Deuteronomy 22

Mien Bible (Thai Script) © Thailand Bible Society, 2007

← Chapter 21 Jump to: Chapter 23 →

1สี ก๊อง ปวัด เม่ย บัว เญย ก๋อ-โย์ว เญย ง่ง ไฟ ปะกี ยู่ง ต่อง เจ๊า วั้ว น่า, ไม้ ตู๋ง โหฒว ฮนั้ง ไม้ เกวน ไม้ สี่ เญย. ฒู้ง อ๋อย หฒุ เคน หฑวน ปุน เม่ย เญย ก๋อ-โย์ว.

2สี ก๊อง วั้ว เต้า ก๋อ-โย์ว เล่ย เม่ย บัว โก, ไฟ ไม้ ฮิ้ว ตุ๊ หาย เต้า เญย แซง-คู้, อ๋อย หฒุ เคน หฑวน เม่ย บัว เญย เปย๊า อัน เจี๊ยน วั้ว, ฒั้ว เม่ย บัว เญย ก๋อ-โย์ว ต้าย ล์อ ฯฒฯ ฝูง หฑวน ปุน นิ่น.

3ก๋อ-โย์ว เญย ล่อ ไฟ นิ่น เญย ลุย ไฟ นิ่น เญย หาย หญู่ง กะน้าย อ๋อย หฒุ ฟี่ ฮนั้ง เญย ฝูง หฑวน. ไม้ ตู๋ง โหฒว ฮนั้ง ไม้ เกวน ไม้ สี่ เญย.

4สี ก๊อง ปวัด ก๋อ-โย์ว เญย ล่อ ไฟ ง่ง ดอบ วั้ว เจ๊า, ไม้ ตู๋ง โหฒว ฮนั้ง ไม้ เกวน ไม้ สี่ เญย. อ๋อย หฒุ เหลียบ เจี์ย ซิน ต้าย.

5มเซียะ ตอน ไม้ ตู๋ง ฒุ มจั่ง ตอน เญย ลุย-โหว. มจั่ง ตอน หย่า ไม้ ตู๋ง ฒุ มเซียะ ตอน เญย ลุย-โหว. เฒี้ยว, เม่ย บัว เญย ทิน-ฮู่ง โหยว ไห่ โหฒว น้าย หญู่ง สี่ เญย เมี่ยน.

6สี ก๊อง ปวัด เหนาะ เล์า เยียม วั้ว เจ๊า-เฮลน, ไม้ กุ๊น เยียม เดี๋ยง ไฟ กะเดี๊ย เดา, ปวัด เหนาะ มา ปั่ว ตอน ไฟ ปั่ว เจ๋า, ไม้ ตู๋ง เลี่ยม มา เหธา เหนาะ ตอน เฒาะ.

7ฒู้ง อ๋อย หฒุ ปู๋ง เหนาะ มา, มป่า เฒาะ เหนาะ ตอน ตุ๊ เญย. ฮนั้ง หน่าย เม่ย บัว ฯฒฯ ตุ๊ หลง, เฒี่ยง ตุ๊ เสี่ยว ญ่วน ด๊าว.

8เม่ย บัว หาย หฒั่น โหฒว เซียง-เปย๊า อ๋อย หฒุ เว่ย เจี๊ยน เปย๊า-ง่อ เญย เปยย ปูง ฮลัง เต๋ย. สี ก๊อง เมี่ยน ด๊อด ไต่, เปย๊า ฒง เมี่ยน ฯฒฯ ไม้ หฒุ ดาม-ตอง.

9ไม้ ตู๋ง เฒาะ กั้น หญู่ง ญิม หฒวัง เม่ย บัว เญย อะหงุ่น หฮวีง. สี ก๊อง ฮนั้ง น้าย โหฒว, เลี่ยม หฒวัง เญย กะน้าย เหธา อะหงุ่น เปี๊ยว, กั้น ไม้ ตุ๊ หล่ง. อ๋อย หฒุ ต้อ มี่ง หฒั่ง ทิน-ฮู่ง เญย เปย๊า.

10ไม้ ตู๋ง หล่ง ง่ง เหธา ล่อ จวั่ง เดี๋ยง-ก์า ดาม ไล่ เดา.

11ไม้ ตู๋ง ฒุ ปะกี ยู่ง เปยย เหธา ล่าม่า สุย หฒอบ เจี๊ยน ดั๊ด ต้าย เญย ลุย.

