Deuteronomy 10

Mien Bible (Thai Script) © Thailand Bible Society, 2007

← Chapter 9 Jump to: Chapter 11 →

1วั้ว หฒั่น เฒี้ยว ก๊อง บั๋ว เยีย, “อ๋อย หฒุ แอ๋ง หฒุ อี คว้าย หละเปย๊ย ฮนั้ง ฒิ่น ด่าง วั้ว เต๋ย อี คว้าย นอ, ฯฒฯ ฝาว บง ต้าย ล์อ เยีย. หย่า อ๋อย หฒุ โหฒว นอม เดี๋ยง-ฟาง เหว่ย ตั๊บ.

2เยีย ฯฒฯ แอ๋ง เฟี้ย เจี๊ยน หว่า ฮนั้ง ฒิ่น ด่าง เม่ย เบ๊าะ ฮู้ วั้ว เต๋ย อี คว้าย เญย หว่า นอ. เฟี้ย ลิ์ว, เม่ย อ๋อย หฒุ ตั๊บ เจี๊ยน วั้ว นอม ฟาง.”

3เยีย ฯฒฯ หล่ง ตะซุ เดี๋ยง โหฒว นอม ฟาง แอ๋ง หฒุ อี คว้าย หละเปย๊ย-เป๊น ฮนั้ง ฒิ่น ด่าง วั้ว เต๋ย อี คว้าย นอ. เยีย เญย ปั์ว แอ๋ง นั้น เจี๊ยน วั้ว เต๋ย อี คว้าย หละเปย๊ย-เป๊น ฝาว บง.

4เฒี้ยว แอ๋ง เฟี้ย วั้ว เต๋ย เหฒียบ ติ้ว เล์ย-หลัด ฮนั้ง ฒิ่น ด่าง เฟี้ย วั้ว หฑุ่น นอ, เซ เม่ย บัว กั๊บ ฒุ้น วั้ว ฮนอย นิ่น เยียม บง กู้ หงว่าย, โต์ว กะญั์ว, ฒุ่น ปุน เม่ย บัว เญย เล์ย-หลัด. เฒี้ยว หย่า จิว ปุน เยีย.

5เยีย ฯฒฯ ต๋าว ซิน เหฌี่ย บง, หฒิว เฒี้ยว พ้าย เญย หว่า เฒาะ วั้ว เต๋ย หละเปย๊ย-เป๊น ตั๊บ เจี๊ยน เยีย โหฒว วั้ว นอม ฟาง กะญั์ว. เถา อี้ จ๋า ฮนอย หธ่อ เยียม วั้ว เญย.

6(อิสะลาเอน เมี่ยน เยียม ยาอาคัน เมี่ยน เญย ววม-ค้วด มี่ง เถา โมเสลา. อาโลน ฯฒฯ เยียม หน่าย เกวย เสย หย่า หฒัง เจี๊ยน หน่าย. นิ่น เญย ตอน, เอเลอาซา, หฑิบ เจี๊ยน โหฒว ไซ เมี่ยน.

7อิสะลาเอน เมี่ยน เยียม หน่าย ธ้วด เจ๊า มี่ง เถา กุดโกดา, แอ๋ง เยียม กุดโกดา มี่ง เถา โย้ดบาทา, เซ ม่าย โด๊ะ ธั้ม เญย ต๋อง.

8วั้ว หฒั่น เฒี้ยว กิ๊น ธ้วด เลวี ฝีง เหว่ย แกง เฒี้ยว เญย แล์ง แหง่ง หว่า ฟาง, เหว่ย โซ้ว เจี๊ยน เฒี้ยว เญย หฑะเฮมียน ฟู-สู, หย่า เต๊ง นิ่น เญย บั๋ว ปวัง หว่า ปุน เมี่ยน. ฮนั้ง หน่าย โหฒว เจี๊ยน ต้าย เถา อี้ จ๋า ฮนอย.

9เหว่ย น้าย เลวี เมี่ยน เยียม นิ่น บัว เญย ก๋อ-โย์ว บุด๋ง ไม้ ม่าย นิ่น บัว เญย ป่วน, ไม้ ตุ๊ หฑิบ หาย หญู่ง. เฒี้ยว กั้น โหฒว นิ่น บัว หฑิบ เญย ป่วน ฮนั้ง เฒี้ยว, เม่ย บัว เญย ทิน-ฮู่ง, บั๋ว นิ่น บัว นอ.)

10เยีย ฮนั้ง ฒิ่น ด่าง วั้ว หฑุ่น นอ, เยียม วั้ว เจี๋ย บง เฝย เหฒียบ ฮนอย เฝย เหฒียบ ม์วน. น้าย หฑุ่น เฒี้ยว แอ๋ง หมวัง เยีย โท้ เญย หว่า หย่า ไม้ เหมียด เม่ย บัว.

