Deuteronomy 21

Mien Bible (Thai Script) © Thailand Bible Society, 2007

← Chapter 20 Jump to: Chapter 22 →

1เยียม เฒี้ยว, เม่ย บัว เญย ทิน-ฮู่ง, จิว ปุน เม่ย บัว เหว่ย เป๋น เม่ย บัว เญย ป่วน เต่ย-ปูง, สี ก๊อง เม่ย บัว ปวัด เต้า เมี่ยน หฒุ ไต๋ ไต่ เยียม วั้ว หล่ม-ฮวาง, หย่า ไม้ ฮิ้ว ตุ๊ หาย เต้า ไต๋,

2อ๋อย หฒุ เห่ว เม่ย บัว เญย เมี่ยน โก๋ เหธา เซี้ยม ฒุ์ย เจียน ธ้วด มี่ง เดาะ หมั่ง ก๋า, น้าย เต้า หฒุ ไต๋ เญย เมี่ยน เยียม นิ่น ไต่ เญย ต๋อง นิด เว่ย ก๋อม เญย ฒี่ง หาย นอม เก้า ฟัด เจี๋ย.

3เยียม นิด จั๋น-ไต่ เก้า ฟัด วั้ว นอม ฒี่ง เญย เมี่ยน โก๋ อ๋อย หฒุ ต้อ เต้า ไม้ แก้ง โหฒว เจี๋ย กง หย่า ไม้ ก์า เจี๋ย เดี๋ยง-ก์า เญย ง่ง เหฒ่ย,

4มี่ง เถา นอม ฮ์อง. วั้ว นอม ฮ์อง เมี่ยน ไม้ ไล่ เจี๋ย เดา ไฟ หฒวัง เจี๋ย กะน้าย หย่า ม่าย โด๊ะ, ม่าย ววม-ต้าย เญย. เยียม วั้ว อ๋อย หฒุ เบ๊าะ ง่ง เญย จาง เน้า.

5เลวี เญย เฒ้ย-ฟุน วั้ว เต๋ย ไซ เมี่ยน อ๋อย หฒุ ธ้วด มี่ง เถา วั้ว นอม ต๋อง. เฒี้ยว, เม่ย บัว เญย ทิน-ฮู่ง, กิ๊น นิ่น บัว ต้าย ฟู-สู นิ่น, เต๊ง เฒี้ยว เญย บั๋ว ปวัง หว่า หย่า ตุ๋น เหยียด ฒู้ง แฑง จ๋า เหธา โหฒว ปุน เมี่ยน หฒุ มุน เญย สี่.

6เยียม นิด จั๋น-ไต่ เก้า ฟัด วั้ว นอม ฒี่ง เญย เมี่ยน โก๋ ฯฒฯ เยียม วั้ว นอม ฮ์อง, หฑาว นิ่น บัว เญย ปั์ว เยียม เบ๊าะ จาง เน้า วั้ว เต้า ง่ง เหฒ่ย กู้ หงว่าย.

7นิ่น บัว ฯฒฯ โหฒว ฒอง-เหฒง ก๊อง, “ไม้ เฒ์ย เยีย บัว เญย ปั์ว ไต๋ น้าย เต้า เมี่ยน. เยีย บัว กั้น เญย มฒีง หย่า ไม้ ปวัด นิ่น หฒุ ไต๋ ไต่.

8โอ เฒี้ยว อ่า, โท้ เม่ย กวั่ง ฆอย เม่ย เญย แปะ ฝีง, อิสะลาเอน เมี่ยน, เญย ฒุ์ย, เซ เม่ย หฒัวะ ต้าย เญย แปะ ฝีง. โท้ ไม้ ตู๋ง ปุน เม่ย เญย เมี่ยน เหว่ย น้าย เต้า ไม้ โหฒว ต่อง เญย เมี่ยน หฒุ ไต๋ ไต่ เญย ฒุ์ย ดาม-ตอง.”

9ฮนั้ง น้าย หฒิว เฒี้ยว ปวัด, เม่ย บัว โหฒว ตุ๊ หอบ ฯฒฯ ไม้ หฒุ เหว่ย ไม้ โหฒว ต่อง เญย เมี่ยน หฒุ ไต๋ ไต่ ดาม-ตอง.

10เม่ย บัว ธ้วด มี่ง เบ๊าะ จ๋า วั้ว หฒั่น, เฒี้ยว, เม่ย บัว เญย ทิน-ฮู่ง, จิว นิ่น บัว หฒุ เยียม เม่ย บัว เญย ปั์ว-เดี๊ย, เม่ย บัว ฯฒฯ ธ้าง ตุ๊ นิ่น บัว.

11เยียม ธ้าง ต้าย เญย เมี่ยน กะญั์ว ปวัด ม่าย เซียะ เหฑว่ย, หย่า ไฮ์ อ๋อย หล่ง โหฒว เอ๊า,

12กุ๊น ต้อ นิ่น มี่ง เม่ย เญย เปย๊า. ปุน นิ่น เถย เหฑ่ง บะเปยย แอ๋ง จั๊บ ปั์ว-โด๊ะ-ไฆว์,

13เหยี่ยน ฆอย หฒุ ธ้าง ต้าย วั้ว หฒั่น ฒุ เจี๊ยน เญย ลุย-โหว, หย่า ปุน นิ่น เยียม เม่ย เญย เปย๊า เฑ่า เญี้ยม นิ่น เญย เตี๋ย หม่า ปวั๊ง เหยียด หฮลา เหญียะ. ฆะฮ้า หล่ง นิ่น โหฒว เอ๊า ตุ๊ อ๊ะ. เม่ย หย่า เป๋น นิ่น เญย โหฆ.

