Deuteronomy 1

Mien Bible (Thai Script) © Thailand Bible Society, 2007

Jump to: Chapter 2 →

1โมเซ ก๊อง น้าย เต๋ย หว่า บั๋ว อิสะลาเอน เญย หฒวัง เมี่ยน วั้ว หฒั่น, นิ่น บัว เยียม จอแดน ด้าย ตง ปูง แหมง เญย เต่ย-ปูง-ฮวาง, เซ เยียม อาลาบา, สุบอา เญย ต๋อย-หง่าน, เยียม ปาลาน เหธา โทเฟน, ลาบาน, ฮาเซโล้ด, ดีซาหับ น้าย เต๋ย ฟิ้ว-มู้ง บุด๋ง.

2เยียม โฮเล้บ บง กัน เสอี บง มี่ง คาเดดบาเนีย เซ เหฒียบ เยี้ยด ฮนอย เญย เจ๊า-ตี้ง.

3เยียม อิสะลาเอน เมี่ยน ธ้วด อียิบ เต่ย-ปูง, ฆะฮ้า เฝย เหฒียบ หฮญัง วั้ว หฮญัง, เหฒียบ เยี้ยด หฮลา แซง-เยี้ยด, โมเซ หฒิว เฒี้ยว หล่ง นิ่น พ้าย ปุน อิสะลาเอน เมี่ยน เญย เหยียด ฒู้ง หว่า ฒุ่น บั๋ว นิ่น บัว.

4วั้ว หฒั่น นิ่น เบ๊าะ ฮี่ง เยียม เฮ้ดโบน ฒี่ง, อาโมไล เมี่ยน เญย สิโหน ฮู่ง, หย่า เยียม เอเดนอี เบ๊าะ ฮี่ง เยียม อัดทาโล้ด ฒี่ง, บาซาน เต่ย เญย โอก ฮู่ง.

5โมเซ เยียม โมอับ เต่ย, จอแดน ด้าย เญย ตง ปูง แหมง เจี์ย กอน ก๊อง น้าย เต๋ย เล์ย-หลัด. นิ่น ก๊อง,

6เฒี้ยว, บัว เญย ทิน-ฮู่ง, เยียม โฮเล้บ บง บั๋ว บัว, “เม่ย บัว เยียม น้าย นอม บง เล่า อ๊ะ, เก๋า อ๊ะ.

7อ๋อย หฒุ แธะ เธี้ยง หูง เจี๊ยน อาโมไล เมี่ยน เญย บง-ไอ๊ ต๋อง เหธา ฮวิน หฑวน อาลาบา เต่ย วั้ว เต๋ย เมี่ยน เญย นอมๆ ต๋อง, มี่ง วั้ว เจี๋ย บง-ฮลัง, เหธา ไฟ ปูง เญย บง-ไอ๊ ต๋อง, เหธา เนเกบ, หย่า กัน เมดิเตเลเนียน ค้อย- เฮลน, เถา คานาอัน เมี่ยน เญย เต่ย-ปูง, หย่า เถา เลบานอน เก้, แอ๋ง เถา ยูเฟติด ต้ม ด้าย.

8หมั่ง ม่าะ! เยีย เฒาะ น้าย นอม เต่ย-ปูง จิว ปุน เม่ย บัว. เม่ย บัว กุ๊น เปียะ มี่ง เยียม อ๊ะ. เซ เยีย, เฒี้ยว, โฮ้ว เจี๊ยน แล์ง ปุน เม่ย บัว เญย อง-ถาย, อับลาฮัม, อีสัก เหธา ยาโค้บ เหธา นิ่น บัว เญย เฒ้ย-ฟุน เญย เต่ย-ปูง.”

9บัว หธ่อ เยียม โฮเล้บ บง วั้ว หฒั่น เยีย บั๋ว เม่ย บัว, “เยีย กั้น ดุ ล่าน เมี่ยน ฮนั้ง ดาม ไม้ ต์ง เม่ย บัว.

