Deuteronomy 3

Mien Bible (Thai Script) © Thailand Bible Society, 2007

← Chapter 2 Jump to: Chapter 4 →

1ฆะฮ้า บัว ฮวิน หูง เจี๊ยน บาซาน มี่ง. บาซาน เต่ย เญย โอก ฮู่ง, เหธา นิ่น เญย หฒวัง แปง ฯฒฯ ธ้วด ต้าย เถา เอเดนอี ฒี่ง เหธา บัว เบ๊าะ จ๋า.

2เฒี้ยว ก๊อง บั๋ว เยีย, “ไม้ ตู๋ง กั้ม เหฑีย นิ่น, เหว่ย หฒุ เยีย เฒาะ นิ่น เหธา นิ่น เญย หฒวัง แปง เหธา นิ่น เญย เต่ย-ปูง จิว ปุน เยียม เม่ย บัว เญย ปั์ว-เดี๊ย หมี่ อ๊ะ. อ๋อย หฒุ โหฒว ปุน นิ่น ฮนั้ง เม่ย บัว โหฒว ปุน เยียม เฮ้ดโบน วั้ว เต้า อาโมไล เมี่ยน เญย ฮู่ง, สิโหน, วั้ว นอ.”

3เฒี้ยว, บัว เญย ทิน-ฮู่ง, หย่า เฒาะ บาซาน เญย โอก ฮู่ง, เหธา นิ่น เญย หฒวัง แปง จิว ปุน เยียม บัว เญย ปั์ว-เดี๊ย. บัว ฯฒฯ ไต๋ เหฑ่ง นิ่น บัว. ไม้ เลี่ยว เหยียด เต้า.

4วั้ว หฒั่น บัว เฒาะ เหฑ่ง นิ่น เญย เหยียด ฒู้ง ฒี่ง. เยียม บาซาน เญย โอก ฮู่ง กุ๊น เญย อานโกบ เต่ย, บัว เฒาะ เหฑ่ง หลัวะ เหฒียบ นอม ฒี่ง. ไม้ ม่าย เหยียด นอม ฒี่ง บัว ไม้ ตุ๊ เฒาะ.

5น้าย เต๋ย เหยียด ฒู้ง ฒี่ง ม่าย ฒี่ง หลาด ฮลัง, ม่าย หลาด แก้ง, หย่า ม่าย แก้ง ซอน เถง ฒี่ง ว้วน. ไม้ ม่าย ฒี่ง หลาด เญย ล์าง หย่า ม่าย ธั้ม เญย.

6บัว หย่า เหมียด เหฑ่ง นิ่น บัว ฮนั้ง บัว โหฒว ปุน เฮ้ดโบน ฒี่ง เญย สิโหน ฮู่ง วั้ว นอ, เซ เหมียด เหฑ่ง นอมๆ ฒี่ง, เลี่ยม มจั่ง มเซียะ เหธา ฝุเจว๊ย.

7มป่า เหยียด ฒู้ง แซง-คู้ เหธา เยียม ฒี่ง ธ้าง ต้าย เญย กะน้าย บัว ต้อ มี่ง เลี่ยว บัว กั้น หล่ง.

8วั้ว หฒั่น บัว ธ้าง เหฑ่ง อาโมไล เมี่ยน เญย อี เต้า ฮู่ง เญย เต่ย-ปูง เยียม จอแดน ด้าย เญย ตง ปูง แหมง, อานโนน ฮ์อง, มี่ง เถา เฮโมน บง.

9(น้าย นอม เฮโมน บง, ไซดอน เมี่ยน เห่ว สีลีออน. อาโมไล เมี่ยน เห่ว เสนี.)

10บัว ธ้าง ตุ๊ เหฑ่ง ลั่ม ฮลัง เดา-แป้ง เญย นอมๆ ฒี่ง เหธา กิเลอาด เต่ย เหยียด ฒู้ง เหธา บาซาน เต่ย เหยียด ฒู้ง, มี่ง เถา สาเลคา เหธา เอเดนอี ฒี่ง. น้าย เซ บาซาน กั๊วะ เญย โอก ฮู่ง เญย ฒี่ง.

