1 Kings 7 — Ika 2018 Bible

1Solomọnụ tụnrụnzị obi-eze. Ahụa mmẹtọ k'o gi tụnchanrịn a.

2Usue obi-eze hụ, “Obi-eze Ẹgboko Lẹbanọnụ”, wụ ụbụkụ iri kwasị ọgụn-ẹsa, ụshịa a wụ ụbụkụ mmisẹn kwasị ọgụn-ẹtọ, ojijẹn-elu ẹ wụ ụbụkụ isẹn kwasị ọgụnnaị. Ogwe sida ndị wẹ gi mẹmẹ ifiri ẹ rị elu ogele adansụn ẹnọ wẹ gizi ogwe sida mẹmẹ.

3Osisi sida kẹ wẹ gizi rụn okpukpu ẹ. Ogwe sida ndị hụ rị elu adansụn sida kẹ wẹ gi dụnmịn a: isẹn kwasị ọgụnnaị kẹ wẹ rị; wẹ dọnyesọnmẹ wẹ ogele-ogele; mmisẹn-mmisẹn rịsọnmẹ ogele ohu.

4Ibe elu kẹ wẹ beyesọnmẹ windo ẹ; ogele windo ẹtọ rị azụụnnị, lẹ azụụnnị, wẹ busọnmẹ ihun zinmẹ ibe wẹ.

5Frem ọnụmụzọ a ile nwọnsọnmẹ azụụn ẹnọ; ibe ihun ẹ kẹ wẹ rịsọnmẹ; windo ẹtọ rị azụụnnị busọnmẹ ihun zinmẹ ibe wẹ ẹtọ rị azụụnnị hụn-ẹbọ.

6Obi-eze hụ nwọn ibẹrẹ-uku adansụn rịsọnmẹ hụn wẹ kpu elu ẹ: usue ẹ wụ ụbụkụ mmisẹn kwasị ọgụn-ẹtọ, ụshịa a wụ ụbụkụ isẹn kwasị ọgụnnaị. Ibẹrẹ-nta wẹ e bu ụzọ e ru rị ihun ẹ; wẹ gi ogwe sida mẹmẹ adansụn ndị wẹ gi kwọndọn okpukpu rị elu ẹ.

7Ọ tụnzịghọ ọgwa nwọn ukpo, Ọgwa Okinkin-ikpe, ọ nọ a hannị wẹ eṅẹn, gi ibe sida ma a gha akpakalị d'e ru ifiri.

8Ẹka-ọrụn ohu hụ kẹ Solomọnụ gi tụn obi-eze ẹ kẹti-kẹti o bi imẹ ẹ, hụn ọ rụnye ibe azụụn. Ọ nọ tụnzịnị nwa Fẹro hụ ọ lụ obi-eze nọzị kẹ ọgwa okinkin-ikpe hụ.

9Ọmụma hi-ogbe wẹ be ihun lẹ azụụn kẹ wẹ dọn chọ k'o gi tụn ihiẹn ndịnị ile, gha ibe azụụn obi-eze d'e ru ezi-ọgwa uku hụ rịn'a, gha iyetọ a d'e ru elu ẹ.

10Ọmụma rị mma, hi-ogbe, k'o gizi gbe iyetọ a: o nwọn ndị ru ụbụkụ mmisẹn lẹ ndị ru ụbụkụ mmẹbụọ.

11Ọmụma ndị ọzọ rịzị mma wẹ besọnmẹ kẹ wẹ dọn chọ lẹ ogwe sida rịsọnmẹ elu ndịnị.

12Wẹ gi ọmụma ndị wẹ betọgụ gbehunmẹ ezi-ọgwa uku hụ — wẹ dọngụ ọmụma mgbe ẹtọ wẹ kebe buche ogwe sida elu ọmụma rịchanrịn wẹ elu nọkẹ kẹ wẹ dọn gbe ezi nọkunmẹchanrịn Ụlọ-nsọ Osolobuẹ lẹ ẹtu-ụlọ rị ihun ẹ.

13Eze wụ Solomọnụ zi ndị ọrụn a, wẹ nọ jẹn alị Taya d'e wẹhẹn'ẹ Huram.

14Nnẹ Huram wụ okpoho ebọn Naf'tali alị Izrẹlụ; di ẹ onyẹ alị Taya, nẹdi Huram, a nwụnhụngụọ; ọ kpụ igwe-bronzu k'ọ rị ndụn. Huram wụ ezigbo ọka igwe-bronzu hụn marịn ẹnya ihiẹn ile wẹ gi igwe-bronzu a rụn. Ọ nọ bịa d'e kunrun eze wụ Solomọnụ, rụnchanrịn ihiẹn ile Solomọnụ sị a rụn.

