Deuteronomy 14

Mien Bible (Thai Script) © Thailand Bible Society, 2007

← Chapter 13 Jump to: Chapter 15 →

1เม่ย บัว เป๋น เฒี้ยว, เม่ย บัว เญย ทิน-ฮู่ง เญย น่าม โญ์ว. เม่ย บัว เฑ่า เญี้ยม ไต่ มี่ง เญย เมี่ยน เญย เฒี่ยง โห่, ไม้ ตู๋ง ก๊าด กั้น เญย ซิน ไฟ เถย มฆ้อง เญย หฑะเฮมียน แหมง,

2เหว่ย หฒุ เม่ย บัว เป๋น เฒี้ยว, เม่ย บัว เญย ทิน-ฮู่ง, เญย ธีง-เหฑ่ง แปะ ฝีง. เยียม เดา-เป้ย เญย หม่าน ฝีง กะญั์ว, เฒี้ยว กิ๊น เม่ย บัว ต้าย เป๋น นิ่น กั้น เญย แปะ ฝีง.

3ตะฟ่าน ม่าย หวุย เญย, กั้ม เฑี้ย เญย กะน้าย, เม่ย บัว ไม้ ตู๋ง หญั่น.

4เม่ย บัว หญั่น ตุ๊ เญย แซง-คู้ เซ ฮนั้ง น้าย. ม่าย ง่ง, ปะกี ยู่ง, เหธา ยู่ง,

5หญู่งๆ จูง ไฌ่, เฮยี่ย ยู่ง, เฮยี่ย ง่ง, เฮยี่ย ปะกี ยู่ง.

6ตะฟ่าน เต้ย บ๋าย โหฒว อี เหฮลง หย่า ฟาน โธ้ เญย แซง-คู้ หญั่น ตุ๊ เญย.

7มป่า ฟาน โธ้ ไฟ เต้ย บ๋าย โหฒว อี เหฮลง, เม่ย บัว อ๋อย หฒุ เก่ เญย เซ ล่อ ท่อ, เหธา โถว, เหธา เยียม หละเปย๊ย เญย ต้ม น์าว. นิ่น บัว ฟาน โธ้ มป่า ไม้ ม่าย เต้ย บ๋าย ฯฒฯ เหว่ย เม่ย บัว ม่าย หวุย.

8ตู์ง เญย เต้ย บ๋าย มป่า ตู์ง ไม้ ฟาน โธ้ ฯฒฯ เหว่ย เม่ย บัว ม่าย หวุย. ไม้ ตู๋ง หญั่น น้าย ปั๊วะ กะน้าย เญย อ๊อ. ไต่ มี่ง เญย หย่า ไม้ ตู๋ง มัวะ หฒุ.

9เยียม ววม เญย กะน้าย, ตะฟ่าน ม่าย ด๊าด, ม่าย เจี๋ย เญย, หญั่น ตุ๊ เญย.

10มป่า ไม้ ม่าย ด๊าด, ไม้ ม่าย เจี๋ย, ไม้ ตู๋ง หญั่น. เซ เหว่ย เม่ย บัว ม่าย หวุย.

11ตะฟ่าน ไม้ ม่าย หวุย เญย เหนาะ เม่ย บัว หญั่น ตุ๊ เญย.

12มป่า น้าย ปั๊วะ เหนาะ ไม้ ตู๋ง หญั่น, เซ ต้ม จ๊าง, ต้ม จ๊าง-ง่ง, ต้ม จ๊าง-บั๊ว,

13ต้ม จ๊าง-เตว๊ย-ด๊าว, ต้ม จ๊าง-เจี๊ยะ, หญู่งๆ ต้ม จ๊าง,

14หญู่งๆ เหนาะ อา,

15เหนาะ ล่อ ท่อ, เหนาะ กู๊ ลง เปน, เหนาะ โฆ ววม, หญู่งๆ ต้ม จ๊าง-เหนาะ โฆ,

16เหนาะ มล่ม มิว, ต้ม เหนาะ กู๊ ลง, เหนาะ กู๊ ลง แปะ,

17แปะ เหาะ, ต้ม จ๊าง-ยั่ง, เหนาะ อ๊าบ,

18เหนาะ เญี่ย, หญู่งๆ เหนาะ กะสา, เหนาะ ฟาม-ธีง, เหธา บะบุย.

19หญู่งๆ ม่าย ด๊าด เญย แกง เซ เหว่ย เม่ย บัว ม่าย หวุย, ไม้ ตู๋ง หญั่น.

20มป่า ตะฟ่าน ม่าย ด๊าด เญย ธีง-เหฑ่ง กะน้าย, เม่ย บัว หญั่น ตุ๊ เญย.

