Deuteronomy 32

Mien Bible (Thai Script) © Thailand Bible Society, 2007

1โอ ลู่ง อ่า, แปง มน่อม หมวัง หลง. เยีย อ๋อย ก๊อง หว่า. โอ ป้าม เกน อ่า, โท้ หมวัง เยียม เยีย เญย ฑุ่ย ธ้วด เญย ญิ่น โญ์ว.

2ปุน เยีย หฌาว เญย เล์ย ฮนั้ง ตุ้ย บยู่ง เหฌี่ย นอ, เยีย ก๊อง เญย หว่า เหฌี่ย ฮนั้ง บยู่ง-ซุ้ย เหฌี่ย, ฮนั้ง บยู่ง-บ๊วน เหฌี่ย เมี้ย-หลุน, หย่า ฮนั้ง บยู่ง-กอง เลี่ยม เมี้ย-เญี์ยม.

3เยีย อ๋อย ฒุ่น เฒี้ยว เญย เม่ง, อ๋อย หฒุ เธง บัว เญย ทิน-ฮู่ง เว่ย โฮล.

4นิ่น เซ เปว บัว วั้ว เต้า เฒี้ยว, นิ่น โหฒว เญย กง ตุ้น ยุ่น เหฑ่ง. นิ่น โหฒว เญย เจ๊า เหยียด ฒู้ง แป้ง ฟิม เญย. นิ่น เซ เหฒียบ ฒัวะ เญย ทิน-ฮู่ง, ไม้ โหฒว ต่อง หาย หญู่ง. นิ่น แป้ง ฟิม เญย, หย่า โหฒว ตุ๊ หอบ.

5นิ่น บัว ไม้ เหฒียบ ฒัวะ เญย โหฒว ปุน นิ่น, นิ่น บัว ม่าย ต๋อง เฆ่ม, ไม้ ตุ๊ โหฒว นิ่น เญย น่าม โญ์ว อ๊ะ, เป๋น เหยียด ต่อย เฮญี้ยว เงา เฮญี้ยว ฌ้วด เญย เมี่ยน.

6โอ เม่ย บัว หฮงง ไห่, ไม้ ม่าย ธง-เม่ง เญย เมี่ยน อ้า! เม่ย บัว ฮนั้ง น้าย วิ่น ปุน เฒี้ยว? นิ่น โหฒว เม่ย บัว เญย เตีย, เหฒย เม่ย บัว, เหลียบ เม่ย บัว ต้าย หย่า ยู์ง เม่ย บัว ไม้ เฒ์ย?

7เม่ย บัว อ๋อย หฒุ จั๋ง เถา โล์-ฮนอย, ฮนั้ม เถา เจี๋ย ต้าย เหฒีย ต่อย เญย หฮญัง-ต้าว. หน่าย เม่ย บัว เญย เตีย, นิ่น ฯฒฯ ปุน เม่ย บัว ฮิ้ว. หน่าย เม่ย บัว เญย เมี่ยน โก๋, นิ่น บัว ฯฒฯ บั๋ว เม่ย บัว.

8เยียม ฮลัง เจี๋ย วั้ว เต้า จิว ปุน หม่าน ฝีง หฑิบ นิ่น บัว เญย ป่วน, เฒาะ ป้าม เมี่ยน ปุน ฆอย เญย เฒี่ยง โห่, หฒิว อิสะลาเอน เมี่ยน เญย โสว โหม่ว, นิ่น ตี่ง หม่าน ฝีง เญย กั๊บ-จ๋าย,

9เหว่ย หฒุ เฒี้ยว เญย ป่วน เซ นิ่น เญย แปะ ฝีง, นิ่น กั้น หฑิบ เญย ป่วน เซ ยาโค้บ เญย เฒ้ย-ฟุน.

10เฒี้ยว ปวั้ง หฒุ นิ่น บัว เยียม วั้ว เต่ย-ปูง-ฮวาง, เยียม ไม้ ม่าย หาย หญู่ง เญย ต๋อง, ขูง ม่าย หฑยาว เญย เฉีย บุย ฮนั้ง. นิ่น ฮวีง ก๋อม, เฑีย เจี๊ยน นิ่น บัว, ฮนั้ง โก๋ว กั้น เญย มฒีง-เมี่ยน นอ.

