1 Kings 9

Ika 2018 Bible

← Chapter 8 Jump to: Chapter 10 →

1Ogẹn Solomọnụ gi tụnchanrịngụ Ụlọ-nsọ Osolobuẹ lẹ obi-eze nke ẹ, mẹchanrịngụ ihiẹn ile ọ chọ n'o mẹ,

2Osolobuẹ nọ bịa d'e kunrun ẹ nke mgbe ẹbụọ, k'o dọn bịa d'e kunrun ẹ imẹ Gibiọnụ.

3Osolobuẹ nọ sị a: “A nụgụọ m ekpere lẹ arịrịọ i gi bịa ihun m; e dọngụọ m Ụlọ-nsọnị ị tụn nsọ ghahanị imẹ Ẹfan m rịferi ẹ. Ẹnya m lẹ obi m jẹnkọ d'a rịferi ebẹhụ.

4“Nke i wụnị, omẹni y'e gi obi i ile lẹ obi kụrụ ọtọ sọn m, nọkẹ kẹ nẹdi i wụ Defidi dọn mẹ, mẹ ihiẹn ile m gwa ị, sọn uhi m lẹ iwu m,

5m k'e dọnmẹ ẹbozo i ukpo-eze Izrẹlụ jẹnrin ejẹn, makẹni ọhụn wụ nkwa m kwe Defidi nẹdi i, sị, ‘Y'e nwọnbehikọ nwa k'a nọdị ukpo-eze Izrẹlụ.’

6“Kanị, omẹni ịyụ mọbụ ụmụ ị a gbakitọ m azụụn, la iwu lẹ uhi m tumẹni ụnụ tọ, jẹnmẹ d'e femẹ mmọn-lẹ-iyi, kpọnị wẹ isi alị,

7ya wụ nị m k'e wepụ ndị Izrẹlụ imẹ alị m ye wẹ, a jụ m Ụlọ-nsọnị m dọngụ nsọ m gi e ye Ẹfan m ọghọ. Ogẹn ahụn, Izrẹlụ e họnrin eje-ihiẹn wẹ gi e lu ilu lẹ ihiẹn-ẹmụ ebe ndị alị ndị ọzọ rị.

8Ọsụọkwọn'a nị Ụlọ-nsọnị rị nwan a la ẹnya, ndị ile ghafekọnị k'a gha a jụsọhị, a mụ ẹmụ, a sị, ‘Kị Osolobuẹ mẹni alịnị lẹ ụlọ-nsọnị ụdị ihiẹnni?’

9Wẹ k'a gha a za wẹ, a sị, ‘Makẹni a latọgụọ wẹ Osolobuẹ wụ Chuku wẹ, hụn gha alị Ijiptu wepụha ndị nẹdi wẹ, sọnmẹ mmọn-lẹ-iyi, femẹ wẹ, rụama wẹ — ya haịn Osolobuẹ gi wẹhẹni wẹ eje-ihiẹnni ile.’ ”

10Ogẹn o gi zugụ ahụa ọgụn, Solomọnụ a tụnchanrịngụọ ụlọ ẹbụbụọ hụ — ya wụ Ụlọ-nsọ Osolobuẹ lẹ obi-eze;

11ya kẹ eze wụ Solomọnụ nọ we obodo ọgụn rị imẹ Galili ye Hiram, eze alị Taya, makẹni Hiram buye ẹ osisi sida lẹ paịnị lẹ goru ile ọ chọ.

12Kanị, ogẹn Hiram gi gha alị Taya jẹn d'e lele obodo ndị hụ Solomọnụ ye ẹ, asụọnị w'a.

13Ọ nọ sị Solomọnụ, “Nwẹnẹ-onyẹ, elee ụdị obodo wụ ndịnị i ye m?” Ọ nọ kpọ wẹ alị Kabulu hụn wụ “Alị Nwọnlẹni isi”, ẹfan ahụn tọkwọ wẹ nwan isi d'e ru tannị.

14Ogẹnni, Hiram e zihẹgụọnị eze wụ Solomọnụ talẹnti goru ọgụn isin.

