bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Ika
/
Ika 2018 Bible
/
1 Kings 22
1 Kings 22
Ika 2018 Bible
← Chapter 21
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
1
Agha esenini ndị Aram lẹ ndị Izrẹlụ ọrọgbọ ahụa ẹtọ.
2
Kanị imẹ ahụa nke ẹtọ, Jehoshẹfatị wụ eze Juda nọ jẹn d'e kele Ehabụ wụ eze ndị Izrẹlụ Ebamịn-ugu.
3
Ehabụ a gwagụọ ịhaịmẹ ẹ oku Ramọtụ-Gilẹdị, sị, “Ụnụ a marịnghọ nị Ramọtụ-Gilẹdị wụ nke ẹnyi, ẹlẹ ya? Bụ o ke nwọn ihiẹn ẹnyi mẹ nị ẹnyi napụha eze Aram ya.”
4
Ya ọ nọ sị Jehoshẹfatị, “N'i sọnjẹn m d'a lụsọn ndị rị Ramọtụ-Gilẹdị agha?” Ya Jehoshẹfatị nọ sị eze Izrẹlụ, “Mmẹ lẹ ịyụ wụ ohu, ndị-agha m wụ nke i, ẹshin m wụ nke i.”
5
Kanị Jehoshẹfatị nọzị sị a, “Jụgụdẹ Osolobuẹ ọnụ.”
6
Ya Ehabụ nọ kpọkikomẹ ndị-amụma, ihiẹn nọ kẹ madụ nnụ, ọ nọ jụma wẹ, “Nị m jẹn d'a lụsọn ndị rị Ramọtụ-Gilẹdị agha ra nị m nọdị?” Wẹ nọ sị a, “Eze, jẹn! Osolobuẹ k'e we ẹ ye i.”
7
Kanị Jehoshẹfatị nọ sị a, “O nwọnni onyẹ-amụma Osolobuẹ rịzịn'a, nị ẹnyi jụ a?”
8
Eze Izrẹlụ nọ sị Jehoshẹfatị, “O nwọnghọ okẹnnyẹ ohu họdụnị hụn nkẹ ẹnyi a jụ uche Osolobuẹ; kanị ize ẹ e ze m makẹni o butunini m amụma rị mma, eje-ihiẹn eje-ihiẹn sụọ. Ẹfan a wụ Maịkaya nwa Imla.” Jehoshẹfatị nọ sị a, “Ekulẹ ẹrịra, eze.”
9
Ya eze Izrẹlụ nọ kpọ ọhaịmẹ ẹ ohu, sị a, “Jẹn d'e wẹhẹ Maịkaya nwa Imla ozigbo.”
10
Eze Izrẹlụ lẹ Jehoshẹfatị eze Juda yi ẹwuru nze wẹ, nọdịsọnmẹ ukpo-eze ebe w'a nọ a kụkpọ ọka nọkunmẹ ọnụ-mgbọn Sameria, ndị amụma hụ ile hụ e buni wẹ amụma.
11
Zẹdikaya nwa Kenaana nkẹ e gigụọdẹ igwe mẹmẹ mpịn, a sị, “Lee ihiẹn Osolobuẹ ku: ‘Mpịn ndịnị kẹ y'e gi sụngbu ndị Aram!’ ”
12
Ndị-amụma ndị ọzọ ile hụ e buzi amụma e ku ihiẹn ohu hụ, a sị, “Agụ, jẹn, maye Ramọtụ-Gilẹdị n'i mẹri ẹ, makẹni Osolobuẹ k'e we ẹ ye i mẹri!”
13
Onyẹ hụ wẹ zi d'a kpọha Maịkaya e ru ẹ, ọ nọ sị Maịkaya, “Lekwọ ẹnya, ndị-amụma ile rị e kuye ọnụ ohu, a sị nị eze k'e mẹri. Kweyekwọnị wẹ, kuni eze ọhụnma.”