10อี้ หฒั่น เฒี้ยว, เม่ย บัว เญย ทิน-ฮู่ง, ปุน เม่ย บัว หฮยาง ด่ง ลู่ง เญย เหฮลย ธั้ม.

11โท้ เฒี้ยว, เม่ย บัว เญย อง-ถาย เญย ทิน-ฮู่ง, ปุน เม่ย บัว หฮยาง ธั้ม เจี๊ยน ฝาว เหยียด ธิน โก๊ว, หย่า เหธย ฟุ ปุน เม่ย บัว ฮนั้ง นิ่น แล์ง ปุน เม่ย บัว วั้ว นอ.

12เม่ย บัว ม่าย หละเญ้า เญย สี่, ม่าย ขวน เฮญี้ยว เญย สี่, ม่าย แฑง ญิ่น แฑง โญ์ว เญย สี่, ขูง เยีย กั้น ฮนั้ง หาย นอ ไฮ่ ดาม ตุ๊ ต์ง?

13อ๋อย หฒุ เยียม เม่ย บัว เญย ฝีงๆ กิ๊น ธ้วด ม่าย ธง-เม่ง, ม่าย เฮญี้ยว-ฒ่อย, หย่า ม่าย ปั้น เหฒ่ย เญย เมี่ยน, ต้ง เมี่ยน ท่าย เญย เมี่ยน. เยีย ฯฒฯ ออน นิ่น บัว โหฒว เม่ย บัว เญย เปย๊ย เฒ้ย.”

14เม่ย บัว เตา เยีย, “เม่ย เห่ว เยีย บัว ฮนั้ง น้าย นอ โหฒว เซ หอบ เญย.”

15เยีย ฯฒฯ เฒาะ เยียม ฝีงๆ โหฒว โฮล เญย เมี่ยน, ต้ง ม่าย ธง-เม่ง, หฒวัง เมี่ยน ท่าย เญย เมี่ยน, ออน นิ่น บัว โหฒว เปย๊ย เฒ้ย. ม่าย เต๋ย กุ๊น เหยียด ธิน เต้า, ม่าย เต๋ย กุ๊น เหยียด แป๊ะ เต้า, ม่าย เต๋ย กุ๊น ฮม์ เหฒียบ เต้า, ม่าย เต๋ย กุ๊น เหฒียบ เต้า. เยีย แอ๋ง ออน เต๋ย โหฒว เหยียด ฝีง เหยียด ฝีง เญย เจียน.

16วั้ว หฒั่น เยีย แอ๋ง ขวิน เม่ย บัว เญย เบ่น สี่ เจียน, ก๋อ-โย์ว ม่าย สี่ อ๋อย หฒุ ฒ่า หลง, แป้ง ฟิม เญย ตุ๋น สี่, ไม้ กุ๊น จวั่ง อิสะลาเอน ฝีง เญย ก๋อ-โย์ว ไฟ อิสะลาเอน เมี่ยน เหธา กั้น ฝีง เมี่ยน ม่าย สี่.

17เซี้ยม เญย เฒี่ยง โห่ ไม้ ตู๋ง หมั่ง หาย เต้า เญย เฮมียน. อ๋อย หฒุ ฒ่า โหฒว โฮล โหฒว ไฝ เญย ฟี่ ฮนั้ง เหฑ่ง. หย่า ไม้ ตู๋ง กั้ม เหฑีย หาย เต้า เมี่ยน เหว่ย หฒุ เซี้ยม เมี่ยน เซ เกวย ทิน-ฮู่ง. หาย เต๋ย สี่ เม่ย บัว ไฮ์ อะ ตุ๊ ตุ๋น, กุ๊น ต้อ ต้าย เยีย น้าย, เยีย ฯฒฯ ตุ๋น อ๊ะ.

