Deuteronomy 8

Mien Bible (Thai Script) © Thailand Bible Society, 2007

← Chapter 7 Jump to: Chapter 9 →

1อ๋อย หฒุ ไฝ ฟิม, เอย เจี๊ยน เยีย อี้ ฮนอย จิว ปุน เม่ย บัว เญย เหยียด ฒู้ง เล์ย-หลัด, เหว่ย ปุน เม่ย บัว ตุ๊ เฒี่ยง เจี๊ยน หย่า หฮยาง ต้าย, ตุ๊ เปียะ มี่ง เยียม เฒี้ยว โฮ้ว เจี๊ยน แล์ง ปุน เม่ย บัว เญย อง-ถาย วั้ว นอม เต่ย-ปูง.

2เม่ย บัว อ๋อย หฒุ จั๋ง เจี๊ยน เยียม วั้ว เต่ย-ปูง-ฮวาง น้าย เต๋ย เฝย เหฒียบ หฮญัง กะญั์ว, เฒี้ยว, เม่ย บัว เญย ทิน-ฮู่ง, ฮนั้ง หาย นอ ต้อ เม่ย บัว, เหว่ย ปุน เม่ย บัว เหญี่ยม กั้น โหฒว ไฝ, เหว่ย เสย หมั่ง ก๋า เม่ย บัว เญย เฮญี้ยว ฮนั้ง หาย นอ, เม่ย บัว หฒะเก้ง กัน หลง นิ่น เญย เล์ย-หลัด เฒ์ย ไฟ ไม้ เฒ์ย.

3นิ่น ปุน เม่ย บัว เหญี่ยม กั้น โหฒว ไฝ, ปุน เม่ย บัว เฮญี้ยว เซีย, แอ๋ง เฒาะ มานา ปุน เม่ย บัว หญั่น, ต้ง เม่ย บัว กั้น ไฟ เม่ย บัว เญย อง-ถาย ไม้ ฮิ้ว เญย กะน้าย. น้าย เซ เหว่ย ปุน เม่ย บัว ฮิ้ว ตุ๊ เมี่ยน ไม้ เฒ์ย ขูง เขา หญั่น ฮบ ยู์ง แหม่ง ฮนั้ง. หย่า อ๋อย หฒุ เขา เฒี้ยว ก๊อง เญย โจ๋วๆ หว่า.

4น้าย เต๋ย เฝย เหฒียบ หฮญัง กะญั์ว เม่ย บัว เญย ลุย-โหว ไม้ ฮู้, เหฒา หย่า ไม้ อ๋ม.

5เยียม เม่ย บัว เญย เฮญี้ยว อ๋อย หฒุ ฮิ้ว ตุ๊ เฒี้ยว, เม่ย บัว เญย ทิน-ฮู่ง, เบ๊าะ หฌาว เม่ย บัว ฮนั้ง เตีย เบ๊าะ หฌาว กั้น เญย ตอน นอ.

6ฮนั้ง หน่าย, เม่ย บัว อ๋อย หฒุ กัน หลง เฒี้ยว, เม่ย บัว เญย ทิน-ฮู่ง เญย เล์ย-หลัด, หย่า ยั่ง นิ่น เญย โต์-เล์ย, ท่าย นิ่น.

7เหว่ย หฒุ เฒี้ยว, เม่ย บัว เญย ทิน-ฮู่ง, อ๋อย ต้อ เม่ย บัว เปียะ นอม หลง ไห่ เญย เต่ย-ปูง. วั้ว นอม เต่ย-ปูง ม่าย โด๊ะ, ม่าย ววม-ฒี้ง, ววม-เบ๋ว เยียม วั้ว ฮ์อง หย่า เยียม วั้ว บง เหลี่ยว ธ้วด.

8วั้ว นอม เต่ย-ปูง หย่า ม่าย เบย้า วิด เหธา เบย้า บาลี, ม่าย อะหงุ่น เฮมย, ง่ง หญอ เดี๋ยง, หฒิ เลี่ยว เดี๋ยง, กะลั้น เดี๋ยง เหธา เมว์ย-ต้อง.

9เยียม วั้ว นอม เต่ย-ปูง เม่ย บัว หย่า ไม้ หง่อ, ไม้ ธา หาย หญู่ง. วั้ว เต๋ย เดา เญย หละเปย๊ย ม่าย เฮลียะ. เยียม วั้ว บง หย่า ไฮ่ เว้ด ธ้วด ต้ง ซิ.