15O gi igwe bronzu mẹmẹ adansụn ẹbụọ mẹ ohi-ohi; ojijẹn-elu wẹ ẹbụbụọ wụsọnmẹ ụbụkụ ẹsa kwasị ọgụn; ohi-ohi wẹ wụsọnmẹ ụbụkụ mmẹsatọ, ụbụkụ mmẹsatọ.

16Ọ nọ gizi igwe-bronzu mẹmẹ isi-adansụn ẹbụọ wẹ k'a dọye elu adansụn ẹbụbụọ ndị hụ: ojijẹn-elu wẹ ẹbụbụọ wụsọnmẹ ụbụkụ ẹsa lẹ mkpikpi.

17O nwọnsọnmẹ ẹgan ndị wẹ kpagbama wẹ gi chọ isi-adansụn ndị hụ wẹ dọye elu adansụn mma: ẹsa-ẹsa kẹ wẹ kọnyesọnmẹ elu isi-adansụn ohu-ohu.

18Huram kpụzị ogbe pomegraneti ogele ẹbụọ, gi wẹ ghahunmẹ ẹgan ndị hụ, gizi chọ isi-adansụn ndị hụ mma. Ẹrịra k'o mẹ isi-adansụn ẹbụbụọ ndị hụ

19Elu adansụn ẹbụbụọ ndị hụ rị ihun ẹtu-ụlọ ihun Ụlọ-nsọ kẹ isi-adansụn ndịnị rị; wẹ nọ kẹ obobo lili; ojijẹn-elu wẹ wụ ụbụkụ isin ụbụkụ isin.

20Elu isi-adansụn ẹbụbụọ hụ, ị ghafe ebẹhụ ọ nọ fụpụha kẹ ugbẹgbẹ, ẹhụ ẹgan ndị ahụn wẹ kpagbama, wẹ kpụ ogbe pomegraneti ọgụn-iri ogele-ogele ghahunmẹ isi-adansụn ohu-ohu.

21Ihun ẹtu-ụlọ rị ihun Ụlọ-NSỌ ebẹhụ k'o tumẹ adansụn ndị hụ. Ọ kpọ hụn rị ẹbamịn ndịdan-mirin “Jakini ”; ọ kpọ hụn rị ẹbamịn-ugu “Bụazị ”.

22Isi-adansụn ndị hụ nọsọnmẹ kẹ obobo lili. Ẹrịra kẹ Huram dọn rụn adansụn ndị hụ, rụnchanrịn wẹ.

23Huram nọ gi ihuye igwe-bronzu kpụ tankị-uku, wẹ kpọ “Ohimin”; o mẹ ohi-ohi. Ụshịa ọnụ a wụ ụbụkụ mmisẹn — gha azụụnnị d'e ru azụụnnị, ojijẹn-elu ẹ wụ ụbụkụ ẹsa-lẹ-mkpikpi; ụbụkụ isẹn kwasị ọgụnnaị k'ọ wụ wẹ gha a ohi-ohi.

24Obele ghahunmẹ ẹ ibe ọnụ a. Mkpu iri-iri rịsọnmẹ imẹ ụbụkụ ohu-ohu. Ogele ẹbụọ-ẹbụọ kẹ wẹ dọnye mkpu ndị ahụn — uwẹ lẹ tankị hụ wụ ibe igwe-bronzu ohu — ẹlẹ wẹ kpụ wẹ nyanmanị tankị.

25Tankị hụ nọdị elu okẹn-efin mmẹbụọ wẹ kpụ: ẹtọ bu ihun zinmẹ ibe ẹbamịn-ugu, ẹtọ e bu ihun zinmẹ ẹbamịn ọwụwa-ẹnyanwụn, ẹtọ e bu ihun zinmẹ ẹbamịn ndịdan-mirin, ẹtọ ẹbamịn ọdịdan-ẹnyanwụn. Elu wẹ kẹ tankị ahụn rị, e busọnmẹ wẹ ibe ọdụndụn zinmẹ etintinnaị okpuru tankị hụ,

26Ulu ẹ han kẹ ọb'ẹka ohu; wẹ gbi ọnụ a nọkẹ ọnụ-mkpu, nọkẹ obobo lili. O ripụ galọnụ mirin nnụ-uku iri (10,000).

27Huram gizi bronzu mẹmẹ trọkụ iri w'e nuhunmẹ. Usue ohu-ohu imẹ wẹ wụ ụbụkụ isin, ụshịa a wụ ụbụkụ isin, ojijẹn-elu ẹ wụ ụbụkụ ẹnọ lẹ mkpikpi.