11(เหฒ่ง เหฌี่ย เญย เลฟาอิม เมี่ยน ขูง ม่าย บาซาน เญย โอก ฮู่ง ฮนั้ง. นิ่น เญย โหธว หล่ง เฮลียะ โหฒว ต้าย, ด๊าว ดั้ว เดาะ, จั๊ง เปยย เดาะ, หฒิว โพว-ทง เญย เดาะ. น้าย ฒูง โหธว อี้ จ๋า ฮนอย หธ่อ เยียม อัมโมน เมี่ยน เญย ลับบา ฒี่ง.)

12วั้ว หฒั่น บัว ธ้าง ตุ๊ ต้าย เญย เต่ย-ปูง เยียม อานโนน ฮ์อง กะเฮลน เญย อาโลเอ ฒี่ง ป๊ะ ปูง, เลี่ยม กิเลอาด เญย เหยียด ป่วน บง หฒั่ง ต๋อง เหธา วั้ว เต๋ย เต่ย-ปูง เญย ฒี่ง จิว ปุน ลูเบน ฝีง เหธา กาด ฝีง.

13กิเลอาด เหฒ่ง เหฌี่ย เญย เดา เหธา โอก ฮู่ง เญย กั๊วะ, บาซาน, เซ อานโกบ เต่ย เหยียด ฒู้ง, เยีย จิว ปุน มะนัดเส ด๊าม-ฝีง. (บาซาน เต่ย เมี่ยน เห่ว โหฒว เลฟาอิม เมี่ยน เญย เต่ย.

14ม่าย เต้า มะนัดเส เญย เฒ้ย-ฟุน, จาอี, ธ้าง ตุ๊ อานโกบ เต่ย เหยียด ฒู้ง, เซ บาซาน เต่ย-ปูง มี่ง เถา เกซู เมี่ยน เหธา มาอาคา เมี่ยน เญย กั๊บ-จ๋าย. นิ่น ธ้วด วั้ว นอม ต๋อง เญย ล์าง เญย บั๋ว เห่ว นิด นิ่น กั้น เญย บั๋ว. บาซาน เต่ย-ปูง หธ่อ ม่าย บั๋ว เห่ว ฮาวโว้ดจาอี ฮนั้ง อี้ จ๋า ฮนอย นอ.)

15เยีย เฒาะ กิเลอาด เต่ย ปุน เต้า มะนัดเส เญย เฒ้ย-ฟุน, มาคีเล.

16เยียม อานโนน ฮ์อง, หล่ง ฮ์อง บุด๋ง โหฒว กั๊บ-จ๋าย, มี่ง เถา อัมโมน เมี่ยน เญย กั๊บ-จ๋าย, ยับบอก ด้าย, เยีย ปุน เหฑ่ง ลูเบน ฝีง เหธา กาด ฝีง.

17ไฟ ปูง เญย กั๊บ-จ๋าย เยียม อาลาบา เญย จอแดน ด้าย, เซ เยียม คินเนเล้ด ค้อย-ตอน มี่ง เถา อาลาบา ค้อย, เซ ค้อย-เฑ้า, ปิดกา เญย บง-จั๊วะ.

18วั้ว หฒั่น เยีย พ้าย เม่ย บัว, ก๊อง, “ เฒี้ยว, เม่ย บัว เญย ทิน-ฮู่ง, เฒาะ น้าย นอม เต่ย-ปูง จิว ปุน เม่ย บัว, เป๋น เม่ย บัว เญย ป่วน. เม่ย บัว เญย เหยียด ฒู้ง เบ๊าะ จ๋า เฮ้น เญย เมี่ยน อ๋อย หฒุ ปุ๋ย เจี๊ยน หวัวะ กิ่น เยียม เม่ย บัว เญย อิสะลาเอน เมี่ยน ก๋อ-โย์ว เญย วั้ว ด่าง แหมง เจี๋ย จอแดน ด้าย.

