1 Kings 4

Ika 2018 Bible

← Chapter 3 Jump to: Chapter 5 →

1Izrẹlụ ile kẹ Solomọnụ kị.

2Ndịnị wụ ndị isi-ọkịkị a: Azaria nwa Zadọkụ wụ onyẹ nchụn-ẹjan;

3Ẹlihorẹfụ lẹ Ahija ụmụ Shisha wụ ndị akanwe; Jehoshẹfatị nwa Ahiludu wụ onyẹ e dọnmẹ ẹkụkwọ;

4Bẹnaya nwa Jehoyada wụ onyẹ isi-agha; Zadọkụ lẹ Abiata wụ ndị nchụn-ẹjan;

5Azaria nwa Natanị kị ndị gọvanọ a kị ẹgbẹrẹ ichẹn-ichẹn; Zabudu nwa Natanị wụ onyẹ nchụn-ẹjan lẹ ọka-iroro eze;

6Ahisha nwọn e lepụ obi-eze ẹnya; Adoniram nwa Ab'da kị ndị wẹ waye ọrụn olu.

7Solomọnụ e nwọnghọzikwọ ndị gọvanọ mmẹbụọ ahụn hụn a kị ẹgbẹrẹ ile rị Izrẹlụ. Wẹ mmẹbụọnị kẹ oku ihiẹn eze lẹ ikpụlọ eze e ri rị ẹka. Ọrọgbọ ifọn ohu-ohu imẹ ahụa kẹ onyẹ-onyẹ imẹ wẹ gi e buhẹ ihiẹn-oriri.

8Ẹfan wẹ wụ ndịnị: Bẹn-Họ hụn kị alị ugu Ifrem;

9Bẹn-Dẹka hụn kị Makazị, Shaalubim, Bẹt-Shẹmẹshi lẹ Ẹlọnụ Bẹt-Hananị;

10Bẹn-Hẹsẹdi hụn kị Arubọtụ. (Sọkọ lẹ alị Hẹfa ile rịzịkwọ okpuru ẹ);

11Bẹn-Abinadabụ hụn kị Nafọtụ-Dọ. (Ịya wụ di Tafatị nwa Solomọnụ);

12Baana nwa Ahiludu kị Taanakị lẹ Mẹgido lẹ Bẹt-Shanị ile hụn nọkunmẹ Zarẹtanị hụn rị mkpọtu Jezriẹlụ — ghazị Bẹt-Shanị d'e ru Ebẹlụ-Mehola lẹ ebe Jokmịam ru;

13Bẹn-Geba kị Ramọtụ-Gilẹdị. (Ụmụ-alị Jaịrị nwa Manasẹ rị Gilẹdị rịzịkwọ okpuru ẹ, cheni ẹgbẹrẹ Agobu rị Bashanị lẹ obodo ọgụn-ẹtọ shịanị gbegbegbe hụn rị imẹ ẹ, hụn wẹ tụnhunmẹsọnmẹ mgbọn, e gi igwe-bronzu e fidọn ọnụ-mgbọn wẹ.)

14Ahinadabụ nwa Ido kị Mahanaim;

15Ahimaazị kị Naf'tali. (Ịya wụ di Basematị nwa Solomọnụ);

16Baana nwa Hushaị kị Asha lẹ Alọtụ;

17Jehoshẹfatị nwa Parụa kị Isaka;

18Shimei nwa Ẹla kị Bẹnjamini;

19Gẹba nwa Uri kị Gilẹdị, (alị Sihọnụ eze ndị Amọ te kị lẹ alị Ọgụ eze Bashanị te kị.) O nwọnzighọ gọvanọ hụn a kịkwama azụụn ile.

20Ogẹn Solomọnụ, ndị Juda lẹ ndị Izrẹlụ họdụnị e bukẹmẹkẹ ọda nọkẹ ẹjan rị mkpẹnrẹn ohimin; ihiẹn wẹ e ri lẹ ihiẹn w'a ra e jun, ẹfọ hụ a sụọ wẹ ụsụọ.

21Solomọnụ kịchanrịn alị-eze ile rị gha Iyi-Yufretisi d'e ru alị ndị Filistia gbegbegbe, d'e rukwọrị okẹn alị Izrẹlụ lẹ alị Ijiptu. Wẹ tụhasọnmẹni Solomọnụ ụtụ, rịsọnmẹ okpuru ẹ, o we nwụn.