14
Kanị, Maịkaya nọ sị a, “Ma Osolobuẹ, ihiẹn Osolobuẹ gwa m sụọ kẹ m jẹnkọ d'a gwa eze.”
15
Ogẹn Maịkaya gi ru ebe eze rị, eze nọ sị a, “Maịkaya, nị ẹnyi jẹn d'a maye Ramọtụ-Gilẹdị ọgụn ra nị ẹnyi nọdị?” Ya Maịkaya nọ sị, “Agụ, jẹn d'a maye ẹ! I k'e mẹri; Osolobuẹ k'e bu ẹ che i ẹka!”
16
Kanị, Eze nọ sị a, “Mgbe ole kẹ m k'a sị ị kun ẹfan Osolobuẹ nị ezioku sụọ k'i k'a gwa m i kebe kweri gwa m ihiẹn Osolobuẹ ku nke-esi?”
17
Ya Maịkaya nọ sị a, “M hụn ndị Izrẹlụ ile kẹ wẹ gbayịya elu ugu lekẹ atụnrụn nwọnlẹni onyẹ-ndu, Osolobuẹ nọ sị, ‘Enwọn wẹ onyẹ-ndu. Onyẹ-onyẹ ya gi udọn lama iwe ẹ.’ ”
18
Ehabụ eze Izrẹlụ nọ sị Jehoshẹfatị, “A gwanị m'ị? O butunini m amụma rị mma, eje-ihiẹn sụọ.”
19
Ya Maịkaya nọ kumẹzi, sị, “Gọn nwan ntịn n'ị nụ ihiẹn Osolobuẹ ku. M hụn kẹ Osolobuẹ nọdị elu ukpo eze ẹ, ndị mmọn-ozi ile rị elu-igwee turuhunmẹ ẹ ẹka-ihiẹn lẹ ẹka-ekpẹn.
20
Osolobuẹ nọ sị, ‘Onyẹ k'a rẹrẹ Ehabụ d'a maye ndị Ramọtụ-Gilẹdị ọgụn kẹn'ọ nwụntọ ebẹhụ?’ “Hụnnị e ku ichẹn, hụnnị e ku ichẹn.
21
Ọ nọbe, mmọn ohu nọ jẹnpụha, wuzo ihun Osolobuẹ, sị a, ‘M k'a rẹrẹ a ye.’ “Osolobuẹ nọ jụ a, sị, ‘Nanị kẹ y'a dọn mẹ ẹ?’
22
Ya mmọn nwẹn nọ sị, ‘M k'e jẹn d'e họnrin mmọn-ntụ ọnụ ndị-amụma a ile.’ “Osolobuẹ nọ sị a, ‘Ijẹn i k'a gha; jẹn d'e m'ẹ.’
23
“Agụ, lee ẹ nwan: Osolobuẹ e buọlẹ mmọn-ntụ che ndị-amụma ị ndịnị ọnụ. Makẹni Osolobuẹ e kuọl'a n'o k'e mẹ i ihiẹn.”
24
Ya Zẹdikaya nwa Kenaana nọ jẹnburu Maịkaya, ma a ọra, sị a, “Elee ụzọ kẹ mmọn Osolobuẹ ahụn gha hụn o gi gharị m d'a gwa ị oku?”
25
Maịkaya nọ sị a, “Ụhụọhịn ị k'a gbaban mmughẹ rị imẹ-imẹ d'a warị k'i k'a marịn.”
26
Ehabụ wụ eze Izrẹlụ nọ sị wẹ, “Weri ni Maịkaya jẹnmẹ: we ẹ jẹnni Amọnụ, Gọvanọ rị a kịnị m obodoni, ya lẹ nwa m wụ Jụashị.
