Deuteronomy 9

Mien Bible (Thai Script) © Thailand Bible Society, 2007

← Chapter 8 Jump to: Chapter 10 →

1อิสะลาเอน เมี่ยน อ่า, หมวัง หลง โอ่. เม่ย บัว อี้ ฮนอย อ๋อย เจี๋ย จอแดน ด้าย เปียะ มี่ง หฒุ่น ธ้วด เก้า โฮล, เก้า เฮ้น เม่ย บัว วั้ว เต๋ย กั๊วะ เญย เมี่ยน. นิ่น บัว เญย ฒี่ง โหย่ว โฮล โหย่ว ว้วน, ฒี่ง หลาด แบ่ง ลู่ง ฮลัง.

2เยียม วั้ว เญย เมี่ยน โหย่ว โฮล โหย่ว ฮลัง, เซ อาน้าก เมี่ยน เญย เฒ้ย-ฟุน. เม่ย บัว ฮิ้ว ตุ๊ เถา น้าย เต๋ย เมี่ยน หย่า ไฮ์ เมี่ยน ก๊อง เจี๋ย, “หาย เต้า ไฮ่ แหง่ง ตุ๊ อาน้าก เมี่ยน?”

3มป่า อี้ ฮนอย เม่ย บัว อ๋อย หฒุ ฮิ้ว ตุ๊ เซ เฒี้ยว, เม่ย บัว เญย ทิน-ฮู่ง, เยียม เม่ย บัว เญย วั้ว ด่าง แหมง ฮนั้ง โต์ว ปั๊ว ชุย เหฑ่ง. เฒี้ยว อ๋อย เหมียด นิ่น บัว, ปุน นิ่น บัว เยียม เม่ย บัว เญย หฑะเฮมียน หฒุ เซวย. ฮนั้ง หน่าย, เม่ย บัว ฯฒฯ หฒุ่น นิ่น บัว ธ้วด, เซี้ยบๆ เญย เหมียด เหฑ่ง นิ่น บัว, ฮนั้ง เฒี้ยว เหธา เม่ย บัว แล์ง เญย หว่า.

4เฒี้ยว, เม่ย บัว เญย ทิน-ฮู่ง, เยียม เม่ย บัว เญย วั้ว ด่าง แหมง หฒุ่น ธ้วด วั้ว เต๋ย เมี่ยน, ไม้ ตู๋ง เยียม เฮญี้ยว ฮนั้ม, “ เฒี้ยว ต้อ เยีย บัว เปียะ ต้าย ตุ๊ น้าย นอม เต่ย-ปูง เหว่ย หฒุ เยีย บัว โหฒว ตุ๊ หอบ.” ฒู้ง ไม้ เฒ์ย! เซ หลาย วั้ว เต๋ย ฝีงๆ เมี่ยน โหฒว หว่าย สี่ เฒี้ยว หธีง หฒุ่น นิ่น บัว ธ้วด เม่ย บัว เญย วั้ว ด่าง แหมง.

5เซ ไม้ เฒ์ย เหว่ย เม่ย บัว โหฒว ตุ๊ หอบ, ไฟ เม่ย บัว เฮญี้ยว หฒีง, เฒี้ยว หธีง ต้าย ปุน เม่ย บัว แฑง ตุ๊ นิ่น บัว เญย เต่ย-ปูง เป๋น เม่ย บัว เญย. เซ หลาย วั้ว เต๋ย ฝีงๆ เมี่ยน โหฒว หว่าย สี่, เฒี้ยว, เม่ย บัว เญย ทิน-ฮู่ง, หธีง หฒุ่น นิ่น บัว ธ้วด เม่ย บัว เญย วั้ว ด่าง แหมง, หย่า เหว่ย เอย เจี๊ยน นิ่น เหธา เม่ย บัว เญย อง-ถาย, อับลาฮัม, อีสัก, เหธา ยาโค้บ โฮ้ว เญย แหง่ง หว่า โหฒว.

6ฮนั้ง หน่าย, เม่ย บัว อ๋อย หฒุ ฮิ้ว ตุ๊ เฒี้ยว, เม่ย บัว เญย ทิน-ฮู่ง, เฒาะ น้าย นอม หลง เญย เต่ย-ปูง จิว ปุน เม่ย บัว, เป๋น เม่ย บัว เญย ป่วน, เซ ไม้ เฒ์ย เหว่ย เม่ย บัว โหฒว ตุ๊ หอบ, เหว่ย หฒุ เม่ย บัว เป๋น เหยียด ฝีง เฮญี้ยว แหง่ง เญย เมี่ยน.

7อ๋อย หฒุ จั๋ง เจี๊ยน, ไม้ ตู๋ง หละคุ, เยียม เต่ย-ปูง-ฮวาง เม่ย บัว ฮนั้ง หาย นอ ธัวะ เฒี้ยว, เม่ย บัว เญย ทิน-ฮู่ง, เฉีย เจี์ย. เยียม เม่ย บัว ธ้วด อียิบ เต่ย-ปูง วั้ว ฮนอย ต้าย เถา น้าย นอม ต๋อง, เม่ย บัว แหง่ง เฒี้ยว.

