachanrịndẹ elu e jẹn, asakọ ẹka ru i, ọrịwụzị Ụlọ-nsọ hụnnị m tụn!

28Ka gọn ntịn ekpere mmẹ wụ odibo i rị e mẹ, a rịọ omikẹn i, dodo Osolobuẹ, Chuku m. Nụ ẹkwan odibo i lẹ ekpere odibo i rị ihun i e mẹ tannị.

29Dodo bukwọ ẹnya zinmẹ Ụlọ-nsọnị uhinhin lẹ efinnaị — ebeni i ku oku ẹ, sị, ‘Ẹfan m k'a rị ebẹhụ’. Gọn ntịn ekpere odibo i bu ihun zinmẹ ebeni mẹ.

30Nụ arịrịọ odibo i lẹ ndị nke i wụ Izrẹlụ wẹ bu ihun zinmẹ ebeni mẹ ekpere. Gha elu-igwee ebe-obibi i nụ ekpere wẹ; ị nụ a, y'a gbagharị wẹ njọ.

31“Omẹni ịhịan mẹ ibe ẹ eje-ihiẹn, nị a sị w'a kun Osolobuẹ, ọ bịa ukpo nchụn-ẹjan ị hụn rị imẹ Ụlọ-nsọnị d'e kun Osolobuẹ,

32dodo nọ elu-igwee nụ a, y'a han eṅẹn. Han nị idibo i eṅẹn: hangbu onyẹ ikpe ma eṅẹn, mẹ ẹ gi isi ẹ buru ihiẹn o mẹ; y'e kuni hụn nwọnlẹni ihiẹn o mẹ ọhụnma, gi ghọsị n'o nwọnni ihiẹn o mẹ.

33“Eṅẹnrẹn mẹri ndị nke i wụ ndị Izrẹlụ agha makẹni ndị nke i mẹ i njọ, nị e rogharị wẹ, buruhẹ i, kweyezin'i, mẹ ekpere, rịọ ị — imẹ Ụlọ-nsọnị,

34dodo, gha elu-igwee nụ, y'a gbagharị ndị nke i wụ Izrẹlụ njọ, wekinhẹn wẹ imẹ alịnị i ye ndị nẹdi wẹ.

35“Omẹni igwere kpọkin akpọhịn, nị mirin ezuezini, makẹni ndị nke i mẹ i njọ, nị e bu wẹ ihun zinmẹ ebeni mẹ ekpere, kpọ Ẹfan ị nị e kweyegụọzịnị wẹ i, latọ njọ wẹ makẹni y'e yeọlẹ wẹ afụnfụn,

36dodo, nọ elu-igwee nụ, y'a gbagharị idibo i njọ, ndị nke i wụ Izrẹlụ, y'a kuzi wẹ ezigbo ụzọ hụ furuni wẹ k'a gha, y'e zi mirin zueye alịnị i ye ndị nke i weri.

37“Omẹni ụnwụn mọbụ ihiẹn rị e gbuni a lụma alịnị mọbụ ndundu e gbu ihiẹn-ugbo mọbụ igurube mọbụ kpamkpam mọbụ nị eṅẹnrẹn kehunmẹ obodo rị imẹ alịnị, ụdị nsọngbu mọbụ ọrịa ọwụlẹ bịanị,

38nị onyẹ ohu mọbụ Izrẹlụ ndị nke ile a bịa d'e mẹ ekpere mọbụ rịọ ị, kị ẹka zinmẹ Ụlọ-nsọnị — omẹkwọnị njọ wẹ mẹ hụ a fụ onyẹ-onyẹ imẹ obi —

39dodo, gha elu-igwee, ebe-obibi i, nụ. Gbagharị, y'e mẹ ihiẹn banyen'ẹ, gi ihiẹn ile onyẹ-onyẹ mẹ sọn ẹ, ebe o mẹ ni y'a marịnghọ obi ẹ (makẹni ịyụ sụọ marịn obi ịhịan ile).

40Mẹ ẹ kẹni wẹ hụn ụzọ a tụ egun i e we wẹ bigụ elu imẹ alị hụn i ye ndị nẹdi ẹnyi.