10เม่ย บัว ตุ๊ หญั่น เป๊ว, อ๋อย หฒุ เธง เฒี้ยว, เม่ย บัว เญย ทิน-ฮู่ง, เหว่ย นิ่น เฒาะ หลง ไห่ เญย เต่ย-ปูง จิว ปุน เม่ย บัว.

11อ๋อย หฒุ ไฝ ฟิม, ไม้ ตู๋ง หละคุ เฒี้ยว, เม่ย บัว เญย ทิน-ฮู่ง. ไม้ ตู๋ง ปู๋ง ด๊อด เหยียด ติ้ว นิ่น เญย เล์ย-หลัด เหธา หลี่ง เหธา เล์ย, ต้ง เยีย อี้ ฮนอย จิว ปุน เม่ย บัว เญย เล์ย.

12ไม้ เฒย แอ๊ะ, เม่ย บัว ตุ๊ หญั่น เป๊ว, โหฒว เปย๊า หลง เยียม เจี๊ยน เญย เฒี่ยง โห่,

13เม่ย บัว เญย ง่ง กวั้น, ปะกี ยู่ง เหธา ยู่ง กวั้น หฮยาง เจี๊ยน ฝาว, เม่ย บัว เญย เจียม ญ่าน เหธา ม่าย เญย หญู่งๆ กะน้าย หย่า ธั้ม เจี๊ยน ฝาว วั้ว หฒั่น,

14เหฑีย เม่ย บัว เญย เฮญี้ยว โหฒว เหมา, หละคุ เฒี้ยว, เม่ย บัว เญย ทิน-ฮู่ง, ต้ง ต้อ เม่ย บัว ธ้วด อียิบ เต่ย-ปูง, โหฒว โน่ว เญย ต๋อง.

15เฒี้ยว ต้อ เม่ย บัว เจี๋ย กั้ม เหฑีย ไห่ เญย ต้ม เต่ย-ปูง-ฮวาง. เยียม วั้ว ม่าย นาง-โตะ เหธา เหฒียบ เหญ่ย ด้าง, หย่า เป๋น เต่ย-ปูง-ฮ์าน, ไม้ ม่าย ววม. นิ่น ปุน ววม เยียม หละเปย๊ย-แหง่ง ธ้วด ต้าย ปุน เม่ย บัว ฮบ.

16เยียม วั้ว เต่ย-ปูง-ฮวาง นิ่น ปุน มานา เม่ย บัว หญั่น, เซ ต้ง เม่ย บัว เญย อง-ถาย ไม้ ฮิ้ว เญย กะน้าย. น้าย เซ เหว่ย ปุน เม่ย บัว เหญี่ยม กั้น โหฒว ไฝ, เหว่ย เสย เม่ย บัว, ปุน เม่ย บัว ฆะฮ้า ฮี้ง ตุ๊ หลง.

17อ๋อย หฒุ ไฝ ฟิม, ไม้ ตู๋ง เยียม เฮญี้ยว ฮนั้ม, “เซ เยีย กั้น เญย ชะ, เยีย กั้น เญย ปั้น เหฒ่ย ปุน เยีย ฮนั้ง น้าย นอ ปุ๊ด ฒ่อย.”

18อ๋อย หฒุ จั๋ง เจี๊ยน เฒี้ยว, เม่ย บัว เญย ทิน-ฮู่ง, ปุน เม่ย บัว ม่าย ปั้น เหฒ่ย ฮนั้ง น้าย นอ ปุ๊ด ฒ่อย ต้าย, เหว่ย เหฒียบ ฒัวะ เญย เอย เจี๊ยน นิ่น เหธา เม่ย บัว เญย อง-ถาย โฮ้ว เจี๊ยน เหลียบ เญย แหง่ง หว่า ฮนั้ง อี้ ฮนอย นอ.

19อี้ ฮนอย เยีย อ๋อย เฮนี้ยๆ เญย ขวิน เม่ย บัว. สี ก๊อง เม่ย บัว หละคุ เฒี้ยว, เม่ย บัว เญย ทิน-ฮู่ง, มี่ง ปัวะ หฒั่ง ป๋าย กั้น เต้า เฒี่ยน นอ, เม่ย บัว ด่ง หาย ฒู้ง อ๋อย หฒุ เหมียด.

20ฮนั้ง เฒี้ยว ปุน เยียม เม่ย บัว เญย วั้ว ด่าง แหมง วั้ว เต๋ย ฝีงๆ เมี่ยน หฒุ เหมียด, เม่ย บัว หย่า ฮนั้ง วั้ว นอ หฒุ เหมียด หลาย ไม้ หมวัง เฒี้ยว, เม่ย บัว เญย ทิน-ฮู่ง เญย หว่า.

← Chapter 7 Jump to: Chapter 9 →