27
Sị nị wẹ, ‘Lee ihiẹn eze ku: ọ sị, “Bu ni onyẹni che ụlọ-ngan; eyelẹ n'ẹ ihiẹn-oriri ọzọ karị brẹdi lẹ mirin d'e runi a lụaha m udọn-lẹ-ndọnkwa.” ’ ”
28
Maịkaya nọ yi, “Ị hụn isi lụa, ya wụnị ẹlẹ Osolobuẹ gwa m ihiẹn m ku!!” Maịkaya nọzị sị ndị rị ebẹhụ, “Ụnụ ile, kọma nị oku m ẹnya!”
29
Ya kẹ eze ndị Izrẹlụ lẹ Jehoshẹfatị eze Juda nọ shi Ramọtụ-Gilẹdị.
30
Eze Izrẹlụ nọ sị Jehoshẹfatị, “M jẹnkọ d'e yiri ẹwuru ọzọ makẹ wẹ gha amarịn m; ịyụ nwẹn, yiri ẹwuru-nze i.” Ya eze Izrẹlụ nọ kẹnhutọ ekikọn, shi ọgbọ-agha.
31
Eze ndị Aram nkẹ a gwaọlẹ madụ mmẹbụọ kwasị ọgụn hụn a kịn'a ndị gi ụgbọ-ẹshin a nụ agha, sị, “Alụsọnkwọlẹ ni onyẹ ọwụlẹ ọgụn, kẹ ndị uku kẹ ndị-nta, mmanị eze Izrẹlụ sụọ.”
32
Ogẹn ndị ahụn a kị ndị gi ụgbọ-ẹshin a lụ agha gi hụn Jehoshẹfatị, wẹ nọ sị, “Ẹhẹn, ọnwan wụ eze Izrẹlụ.” Ya wẹ nọ bu ihun zinmẹ ẹ nị wẹ maye ẹ, kanị mgbe o gi yi oro,
33
ndị hụ a kị ndị gi ụgbọ-ẹshin a lụ agha nọ ghọta nị ẹlẹ ya wụ eze Izrẹlụ azụụn hụ, wẹ nọ chụbehi ẹ.
34
Kanị ọbara-ụta onyẹ ohu gbahụ tụche nọ gha eze Izrẹlụ wụ Ehabụ ẹgbata ẹwuru-igwe ẹ, tụ a. Eze Izrẹlụ nọ sị hụn a nyann'a ụgbọ-ẹshin, “Gbehutọ n'i bupụ m ọgbọ-aghanị ozigbo! A rụọlẹ wẹ m ẹhụ!”
35
Ọgụn ahụn kẹnrẹn nị eki gi. Ọdadọn kẹ wẹ dadọnsọnmẹ Ehabụ imẹ ụgbọ-ẹshin ẹ, bu ẹ ihun zimẹ ndị Aram. Ẹdeke hụ a gha ebẹhụ wẹ rụ a ẹhụ a gbaye alị ụgbọ-ẹshin ahụn; o ru ẹnyasị hụ, ọ nọ nwụnhụn.
36
Hụn anwụn gihụ rị a rọ, oro a pụ, ghagbama igunrun ndị-agha ile, a sị, “Onyẹ ọwụlẹ lashi obodo ẹ; onyẹ ọwụlẹ la anị a!”
37
Eze a nwụnhụn, wẹ nọ bulụa a Sameria, li ẹ ye ebẹhụ.
38
Ya wẹ nọ nọ mirin ohu rị Sameria, ebe ndị ịgbaraja nọ a wụ ẹhụ chanpụ ụgbọ-ẹshin ahụn, nkitẹ nọ rachan ẹdeke eze, ihiẹn nwẹn Osolobuẹ ku a bụn.
39
Ihiẹn ndị ọzọ ile mẹni ogẹn Ehabụ gi rị a kị lẹ ihiẹn ile o mẹ, obi-eze o gisọnmẹ eze-enyi nyan imẹ ẹ lẹ obodo ndị ọ tụnhunmẹ mgbọn makẹ agha — rị imẹ ẹkụkwọ wẹ detọ ihiẹn mẹ ogẹn ndị-nze hụn kịsọnmẹ Izrẹlụ.