18วั้ว หฒั่น เยีย หย่า เฒาะ เม่ย บัว อ๋อย หฒุ โหฒว เญย หญู่งๆ สี่ บั๋ว เม่ย บัว.

19บัว ฯฒฯ หฒิว เฒี้ยว, บัว เญย ทิน-ฮู่ง, พ้าย เญย หว่า ธ้วด โฮเล้บ, มี่ง ทง เม่ย บัว ปวัด เจี๋ย วั้ว นอม กั้ม เหฑีย ไห่ เญย ต้ม เต่ย-ปูง-ฮวาง หูง เจี๊ยน อาโมไล เมี่ยน เญย บง หฒั่ง ต๋อง ต้าย เถา คาเดดบาเนีย.

20เยีย แอ๋ง บั๋ว เม่ย บัว, “เม่ย บัว ต้าย เถา อาโมไล เมี่ยน เญย บง-ไอ๊ ต๋อง, เซ เฒี้ยว, บัว เญย ทิน-ฮู่ง, จิว ปุน บัว เญย ต๋อง.

21หมั่ง ม่าะ! เฒี้ยว, เม่ย บัว เญย ทิน-ฮู่ง, เฒาะ น้าย นอม เต่ย-ปูง จิว ปุน เม่ย บัว หมี่ อ๊ะ. กุ๊น เปียะ มี่ง เฒาะ น้าย นอม เต่ย-ปูง ฮนั้ง เฒี้ยว, เม่ย บัว เญย อง-ถาย เญย ทิน-ฮู่ง, บั๋ว เม่ย บัว วั้ว นอ. ไม้ ตู๋ง กั้ม เหฑีย หย่า ไม้ ตู๋ง เฮญี้ยว ฮวาง.”

22เม่ย บัว เหยียด ฒู้ง ฯฒฯ ต้าย บั๋ว เยีย, “บัว อ๋อย หฒุ ปุน เมี่ยน มี่ง ด่าง เถง บัว ฒ่า วั้ว นอม เต่ย-ปูง, ฯฒฯ หฑวน ต้าย ก๊อง บัว อ๋อย หฒุ ยั่ง หาย ติ้ว เจ๊า เปียะ หย่า อ๋อย เถา หาย นอม เหธา หาย นอม ฒี่ง.”

23ฮนั้ง น้าย โหฒว เยีย ไฮ์ หอบ เญย, ฯฒฯ กิ๊น เหฒียบ เหญ่ย เต้า เม่ย บัว เญย เมี่ยน, เหยียด ฝีง เหยียด เต้า.

24นิ่น บัว ฯฒฯ ธ้วด เจ๊า ยั่ง บง มี่ง เถา เอดโค ฮ์อง ฒ่า วั้ว เต๋ย เดา.

25นิ่น บัว ต้อ เต๋ย วั้ว นอม เต่ย-ปูง เญย เปี๊ยว ต้าย ปุน บัว หย่า บั๋ว บัว, “ เฒี้ยว, บัว เญย ทิน-ฮู่ง, เหธย ปุน บัว เญย เต่ย-ปูง เซ หลง ไห่.”

26มป่า เม่ย บัว แหง่ง เจี๊ยน เฒี้ยว, เม่ย บัว เญย ทิน-ฮู่ง, พ้าย เญย หว่า, ไม้ คั้ง เปียะ วั้ว นอม เต่ย-ปูง.

27เยียม เม่ย บัว เญย ด๊บ-ลิ่ว เม่ย บัว งบ เจี๊ยน ก๊อง, “ เฒี้ยว ฑอง บัว ฯฒฯ ต้อ บัว เยียม อียิบ เต่ย-ปูง ธ้วด ต้าย จิว ปุน อาโมไล เมี่ยน เหมียด เหฑ่ง บัว.