19มป่า เม่ย บัว เญย เอ๊า-เจว๊ย เหธา เม่ย บัว เญย แซง-คู้, (เยีย ฮิ้ว ตุ๊ เม่ย บัว ม่าย แซง-คู้ ธั้ม ไห่,) อ๋อย หฒุ เยียม เยีย จิว ปุน เม่ย บัว ลิ์ว วั้ว เต๋ย ฒี่ง,

20ฒั้ว เม่ย บัว เญย ก๋อ-โย์ว ตุ๊ ฮิด ขวน ฮนั้ง เม่ย บัว นอ. เซ ฒั้ว นิ่น บัว ตุ๊ เยียม เจี๊ยน วั้ว หง่าน ปูง จอแดน ด้าย, ต้ง เฒี้ยว, เม่ย บัว เญย ทิน-ฮู่ง, จิว ปุน นิ่น บัว เญย เต่ย-ปูง. ฆะฮ้า เม่ย บัว เก๊าะ-เมี่ยน ตุ๊ หฑวน เยีย เหธย ปุน เก๊าะ-เมี่ยน เญย ป่วน เดา.”

21วั้ว หฒั่น เยีย บั๋ว โยซูวา, “เม่ย กั้น เญย มฒีง ตุ๊ ปวัด เฒี้ยว, เม่ย เญย ทิน-ฮู่ง, ฮนั้ง หาย นอ โหฒว ปุน น้าย เต๋ย อี เต้า ฮู่ง. เฒี้ยว หย่า อ๋อย ฮนั้ง วั้ว นอ โหฒว ปุน ต้ง เจี๋ย วั้ว หง่าน เม่ย บัว อ๋อย มี่ง เญย นอมๆ เต่ย-ปูง.

22ไม้ ตู๋ง กั้ม เหฑีย นิ่น บัว เหว่ย หฒุ เฒี้ยว, เม่ย บัว เญย ทิน-ฮู่ง กั้น, อ๋อย เหว่ย เม่ย บัว เบ๊าะ จ๋า.”

23วั้ว หฒั่น เยีย ชะ โท้ เฒี้ยว,

24“โอ เฒี้ยว ทิน-ฮู่ง อ่า, เม่ย ปุน เยีย, เม่ย เญย โปว, เจี์ย กอน ปวัด เม่ย เฮ้น ไห่ เญย ต้ม ชะ. เยียม ลู่ง เยียม เดา ม่าย หาย เต้า เฒี่ยน ไฮ่ ฮนั้ง เฒี้ยว โหฒว โฮล ไห่, เฮ้น ไห่ เญย สี่?

25โท้ ฆอย ฑุ่ย ปุน เยีย เจี๋ย วั้ว หง่าน หฒิ จอแดน ด้าย หมั่ง วั้ว นอม หลง ไห่ เญย เต่ย-ปูง, เซ วั้ว นอม เหฑว่ย ไห่ เญย เก้ ฒอง, เหธา เลบานอน เก้.”

26มป่า หลาย เม่ย บัว, เฒี้ยว เฉีย เจี์ย เยีย, ไม้ หมวัง เยีย. เฒี้ยว ก๊อง, “เก๋า อ๊ะ! ไม้ ตู๋ง แอ๋ง เหธา เยีย ก๊อง น้าย เต๋ย สี่ ม่าะ!

27เม่ย ฝาว ปิดกา บง- นี้ง มี่ง หมั่ง ตง น่าม ไฟ ป๊ะ. หล่ง เม่ย กั้น เญย มฒีง หมั่ง วั้ว นอม เต่ย-ปูง เหว่ย หฒุ เม่ย ฒู้ง ไม้ ตุ๊ เจี๋ย จอแดน ด้าย.

28อ๋อย หฒุ พ้าย โยซูวา, ขวิน นิ่น, เถง นิ่น หฒูง ชะ, เหว่ย หฒุ นิ่น อ๋อย หฒุ ต้อ น้าย เต๋ย เมี่ยน เจี๋ย ด้าย หฑิบ เม่ย ตุ๊ ปวัด เญย เต่ย-ปูง.”

29ฮนั้ง หน่าย, บัว เยียม เจี๊ยน เบดเปโอ ฒี่ง ต๋อย-หง่าน เญย ฮ์อง.

← Chapter 2 Jump to: Chapter 4 →