1 Kings 20

Ika 2018 Bible

← Chapter 19 Jump to: Chapter 21 →

1Bẹn-Hadadị wụ eze Aram kpọnpụha ndị agha a ile. Ya lẹ ndị-nze mmẹbụọ kwasị ọgụn ọzọ nọ wịrị, wẹ lẹ ẹshin wẹ lẹ ụgbọ-ẹshin wẹ. Ọ nọ jẹn d'e kehunmẹ obodo Sameria okehunmẹ agha.

2Ọ nọ zi ndị-ozi jẹn imẹ obodo hụ d'e zi Ehabụ eze Izrẹlụ Ẹbamịn-ugu ozini: “Lee ihiẹn Bẹn-Hadadị ku:

3Siliva ị lẹ goru i wụ nke m, inyẹnmẹ i ndị kachanrịn mma lẹ ụmụ ị wụzịkwọ nke m.”

4Eze Izrẹlụ nọ sị, “Eze nwọnni m, ya rị k'i dọn ku, mmẹ lẹ ihiẹn ile m nwọn wụ nke i.”

5Ndị-ozi ahụn nọ bịazị, sị a, “Lee ihiẹn Bẹn-Hadadị ku, ọ sị, ‘Mmẹ te zi wẹ d'a sị ị ye m hụ siliva ị lẹ goru i lẹ inyẹnmẹ i lẹ ụmụ ị sụọ.

6Kanị mgbeni eki, m k'e zihẹ ndị-isi agha m d'a gwalọ obi-eze i lẹ iwe ịhaịmẹ i. Wẹ k'e kpọnrin ihiẹn ile rị mma ụnụ nwọn.’ ”

7Eze Izrẹlụ nọ kpọkikomẹ ndị-ichẹn ile rị alị a, sị wẹ, “Ụnụ a hụn a nị oku kẹ okẹnnyẹni rị a chọ? Ọ sị mmẹ ye ẹ inyẹnmẹ m lẹ ụmụ m, siliva m lẹ goru m, ajụnị m.”

8Ndị-ichẹn ahụn lẹ ndị alị nọ ku ọnụ ohu, sị a, “Egọnkwọl'a ntịn; eyelẹ ẹ ihiẹn ọ sị ị y'ẹ.”

9Ọ nọ sị ndị-ozi Bẹn-Hadadị, “Gwa nị eze nwọnni m, sị, ‘M k'e mẹchanrịn ihiẹn ile i gwa m isi-ibuzọ. Kanị asakọ m ẹka mẹ hụnnị i ku ikpanzụụnnị.’ ” Ya ndị-ozi hụ nọ jẹn d'a gwa Bẹn-Hadadị ihiẹn ọ shịarị wẹ.

10Bẹn-Hadadị nọ zi ozi ọzọ jẹnni Ehabụ, sị, “Mmọn ndị ẹnyi e fe wẹ mẹ m ihiẹn, mẹshi m'ẹ ikẹn, omẹni a nịdẹ m ẹjan k'e junsọnmẹ onyẹ-onyẹ imẹ ndị-agha m ọb'ẹka ohu họdụ imẹ Sameria.”

11Eze Izrẹlụ nọ sị, “Sị n'a, ‘Onyẹ hụn kọnringụhụ agha ya anyanlẹ isi nọkẹ onyẹ lụagụnị gbụpụ ẹwuru-agha.’ ”

12Ebe Bẹn-Hadadị lẹ ndị nze ya lẹ wẹ wị rị a ra manya imẹ ọdụ-agha wẹ k'ọ nọ nụ ozini, ọ nọ sị ndị-agha a, “Kwademẹ ni agha”, ya wẹ nọ kọnrin nị wẹ d'a maye nwan obodo ahụn ọgụn.

13Ya kẹ onyẹ-amụma ohu nọ bịa d'e kunrun Ehabụ eze Izrẹlụ, sị a, “Lee ihiẹn Osolobuẹ ku: Ọ sị, ‘Ya hụnghọ igwerigwe ndị-aghanị? M k'e we wẹ ye i tannị, y'e gi ẹ marịn nị mmẹ wụ Osolobuẹ.’ ”

14Ehabụ nọ sị, “Onyẹ k'e mẹ ihiẹnni?” Onyẹ-amụma ahụn nọ sị a, “Osolobuẹ sị, ‘Ikoro ndị gọvanọ ị ile jẹnkọ d'a kịha nwọn mẹ ẹ.’ ” Ehabụ nọ jụzị a, “Onyẹ nwọn bidọn ya wụ ọgụn?” Onyẹ amụma ahụn nọ sị a, “Ịyụ k'e bidọn ẹ.”

15Ehabụ nọ kpọ Ikoro rị okpuru ndị gọvanọ a rị ẹgbẹrẹ ichẹn-ichẹn, mmadụ mmẹbụọ kwasị ọgụn-mmanaị (232). Ọ nọ kpọzị ndị-agha ndị Izrẹlụ ile, mmadụ nnụ-uku ẹsa (7,000).

