Deuteronomy 29

Mien Bible (Thai Script) © Thailand Bible Society, 2007

← Chapter 28 Jump to: Chapter 30 →

1น้าย เต๋ย หว่า เซ เยียม โมอับ วั้ว หฒั่น, เฒี้ยว หัด โมเซ เหธา อิสะลาเอน เมี่ยน เหลียบ เญย แหง่ง หว่า, ทิบ เจี๊ยน เยียม โฮเล้บ นิ่น เหธา นิ่น บัว เหลียบ เญย แหง่ง หว่า.

2โมเซ เห่ว อิสะลาเอน เญย หฒวัง เมี่ยน กั๊บ ฒุ้น ฯฒฯ ก๊อง บั๋ว นิ่น บัว, เม่ย บัว กั้น เญย มฒีง ตุ๊ ปวัด เยียม อียิบ เต่ย-ปูง, เฒี้ยว ฮนั้ง หาย นอ โหฒว ปุน ฟาโล ฮู่ง เหธา นิ่น เญย หฒวัง เจียน เหธา ก๋อม นิ่น เญย เต่ย-ปูง.

3เม่ย บัว กั้น เญย มฒีง ตุ๊ ปวัด วั้ว เต๋ย ต้ม เหฒะ หน่าน เหธา บัวะ ฮ่อง เญย สี่ เหธา จั๋ง-โห่.

4มป่า เถา อี้ ฮนอย เฒี้ยว ไม้ ปุน เม่ย บัว เญย เฮญี้ยว ไฮ่ เม่ง แปะ, ไม้ ปุน เม่ย บัว เญย มฒีง ไฮ่ หมั่ง ตุ๊ ปวัด, หย่า ไม้ ปุน เม่ย บัว เญย มน่อม ไฮ่ หมวัง ตุ๊ ไฮ์.

5เยีย ต้อ เม่ย บัว เยียม เต่ย-ปูง-ฮวาง วั้ว เต๋ย เฝย เหฒียบ หฮญัง กะญั์ว, เม่ย บัว ฒุ เญย ลุย-โหว หย่า ไม้ ฮู้. เม่ย บัว ตาบ เญย เฮ่ หย่า ไม้ หว่าย.

6เม่ย บัว ไม้ ตุ๊ หญั่น ฌั้ว หย่า ไม้ ตุ๊ ฮบ อะหงุ่น ติ๊ว ไฟ ติ๊ว-คู้. เยีย ฮนั้ง น้าย โหฒว เหว่ย ปุน เม่ย บัว ฮิ้ว ตุ๊ เยีย เซ เฒี้ยว, เม่ย บัว เญย ทิน-ฮู่ง.

7เม่ย บัว ต้าย เถา น้าย นอม เต่ย-ปูง วั้ว หฒั่น เฮ้ดโบน ฒี่ง เญย สิโหน ฮู่ง เหธา บาซาน เญย โอก ฮู่ง, ธ้วด ต้าย เหธา บัว เบ๊าะ จ๋า มป่า บัว เบ๊าะ ฮี่ง นิ่น บัว.

8บัว ธ้าง เหฑ่ง นิ่น บัว เญย เต่ย-ปูง จิว ปุน ลูเบน ฝีง, กาด ฝีง, เหธา มะนัดเส เญย ด๊าม-ฝีง.

9เม่ย บัว อ๋อย หฒุ เหฒียบ ฒัวะ เญย กัน หลง น้าย เต๋ย แหง่ง หว่า เหว่ย ปุน เม่ย บัว โหฒว เญย หญู่งๆ ตุ๊ หลง.

10อี้ ฮนอย เม่ย บัว ฝีงๆ เญย เปย๊ย เฒ้ย เหธา เมี่ยน โก๋, เม่ย บัว เญย เจียน, อิสะลาเอน เมี่ยน เญย เหยียด หฒวัง มจั่ง ตอน,

11เม่ย บัว เญย เอ๊า-เจว๊ย, เยียม เม่ย บัว เญย ด๊บ-ลิ่ว เธี้ยง เญย กั้น ฝีง เมี่ยน, เหธา เถง เม่ย บัว แก๊ะ ฒ่าง ดาม ววม เญย เมี่ยน, ต้าย กั๊บ ฒุ้น โซ้ว เจี๊ยน เฒี้ยว, เม่ย บัว เญย ทิน-ฮู่ง, เญย หฑะเฮมียน.