28K'o dọn rụn trọkụ ndị ahụn: Akpụrụ-igwe rịsọnmẹ wẹ ile nkọ ẹnịnọ kwọndọnsọnmẹ ibe igwe-bronzu wẹ gi mẹmẹ ẹhụ wẹ.

29Wẹ kpụsọnmẹ ẹwọrọ lẹ okẹn-efin lẹ chẹrobu ye ẹhụ trọkụ ndị ahụn; kpụzị obobo wẹ dọngbama nọkẹ ihiẹn-olu ye akp'igwe ndị ahụn elu lẹ okpuru ẹwọrọ lẹ okẹn-efin lẹ chẹrobu ndị ahụn.

30Trọkụ ndịnị ile nwọnsọnmẹ ụkụ ẹnọ-ẹnọ wẹ gizi igwe-bronzu mẹmẹ lẹ akpụrụ-igwe bronzu hụn kwọngbama ụkụ-trọkụ azụụnnị lẹ hụn rị azụụnnị. Obu-afẹrẹ rịsọnmẹ wẹ nkọ ẹnịnọ; wẹ kpụzị obobo wẹ dọnyesọnmẹ nọkẹ ihiẹn-olu gi chọ obu-afẹrẹ ndị ahụn mma.

31Ihiẹn nọ kẹ drọm wẹ bebelụa rị etintinnaị ibe elu trọkụ hụ. Usue ẹ wụ ụbụkụ ohu lẹ mkpikpi: ya lẹ ihiẹn bun'ẹ wụ ụbụkụ ẹbụọ lẹzi hụn rulẹni mkpikpi. Wẹ tụyesọnmẹ ihiẹn ẹhụ ihiẹn hụ bun'ẹ. O mẹ ohi-ohi. Ibe igwe bronzu wẹ gi kpụ ẹhụ trọkụ ndị hụ nwọnsọnmẹ mkpẹnrẹn ẹnọ-ẹnọ — emẹni wẹ ohi-ohi.

32Ụkụ ẹnọ trọkụ ndị hụ gi a gba rịsọnmẹ okpuru ibe igwe ndị ahụn wẹ gi mẹmẹ ẹhụ wẹ; akpụrụ-igwe bronzu kwọngbama ụkụ trọkụ lẹ ẹhụ trọkụ nọgbama. Ojijẹn elu ụkụ trọkụ ndị hụ wụ ọb'ụkụ ẹbụọ lẹ hụn rulẹni mkpikpi.

33Ọ kpụ ụkụ-trọkụ ndị ahụn nọkẹ ụkụ ụgbọ-ẹshin; igwe-bronzu kẹ wẹ gi kpụ ihiẹn ile rị ụkụ trọkụ ndị hụ, kẹ w'a kpụ blọkụ: kẹ akpụrụ-igwe bu họbụ o gi a gba kẹ wili kẹ spoku kẹ họbụ lẹ enwẹn ẹ.

34Trọkụ ndị ahụn nwọnsọnmẹ ẹka ẹnọ-ẹnọ, ohu-ohu rịsọnmẹ ẹ nkọ ohu-ohu.

35Trọkụ ndị hụ nwọnsọnmẹ ihiẹn wẹ gi gbahunmẹ elu wẹ; omimi ẹ kazị mgbube ụbụkụ ohu. Ẹka a ile kwọndọnsọnmẹn'ẹ elu trọkụ hụ lẹ ọnụ a wụ ogbe ohu — anyannị w'a.

36Ọ tụzị chẹrobu lẹ ẹwọrọ lẹ nkụ yesọnmẹ akpụrụ-igwe rị mkpẹnrẹn lẹ ẹhụ wẹ, ebe ile nwọnlẹni ihiẹn rịn'a, tụyesọnmẹzi obobo ndị hụ wẹ dọngbama nọkẹ ihiẹn-olu mkpẹnrẹn-mkpẹnrẹn.

37Ẹnịna kẹ Huram mẹmẹ trọkụ iri ahụn, makẹni ihiẹn ohu k'o huyesọnmẹ igwe-bronzu gi kpụ wẹ ile, wẹ ile wụ ahanmahan; wẹ ile yi eyi.

38Huram mẹmẹ afẹrẹ igwe-bronzu iri. Ohu-ohu imẹ wẹ e ri galọnụ ọgụn-mmanaị; ụshịa a wụ ụbụkụ isin; afẹrẹ ohu jẹnkọ d'a rị trọkụ ohu.

