Deuteronomy 30

Mien Bible (Thai Script) © Thailand Bible Society, 2007

← Chapter 29 Jump to: Chapter 31 →

1เยีย ตอง เจี๊ยน เม่ย บัว ก๊อง น้าย เต๋ย หว่า, เซ เหยียด ฒู้ง ปวัง เญย หว่า เหธา เหฒียว เญย หว่า, ธ้วด ต้าย ต๋อย-ติ่ว วั้ว หฒั่น, เม่ย บัว หย่า หฒุ เยียม หฑาน, เยียม เฒี้ยว, เม่ย บัว เญย ทิน-ฮู่ง, ปุน เม่ย บัว เยียม วั้ว เต๋ย หม่าน กั๊วะ บุด๋ง, เม่ย บัว หย่า ฮนั้ม-หฑวน จั๋ง หฒุ น้าย เต๋ย หว่า,

2เม่ย บัว เหธา เม่ย บัว เญย เฒ้ย-ฟุน ฯฒฯ หฑวน ต้าย ล์อ เฒี้ยว, เม่ย บัว เญย ทิน-ฮู่ง, หย่า หล่ง เหฑ่ง เฮญี้ยว, หล่ง เหฑ่ง หฒะเอ๋ย, หมวัง อี้ ฮนอย เยีย หัด เม่ย บัว เญย เหยียด ฒู้ง หว่า,

3เฒี้ยว, เม่ย บัว เญย ทิน-ฮู่ง, ฯฒฯ ปุน เม่ย บัว ตุ๊ หลง ฮนั้ง โล์ วั้ว นอ. เฒี้ยว, เม่ย บัว เญย ทิน-ฮู่ง, อ๋อย ค้อ-เลี่ยน เม่ย บัว. นิ่น อ๋อย เซียว เม่ย บัว, ต้ง นิ่น ปุน หฑาน เยียม หม่าน ฝีง บุด๋ง เญย เมี่ยน, หฑวน ต้าย กั๊บ ฒุ้น.

4ไม้ กุ๊น เม่ย บัว หฒุ หฑาน มี่ง เยียม ลู่ง เดี๊ย เก้า โก เจี๋ย เญย ต๋อง, เฒี้ยว, เม่ย บัว เญย ทิน-ฮู่ง, อ๋อย เยียม วั้ว เซียว ฒุ้น, ต้อ เม่ย บัว หฑวน ต้าย.

5เฒี้ยว, เม่ย บัว เญย ทิน-ฮู่ง, อ๋อย ต้อ เม่ย บัว เปียะ มี่ง เยียม ฒิ่น ด่าง เป๋น เม่ย บัว เญย อง-ถาย เญย เต่ย-ปูง, หย่า อ๋อย ปุน เม่ย บัว ตุ๊ เก้า หลง เก้า เป๋น, ปุน เม่ย บัว เก้า หฮยาง เม่ย บัว เญย อง-ถาย.

6เฒี้ยว, เม่ย บัว เญย ทิน-ฮู่ง, อ๋อย จั๊ม เม่ย บัว เหธา เม่ย บัว เญย เฒ้ย-ฟุน เญย เฮญี้ยว, ปุน เม่ย บัว หล่ง เหฑ่ง เฮญี้ยว, หล่ง เหฑ่ง หฒะเอ๋ย ฮนั้ม เฒี้ยว, เม่ย บัว เญย ทิน-ฮู่ง, เหว่ย ปุน เม่ย บัว ตุ๊ เฒี่ยง เจี๊ยน.

7เฒี้ยว, เม่ย บัว เญย ทิน-ฮู่ง, อ๋อย ปุน เม่ย บัว เญย วิน-วั้ง, ต้ง ฑอง เม่ย บัว, โหฒว โตะ เม่ย บัว วั้ว เต๋ย, หฒุ น้าย เต๋ย เหยียด ฒู้ง เหฒียว เญย หว่า.

8เม่ย บัว แอ๋ง อ๋อย หฑวน ต้าย หมวัง เฒี้ยว, หย่า เอย เหฑ่ง เยีย อี้ ฮนอย จิว ปุน เม่ย บัว เญย เหยียด ฒู้ง หลี่ง.

9เฒี้ยว, เม่ย บัว เญย ทิน-ฮู่ง, อ๋อย ปุน เม่ย บัว โหฒว เญย หญู่งๆ กง ตุ๊ หลง, ปุน เม่ย บัว ตุ๊ ฝุเจว๊ย ธั้ม, ตุ๊ แซง-คู้ ธั้ม, ปุน เดา ธ้วด แกง-หฒวัง หลง. เฒี้ยว แอ๋ง อ๋อย อะเฮน้ย เม่ย บัว, ปุน เม่ย บัว ตุ๊ หลง, ฮนั้ง นิ่น อะเฮน้ย เม่ย บัว เญย อง-ถาย นอ.

10นิ่น ฮนั้ง น้าย โหฒว สี ก๊อง เม่ย บัว หมวัง เฒี้ยว, เม่ย บัว เญย ทิน-ฮู่ง เญย หว่า, เอย เจี๊ยน น้าย ป๊วน เล์ย-หลัด โซว เฟี้ย เจี๊ยน เญย เล์ย-หลัด เหธา หลี่ง, หย่า หล่ง เหฑ่ง เฮญี้ยว, หล่ง เหฑ่ง หฒะเอ๋ย หฑวน ต้าย ล์อ เฒี้ยว, เม่ย บัว เญย ทิน-ฮู่ง.