16Wẹ nọ gi efinaị buli, hụn ahụn Bẹn-Hadadị lẹ ndị-nze mmẹbụọ kwasị ọgụn ahụn ya lẹ wẹ wị rịkwọ imẹ ọdụ-agha wẹ ogẹn hụ, a ra manya, a tụ.

17Ikoro ndị hụ a rụnnị ndị gọvanọ ẹgbẹrẹ ichẹn-ichẹn buruni wẹ ụzọ. O nwọngụọ ndị Bẹn-Hadadị zipụ d'e ke nke. Ya wẹ nọ zihẹ ozi, sị, “Ndị-agha Sameria rị e dọnpụha.”

18Ọ nọ sị wẹ, “Omẹni udọn kẹ wẹ pụha d'a chọ, nwụn nị wẹ ẹka; omẹni agha kẹ wẹ pụha d'a lụ, nwụnzịkwọ nị wẹ ẹka.”

19Ikoro ndị hụ ndị Gọvanọ Ehabụ kịha nọ gha imẹ obodo Sameria dọnpụha, uwẹ lẹ ndị-agha Izrẹlụ sọnkọnị wẹ.

20Onyẹ-onyẹ nọ gbu onyẹ-agha Aram ya lẹ ịya gba lụ ọgụn. Ya kẹ ndị-agha Aram họdụnị nọ gbama ọsọ, ndị Izrẹlụ nọ chụ wẹ. Kanị, Bẹn-Hadadị eze ndị alị Siria, ndị Aram, nọ gi ẹshin gbapụ, ya lẹ ndị-agha a e nyin ẹshin-agha.

21Eze Izrẹlụ nọ kịrị ndị-agha chụ wẹ, kwọndọn ẹshin lẹ ụgbọ-anyịnyan ndị ahụn, gbu ndị Aram ọda-ọda.

22Omẹgụ, onyẹ-amụma hụ nọ bịa d'e kunrun eze Izrẹlụ, sị a, “Kwademẹ ọhụnma-ọhụnma; mẹ ihiẹn i marịn i k'e mẹ, makẹni eze Aram k'a mayezi i ọgụn mbidọn ahụa lalanị.”

23Ịhaịmẹ Aram nkẹ hụ a sị eze wẹ, “Mmọn elu ugu kẹ mmọn ndị Izrẹlụ wụ. Ya haịn wẹ gi karịka ẹnyi ẹka. Ẹnyi nọ alị-aradan lụsọn wẹ ọgụn, ẹnyi k'e mẹrirịrị.

24Lee nwan ihiẹn i k'e mẹ: wepụ ndị-nze hụ yụ lẹ wẹ wị ọkwa wẹ, gi ndị ọkị-agha nọkinsọnmẹ ẹnya wẹ.

25Kwademẹzi ndị-agha hankẹ ndị ahụn wẹ gbunarịn ị lẹzi ẹshin lẹ ụgbọ-anyịnyan buhan ọda kẹ ndị mbụ — ẹnyi e jẹn d'a nọ alị-aradan nụsọn Izrẹlụ ọgụn; ẹnyi k'e girịrị a mẹri wẹ.” Ọ nọ kweyeni wẹ, mẹ ihiẹn wẹ ku.

26O zu ahụa ohu, Bẹn-Hadadị nọ kpọnrin ndị-agha Aram, shi Afẹki d'a lụsọn ndị Izrẹlụ ọgụn.

27Ogẹn ndị Izrẹlụ nkẹ gi kwademẹgụ agha, werigụ ihiẹn ndị w'e gi jẹn, wẹ nọ buli d'e kunrun ndị Aram. Ndị Izrẹlụ nọ weri ọnọdị agha ebe wẹ nọ bu ihun zinmẹ ndị-agha Aram. Ndị-agha Izrẹlụ nọhụ kẹ igunrun ewu ẹbụọ mẹ ẹkẹrẹ-ẹkẹrẹ, kanị ndị Aram jun ụzọ ile.

28Onyẹ-ozi Osolobuẹ nọ pụha, sị eze Izrẹlụ, “Lee ihiẹn Osolobuẹ ku: Ọ sị ebe o mẹni ndị Aram rị e ro nị Osolobuẹ wụ mmọn elu-ugu, nị ẹlẹ mmọn ọdanmgbugbu, m k'e bu igwerigwe ndị aghanị ye i mẹri, nị ị hụn ụzọ marịn nị mmẹ wụ Osolobuẹ.”

29Ndị-agha Aram lẹ Izrẹlụ rịsọnmẹ ọnọdị wẹ, bu ihun zinmẹ ibe wẹ, akp'ọhịn ẹsa, nke akp'ọhịn ẹsa rịn'a, ọgụn e bidọn. Ndị Izrẹlụ nọ gi akp'ọhịn ohu gbu mmadụ nnụ-uku ọgụn-isẹn (100,000) imẹ ndị-agha ndị Aram gi ụkụ e jẹn agha.