39Ya Huram nọ bu trọkụ isẹn che ezi ẹbamịn ndịdan-mirin Ụlọ-nsọ, bu isẹn che ẹbamịn-ugu Ụlọ-nsọ, bu tankị uku hụ che ebe ẹhụ-ẹjan nọ gbugi, ẹbamịn ndịdan-mirin, ihun Ụlọ-nsọ.

40Ọ nọzị mẹmẹ afẹrẹ uku ndị ọzọ wẹ gi e rụn ọrụn imẹ Ụlọ-nsọ lẹ ọsẹkẹ lẹ afẹrẹ ndị wẹ gi e fekpu ihiẹn. Ẹrịra kẹ Huram dọn rụnchanrịn ihiẹn ile eze wụ Solomọnụ sị a rụn imẹ Ụlọ-nsọ Osolobuẹ —

41ihiẹn ndịnị k'ọ rụn: adansụn ẹbụọ, isi-adansụn ẹbụọ ẹhụ wẹ nọzị kẹ ugbẹgbẹ, ẹgan ndị hụ wẹ kpagbama hụn wẹ gi chọ isi-adansụn ẹbụbụọ hụ mma;

42ogbe Pomegraneti nnụ ahụn wẹ tụnị ẹgan ndị ahụn wẹ kpagbama. (Ogele pomegraneti ẹbụọ-ẹbụọ kẹ wẹ gisọnmẹ chọ ẹgan rị isi-adansụn ohu-ohu mma.)

43Hụram rụnzị Trọkụ iri ahụn lẹ afẹrẹ wẹ iri;

44lẹ Tankị uku hụ lẹ okẹn-efin mmẹbụọ rị okpuru ẹ;

45ite lẹ ọsẹkẹ lẹ afẹrẹ ndị ahụn wẹ gi e fekpu ihiẹn. Igwe bronzu wẹ finchanpụ ọhụnma-ọhụnma kẹ Huram gi mẹmẹni Eze wụ Solomọnụ ihiẹn ndịnị ile wẹ gi a rụn ọrụn imẹ Ụlọ-nsọ Osolobuẹ.

46Kẹ eze dọn gwa wẹ, ụrụa kẹ wẹ gi kpụgụ wẹ, wẹ nọ hu igwe-bronzu rịnranpụnị ye imẹ ụrụa hụ, gi kpụ wẹ — alị ụrụa rị mkpẹnrẹn Iyi Jọdanị, ẹgbata Sukọtụ lẹ Zarẹtanị.

47Solomọnụ amanị ihiẹn ndịnị, makẹni e bukẹzi wẹ ọda; amanị wẹ igwe-bronzu bann'a.

48Solomọnụ mẹmẹzi ihiẹn ndịnị ile rị imẹ Ụlọ Osolobuẹ: Ukpo nchụn-ẹjan goru, teburu goru wẹ gi e butọnị Osolobuẹ Brẹdi;

49Obu-ukpẹ ndị ahụn wẹ gi ezigbo goru wẹ buchelẹni ihiẹn ọzọ mẹmẹ, (hụn rịsọnmẹ ihun Ebẹhụ Kachanrịn Nsọ. Isẹn rị ẹbamịn ndịdan-mirin, isẹn rị ẹbamịn-ugu); obobo ndị ahụn wẹ gi goru kpụ lẹ ukpẹ ndị ahụn lẹ ihiẹn wẹ gi e biri ọkụn;

50ihiẹn ndị hụ wẹ gisọnmẹ ezigbo goru wẹ buchelẹni ihiẹn ọzọ mẹmẹ: kẹ afẹrẹ uku ndị hụ kẹ nwa-mbu ukpẹ ndị hụ kẹ afẹrẹ ndị ọzọ rịn'a kẹ sẹnsa wẹ gi a mụ nsẹnsi kẹ ụkụ-ọnụmụzọ rịchanrịn imẹ-imẹ, ụkụ-ọnụmụzọ Ebẹhụ Kachanrịn Nsọ lẹ ụkụ-ọnụmụzọ ibẹrẹ uku rị Ụlọ-NSỌ.

51Ogẹn Solomọnụ gi rụngụ ọrụn ile ọ rụn imẹ Ụlọ-nsọ Osolobuẹ, ọ nọ kpọnbanhan ihiẹn ndị ahụn nẹdi ẹ wụ Defidi gi kwanị Osolobuẹ nị wẹ gi rụn Ụlọ-nsọ: kẹ siliva kẹ goru kẹ ihiẹn ndị ọzọ ya lẹ wẹ wị. Solomọnụ nọ bu wẹ che ebe wẹ e dọnmẹ ihiẹn imẹ Ụlọ-nsọ Osolobuẹ.