Deuteronomy 20

Mien Bible (Thai Script) © Thailand Bible Society, 2007

← Chapter 19 Jump to: Chapter 21 →

1เม่ย บัว ธ้วด มี่ง เหธา วิน-วั้ง เบ๊าะ จ๋า วั้ว หฒั่น, ปวัด ม์า เหธา เบ๊าะ จ๋า เญย ม์า-เธีย เหธา นิ่น บัว เญย แปง เก้า ธั้ม เม่ย บัว เญย, หย่า ไม้ ตู๋ง กั้ม เหฑีย เหว่ย หฒุ เฒี้ยว, เม่ย บัว เญย ทิน-ฮู่ง, ต้ง ต้อ เม่ย บัว ธ้วด อียิบ เต่ย-ปูง วั้ว เต้า, เหธา เม่ย บัว เยียม.

2อ๊า ลั่ม ธ้วด มี่ง เบ๊าะ จ๋า วั้ว หฒั่น, ไซ เมี่ยน ฯฒฯ เยียม แปง เญย หฑะเฮมียน ต๋อย นิ่น บัว ก๊อง,

3“โอ อิสะลาเอน เมี่ยน อ่า, หมวัง หลง โอ่. อี้ ฮนอย เม่ย บัว อ๋อย หฒุ ธ้วด มี่ง เหธา เม่ย บัว เญย วิน-วั้ง เบ๊าะ จ๋า. ไม้ ตู๋ง เฮญี้ยว เมา, ไม้ ตู๋ง กั้ม เหฑีย, ไม้ ตู๋ง เฮญี้ยว หลุ่น ไฟ หฒุ วิน-วั้ง แฮะ เม่ย บัว,

4เหว่ย หฒุ เฒี้ยว, เม่ย บัว เญย ทิน-ฮู่ง, เหธา เม่ย บัว มี่ง, อ๋อย เหว่ย เม่ย บัว เบ๊าะ เม่ย บัว เญย วิน-วั้ง, ปุน เม่ย บัว ตุ๊ ฮี่ง.”

5แปง-เปย๊ย อ๋อย หฒุ ก๊อง บั๋ว นิ่น บัว เญย แปง, “ม่าย หาย เต้า ก๊ม เหฒียง เซียง-เปย๊า หย่า ไม้ แก้ง ฝูง ปุน ทิน-ฮู่ง? ม่าย นอ, กุ๊น หฑวน เปย๊า อ๊ะ. เหฑีย เบ๊าะ จ๋า หฒุ ไต่, กั้น เต้า ฯฒฯ ฝูง นิ่น เญย เปย๊า.

6ม่าย หาย เต้า หฒวัง อะหงุ่น เปี๊ยว หย่า ไม้ แก้ง ตุ๊ หญั่น? ม่าย นอ, กุ๊น หฑวน เปย๊า อ๊ะ. เหฑีย เบ๊าะ จ๋า หฒุ ไต่, กั้น เต้า ฯฒฯ ตุ๊ หญั่น.

7ม่าย หาย เต้า ก๊อง เฒี่ยง เอ๊า หย่า ไม้ แก้ง โหฒว ธีง-จา? ม่าย นอ, กุ๊น หฑวน เปย๊า อ๊ะ. เหฑีย เบ๊าะ จ๋า หฒุ ไต่, กั้น เต้า ฯฒฯ หล่ง นิ่น เญย เอ๊า.”

8แปง-เปย๊ย อ๋อย หฒุ แอ๋ง บั๋ว นิ่น บัว เญย หฒวัง แปง, “หาย เต้า กั้ม เหฑีย, เฮญี้ยว เมา? ม่าย นอ, กุ๊น หฑวน เปย๊า อ๊ะ. เหฑีย ไฮ่ โหฒว ปุน นิ่น เญย จวั่ง โหฒว แปง เญย ต่อย เฮญี้ยว เมา ฮนั้ง นิ่น นอ.”

9แปง-เปย๊ย เหธา แปง ก๊อง ลิ์ว, นิ่น บัว อ๋อย หฒุ พ้าย เต๋ย เมี่ยน โหฒว เปย๊ย กุ๊น เหยียด กวั้น เหยียด กวั้น แปง.

10เม่ย บัว มี่ง เถา ฟัด เต๋ย ต้ง เม่ย บัว อ๋อย เบ๊าะ วั้ว นอม ฒี่ง, อ๋อย หฒุ ปุน นิ่น บัว ม่าย ฉัง เหญี่ยม เมา.