11ฮนั้ง ต้ม จ๊าง หฌาว ตอน ได๋, หล่ง ด๊าด เฑีย เจี๊ยน นิ่น เญย ตอน. นิ่น ยัง ด๊าด หฌาว นิ่น เญย ตอน โหะ, เถา ตอน เญย ด๊าด เฮ้น, ไฮ่ ได๋ ฝาว,

12เฒี้ยว กั้น ดุ เต้า ต้อ นิ่น เญย แปะ ฝีง, ไม้ ม่าย กั้น ฝีง เญย เฒี่ยน เหธา นิ่น บัว เยียม.

13นิ่น ปุน นิ่น บัว กุ๊น เดา-เป้ย ฮลัง เญย ต๋อง, ตุ๊ หญั่น เยียม เด่ย ธ้วด เญย แกง-หฒวัง, ปุน นิ่น บัว ตุ๊ หญั่น เยียม หละเปย๊ย กะญั์ว เญย เมว์ย-ต้อง, หย่า หญั่น เยียม หละเปย๊ย-เดา ธ้วด เญย กะลั้น โย่ว.

14นิ่น ปุน ง่ง หญอ-เฮมย เหธา ยู่ง หญอ, ปะกี ยู่ง ตอน เหธา ยู่ง โก๊ว จุ่น, เซ บาซาน เต่ย เก้า หลง เจี๋ย เญย ยู่ง. นิ่น บัว ตุ๊ หญั่น หฒั่ง ฮ่อง เญย เบย้า วิด, ตุ๊ ฮบ อะหงุ่น เปี๊ยว เก้า หลง เจี๋ย เญย ติ๊ว.

15มป่า เยซูลุน ปุ๊ด ฒ่อย ต้าย, ฆะฮ้า แหง่ง เฒี้ยว, นิ่น บัว จุ่น, ติ ต์าน โฮ์, คู่ เยียม คู่ หญั่น, ฯฒฯ กวั่ง เหฒย นิ่น บัว ต้าย วั้ว เต้า ทิน-ฮู่ง, หมั่ง เผีย เหฌียว นิ่น บัว วั้ว เต้า เฒี้ยว.

16นิ่น บัว หฒั่ง กั้น ฝีง เมี่ยน เญย เฒี่ยน ปุน ทิน-ฮู่ง หั่น นิ่น บัว. นิ่น บัว โหฒว โหยว ไห่, กั้ม เฑี้ย ไห่ เญย สี่, ธัวะ นิ่น เฉีย เจี์ย.

17นิ่น บัว เหฒี่ย เมี้ยน, ต้ง ไม้ เฒ์ย เฒียน เฒี่ยน. หฒั่ง ฒิ่น ด่าง ไม้ ฮิ้ว ตุ๊ เญย เฒี่ยน, หฒั่ง โธะ โหะ ธ้วด ต้าย เซียง เญย เฒี่ยน. หฒั่ง เม่ย บัว เญย อง-ถาย ไม้ หฒั่ง เจี๋ย เญย เฒี่ยน.

18เม่ย บัว ไม้ จั๋ง ปุน เม่ย บัว ธ้วด เสย วั้ว เต้า, หย่า หละคุ ยู์ง เม่ย บัว ต้าย วั้ว เต้า ทิน-ฮู่ง.

19เฒี้ยว หมั่ง ฯฒฯ เฆ่ม นิ่น บัว, หลาย นิ่น เญย น่าม โญ์ว โหฒว ปุน นิ่น เฉีย เจี์ย.

20นิ่น ก๊อง, “เยีย อ๋อย ปวัง เจี๊ยน เยีย เญย เฮมียน, ไม้ หมั่ง นิ่น บัว. เยีย อ๋อย ฒั้ว เจี๊ยน หมั่ง ก๋า, เถา เซ้ด เมว์ย นิ่น บัว ฮนั้ง หาย นอ. นิ่น บัว เซ เหยียด ต่อย ตุ๊-เอ๋ย ไม้ หมวัง หว่า เญย เมี่ยน, เป๋น ไม้ เหฒียบ ฒัวะ เญย น่าม โญ์ว.