28บัว ไม้ ไฮ่ มี่ง หาย. บัว เญย ก๋อ-โย์ว ฒู้ง ปุน บัว เญย บะฑิว หยุ เหฑ่ง หมี่ อ๊ะ. เหว่ย หฒุ นิ่น บัว ก๊อง, ‘วั้ว เต๋ย เมี่ยน เก้า เฮ้น บัว, โหย่ว โฮล โหย่ว ฮลัง. นิ่น บัว เญย ฒี่ง โหย่ว โฮล โหย่ว ว้วน, ฒี่ง หลาด แบ่ง ลู่ง ฮลัง. เยีย บัว ฒู้ง ปวัด อาน้าก เมี่ยน เยียม หน่าย.’”

29เยีย ฯฒฯ บั๋ว เม่ย บัว, “ไม้ ตู๋ง แฮะ กั้น, ไม้ ตู๋ง กั้ม เหฑีย นิ่น บัว.

30เฒี้ยว, เม่ย บัว เญย ทิน-ฮู่ง, มี่ง ด่าง ต้อ เม่ย บัว, อ๋อย เหว่ย เม่ย บัว เบ๊าะ จ๋า, ฮนั้ง เยียม อียิบ เต่ย-ปูง ตอง เจี๊ยน เม่ย บัว โหฒว นอ.

31เยียม วั้ว เต่ย-ปูง-ฮวาง เม่ย บัว ปวัด เฒี้ยว, เม่ย บัว เญย ทิน-ฮู่ง, เฒี่ยง ติ้ว เจ๊า ต้อ เม่ย บัว กัน เจ๊า หฒั่ง แป้ง ออน เญย เถา น้าย นอม ต๋อง, ฮนั้ง เตีย ฮล้อบ กั้น เญย ตอน นอ.”

32มป่า ไม้ กุ๊น เยีย ฮนั้ง น้าย นอ ก๊อง, เม่ย บัว ฒู้ง ไม้ เสียน เขา เฒี้ยว, เม่ย บัว เญย ทิน-ฮู่ง,

33ต้ง เยียม เจ๊า หฒั่ง มี่ง ด่าง เม่ย บัว วั้ว เต้า. ลู่ง ม์วน หฒั่น นิ่น เยียม โต์ว กะญั์ว, ลู่ง ฮนอย หฒั่น เยียม ต๊อ บ๋วน, มี่ง ด่าง ล์อ ต๋อง ปุน เม่ย บัว เหลียบ เธี้ยง หย่า ปุน เม่ย บัว ฮิ้ว ตุ๊ อ๋อย หฒุ ยั่ง หาย มี่ง.

34เฒี้ยว หมวัง ไฮ์ เม่ย บัว งบ เญย หว่า ฯฒฯ เฉีย เจี์ย! ไห่, โฮ้ว เจี๊ยน ก๊อง,

35“น้าย ต่อย หว่าย ไห่ เญย เมี่ยน เลี่ยม เหยียด เต้า ไม้ ตุ๊ ปวัด เยีย แล์ง ปุน เม่ย บัว เญย อง-ถาย วั้ว นอม หลง ไห่ เญย เต่ย-ปูง.

36ขูง ม่าย เยฟุนเน เญย ตอน, คาเล้บ, ตุ๊ ปวัด ฮนั้ง. เยีย อ๋อย เฒาะ นิ่น ตาบ เจี๋ย เญย เต่ย-ปูง จิว ปุน นิ่น เหธา นิ่น เญย เฒ้ย-ฟุน, เหว่ย หฒุ นิ่น หล่ง เหฑ่ง เฮญี้ยว กัน เฒี้ยว.”

37หลาย เม่ย บัว, เฒี้ยว หย่า เฉีย เจี์ย เยีย. นิ่น ก๊อง, “โมเซ อ้า! เลี่ยม เม่ย หย่า ไม้ ตุ๊ เปียะ วั้ว นอม เต่ย-ปูง อ๊ะ.