11สี ก๊อง นิ่น บัว เหญี่ยม เมา, นิ่น บัว หย่า คอย ฒี่ง แก้ง, เยียม วั้ว นอม ฒี่ง เญย หฒวัง เมี่ยน อ๋อย หฒุ เถง เม่ย บัว โหฒว โน่ว, บัวะ เม่ย บัว กุ๊น.

12มป่า สี ก๊อง วั้ว นอม ฒี่ง เญย เมี่ยน ไม้ เหญี่ยม เมา, แหง่ง เจี๊ยน เม่ย บัว ฯฒฯ เหธา เม่ย บัว เบ๊าะ จ๋า, เม่ย บัว อ๋อย หฒุ เว่ย เจี๊ยน เบ๊าะ วั้ว นอม ฒี่ง.

13เฒี้ยว, เม่ย บัว เญย ทิน-ฮู่ง, เฒาะ วั้ว นอม ฒี่ง จิว ปุน เยียม เม่ย บัว เญย ปั์ว-เดี๊ย วั้ว หฒั่น, อ๋อย หฒุ หล่ง หฑุ ด๊าว ไต๋ เหฑ่ง น้าย นอม ฒี่ง เญย มจั่ง ตอน.

14มป่า มเซียะ ตอน เหธา ฝุเจว๊ย, แซง-คู้ เหธา เยียม ฒี่ง กะญั์ว เญย เหยียด ฒู้ง กะน้าย ไฮ่ หล่ง เป๋น เม่ย บัว กั้น ลู้ ต้าย เญย กะน้าย. เม่ย บัว ลู้ วิน-วั้ง เญย เหยียด ฒู้ง กะน้าย เม่ย บัว หล่ง ตุ๊ เญย. เฒี้ยว, เม่ย บัว เญย ทิน-ฮู่ง, เฒาะ น้าย เต๋ย กะน้าย จิว ปุน เม่ย บัว หล่ง.

15อ๋อย หฒุ ฮนั้ง น้าย โหฒว ปุน เล่ย เม่ย บัว โก วั้ว เต๋ย นอมๆ ฒี่ง, ตะฟ่าน ไม้ เฒ์ย นิด ฟัด น้าย เต๋ย ฝีงๆ เมี่ยน เญย ฒี่ง.

16มป่า เฒี้ยว, เม่ย บัว เญย ทิน-ฮู่ง, ปุน เม่ย บัว หฑิบ วั้ว เต๋ย ฝีงๆ เมี่ยน เญย ฒี่ง, ตะฟ่าน ไฮ่ เท้า เฉีย เญย กะน้าย อ๋อย หฒุ ไต๋ เหฑ่ง, ไม้ ตู๋ง เลี่ยว เหยียด เต้า.

17อ๋อย หฒุ เหมียด เหฑ่ง น้าย เต๋ย เมี่ยน, เซ ฮิดไท เมี่ยน, อาโมไล เมี่ยน, คานาอัน เมี่ยน, เปลิดซี เมี่ยน, ฮีไว เมี่ยน เหธา เยบุด เมี่ยน, หฒิว เฒี้ยว, เม่ย บัว เญย ทิน-ฮู่ง, หัด เญย หว่า.

18ไม้ เฒย แอ๊ะ, นิ่น บัว หฌาว เม่ย บัว กัน เจี๊ยน นิ่น บัว หฒั่ง นิ่น บัว เญย เฒี่ยน, โหฒว วั้ว เต๋ย โหยว ไห่, กั้ม เฑี้ย ไห่ เญย สี่. เม่ย บัว ฯฒฯ ป์าม ฒุ์ย ต่อง เฒี้ยว, เม่ย บัว เญย ทิน-ฮู่ง.

19เม่ย บัว อ๋อย เบ๊าะ หาย นอม ฒี่ง ฯฒฯ เว่ย เจี๊ยน เล่า เญย, ไม้ ตู๋ง หล่ง โป๊ว ฮงะ หว่าย เดี๋ยง, เหว่ย หฒุ เม่ย บัว ไฮ่ หญั่น น้าย เต๋ย เดี๋ยง เญย เปี๊ยว. ไม้ ตู๋ง ก๋อย. เด่ย เญย เดี๋ยง ไม้ เฒ์ย เม่ย บัว เญย วิน-วั้ง.

20ตะฟ่าน ฮิ้ว ตุ๊ ไม้ เฒ์ย เฒี่ยง เปี๊ยว เญย เดี๋ยง ก๋อย ตุ๊ เญย, เหว่ย หล่ง โหฒว จา-สี่ เบ๊าะ เม่ย บัว เว่ย ก๋อม วั้ว นอม ฒี่ง เถา ฒี่ง บาง.

← Chapter 19 Jump to: Chapter 21 →