8เลี่ยม เยียม โฮเล้บ บง เม่ย บัว ธัวะ เฒี้ยว เฉีย เจี์ย, นิ่น ฯฒฯ โน์ว ไห่ เม่ย บัว, ฒู้ง อ๋อย เหมียด เหฑ่ง เม่ย บัว.

9เยีย ฝาว บง มี่ง ฒิบ วั้ว เต๋ย หละเปย๊ย-เป๊น วั้ว หฒั่น, เซ ม่าย เฒี้ยว เหธา เม่ย บัว เหลียบ เญย แหง่ง หว่า เญย หละเปย๊ย-เป๊น, เยีย เยียม วั้ว เจี๋ย บง เฝย เหฒียบ ฮนอย เฝย เหฒียบ ม์วน, ไม้ หญั่น หฮนาง หย่า ไม้ ฮบ ววม.

10เฒี้ยว เฒาะ น้าย เต๋ย อี คว้าย หละเปย๊ย-เป๊น ปุน เยีย, เซ หล่ง นิ่น กั้น เญย ปั์ว-โด๊ะ เฟี้ย เญย หว่า. น้าย เต๋ย หละเปย๊ย-เป๊น เฟี้ย เญย เซ เม่ย บัว กั๊บ ฒุ้น วั้ว ฮนอย, เฒี้ยว เยียม บง กู้ หงว่าย, โต์ว กะญั์ว, ก๊อง บั๋ว เม่ย บัว เญย เหยียด ฒู้ง เล์ย-หลัด.

11เจี๋ย ลิ์ว เฝย เหฒียบ ฮนอย เฝย เหฒียบ ม์วน, เฒี้ยว เฒาะ น้าย เต๋ย อี คว้าย หละเปย๊ย-เป๊น จิว ปุน เยีย, เซ เฟี้ย เจี๊ยน แหง่ง หว่า เญย หละเปย๊ย-เป๊น.

12เฒี้ยว บั๋ว เยีย, “ก๊าน เหฌี่ย บง มี่ง, เหว่ย หฒุ เม่ย เญย แปะ ฝีง, ต้ง เม่ย ต้อ ธ้วด อียิบ เต่ย-ปูง เญย แปะ ฝีง, โหฒว หว่าย สี่ หมี่ อ๊ะ. นิ่น บัว เซี้ยบๆ เญย กวั่ง เยีย หัด เญย หว่า, เหว่ย กั้น โต๋ หมิ่ว-ฝัง.”

13เฒี้ยว แอ๋ง ก๊อง บั๋ว เยีย, “เยีย ปวัด น้าย เต๋ย เมี่ยน หฒะเก้ง! เฮญี้ยว แหง่ง เญย เมี่ยน.

14ไม้ ตู๋ง ล่าน เยีย. เยีย อ๋อย เหมียด นิ่น บัว, ปุน เยียม น้าย ลู่ง เดี๊ย ไม้ ม่าย หาย เต้า จั๋ง ตุ๊ นิ่น บัว เญย บั๋ว. เยีย ฯฒฯ ปุน เม่ย โหฒว เหยียด ฝีง เก้า โฮล เก้า เฮ้น นิ่น บัว.”

15เยีย ฯฒฯ ต๋าว ซิน เหฌี่ย บง. บง หธ่อ ม่าย โต์ว เหฒียะ เจี๊ยน เญย. เยีย เญย อี เจี๊ยะ ปั์ว นั้น เจี๊ยน เฟี้ย เจี๊ยน แหง่ง หว่า วั้ว เต๋ย อี คว้าย หละเปย๊ย-เป๊น.

16เยีย หมั่ง ปวัด เม่ย บัว ป์าม ฒุ์ย ต่อง เฒี้ยว, เม่ย บัว เญย ทิน-ฮู่ง. เม่ย บัว เหว่ย กั้น โต๋ ง่ง ตอน เญย หมิ่ว-ฝัง, เซี้ยบๆ เญย กวั่ง เฒี้ยว หัด เม่ย บัว เญย หว่า.

17เยีย ฯฒฯ เฒาะ เยียม เยีย เญย อี เจี๊ยะ ปั์ว วั้ว เต๋ย อี คว้าย หละเปย๊ย หมะ เหฌี่ย เม่ย บัว เญย หฑะเฮมียน ฮู้ เหฑ่ง.