15Ọnwan wụ ọrụn hụ Eze wụ Solomọnụ waye ndị ọ họrị olu, gi wẹ tụn Ụlọ-nsọ Osolobuẹ, obi-eze ẹ, mkpọnyin hụ obi-eze rị elu ẹ, mgbọn Jerusalẹm lẹ obodo Hazọ, Mẹgido lẹ Gẹza.

16(Fẹro, eze alị Ijiptu, maye Gẹza ọgụn, mẹri ẹ, weri ẹ, bi ọkụn y'ẹ. O gbu ndị Kenaanị bin'ẹ, ọ nọ gi ẹ du nwa a hụn o we ye Solomọnụ lụrụ.

17Ya Solomọnụ nọ nwan tụndọnzi Gẹza.) Solomọnụ e dọnzizighọ obodo Bẹt-Họrọnụ rị Mkpọtu Oke,

18Baalatị lẹ Tad'mọ hụn rị alị ọkpọ-nkụn, hụn rị imẹ alị a;

19ọ tụnzịghọ obodo ile o dọnmẹ ihiẹn-ugbo lẹ ndị o dọnmẹ ụgbọ-ẹshin ẹ lẹ ẹshin ẹ lẹzi ihiẹn ile ọ chọ n'ọ tụn imẹ Jerusalẹm, imẹ Lẹbanọnụ lẹ ẹgbẹrẹ hụ ile ọ rị a kị.

20Ndị ahụn ile họdụ imẹ ndị Amọ, ndị Hẹti, ndị Pẹrẹzi, ndị Hivu lẹ ndị Jebusu rị Izrẹlụ. (Ndịnị ẹlẹ ndị Izrẹlụ).

21Wẹ wụ ụmụ-ụmụ ndị ahụn Izrẹlụ salẹni ẹka gbupụchanrịn. Uwẹ kẹ Solomọnụ wa nwan ọrụn ye olu nị w'a rụnn'a ọrụn, k'ọ nọkwọ nwan d'e ru tannị.

22Kanị onwọnni onyẹ Izrẹlụ ọwụlẹ Solomọnụ gi họnrin igbọn; ndị Izrẹlụ wụ ndị-agha a, ndị e yen'ẹ ẹka a kị, ndị o yesọnmẹ ọkwa, ndị-isi agha a lẹ ndị-agha hụn a kịn'a ụgbọ-ẹshin, a kị ndị e nyinjẹn wẹ agha.

23Uwẹ wụ ndị-isi ọrụn ihiẹn ndị hụ Solomọnụ rị a rụn. Wẹ rị madụ iri kwasị ọgụn-ẹsa kwasị nnụ (550); uwẹ kị ndị-ọrụn rị a rụn ihiẹn ndị ahụn.

24Ogẹn nwa Fẹro gi ghagụ Obodo hụ Defidi tụn lụaha obi-eze hụ di ẹ wụ Solomọnụ tụnn'a kẹ Solomọnụ gi tụn mkpọnyin hụ ghahunmẹ ukun obi-eze hụ.

25Mgbe ẹtọ ahụa kẹ Solomọnụ a nọ ukpo nchụn-ẹjan ọ rụnnị Osolobuẹ a chụnyeni Osolobuẹ ẹjan w'a dụn ọkụn lẹ ẹjan-ekele, a mụyeni Osolobuẹ nsẹnsi e cheni wẹ, e gi ẹ a rụnzu ihiẹn Ụlọ-nsọ hụ chọ.

26Eze wụ Solomọnụ rụnsọnmẹzi ụgbọ-mirin imẹ Eziọnụ-Gẹba, hụn nọkunmẹ Ẹlatị rị Ẹdọm, mkpẹnrẹn Ohimin-ufie.

27Hiram nọ zi ndị ọrụn a ndị a nyan ụgbọ-mirin, ndị marịn kẹ ohimin nọ, d'e sọn ndị ọrụn Solomọnụ rụn ọrụn imẹ ụgbọ-mirin ndị hụ.

28Wẹ nọ gi ụgbọ-mirin ndị hụ shi alị Ofiri, gha ebẹhụ bulụa goru kilo nnụ-uku mmisin (16,000kg), buye Eze wụ Solomọnụ.

← Chapter 8 Jump to: Chapter 10 →