14โฮ์ ต้าย สี ก๊อง ไม้ ปวั๊ง เฮญี้ยว นิ่น, ปุน นิ่น ธ้วด หย่า เซว่ย นิ่น มี่ง หาย หย่า ตุ๊. ไม้ ตู๋ง ปุน นิ่น ต๋อง โน่ว หม่าย ญ่าน, เหว่ย หฒุ เม่ย ป่าย หฒุ นิ่น หมี่ อ๊ะ.

15สี ก๊อง เมี่ยน ม่าย อี เต้า เอ๊า, ม่าย เต้า นิ่น ฮนั้ม, ม่าย เต้า นิ่น ไม้ ฮนั้ม. อี เต้า ฒู้ง ยู์ง ตุ๊ ตอน มป่า นิ่น เญย ตอน-หละเก๊า เซ นิ่น ไม้ ฮนั้ม วั้ว เต้า เอ๊า เญย ตอน.

16เถา ปุน ฆอย จา-ตี้ง นิ่น เญย ตอน หฑิบ เญย เฒี่ยง โห่, ไม้ ตู๋ง เฒาะ โหฒว ตอน-หละเก๊า ตุ๊ ซูง-โก๊ว กะน้าย ปุน นิ่น ฮนั้ม วั้ว เต้า เอ๊า เญย ตอน, เควย หฒุ หฒะเก้ง โหฒว ตอน-หละเก๊า วั้ว เต้า, ต้ง นิ่น ไม้ ฮนั้ม วั้ว เต้า เอ๊า เญย ตอน.

17นิ่น อ๋อย หฒุ ปุน ซูง-โก๊ว กะน้าย ต้ง นิ่น ไม้ ฮนั้ม วั้ว เต้า เอ๊า เญย ตอน เหว่ย เหญี่ยม นิ่น โหฒว ตอน-หละเก๊า. น้าย เต้า โหฒว นิ่น เญย ต้าว เต้า ตอน. โหฒว ตอน-หละเก๊า ตุ๊ ซูง-โก๊ว เญย เล์ย เป๋น นิ่น เญย.

18หาย เต้า ม่าย ตอน, วั้ว เต้า ตอน ไม้ เฒี่ยง ฮ่อง, เฮญี้ยว แหง่ง ไห่, เตี๋ย หม่า เบ๊าะ หฌาว หย่า ไม้ หมวัง,

19นิ่น เญย เตี๋ย หม่า อ๋อย หฒุ เฒาะ นิ่น ต้อ มี่ง เถา กั้น เญย ป๊วน-ฒี่ง แก้ง ด่าง, เมี่ยน โก๋ วั้ว.

20นิ่น บัว อ๋อย หฒุ ก๊อง บั๋ว วั้ว เต๋ย เมี่ยน โก๋, “เยีย บัว เญย น้าย เต้า ตอน เฮญี้ยว แหง่ง ไห่, ไม้ หมวัง เยีย บัว เญย หว่า. ขูง โหฒว พะลี พะหลาย เญย สี่ เม้า หญั่น ฮบ ฆวิน ฮนั้ง.”

21วั้ว นอม ฒี่ง เญย หฒวัง มจั่ง ตอน ฯฒฯ หล่ง หละเปย๊ย ฒง ไต่ นิ่น. ฮนั้ง หน่าย เม่ย บัว ฯฒฯ ปุน เยียม เม่ย บัว บุด๋ง ไม้ ม่าย น้าย หญู่ง เอ๊าะ สี่. อิสะลาเอน เญย หฒวัง เมี่ยน ไฮ์ น้าย เต๋ย สี่ ฯฒฯ กั้ม เหฑีย ไห่.

22สี ก๊อง ม่าย เต้า เมี่ยน ป์าม หฒี่ ตุ๊ ไต๋ เญย ฒุ์ย, นิ่น หฒุ ไต๋ ไต่ แอ๋ง เฒาะ เซย ดิ๋ว เจี๊ยน เดี๋ยง กู้ หงว่าย,

23ไม้ ตู๋ง เลี่ยว นิ่น เญย เซย เยียม วั้ว เดี๋ยง เจี๋ย ม์วน. ต้ง วั้ว ฮนอย ฒู้ง อ๋อย หฒุ ปย๊บ, เหว่ย หฒุ หาย เต้า หฒุ ดิ๋ว เจี๊ยน เดี๋ยง กู้ หงว่าย, วั้ว เต้า หฒุ ทิน-ฮู่ง เหฒียว. ไม้ ตู๋ง โหฒว ปุน เฒี้ยว, เม่ย บัว เญย ทิน-ฮู่ง, จิว ปุน เม่ย บัว หฑิบ เญย เต่ย-ปูง ม่าย หวุย.

← Chapter 20 Jump to: Chapter 22 →