41“Omẹzini onyẹ alị ọzọ rịlẹni imẹ ndị Izrẹlụ hụn wụ ndị nke i e gi ufiri ọghọ Ẹfan ị gha alị teni bịa —

42makẹni wẹ k'a nụ okẹn Ẹfan ị lẹ ikẹn i lẹ ikẹn hụn ị kpasọnmẹ; ọ bịa ebeni, bu ihun zinmẹ Ụlọ-nsọnị, mẹ ekpere,

43dodo, gha elu-igwee, ebe-obibi i, nụ, y'e mẹ ihiẹn ọwụlẹ otumunyẹ hụ rịọ ị, kẹni ndị ile rị ụwa marịn Ẹfan ị, tụ egun i kẹ ndị nke i wụ Izrẹlụ dọn e mẹ, lẹni wẹ hụn ụzọ marịn nị Ẹfan ị kẹ wẹ gi tụn Ụlọnị m tụn.

44“Ndị nke i jẹn d'a lụsọn ndị iṅẹnrẹn wẹ agha, ebe ọwụlẹ ọ wụ hụn i zijẹn wẹ, nị e bu wẹ ihun zinmẹ Jerusalẹm, obodoni ị họrị, lẹ Ụlọ-nsọnị m tụn makẹ Ẹfan ị, mẹ ekpere,

45dodo, gha elu-igwee nụ ekpere wẹ lẹ arịrịọ wẹ, y'a tụnị wẹ ụya.

46“Omẹni ndị nke i mẹ i njọ — ebe o mẹ ni onwọnni onyẹ ghalẹni e mẹ njọ, ni y'e gi iwe ihiẹn wẹ mẹ bu wẹ che ẹka ndị-iṅẹnrẹn, e mẹri wẹ wẹ, kpụn wẹ shi alị wẹ, ọsụọn'a ebe teni mọbụ ebe rị nsue,

47nị a nọ wẹ alị ndị gini wẹ rohutọ, bihutọ ẹka, nọ alị ndị ahụn mẹrini wẹ, rịọ ị, sị, ‘Ẹnyi e mẹọlẹ njọ; ẹnyi e mẹfiegụọ; ẹnyi e mẹọlẹ eje-ihiẹn’;

48omẹni wẹ gi obi wẹ ile lẹ umẹ-ndụn wẹ ile rogharị buruhẹ i ebẹhụ wẹ rị imẹ alị ndị-iṅẹnrẹn wẹ hụn kpụnrụnnị wẹ, bu ihun zinmẹ alịnị mẹ ekpere — alịnị i ye ndị nẹdi wẹ lẹ obodoni ị họrị lẹ Ụlọ-nsọnị m tụnnị ị n'ọ za Ẹfan ị,

49dodo, gha elu-igwee, ebe-obibi i, nụ ekpere wẹ lẹ arịrịọ wẹ, y'a tụnị wẹ ụya;

50y'a gbagharị ndị nke i, hụn mẹ i njọ; gbagharị ihiẹn ile wẹ mẹ i, y'e mẹ ndị mẹrini wẹ mẹni wẹ omikẹn;

51makẹni ndị nke i kẹ wẹ wụ, ịyụ nwọn wẹ, ndị hụn ị gha Ijiptu, okẹn ọkụn ahụn wẹ gi a kpụ ụzụn, wepụha.

52“Dodo, bukwọ ẹnya ị zinmẹ arịrịọ odibo i lẹ arịrịọ ndị nke i wụ Izrẹlụ, y'e gọn wẹ ntịn ogẹn ọwụlẹ wẹ kwanghọsị ị.

53Makẹni ịyụ họrị wẹ imẹ ndị ile rị ụwa nị wẹ wụrụ nke i: nị ịya kẹ i gi odibo i wụ Mozizi ku ogẹn ịyụ wụ Osolobuẹ Nwọn ikẹn ile gi gha alị Ijiptu wepụha ndị nẹdi ẹnyi.”

54Ogẹn Solomọnụ gi mẹgụ ekpere ndịnị ile, rịọgụ Osolobuẹ ihiẹn ndịnị, ọ nọ lihi ọtọ ihun ukpo nchụn-ẹjan Osolobuẹ ebẹhụ o sekpu bu ẹka zinmẹ elu-igwee e mẹ ekpere hụ.

55Ọ nọ wuzo, weshi olu elu gọzi ndị Izrẹlụ hụ ile zu ebẹhụ, sị,

56“Ọjịja-mma ya rịnị Osolobuẹ hụn ye nwan ndị nke ẹ wụ Izrẹlụ izu-ikẹn k'o dọn kwe nkwa. Onwọnni akpụ oku ohu mẹzulẹni imẹ nkwa ọma ile o gi odibo ẹ wụ Mozizi kwe.