12เม่ย บัว ต้าย เหว่ย ฒิบ เฒี้ยว, เม่ย บัว เญย ทิน-ฮู่ง, โฮ้ว เจี๊ยน เหธา เม่ย บัว แล์ง เจี์ย เญย แหง่ง หว่า, เซ ต้ง อี้ ฮนอย เฒี้ยว, เม่ย บัว เญย ทิน-ฮู่ง, เหธา เม่ย บัว เหลียบ เจี์ย เญย แหง่ง หว่า.

13อี้ ฮนอย เฒี้ยว อ๋อย เหลียบ เม่ย บัว เป๋น นิ่น กั้น เญย แปะ ฝีง. นิ่น ฯฒฯ เป๋น เม่ย บัว เญย ทิน-ฮู่ง, ฮนั้ง นิ่น เหธา เม่ย บัว แล์ง, หย่า ฮนั้ง นิ่น เหธา เม่ย บัว เญย อง-ถาย, อับลาฮัม, อีสัก, เหธา ยาโค้บ โฮ้ว เจี๊ยน แล์ง วั้ว นอ.

14เยีย ไม้ ตาน เหธา เม่ย บัว เหลียบ น้าย เต๋ย แหง่ง หว่า,

15เซ ไม้ เฒ์ย ขูง เหธา เยีย บัว โซ้ว เจี๊ยน น้าย เยียม เฒี้ยว, บัว เญย ทิน-ฮู่ง, เญย หฑะเฮมียน วั้ว เต๋ย ฮนั้ง. เยีย หย่า เหธา ฆะฮ้า ฮี้ง ไม้ แก้ง ธ้วด เสย เญย เฒ้ย-ฟุน เหลียบ น้าย เต๋ย แหง่ง หว่า.

16เม่ย บัว ฮิ้ว ตุ๊ บัว เยียม อียิบ เต่ย-ปูง วั้ว หฒั่น บัว ฮนั้ง หาย นอ เยียม, หย่า ฮิ้ว ตุ๊ บัว เจี๋ย วั้ว เต๋ย ธั้ม-ฝีง เมี่ยน เญย กั๊วะ ฮนั้ง หาย นอ เจี๋ย.

17เม่ย บัว ตุ๊ ปวัด เยียม นิ่น บัว บุด๋ง หล่ง เดี๋ยง, หล่ง หละเปย๊ย ไฟ เจียม ญ่าน โหฒว ต้าย วั้ว เต๋ย โหยว ไห่, กั้ม เฑี้ย ไห่ เญย หมิ่ว-ฝัง.

18อ๋อย หฒุ ไฝ ฟิม, เหฑีย เยียม เม่ย บัว บุด๋ง เญย หาย เต้า มจั่ง มเซียะ ไฟ หาย ป่วน, หาย ฝีง เมี่ยน กวั่ง เฒี้ยว, เม่ย บัว เญย ทิน-ฮู่ง, มี่ง หฒั่ง วั้ว เต๋ย กั๊วะ เญย เฒี่ยน. เหฑีย เยียม เม่ย บัว บุด๋ง ไฮ่ ฮนั้ง ม่าย กอน ธ้วด อิม ไห่, ไฮ่ แหล่ง เมี่ยน เญย เปี๊ยว.

19สี ก๊อง ม่าย เต้า น้าย หญู่ง เมี่ยน ไฮ์ น้าย เต๋ย โฮ้ว เญย แหง่ง หว่า, นิ่น เยียม เฮญี้ยว ไฮ์ ฮนั้ง ปวัง หว่า นิ่น กั้น ฯฒฯ หล่าย, “ไม้ กุ๊น เซว่ย เอ๋ย โหฒว, เยีย หธ่อ ไฮ่ ตุ๊ หลง เญย.” ฮนั้ง หน่าย, ไม้ กุ๊น คู้ เมี่ยน ไฟ เอ๊าะ เมี่ยน, เหยียด ฒู้ง อ๋อย หฒุ เหมียด เหฑ่ง.

20เฒี้ยว เหยียด ลิ์ว ไม้ กวั่ง น้าย หญู่ง เมี่ยน เญย ฒุ์ย. เฒี้ยว เฉีย เจี์ย, หั่น เกา, ฯฒฯ ปุน น้าย ล่าน เมี่ยน เสี่ยว เฟี้ย เจี๊ยน น้าย ป๊วน โซว เหยียด ฒู้ง เหฒียว เญย หว่า เถา หฒุ เหมียด เหฑ่ง, ไม้ ตุ๊ เยียม น้าย ลู่ง เดี๊ย.