12เม่ย บัว ฒุ เญย ต้ม ลุย-ด๊าว, ลุย-ซยาม-เจี๊ยะ เญย เปยย นอม เก๊าะ อ๋อย หฒุ ตี๋ง เจี๊ยน ฆี่ง โฆว.

13สี ก๊อง ม่าย เต้า เมี่ยน หล่ง เอ๊า หย่า เหธา นิ่น เปว๋ย, ฆะฮ้า ฑอง นิ่น,

14ฯฒฯ ล์อ เจ๊า ก๊อง โตะ ป่าย เอ๊า เญย เม่ง เต้า. นิ่น ก๊อง, “เยีย หล่ง วั้ว หฒั่น เยีย ไม้ ปวัด นิ่น ม่าย จั๋ง-โห่ ปุน ธีง นิ่น เซ ไม้ เปว๋ย เจี๋ย ตอน เญย เซียะ.”

15เซียะ เญย เตี๋ย หม่า ฯฒฯ อ๋อย หฒุ ต้อ หญู่ง จั๋ง-โห่ ธ้วด ต้าย มี่ง เถา ฒี่ง แก้ง ด่าง, เมี่ยน โก๋ วั้ว, ปุน ธีง นิ่น บัว เญย เซียะ ไม้ เปว๋ย เจี๋ย ตอน.

16เซียะ เญย เตีย ฯฒฯ ก๊อง บั๋ว เมี่ยน โก๋, “เยีย ปุน เยีย เญย เซียะ น้าย เต้า เมี่ยน หล่ง โหฒว เอ๊า มป่า อี้ หฒั่น นิ่น ฑอง.

17นิ่น ฒู้ง ก๊อง โตะ เยีย เญย เซียะ. นิ่น ก๊อง, ‘เยีย ไม้ ปวัด เม่ย เญย เซียะ ม่าย จั๋ง-โห่ ปุน ธีง นิ่น ไม้ เปว๋ย เจี๋ย ตอน.’ ต้ง น้าย อ๊ะ! น้าย โหฒว จั๋ง-โห่ ปุน ธีง เยีย เญย เซียะ ไม้ หฑย่าว เจี๋ย ตอน.” เซียะ เญย เตี๋ย หม่า ฯฒฯ เฒาะ โหฒว จั๋ง-โห่ วั้ว คว้าย เดีย ทาน เจี๊ยน เมี่ยน โก๋ เญย หฑะเฮมียน โหฒว ฒอง-เหฒง.

18วั้ว นอม ฒี่ง เญย เมี่ยน โก๋ ฯฒฯ เฒาะ วั้ว เต้า โหฆ ต้าย หล่ง ปย๊า-ปิน เบ๊าะ,

19แอ๋ง ปาด นิ่น หญี่ เหฒียบ หลัวะ ลู์ง ญ่าน จิว ปุน เซียะ เญย เตีย, เหว่ย หฒุ นิ่น ปุน เหยียด เต้า ไม้ เปว๋ย เจี๋ย โหฆ เญย อิสะลาเอน เซียะ ด๊อด เม่ง เต้า. วั้ว เต้า เซียะ หธ่อ เป๋น นิ่น เญย เอ๊า, นิ่น เหยียด ลิ์ว ไม้ ไฮ่ เล่ย กวั่ง.

20มป่า สี ก๊อง นิ่น โก๋ เญย หว่า เฒียน เญย, เซียะ หย่า ล์อ ไม้ ตุ๊ หาย หญู่ง โหฒว ฒอง-เหฒง ปุน ธีง นิ่น ไม้ หฑย่าว เจี๋ย ตอน,

21นิ่น บัว ฯฒฯ ต้อ น้าย เต้า เซียะ ธ้วด ต้าย เยียม นิ่น เญย เตีย เญย เปย๊า เญย แก้ง ด่าง. วั้ว นอม ฒี่ง เญย หฒวัง มจั่ง ตอน ฯฒฯ เฒาะ หละเปย๊ย ฒง ไต่, เหว่ย หฒุ นิ่น เยียม อิสะลาเอน เมี่ยน บุด๋ง โหฒว ไญ้ ไห่ เญย สี่. นิ่น หธ่อ เยียม นิ่น เญย เตีย เญย เปย๊า วั้ว หฒั่น นิ่น โหฒว ฮนั้ง หม่าย ป๊วน-ซิน เญย มเซียะ ตอน นอ. ฮนั้ง น้าย โหฒว, ฯฒฯ ปุน เยียม เม่ย บัว บุด๋ง ไม้ ม่าย น้าย หญู่ง เอ๊าะ สี่.