21นิ่น บัว หฒั่ง ต้ง ไม้ เฒ์ย เฒียน เฒี่ยน, ปุน เยีย หั่น นิ่น บัว. นิ่น บัว ป๋าย ไม้ ลั่ม หล่ง เญย หมิ่ว-ฝัง ธัวะ เยีย เฉีย เจี์ย. เยีย ฯฒฯ หล่ง ไม้ ม่าย กั๊วะ เญย เมี่ยน ปุน นิ่น บัว เหมว่ย เจี๊ยะ, หล่ง เหยียด ฝีง หฮงง เญย เมี่ยน ธัวะ นิ่น บัว เฉีย เจี์ย.

22เยีย เฉีย เจี์ย ฮนั้ง โต์ว เหฒียะ เจี๊ยน, ฒู้ง เหฒียะ เถา เยี่ยม เกน โด เจี๋ย เญย ต๋อง, อ๋อย ปั๊ว เหฑ่ง เดา-เป้ย เหธา แกง-หฒวัง กะน้าย, ฒู้ง เหฒียะ เถา บง เญย กอน-โด๊ะ.

23“เยีย อ๋อย เฒาะ เหฒีย หญู่ง เหฒะ หน่าน ดุย เจี๊ยน นิ่น บัว, ปู๋ง เหฑ่ง เยีย เญย ฟอง-ธัง ต้าย ป๊วน นิ่น บัว.

24ปุน นิ่น บัว ปวั้ง ต้ม หง่อ ฯฒฯ คอง ไจ่ เญย, หฒุ โตะ ไห่ เญย แป่ง, ซิน ฮลุ จอม เญย, หย่า ปุ๊ด เธี้ยว ไห่ เญย ววน-แป่ง เหมียด นิ่น บัว. เยีย อ๋อย ปุน เฮยี่ย ฒ่อย เญย ญ่า หงาด นิ่น บัว. ปุน ลุ่ย กัน เนีย-บูง เญย นาง-โตะ เญาะ.

25เยียม กะเหญี่ย ม่าย หฑุ ด๊าว ไต๋ นิ่น บัว. เยียม เปย๊า กะญั์ว หย่า กั้ม เหฑีย เจี๊ยน. ตอน-หลุน เซียะ-หลุน อ๋อย หฒุ เหมียด, เลี่ยม ฮบ หญอ เญย กู้งว์า เหธา อง-มฆ้อง-แปะ หฒุ เหมียด เหฑ่ง.

26เยีย ก๊อง เยีย อ๋อย ปุน นิ่น บัว ฟ้าด หฑาน, ปุน นิ่น บัว เญย บั๋ว เยียม หม่าน เมี่ยน บุด๋ง หฒุด เหฑ่ง.

27มป่า เยีย กั้ม เหฑีย วิน-วั้ง ปู๋ง หว่า-เหมา, เหฑีย นิ่น บัว เปียะ เฮญี้ยว ต่อง. เฑ่า เหย วิน-วั้ง ก๊อง, ‘เซ เยีย บัว กั้น เญย ชะ ตุ๊ ฮี่ง, ไม้ เฒ์ย เฒี้ยว โหฒว น้าย เต๋ย เหยียด ฒู้ง สี่.’”

28อิสะลาเอน เมี่ยน ไม้ คั้ง เอย เจี๊ยน ธ่าง ล่าง ลิ์ว เญย หว่า โหฒว, นิ่น บัว ไม้ เปียะ เฮญี้ยว หาย หญู่ง.

29เฝย ตุ๊ นิ่น บัว ม่าย ธง-เม่ง, ไฮ่ เปียะ เฮญี้ยว น้าย เต๋ย สี่ ฯฒฯ สัม ตุ๊ ธ้วด นิ่น บัว เซ้ด เมว์ย เญย เฒี่ยง โห่.

30เหยียด ล่าน เมี่ยน ฮนั้ง หาย นอ ไฮ่ หฒุ่น ตุ๊ เหยียด ธิน ล่าน? อี ล่าน ฮนั้ง หาย นอ ไฮ่ หฒุ่น เหยียด หว่าน ล่าน เปย๋า? ธ้วด ลิ์ว เปว นิ่น บัว วั้ว เต้า เฒี้ยว หม่าย นิ่น บัว, นิ่น บัว เญย เฒี้ยว หย่า เล่ย กวั่ง นิ่น บัว.