57Osolobuẹ wụ Chuku ẹnyi, ya dodo nọyeni ẹnyi k'o dọn nọyeni ndị nẹdi ẹnyi; y'a latọkwọlẹ ẹnyi mọbụ jụ ẹnyi tọ.

58Ya dodo mẹ obi ẹnyi shi ebe ọ rị, nị ẹnyi hụn ụzọ a gha ụzọ a ile, e mẹ ihiẹn ọ sị ẹnyi mẹ, e sọn uhi ẹ lẹ ụmụ-iwu o yesọnmẹ ndị nẹdi ẹnyi.

59Oku ndịnị, hụn m gisọnmẹ mẹ ekpere ihun Osolobuẹ, y'a rịkwọ Osolobuẹ wụ Chuku ẹnyi nsue kẹ efinnaị kẹ uhinhin, n'ọ hụn ụzọ a tụnị mmẹ wụ odibo ẹ ụya, a tụnị ndị nke ẹ wụ Izrẹlụ ụya, kẹ wẹ dọnsọnmẹ nwọn mkpa ụhụọhịn-ụhụọhịn,

60kẹni ndị ile rị elu-ụwa hụn ụzọ marịn nị Osolobuẹ wụ Chuku lẹni Chuku ọzọ arịa.

61Kanị ụnụ k'e wechanrịnkwọ obi ụnụ ye Osolobuẹ wụ Chuku ẹnyi, e gi uhi ẹ e bi, e mẹ ihiẹn ndị ọ sị ẹnyi mẹ, k'o dọn nwan rị ogẹnni.”

62Ya eze lẹ ndị Izrẹlụ ile nọ chụnyesọnmẹni Osolobuẹ ẹjan.

63Anụ Solomọnụ gbu gi chụnyeni Osolobuẹ ẹjan-ekele wụ efin nnụ-uku ẹbụọ-kwasị-ọgụn (22,000) lẹ atụnrụn lẹ ewu nnụ-uku ọgụn-isin (120,000). Ẹrịra kẹ eze lẹ ndị Izrẹlụ ile gi ha Ụlọ-nsọ Osolobuẹ hụ ye Osolobuẹ ẹka.

64Ụhụọhịn ohu hụ kẹ eze gizi dọn ahanmahan ihun-ezi Ụlọ-nsọ Osolobuẹ hụ nsọ, nọ ebẹhụ chụnyesọnmẹ ẹjan ichẹn-ichẹn wẹ gi ọkụn a chụnye, kẹ hụn w'a dụnkwama ọkụn kẹ ẹjan-ọka kẹ ẹjan-ekele w'a dụn ụtọrọ a sụọ ọkụn, makẹni ukpo nchụn-ẹjan ahụn wẹ gi igwe-bronzu mẹmẹ e mẹkẹ ẹkẹrẹ w'a nọ chụn ẹjan ahụn ile bugbu enwẹn ẹ ọda — ẹjan-anụ lẹ ọka lẹ ụtọrọ hụ ile.

65Ya Solomọnụ nọ gi ẹrịra mẹ Mmẹmmẹ Ibi-imẹ-ọdụ nke ahụa hụ, ya lẹ ndị Izrẹlụ hụ ile; igunrun ahụn bugbu enwẹn ẹ ọda. Wẹ ghasọnmẹ alị Izrẹlụ ile bịa — ghakwọrị Lebo-Hamatị d'e ru Iyi Udu-mirin rị okẹn Izrẹlụ lẹ alị Ijiptu. Wẹ gi ọrọgbọ akpọhịn ẹsa mẹ mmẹmmẹ hụ ihun Osolobuẹ ebẹhụ, wezi akp'ọhịn ẹsa chen'ẹ — ọrọgbọ akp'ọhịn mmẹnọ gbegbegbe!

66Eki e fọn, ọ nọ gbashịa wẹ. Wẹ nọ gọzi eze, lama. Ẹfọ hụ a sụọ wẹ ụsụọ, ịghọghọ e jun wẹ obi, makẹ ihiẹn-ọma ile Osolobuẹ mẹni odibo ẹ wụ Defidi lẹ ndị nke ẹ wụ Izrẹlụ.