21เฒี้ยว อ๋อย เยียม ฝีงๆ อิสะลาเอน เมี่ยน บุด๋ง เฒาะ นิ่น ดุ ล่าน เมี่ยน ธ้วด, ปุน นิ่น หฒุ โค้ว, หฒิว น้าย ป๊วน เล์ย-หลัด โซว เฟี้ย เจี๊ยน เญย แหง่ง หว่า หฒุ เหฒียว.

22เม่ย บัว ต่อย เจี๋ย ต่อย ฆะฮ้า ฮี้ง ธ้วด เสย เญย เฒ้ย-ฟุน เหธา เยียม โก เญย เต่ย-ปูง ต้าย เญย กั้น ฝีง เมี่ยน ฯฒฯ ปวัด น้าย นอม เต่ย-ปูง หฒุ ปวั้ง เญย ต้ม สี่ เหธา เฒี้ยว ปุน เต่ย-ปูง หฒุ เญย หญู่งๆ แป่ง.

23น้าย นอม เต่ย-ปูง ขูง ม่าย ฮู่ง, ม่าย เฑ้า, เป๋น เดา-ฮวาง, เหว่ย หฒุ โต์ว ปั๊ว ชุย หมี่ อ๊ะ. ไม้ ม่าย หาย เต้า หฒวัง กะน้าย หย่า ไม้ ม่าย หาย หญู่ง แกง-หฒวัง ธ้วด. เลี่ยม เมี้ย หย่า ไม้ ธ้วด. เฒี้ยว อ๋อย ปุน เต่ย-ปูง หฒุ ป่าย ฮนั้ง นิ่น เฉีย เจี์ย! ไห่ ฯฒฯ โหฒว ปุน โสโดม, โกโมลา, อัดมา เหธา เสโบยิม หฒุ ป่าย วั้ว นอ.

24หม่าน ฝีง เมี่ยน ฒู้ง อ๋อย หน่าย, “ เฒี้ยว เหว่ย หาย ติ่ว ฮนั้ง น้าย นอ โหฒว ปุน น้าย นอม เต่ย-ปูง? นิ่น เหว่ย หาย ติ่ว ด่ง หน่าย เฉีย เจี์ย?”

25เมี่ยน ฯฒฯ เตา, “เซ เหว่ย หฒุ น้าย เต๋ย เมี่ยน กวั่ง เฒี้ยว, นิ่น บัว เญย อง-ถาย เญย ทิน-ฮู่ง, ต้อ นิ่น บัว ธ้วด อียิบ เต่ย-ปูง เญย เฒี่ยง โห่ เหธา นิ่น บัว เหลียบ เญย แหง่ง หว่า.

26นิ่น บัว มี่ง ฟู-สู ป๋าย ต้ง นิ่น บัว ไม้ ป๋าย เจี๋ย เญย เฒี่ยน, เซ เฒี้ยว ไม้ ปุน นิ่น บัว หฒั่ง เญย เฒี่ยน.

27เหว่ย น้าย เฒี้ยว เฉีย เจี์ย! ไห่ น้าย นอม เต่ย-ปูง, ปุน นิ่น บัว หฒุ เหฒียว ฮนั้ง น้าย ป๊วน โซว เฟี้ย เจี๊ยน เญย หว่า.

28เฒี้ยว โน์ว ไห่, เฉีย เจี์ย เจี๊ยน แปง นิ่น บัว ธ้วด ต้าย กวั่ง เยียม กั้น นอม กั๊วะ ฮนั้ง อี้ จ๋า ฮนอย นอ.”

29เกม เจี๊ยน เญย สี่ เซ เฒี้ยว, บัว เญย ทิน-ฮู่ง เญย. หล่าว ย่าง เญย สี่ เหยียด ลิ์ว เป๋น บัว เญย เหธา บัว เญย เฒ้ย-ฟุน เญย, เหว่ย ปุน บัว ไฮ่ เอย เจี๊ยน น้าย เต๋ย เล์ย-หลัด เญย เหยียด ฒู้ง หว่า โหฒว.

← Chapter 28 Jump to: Chapter 30 →