21ตะฟ่าน นิ่น กั้น ไต่ เญย กะน้าย, เม่ย บัว ไม้ ตู๋ง หญั่น. ปุน เหธา เม่ย บัว จวั่ง มู้ง เยียม เญย กั้น ฝีง เมี่ยน หญั่น หย่า ตุ๊, ไฟ หม่าย ปุน จั๋น หย่า ตุ๊. เหว่ย หฒุ เม่ย บัว กั้น เป๋น เฒี้ยว, เม่ย บัว เญย ทิน-ฮู่ง, เญย ธีง-เหฑ่ง เมี่ยน. ไม้ ตู๋ง หล่ง ยู่ง มา เญย หญอ โฒ้ว ยู่ง ตอน เญย อ๊อ.

22เม่ย บัว เญย เหลียง-เด่ย หฮญังๆ เซียว ต้าย เญย แกง-หฒวัง อ๋อย หฒุ ฝ่ง ห่อ เหฒียบ โก๊ว เญย เหยียด โก๊ว.

23อ๋อย หฒุ ต้อ เม่ย บัว เญย ล่าง หฒิ, เซียง-อะหงุ่น ติ๊ว, กะลั้น โย่ว เหฒียบ โก๊ว เญย เหยียด โก๊ว เหธา เม่ย บัว เญย ง่ง กวั้น ยู่ง กวั้น เญย ต้าว ทอย ตอน มี่ง เยียม เฒี้ยว, เม่ย บัว เญย ทิน-ฮู่ง, เญย หฑะเฮมียน หญั่น. เซ เยียม นิ่น อ๋อย กิ๊น ต้าย เหลียบ นิ่น กั้น เญย เม่ง วั้ว นอม ต๋อง เหว่ย ปุน เม่ย บัว โหะ หลิ่น หฒั่นๆ ท่าย เฒี้ยว, เม่ย บัว เญย ทิน-ฮู่ง.

24สี ก๊อง วั้ว นอม ต๋อง เล่ย ตุ๊ เม่ย บัว โก, ฯฒฯ ต้อ ไม้ ตุ๊ เฒี้ยว, เม่ย บัว เญย ทิน-ฮู่ง, เหธย ฟุ ปุน เม่ย บัว เหฒียบ โก๊ว เญย เหยียด โก๊ว, (เหว่ย หฒุ เฒี้ยว, เม่ย บัว เญย ทิน-ฮู่ง, อ๋อย กิ๊น เหลียบ นิ่น เญย เม่ง วั้ว นอม ต๋อง เล่ย เม่ย บัว โก ไห่,)

25อ๋อย หฒุ เฒาะ เม่ย บัว เหฒียบ โก๊ว เญย เหยียด โก๊ว หม่าย เป๋น ญ่าน, ฯฒฯ ต้อ เจี๊ยน มี่ง เฒี้ยว, เม่ย บัว เญย ทิน-ฮู่ง, อ๋อย กิ๊น วั้ว นอม ต๋อง.

26ไฮ์ อ๋อย หญั่น หาย หญู่ง, กุ๊น หล่ง น้าย เต๋ย ญ่าน ม์าย. ม์าย ง่ง, ปะกี ยู่ง, อะหงุ่น ติ๊ว ไฟ หาย หญู่ง ติ๊ว ไฟ อ๋อย หล่ง หาย หญู่ง หย่า ตุ๊. ฮนั้ง หน่าย เม่ย บัว เหธา เม่ย บัว เญย เปย๊า ฒง เมี่ยน เยียม เฒี้ยว, เม่ย บัว เญย ทิน-ฮู่ง เญย หฑะเฮมียน, เฌียน-โย่ว เญย หญั่น.

27หย่า ไม้ ตู๋ง หละคุ เยียม เม่ย บัว เญย ฒี่ง กะญั์ว เญย เลวี เมี่ยน เหว่ย หฒุ นิ่น บัว ไม้ ตุ๊ เหธา เม่ย บัว ปุน ฆอย เญย ป่วน หย่า ไม้ ม่าย นิ่น บัว กั้น หฑิบ เญย ป่วน.

28โม์ว หฑุ่น ปวั๊ง ปัว หฮญัง วั้ว หฮญัง เซียว ต้าย เญย แกง-หฒวัง เหฒียบ โก๊ว เญย เหยียด โก๊ว อ๋อย หฒุ ต้อ ต้าย เซียว เจี๊ยน เม่ย บัว เญย มู้ง กะญั์ว,

29เหว่ย ปุน เยียม เม่ย บัว เญย มู้ง เญย เลวี เมี่ยน, (เหว่ย หฒุ นิ่น บัว ไม้ ตุ๊ เหธา เม่ย บัว ปุน ฆอย เญย ป่วน, หย่า ไม้ ม่าย นิ่น บัว กั้น หฑิบ เญย ป่วน,) เหธา เยียม เม่ย บัว เญย มู้ง กะญั์ว เญย กั้น ฝีง เมี่ยน เหธา กู้ ฮั่น ฝุเจว๊ย เหธา เอ๊า-กว๊า ตุ๊ หญั่น เป๊ว. ฮนั้ง น้าย โหฒว, เฒี้ยว, เม่ย บัว เญย ทิน-ฮู่ง, ฯฒฯ เหธย ฟุ เม่ย บัว เญย ปั์ว โหฒว เญย หญู่งๆ กง.

← Chapter 13 Jump to: Chapter 15 →