22Ihiẹn w'e ri obi-eze Solomọnụ ụhụọkịn-ụhụọkịn wụ ẹkpa ọka uku iri-kwasị ọgụn wẹ gweriẹn lẹ ẹkpa-uku ọgụn-ẹtọ wẹ gweriẹnlẹni;

23Efin iri wẹ zụn ụlọ, efin ọgụn wẹ zụn ogbe lẹ atụnrụn lẹ ewu ọgụn-isẹn lẹ ele lẹ mgbadan lẹ ele-robọkụ lẹ ọkụkụ ndị duni —

24makẹni alị-eze ile rị ẹbamịn ọdịdan-ẹnyanwụn Iyi-Yufretisi rịchanrịn okpuru ẹ, gha Tifsa d'e ru Gaza, ndị nze wẹ ile rịchanrịn okpuru ẹ. O nwọnchanrịn udọn azụụn ile.

25Ogẹn hụ ile Solomọnụ gi rị ndụn, ndị Juda lẹ Izrẹlụ, gha Danị d'e ru Biẹshẹba, bi udọn lẹ ndọnkwa — onyẹ-onyẹ bi ụlọ nke ẹ, nwọn alị vaịnị lẹ figi nke ẹ.

26Solomọnụ nwọn ụlọ-ẹshin nnụ ọgụn-isẹn (40,000) o dọnmẹ ẹshin ndị a dọkpụnn'a ụgbọ-ẹshin, nwọnzikwọ ẹshin nnụ-uku mmẹbụọ (12,000) ndị ọzọ.

27Ndị gọvanọ ahụn a kị ẹgbẹrẹ rị ichẹn-ichẹn e wẹhẹsọnmẹ ihiẹn Eze wụ Solomọnụ lẹ ndị e sọn ẹ e ri ihiẹn-oriri e ri, onyẹ lẹ ifọn ẹ, onyẹ lẹ ifọn ẹ. Wẹ e dọnrin ẹnya a hụn a nị onwọnni ihiẹn a kọnị.

28W'e butọsọnmẹzikwọ ọka-bali lẹ ẹfịfịa ọkpọ-nkụn wẹ sị wẹ e buhẹ ebe ile w'e dọnmẹ ẹshin, ịya kẹ ẹshin a dọkpụn ụgbọ-ẹshin lẹ ẹshin mmaka e ri.

29Osolobuẹ ye Solomọnụ amamihiẹn lẹ okẹn akọ-lẹ-uche, ye ẹ nghọta wẹ ghalẹni a s'ẹka a kọwa.

30Solomọnụ kachanrịn ndị ile wẹ gi amamihiẹn marịn ẹbamịn ọwụwa-ẹnyanwụn amamihiẹn e nwọn — kẹ ndị rịdẹ alị Ijiptu.

31Ya kachanrịn ndị ọzọ ile rị ụwa amamihiẹn e nwọn: kẹ Ẹtanị onyẹ Ẹzra kẹ Hẹmanị, Kakọlụ lẹ Dada — ụmụ Mahọlụ. Otiti ẹ ghagbarị alị ile fihunmẹ Izrẹlụ.

32Ọ tụ atụtụ-ilu nnụ-uku ẹtọ (3,000); ẹbụ a rị isẹn kwasị nnụ-uku (1,005).

33Solomọnụ kọwasọnmẹ kẹ ihiẹn-akụnkụn ichẹn-ichẹn nọ, gha okẹn-osisi sida ẹgboko Lẹbanọnụ d'e rudẹ ẹrurushin hụn e pu ụsụọ-ẹjan. Ọ kọwazịkwọ kẹ anụmanụ lẹ nnụnụ lẹ ihiẹn ndị a rịnị lẹ azụn nọ.

34Ndị alị ile a bịasọnmẹ d'e gọn ntịn amamihiẹn Solomọnụ — ndị-nze ile rị elu-ụwa hụn nụ ukwere amamihiẹn ẹ e zihẹsọnmẹ ndị nke wẹ d'e gọn ẹ ntịn.

← Chapter 3 Jump to: Chapter 5 →