30Ndị họdụnị nọ gbashi obodo Afẹki, kanị mgbọn obodo Afẹki nọ dangbu wẹ ile, mmadụ nnụ-uku ẹsa kwasị ọgụn (27,000). Bẹn-Hadadị nkẹ nọ gbaban imẹ obodo ahụn, rụban mmughẹ ohu rị imẹ-imẹ d'a warị.

31Ịhaịmẹ ẹ nọ sị a, “Lee ẹ, ẹnyi a nụgụọ nị ndị-nze Izrẹlụ wụ ndị omikẹn. Nị ẹnyi jeri nwan ẹkpa, ẹkwa-achọ, gi eriri kẹnmẹ isi, d'e kunrun eze Izrẹlụ. Ikẹnkwọ o mẹ omikẹn dọnmẹ i ndụn.”

32E jerigụ wẹ ẹkpa ukun, gi eriri kẹnmẹ isi, wẹ nọ jẹn d'e kunrun eze Izrẹlụ; wẹ nọ sị a, “Odibo i wụ Bẹn-Hadadị sị, ‘Dodo egbulẹ m.’ ” Eze wụ Ehabụ nọ sị wẹ, “Echẹn k'ọ rị ndụn? Nwẹnẹ m rọ.”

33A hụn wẹ n'o kuyeni wẹ, wẹ nọ kweri oku ẹ ọgbahu-ọgbahu, sị, “Ẹghẹẹ, Bẹn-Hadadị nwẹnẹ i!” Eze Izrẹlụ nọ sị wẹ, “D'e wẹhẹn'ẹ nwan.” Ogẹn Bẹn-Hadadị gi pụha, Ehabụ nọ nị a nyinbanhan imẹ ụgbọ-ẹshin ẹ.

34Bẹn-Hadadị nọ sị a, “M k'e yekin i obodo ndị ahụn nẹdi m narịn nẹdi i; i nwọn ikẹn rụnrụn afịa imẹ obodo ẹnyi wụ Damaskọsụ kẹ nẹdi m dọn rụn imẹ obodo ụnụ wụ Sameria.” Ehabụ nọ sị a, “I jẹnkọ d'e kunrịrị iyi kwe m nkwa rịn'a m kebe hapụ ị.” Ya wẹ nọ kun iyi, kwetarị nkwa, Ehabụ nọ hatu ẹ.

35Onyẹ ohu imẹ ndị-amụma nwọnhẹn ozi ẹka Osolobuẹ, ọ nọ sị ibe ẹ, “Fịan m ihiẹn!” O kweni fịan a.

36Ya onyẹ amụma hụ nọ sị a, “Makẹni ị pa oku Osolobuẹ, ị ghahụ ebeni m rị pụ, ẹwọrọ k'e gbu i.” Ogẹn okẹnnyẹ ahụn gi pụ, ẹwọrọ nọ maye ẹ, gbu ẹ.

37Onyẹ-amụma ahụn a hụn onyẹ ọzọ, sị a, “Dodo fịan m ihiẹn.” Ya onyẹ ahụn nọ fịan a ihiẹn, rụ a ẹhụ.

38Onyẹ-amụma ahụn nọ jẹn d'e wuzo ụzọ, e che eze, gi ihiẹn kpumẹ ihun makẹ wẹ gha a marịn onyẹ ọ wụ.

39Hụn eze gi ghafekọ, onyẹ amụma hụ nọ kpọchen'ẹ, sị, “Mmẹ odibo i jẹn ọgbọ-agha, onyẹ ohu nọ wẹhẹni m onyẹ ọ nwụndọn, sị m, ‘Kwọndọn okẹnnyẹni. Ọ nahịn ị, y'e gi ndụn ị kụ ụgwọ a mọbụ y'a kụ akpụrụ siliva nnụ-uku ẹtọ.’

40Kanị, ebe m rị e mẹ ọnwan e mẹ ọnwan, ahụnzịnị m okẹnnyẹ nwẹn.” Eze Izrẹlụ nọ sị a, “Ọnụ ị e kugụọ ihiẹn wẹ jẹnkọ d'e mẹ i.”

41Ya onyẹ-amụma nwẹn nọ wepụ ihiẹn hụ o gi kpukin ẹnya ozigbo-ozigbo, eze Izrẹlụ nọ lepụha nị onyẹ-amụma rọ.

42Ọ nọ sị eze, “Lee ihiẹn Osolobuẹ ku: Ọ sị, ‘Y'a hapụgụọ onyẹ m sị n'o k'a nwụnrịrị. I jẹnkọ d'e gi nwan ndụn ị kụ ụgwọ a, gi ndị nke i kụ ụgwọ ndị nke ẹ.’ ”

43Eze Izrẹlụ nọ fụ ẹhụ lashi obi-eze ẹ rị Sameria, bukọ olulu.

← Chapter 19 Jump to: Chapter 21 →