38มป่า เม่ย เญย ปอง-ปั์ว เมี่ยน, นุน เญย ตอน, โยซูวา, ตุ๊ เปียะ. เม่ย อ๋อย หฒุ เถง นิ่น หฒูง ชะ, เหว่ย หฒุ นิ่น อ๋อย หฒุ ต้อ อิสะลาเอน เมี่ยน เปียะ มี่ง หฑิบ วั้ว นอม เต่ย-ปูง.

39เลี่ยม เม่ย บัว เญย ฝุเจว๊ย-ไฝ, ต้ง เม่ย บัว ก๊อง อ๋อย หฒุ ธ้าง มี่ง วั้ว เต๋ย, เซ เถา อี้ ฮนอย ไม้ ฮิ้ว ตุ๊ หลง, ไม้ ฮิ้ว ตุ๊ เธี้ยว เญย ฝุเจว๊ย, ฒู้ง ตุ๊ เปียะ วั้ว นอม เต่ย-ปูง. เยีย อ๋อย เฒาะ วั้ว นอม เต่ย-ปูง จิว ปุน นิ่น บัว ฯฒฯ เป๋น นิ่น บัว หฑิบ เญย ป่วน.

40มป่า เม่ย บัว อ๋อย หฒุ ต๋าว ซิน หูง เจี๊ยน เต่ย-ปูง-ฮวาง, กัน ค้อย-ซิ วั้ว ติ้ว เจ๊า หฑวน.”

41วั้ว หฒั่น เม่ย บัว เตา, “เยีย บัว ป์าม ฒุ์ย ต่อง เฒี้ยว. เยีย บัว อ๋อย ธ้วด มี่ง เบ๊าะ จ๋า ฮนั้ง เฒี้ยว, เยีย บัว เญย ทิน-ฮู่ง, บั๋ว เยีย บัว โหฒว นอ.” เม่ย บัว เหยียด ฒู้ง ฯฒฯ ปุ๋ย เจี๊ยน หวัวะ กิ่น, ฮนั้ม ต้าย ฝาว บง-ไอ๊ เญย ต๋อง เซ ฮู่ง เห่ เญย.

42มป่า เฒี้ยว ก๊อง บั๋ว เยีย, “บั๋ว นิ่น บัว, ‘ไม้ ตู๋ง มี่ง เบ๊าะ จ๋า เหว่ย หฒุ เยีย ไม้ เหธา เม่ย บัว เยียม. เหฑีย เม่ย บัว หฒุ เซวย เม่ย บัว เญย วิน-วั้ง.’”

43เย ีย ฯฒฯ บั๋ว เม่ย บัว มป่า เม่ย บัว ไม้ คั้ง หมวัง. เม่ย บัว แหง่ง เจี๊ยน เฒี้ยว หัด เญย หว่า, โหฒว เหมา, ธ้วด มี่ง ฝาว บง หฒั่ง เญย ต๋อง หมี่ อ๊ะ.

44เยียม วั้ว บง เญย อาโมไล เมี่ยน ธ้วด ต้าย เบ๊าะ เม่ย บัว, ฮนั้ง เหยียด ปู้ง เมว์ย นอ, หฒุ่น เม่ย บัว เยียม เสอี บง ไต๋ เจี๊ยน มี่ง เถา โฮมา.

45เม่ย บัว ฯฒฯ หฑวน ต้าย เยียม เฒี้ยว เญย หฑะเฮมียน เญี้ยม. เฒี้ยว หย่า ฮนั้ง ไม้ ไฮ์ นอ, ไม้ หมวัง เม่ย บัว เญี้ยม.

46เม่ย บัว ฯฒฯ แอ๋ง เยียม คาเดด ธั้ม-ฮนอย เญย, หฒิว เม่ย บัว ตุ๊ เยียม หน่าย เญย ฮนอย-เหญียะ.

Jump to: Chapter 2 →