11เฒี้ยว บั๋ว เยีย, “มี่ง อ๊ะ. ต้อ น้าย เต๋ย แปะ ฝีง ธ้วด เจ๊า เหว่ย ปุน นิ่น บัว เปียะ มี่ง ตุ๊ วั้ว นอม เต่ย-ปูง เป๋น นิ่น บัว เญย ป่วน, เซ เยีย โฮ้ว จิว ปุน นิ่น บัว เญย อง-ถาย เญย เต่ย-ปูง.”

12โอ อิสะลาเอน เมี่ยน อ้า! อี้ หฒั่น เฒี้ยว, เม่ย บัว เญย ทิน-ฮู่ง, อ๋อย เม่ย บัว ฮนั้ง หาย นอ โหฒว? นิ่น อ๋อย เม่ย บัว ท่าย เฒี้ยว, เม่ย บัว เญย ทิน-ฮู่ง, เอย เจี๊ยน นิ่น เญย เอ๋ย, หล่ง เหฑ่ง เฮญี้ยว หล่ง เหฑ่ง หฒะเอ๋ย ฮนั้ม นิ่น, ฟู-สู นิ่น.

13อ๋อย หฒุ กัน หลง เฒี้ยว เญย เล์ย-หลัด เหธา เล์ย, เซ เยีย อี้ ฮนอย จิว ปุน เม่ย บัว เญย เล์ย เหว่ย ปุน เม่ย บัว ตุ๊ หลง.

14หมั่ง ม่าะ! ลู่ง เหธา เก้า ฮลัง เจี๋ย เญย ลู่ง, เดา-เป้ย เหธา เยียม เดา-เป้ย เญย หม่าน หมวด เป๋น เฒี้ยว, เม่ย บัว เญย ทิน-ฮู่ง เญย.

15มป่า เฒี้ยว อะเฮน้ย เม่ย บัว เญย อง-ถาย หย่า ฮนั้ม นิ่น บัว, ฯฒฯ เยียม หม่าน ฝีง บุด๋ง กิ๊น นิ่น บัว เญย เฒ้ย-ฟุน, เซ กิ๊น เม่ย บัว ฮนั้ง อี้ จ๋า ฮนอย นอ.

16เหว่ย น้าย เม่ย บัว อ๋อย หฒุ จั๊ม เฮญี้ยว, ไม้ ตู๋ง แอ๋ง โหฒว เฮญี้ยว แหง่ง.

17เหว่ย หฒุ เฒี้ยว, เม่ย บัว เญย ทิน-ฮู่ง, เซ หม่าน เฒี่ยน เญย เฒี่ยน, หม่าน เฒี้ยว เญย เฒี้ยว, โฮล เจี๋ย เญย ทิน-ฮู่ง, เฮ้น ไห่, บัวะ ฮ่อง ไห่. นิ่น ไม้ หมั่ง หาย เต้า เญย เฮมียน หย่า ไม้ ฒิบ ญ่าน หฮมวัง.

18นิ่น เถง กู้ ฮั่น ฝุเจว๊ย เหธา เอ๊า-กว๊า ตุ๊ แป้ง ฟิม, หย่า ฮนั้ม เยียม เม่ย บัว บุด๋ง เญย กั้น ฝีง เมี่ยน ฯฒฯ เหธย หญั่น ฮบ ลุย-โหว ปุน นิ่น บัว.

19เหว่ย น้าย เม่ย บัว หย่า อ๋อย หฒุ ฮนั้ม เยียม เม่ย บัว บุด๋ง เญย กั้น ฝีง เมี่ยน เหว่ย หฒุ เยียม อียิบ เต่ย-ปูง เญย เฒี่ยง โห่ เม่ย บัว หย่า เป๋น กั้น ฝีง เมี่ยน.

20อ๋อย หฒุ ท่าย เฒี้ยว, เม่ย บัว เญย ทิน-ฮู่ง, ขูง ฟู-สู นิ่น ฮนั้ง. อ๋อย หฒุ เขา ว้วน นิ่น หย่า เฒี้ยง นิ่น เญย บั๋ว โฮ้ว หว่า.

21อ๋อย หฒุ เธง นิ่น. นิ่น เซ เม่ย บัว เญย ทิน-ฮู่ง, ต้ง เม่ย บัว กั้น เญย มฒีง ตุ๊ ปวัด นิ่น เหว่ย เม่ย บัว โหฒว วั้ว เต๋ย โฮล ไห่, บัวะ ฮ่อง ไห่ เญย สี่ วั้ว เต้า.

22เม่ย บัว เญย อง-ถาย มี่ง อียิบ เต่ย-ปูง วั้ว หฒั่น นิ่น บัว ม่าย เธี้ยด เหฒียบ ล่าน เมี่ยน. อี้ หฒั่น เฒี้ยว, เม่ย บัว เญย ทิน-ฮู่ง, ปุน เม่ย บัว ด่ง ลู่ง เญย เหฮลย ธั้ม.

← Chapter 9 Jump to: Chapter 11 →