31เยีย บัว เญย วิน-วั้ง ฮิ้ว ตุ๊ กั้น เญย เฒี่ยน ไม้ ฮนั้ง เยีย บัว เญย ทิน-ฮู่ง.

32วิน-วั้ง เซ ฮนั้ง โสโดม เญย อะหงุ่น เฮมย, หย่า ฮนั้ง โกโมลา เญย เด่ย เญย เฮมย เฒี่ยง เญย. นิ่น บัว เญย อะหงุ่น เปี๊ยว ม่าย โตะ เฉีย, นิ่น บัว เญย อะหงุ่น เปี๊ยว-จ้อย หย่า อิม.

33นิ่น บัว เญย อะหงุ่น ติ๊ว เซ นาง เญย เดีย-โตะ, นาง-เจี๊ยะ เธี้ยว ไห่ เญย โตะ เฉีย.

34“เยีย เซียว เจี๊ยน วิน-วั้ง โหฒว เญย น้าย เต๋ย สี่, เบ๊าะ เจี๊ยน เหยียน เยีย เซียว จ๋าย เญย กะน้าย เญย ต๋อง ไม้ เฒ์ย?

35จ๊าว วิน เซ เยียม เยีย. เยีย หฒะเก้ง จ๊าว อ๊ะ. ฒั้ว นิ่น บัว เญย เหฒา ธ้าย พยัด ดอบ หมี่ อ๊ะ. นิ่น บัว หฒุ เหฒะ หน่าน เญย ฮนอย-เหญียะ เถา ฟัด อ๊ะ. หฒุ เหมียด เญย เฒี่ยง โห่ อ๋อย เซี้ยบๆ เญย เถา.”

36เฒี้ยว ปวัด นิ่น เญย แปะ ฝีง เญย ชะ เหฑ่ง. ไม้ เหฒ่ง เหยียด เต้า ไม้ กุ๊น โหฒว โน่ว ไฟ ไม้ โหฒว โน่ว เญย. นิ่น ฯฒฯ เหฌียว นิ่น เญย แปะ ฝีง, หย่า ค้อ-เลี่ยน นิ่น เญย โปว.

37นิ่น ฯฒฯ ก๊อง, “นิ่น บัว เญย เฒี่ยน เยียม หาย? นิ่น บัว เขา วั้ว เต้า เฒี้ยว นี?

38ต้ง หญั่น นิ่น บัว เหฒี่ย วั้ว เต๋ย อ๊อ-จุ่น, หย่า ฮบ นิ่น บัว เธี้ย เหฒี่ย เญย อะหงุ่น ติ๊ว. ปุน วั้ว เต๋ย เฒี่ยน ต้าย เถง เม่ย บัว, ปุน นิ่น บัว เปว เจี๊ยน เม่ย บัว ม่าะ!

39“หมั่ง ม่าะ! เซ เยีย, เยีย กั้น, โหฒว ทิน-ฮู่ง. ธ้วด ลิ์ว เยีย, ไม้ ม่าย กั้น เต้า เฒี่ยน. เยีย ปุน เมี่ยน ไต่ หย่า ปุน เมี่ยน นั่ง, เยีย ปุน เมี่ยน หฒุ มุน หย่า หฒ่อ เมี่ยน หลง, ไม้ ม่าย หาย เต้า ไฮ่ เฒาะ นิ่น บัว ธ้วด เยีย เญย ปั์ว-เดี๊ย.

40เยีย ซูง ปั์ว เฒี้ยง ลู่ง โฮ้ว เจี๊ยน ก๊อง, ฮนั้ง เยีย เหยียด ลิ์ว เฒี่ยง เจี๊ยน, ด่ง วั้ว เฒียน,

41สี ก๊อง เยีย เหฑียว ไหล่ เหฑียว แปะ เยีย เญย หฑุ ด๊าว แฒ่งๆ เญย, เยีย เญย ปั์ว นั้น เจี๊ยน อ๋อย ตี่ง ฒุ์ย, เยีย อ๋อย จ๊าว เยีย เญย วิน-วั้ง เญย เซี่ยว, อ๋อย วิ่น ปุน ฑอง เยีย วั้ว เต๋ย.