22สี ก๊อง ปวัด เต้า เมี่ยน เหฮยียน กั้น เต้า เมี่ยน เญย เอ๊า, อี เต้า ฒู้ง อ๋อย หฒุ ตี่ง ฒุ์ย ไต๋ ไต่. ฮนั้ง น้าย โหฒว ฯฒฯ ปุน เยียม อิสะลาเอน เมี่ยน บุด๋ง ไม้ ม่าย น้าย หญู่ง เอ๊าะ สี่.

23สี ก๊อง ม่าย เต้า ไม้ หฑย่าว เจี๋ย ตอน เญย เซียะ, เมี่ยน หย่า ก๊อง เฒี่ยง นิ่น หมี่ อ๊ะ, ม่าย เต้า มจั่ง ตอน ปวั้ง หฒุ นิ่น เยียม วั้ว ฒี่ง ฯฒฯ เหธา นิ่น เปว๋ย,

24เม่ย บัว อ๋อย หฒุ ต้อ นิ่น บัว อี เต้า ธ้วด กะเหญี่ย หฒิ ฒี่ง แก้ง ด่าง แอ๋ง หล่ง หละเปย๊ย ฒง ไต่ นิ่น บัว. วั้ว เต้า เซียะ หฒุ ไต๋ ไต่ เหว่ย หฒุ นิ่น เยียม ฒี่ง กะญั์ว หย่า ไม้ เห่ว บุย โท้ เมี่ยน ต้าย เถง. วั้ว เต้า มจั่ง ตอน ไต่ เหว่ย หฒุ นิ่น เหฮยียน กั้น เต้า เมี่ยน เญย เอ๊า. ฮนั้ง น้าย โหฒว ฯฒฯ ปุน เยียม เม่ย บัว บุด๋ง ไม้ ม่าย น้าย หญู่ง เอ๊าะ สี่.

25มป่า สี ก๊อง ม่าย เต้า มจั่ง ตอน ปวั้ง หฒุ เต้า ต้ง เมี่ยน ก๊อง เฒี่ยง เญย เซียะ เยียม วั้ว น่า ฯฒฯ เฒาะ เจี๊ยน น้าย เต้า เซียะ ธา, ขูง อ๋อย หฒุ เฒาะ น้าย เต้า มจั่ง ตอน ไต๋ ไต่ ฮนั้ง.

26ไม้ ตู๋ง โหฒว หาย หญู่ง ปุน วั้ว เต้า เซียะ เหว่ย หฒุ นิ่น ไม้ โหฒว หาย หญู่ง ฒุ์ย หฒี่ ตุ๊ ไต่. น้าย หญู่ง สี่ เซ ฮนั้ง เมี่ยน ป่าๆ มี่ง เบ๊าะ ไต่ เต้า นิ่น เญย ล์าง หฒั่ง เมี่ยน,

27เหว่ย หฒุ น้าย เต้า มจั่ง ตอน เยียม วั้ว น่า ปวั้ง หฒุ น้าย เต้า ต้ง เมี่ยน ก๊อง เฒี่ยง เญย เซียะ ฯฒฯ ธา นิ่น. ไม้ กุ๊น เซียะ ชะ เห่ว หย่า ไม้ ม่าย หาย เต้า ต้าย เหฌียว นิ่น.

28สี ก๊อง ม่าย เต้า มจั่ง ตอน ปวั้ง เต้า ไม้ หฑย่าว เจี๋ย ตอน หย่า ไม้ ม่าย เมี่ยน ก๊อง เฒี่ยง เญย เซียะ ฯฒฯ เฒาะ เจี๊ยน นิ่น ธา หย่า ม่าย เมี่ยน ปวัด,

29ธา เซียะ วั้ว เต้า มจั่ง ตอน อ๋อย หฒุ ปุน เหฒียบ ฮม์ ลู์ง ญ่าน เซียะ เญย เตีย เหว่ย หฒุ นิ่น ป่าย วั้ว เต้า เซียะ. เซียะ ฯฒฯ เป๋น นิ่น เญย เอ๊า หมี่ อ๊ะ. นิ่น เหยียด ลิ์ว ไม้ ไฮ่ เล่ย กวั่ง.

30เมี่ยน ไม้ ตู๋ง หล่ง เตีย เญย เอ๊า โหฒว กั้น เญย เอ๊า. ฮนั้ง น้าย โหฒว ป่าย หฒุ กั้น เญย เตีย.

← Chapter 21 Jump to: Chapter 23 →