11เยีย อี้ ฮนอย หัด เม่ย บัว เญย เล์ย-หลัด เซ ไม้ เฒ์ย เหว่ย เม่ย บัว อะ เจี๋ย ด่าง, หย่า ไม้ เฒ์ย เล่ย เม่ย บัว โก.

12เซ ไม้ เฒ์ย เยียม กู้ หงว่าย ลู่ง เม่ย บัว ฯฒฯ ก๊อง, “หาย เต้า อ๋อย ฝาว ลู่ง เถง เยีย บัว เฒาะ เหฌี่ย แอ๋ง ฒุ่น ปุน เยีย บัว หมวัง หย่า เอย เจี๊ยน โหฒว?”

13น้าย เต๋ย เล์ย-หลัด หย่า ไม้ เฒ์ย เยียม วั้ว หง่าน หฒิ ค้อย ฯฒฯ อ๋อย หฒุ หน่าย, “หาย เต้า อ๋อย เจี๋ย ค้อย มี่ง เถง เยีย บัว เฒาะ ต้าย แอ๋ง ฒุ่น ปุน เยีย บัว หมวัง หย่า เอย เจี๊ยน โหฒว?”

14วั้ว เต๋ย เล์ย-หลัด เหธา เม่ย บัว เยียม น้าย, ฒู้ง เยียม เม่ย บัว เญย ฑุ่ย หย่า เยียม เม่ย บัว เญย เฮญี้ยว เหว่ย ปุน เม่ย บัว เอย เจี๊ยน โหฒว.

15หมั่ง ม่าะ! เยีย อี้ ฮนอย ปุน เม่ย บัว ม่าย ฉัง กิ๊น อ๋อย ม่าย แหม่ง เฒี่ยง ไฟ ไต่, ตุ๊ หลง ไฟ ตุ๊ เธี้ยว.

16สี ก๊อง เม่ย บัว เอย เจี๊ยน เฒี้ยว, เม่ย บัว เญย ทิน-ฮู่ง เญย หว่า, ต้ง เยีย อี้ ฮนอย หัด เม่ย บัว เญย หว่า, ฮนั้ม เฒี้ยว, เม่ย บัว เญย ทิน-ฮู่ง, ยั่ง นิ่น เญย โต์, กัน หลง นิ่น เญย เล์ย-หลัด เหธา หลี่ง เหธา เล์ย, เม่ย บัว ฯฒฯ ตุ๊ เฒี่ยง เจี๊ยน หย่า หฮยาง เจี๊ยน ฝาว. เม่ย บัว ตุ๊ เปียะ มี่ง เยียม เจี๊ยน อ๋อย เป๋น เม่ย บัว เญย ป่วน วั้ว นอม เต่ย-ปูง วั้ว หฒั่น, เฒี้ยว, เม่ย บัว เญย ทิน-ฮู่ง, อ๋อย เหธย ฟุ ปุน เม่ย บัว.

17มป่า สี ก๊อง เม่ย บัว เฮญี้ยว แหง่ง, ไม้ คั้ง หมวัง เฒี้ยว, ฯฒฯ หฒุ ดั๊ว มี่ง ฟู-สู หฒั่ง เหญี่ย เญย เฒี่ยน,

18อี้ ฮนอย เยีย เม่งๆ เญย ฒุ่น บั๋ว เม่ย บัว, เม่ย บัว ด่ง หาย ฒู้ง อ๋อย หฒุ เหมียด. เม่ย บัว เจี๋ย จอแดน ด้าย เปียะ อ๋อย เป๋น เม่ย บัว เญย ป่วน วั้ว นอม เต่ย-ปูง เม่ย บัว ไม้ ตุ๊ เฒี่ยง เล่า.

19เยีย อี้ ฮนอย เห่ว ลู่ง เหธา เดา เถง เม่ย บัว โหฒว ฒอง-เหฒง, เยีย ปุน เม่ย บัว ม่าย ฉัง กิ๊น อ๋อย เฒี่ยง ไฟ ไต่, อ๋อย ตุ๊ ฟุ ไฟ หฒุ เหฒียว. อี้ หฒั่น อ๋อย หฒุ กิ๊น เม่ย บัว อ๋อย ตุ๊ เฒี่ยง เจี๊ยน เหว่ย ปุน เม่ย บัว เญย เฒ้ย-ฟุน ไฮ่ ตุ๊ เฒี่ยง เจี๊ยน,

20หย่า ฮนั้ม เฒี้ยว, เม่ย บัว เญย ทิน-ฮู่ง, หมวัง นิ่น เญย หว่า, เขา ว้วน นิ่น. ฮนั้ง หน่าย, เม่ย บัว เหธา เม่ย บัว เญย เฒ้ย-ฟุน ตุ๊ เฒี่ยง เสี่ยว ญ่วน ด๊าว เยียม เฒี้ยว โฮ้ว เจี๊ยน อ๋อย ปุน เม่ย บัว เญย อง-ถาย, อับลาฮัม, อีสัก เหธา ยาโค้บ วั้ว นอม เต่ย-ปูง.

← Chapter 29 Jump to: Chapter 31 →