42เยีย อ๋อย ปุน เยีย เญย ฟอง-ธัง ฮบ ฑย้าม ฆวิน, ปุน เยีย เญย หฑุ ด๊าว หญั่น อ๊อ, ต้ง หฒุ ธ้าง ต้าย ไต๋ ไต่ วั้ว เต๋ย เมี่ยน เญย ฑย้าม, เหธา วิน-วั้ง เปย๊ย เญย มฆ้อง.”

43โอ หม่าน กั๊วะ เมี่ยน อ่า, อ๋อย หฒุ เหธา ทิน-ฮู่ง เญย แปะ ฝีง เฌียน-โย่ว, เหว่ย หฒุ นิ่น อ๋อย เหว่ย นิ่น เญย โปว เญย ฑย้าม จ๊าว วิน. นิ่น อ๋อย จ๊าว นิ่น เญย วิน-วั้ง เญย เซี่ยว, อ๋อย ฟิ นิ่น เญย เต่ย-ปูง, กวั่ง นิ่น เญย เมี่ยน เญย ฒุ์ย.

44โมเซ เหธา นุน เญย ตอน, โยซูวา, ต้าย ก๊อง เหฑ่ง น้าย ติ้ว ฑูง เญย หว่า ปุน แปะ ฝีง หมวัง.

45ก๊อง ลิ์ว น้าย เต๋ย เหยียด ฒู้ง หว่า ปุน อิสะลาเอน เญย หฒวัง เมี่ยน หมวัง วั้ว หฒั่น,

46โมเซ ก๊อง บั๋ว นิ่น บัว, “อ๋อย หฒุ หล่ง เฮญี้ยว จั๋ง เจี๊ยน เยีย อี้ ฮนอย ก๊อง ปุน เม่ย บัว หมวัง เญย เหยียด ฒู้ง หว่า. ฮนั้ง หน่าย เม่ย บัว ไฮ่ หัด เม่ย บัว เญย ตอน-เจว๊ย ฟุน-ฟะ หลงๆ เญย เอย เจี๊ยน น้าย เต๋ย เล์ย-หลัด เญย เหยียด ฒู้ง หว่า.

47น้าย เต๋ย หว่า ไม้ เฒ์ย เหว่ย เม่ย บัว เป๋น ขูง-หว่า, เซ เป๋น เม่ย บัว เญย แหม่ง. เม่ย บัว เอย เจี๊ยน น้าย เต๋ย หว่า โหฒว, เม่ย บัว ฯฒฯ เฒี่ยง ตุ๊ เสี่ยว ญ่วน ด๊าว เยียม เม่ย บัว อ๋อย เจี๋ย จอแดน ด้าย ตุ๊ เป๋น เม่ย บัว เญย ป่วน วั้ว นอม เต่ย-ปูง.”

48ต้ง วั้ว ฮนอย เฒี้ยว ก๊อง บั๋ว โมเซ,

49“เม่ย อ๋อย หฒุ ฝาว อาบาลิม เก้ ฒอง เถา โมอับ เต่ย-ปูง เญย เนโบ บง, เยียม เยลีโค ฒี่ง ต๋อย-หง่าน, หมั่ง ต้ง เยีย อ๋อย จิว ปุน อิสะลาเอน เมี่ยน เหว่ย เป๋น นิ่น บัว หฑิบ เญย ป่วน วั้ว นอม คานาอัน เต่ย-ปูง.

50เม่ย ฒู้ง อ๋อย หฒุ เยียม เม่ย ฝาว วั้ว นอม บง เกวย เสย, ฮนั้ง เม่ย เญย ก๋อ, อาโลน, เยียม โฮอา บง เกวย เสย หมี่ อ๊ะ,

51เหว่ย หฒุ เม่ย บัว อี มั์ว เยียม สิน เต่ย-ปูง-ฮวาง, คาเดด เต่ย เญย เมลีบา ววม โหฒว ต่อง เยีย, ต้ง เม่ย บัว ตอง เจี๊ยน อิสะลาเอน เมี่ยน ไม้ ท่าย เยีย ธีง-เหฑ่ง.

52เหว่ย น้าย เม่ย ฯฒฯ เยียม โก เญย หมั่ง เยีย จิว ปุน อิสะลาเอน เมี่ยน เญย เต่ย-ปูง มป่า เม่ย ไม้ ตุ๊ เปียะ.”

← Chapter 31 Jump to: Chapter 33 →