18เยีย แอ๋ง บ๊าบ เหฌี่ย เฒี้ยว เญย หฑะเฮมียน ฮนั้ง ฒิ่น ด่าง วั้ว หฑุ่น นอ. เฝย เหฒียบ ฮนอย เฝย เหฒียบ ม์วน เยีย ไม้ หญั่น หฮนาง, ไม้ ฮบ ววม, หลาย เม่ย บัว ป์าม เญย เหยียด ฒู้ง ฒุ์ย, เซ หฒิว เฒี้ยว ปวัด เม่ย บัว โหฒว เอ๊าะ ไห่ เญย สี่ ธัวะ นิ่น เฉีย เจี์ย.

19เยีย กั้ม เหฑีย ไห่ เฒี้ยว ด่ง หน่าย โน์ว, เฉีย เจี์ย ไห่ เม่ย บัว, ฒู้ง อ๋อย เหมียด เม่ย บัว. มป่า เฒี้ยว แอ๋ง หมวัง หฑุ่น เยีย โท้ เญย หว่า.

20เฒี้ยว หย่า เฉีย เจี์ย ไห่ อาโลน, อ๋อย เหมียด นิ่น, มป่า วั้ว หฒั่น เยีย หย่า เหว่ย นิ่น เต๋า เก๋า.

21เยีย เฒาะ เม่ย บัว ป์าม ฒุ์ย โต๋ ต้าย วั้ว เต้า ง่ง ตอน หล่ง โต์ว ปั๊ว. ปั๊ว ลิ์ว, เยีย แอ๋ง เบ๊าะ ฮู้, หม่อ เป๋น บ๊วน ฮนั้ง เนีย-บูง นอ, ฯฒฯ ฮ์า เยียม บง เหลี่ยว เหฌี่ย เญย โด๊ะ.

22เยียม ทาเบลา, มัดสา เหธา ขิบโล้ดหัดตาอาวา เม่ย บัว หย่า ธัวะ เฒี้ยว เฉีย เจี์ย.

23เฒี้ยว เห่ว เม่ย บัว ธ้วด คาเดดบาเนีย วั้ว หฒั่น นิ่น ก๊อง, “เปียะ มี่ง เฒาะ เยีย จิว ปุน เป๋น เม่ย บัว เญย ป่วน วั้ว นอม เต่ย-ปูง.” มป่า เม่ย บัว แหง่ง เจี๊ยน เฒี้ยว หัด เญย หว่า, ไม้ เสียน นิ่น, ไม้ หมวัง นิ่น เญย หว่า.

24เยียม เยีย ฮิ้ว ตุ๊ เม่ย บัว วั้ว ฮนอย เถา อี้ หฒั่น เม่ย บัว ขูง แหง่ง เฒี้ยว ฮนั้ง.

25วั้ว เต๋ย เฝย เหฒียบ ฮนอย เฝย เหฒียบ ม์วน เยีย บ๊าบ เหฌี่ย เยียม เฒี้ยว เญย หฑะเฮมียน เหว่ย หฒุ เฒี้ยว ก๊อง นิ่น อ๋อย เหมียด เม่ย บัว.

26เยีย เต๋า เก๋า โท้ เฒี้ยว, “โอ เฒี้ยว ทิน-ฮู่ง อ้า! ไม้ ตู๋ง เหมียด เม่ย เญย แปะ ฝีง, เซ เม่ย กั้น เญย แปะ ฝีง, ต้ง เม่ย หล่ง ต้ม ชะ หฒัวะ นิ่น บัว, ต้อ นิ่น บัว ธ้วด อียิบ เต่ย-ปูง ต้าย เญย เมี่ยน.

27โท้ จั๋ง เจี๊ยน เม่ย เญย โปว, อับลาฮัม, อีสัก เหธา ยาโค้บ. ไม้ ตู๋ง เฮยี้ยด เฮญี้ยว น้าย เต๋ย เมี่ยน เฮญี้ยว แหง่ง, โหฒว หว่าย สี่, ป์าม ฒุ์ย.

28ไม้ เฒย แอ๊ะ, เม่ย ต้อ เยีย บัว ธ้วด วั้ว นอม เต่ย-ปูง เญย เมี่ยน อ๋อย ก๊อง, ‘ เฒี้ยว ไม้ ม่าย ปั้น เหฒ่ย ต้อ น้าย เต๋ย แปะ ฝีง เปียะ นิ่น แล์ง จิว ปุน นิ่น บัว เญย เต่ย-ปูง. เฒี้ยว หย่า ฑอง นิ่น บัว หธีง ต้าย ต้อ นิ่น บัว ธ้วด มี่ง เยียม เต่ย-ปูง-ฮวาง ไต๋ ไต่ นิ่น บัว.’

29มป่า นิ่น บัว เซ เม่ย เญย แปะ ฝีง, เม่ย กั้น เญย เมี่ยน, ต้ง เม่ย หล่ง เม่ย เญย ต้ม ชะ เหธา เม่ย เฮ้น ไห่ เญย ปั์ว ต้อ ธ้วด ต้าย.”

← Chapter 8 Jump to: Chapter 10 →