40
Ehabụ a nwụnhụn, laburu ndị nẹdi ẹ, nwa a wụ Ahazia nọ họnrin eze, nọkin ẹnya a.
41
Hụn mẹ ẹ ahụa ẹnọ Ehabụ kịma ndị Izrẹlụ kẹ Jehoshẹfatị nwa Asa kịma Juda.
42
Jehoshẹfatị rị nwa ahụa mmisẹn kwasị ọgụn k'o họnrin eze; ahụa isẹn kwasị ọgụn k'ọ kị; Jerusalẹm k'ọ nọ kị. Ẹfan nnẹ ẹ wụ Azuba, nwa Shilihi.
43
Jehoshẹfatị sọnchanrịn nzọmụkụ nẹdi ẹ wụ Asa imẹ ihiẹn ile, ọ ghanị imẹ ẹ pụ; ihiẹn a sụọ Osolobuẹ k'o mẹchanrịn. Kanị, ofufe hụ wẹ rị a dan Iwu e fe Osolobuẹ ebe jẹnsọnmẹ elu a kụsịkwọnị, ndị alị hụkwọ e jẹn ebẹhụ d'a chụnnị Osolobuẹ ẹjan, a mụ nsẹnsi.
44
Udọn rịzịkwọ ẹgbata Jehoshẹfatị lẹ eze Izrẹlụ.
45
Ihiẹn ndị ọzọ ile mẹni ogẹn Jehoshẹfatị gi rị a kị lẹ ihiẹn ndị o mẹ lẹ agha ndị ọ lụ rị imẹ ẹkụkwọ wẹ detọ ihiẹn mẹ ogẹn ndị-nze hụn kịsọnmẹ Juda.
46
Ọ chụpụchanrịn ikẹnnyẹ ile wụ ịgbaraja ụlọ-mmọn imẹ alị hụ ile, ndị họdụnị kẹ nẹdi ẹ wụ Asa chụpụgụ ịgbaraja ikẹnnyẹ ogẹn nke ẹ.
47
Alị Ẹdọm enwọn eze nke wẹ ogẹn hụ, onyẹ rị ebẹhụ rị okpuru Jehoshẹfatị a kidọnn'ẹ.
48
Jehoshẹfatị nọ rụn ụgbọ ndị a gba okẹn-ohimin ye azụụn hụ, nị wẹ e gi wẹ e jẹn alị Ofiri d'e buhẹ goru, kanị ụgbọ-mirin ndị ahụn agbanị, Eziọnụ-Gẹba rị alị Ẹdọm kẹ wẹ ruhụ, wẹ nọ kpu.
49
Ahazia nwa Ehabụ te sị Jehoshẹfatị, “Nị ndị nke m sọnjẹn ndị nke i.” Jehoshẹfatị a jụ.
50
Jehoshẹfatị a kịgụ, nwụnhụn, laburu ndị nẹdi ẹ, wẹ nọ li ẹ ye ebe wẹ liye ndị nẹdi ẹ, imẹ obodo hụ nẹdi ẹ kanị wụ Defidi tụn. Nwa a wụ Jehoram nọ nọkin ẹnya a kịma.
51
Hụn mẹ ahụa mmẹsa Jehoshẹfatị kịma Juda kẹ Ahazia nwa Ehabụ kịma ndị Izrẹlụ. Obodo Sameria k'ọ nọ kị ndị Izrẹlụ; ahụa ẹbụọ k'ọ kị.
52
Kanị, o mẹ ihiẹn rịlẹni mma ẹnya Osolobuẹ, sọnsọnmẹ nzọmụkụ nẹdi ẹ lẹ nnẹ ẹ lẹ nke Jerobụam nwa Nebatị hụn nu ndị Izrẹlụ ye imẹ njọ;
53
o fe Baalụ, kụn'a isi alị, kpasu Osolobuẹ wụ Chuku Izrẹlụ iwe kẹ nẹdi ẹ dọn mẹ.
← Chapter 21
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22