Deuteronomy 17

Mien Bible (Thai Script) © Thailand Bible Society, 2007

← Chapter 16 Jump to: Chapter 18 →

1ไม้ ตู๋ง หล่ง หว่าย ฝัง ไฟ ม่าย ต๋อง เฆ่ม เญย ง่ง ไฟ ปะกี ยู่ง ฝ่ง ห่อ เหฒี่ย ปุน เฒี้ยว, เม่ย บัว เญย ทิน-ฮู่ง. ฮนั้ง น้าย เซ เฒี้ยว, เม่ย บัว เญย ทิน-ฮู่ง, โหยว ไห่, กั้ม เฑี้ย ไห่ เญย สี่.

2เยียม เฒี้ยว, เม่ย บัว เญย ทิน-ฮู่ง, เหธย ปุน เม่ย บัว เญย หาย นอม มู้ง, สี ก๊อง ม่าย หาย เต้า มจั่ง ไฟ มเซียะ เอย เฒี้ยว หมั่ง, ปวัด นิ่น โหฒว หว่าย สี่ ต่อง นิ่น แล์ง เญย แหง่ง หว่า,

3แหง่ง เยีย หัด เญย หว่า, มี่ง หฒั่ง เหญี่ย เญย เฒี่ยน ฯฒฯ ป๋าย วั้ว เต๋ย เฒี่ยน, ไฟ ป๋าย บะฮนอย ไฟ หฮลา ไฟ กู้ หงว่าย ลู่ง เญย กะน้าย,

4น้าย เต๋ย สี่ หย่า ม่าย เมี่ยน บั๋ว เม่ย บัว, เม่ย บัว หย่า ไฮ์ หมี่ อ๊ะ, อ๋อย หฒุ หลงๆ เญย ฒ่า หมั่ง. สี ก๊อง ฮิ้ว ตุ๊ น้าย เต๋ย สี่ หฒะเก้ง ม่าย นอ, หย่า ฮิ้ว ตี่ง เยียม อิสะลาเอน เมี่ยน บุด๋ง ม่าย เมี่ยน โหฒว น้าย เต๋ย โหยว ไห่, กั้ม เฑี้ย ไห่ เญย สี่,

5อ๋อย หฒุ เฒาะ โหฒว น้าย หญู่ง เอ๊าะ สี่ เญย เมี่ยน, ไม้ กุ๊น มจั่ง ไฟ มเซียะ, ต้อ นิ่น มี่ง เถา ฒี่ง หลาด แก้ง กะเหญี่ย แหมง หล่ง หละเปย๊ย ฒง ไต่.

6อ๋อย หฒุ ม่าย อี ปัว เต้า ฒอง-เหฒง เมี่ยน โหฒว ฒอง-เหฒง หธีง ตี่ง นิ่น เญย ฒุ์ย หฒุ ไต่. ขูง ม่าย ดุ เต้า โหฒว ฒอง-เหฒง ฮนั้ง, ไม้ ตู๋ง ไต๋ หาย เต้า.

7โหฒว ฒอง-เหฒง เญย เมี่ยน อ๋อย หฒุ เหฌี่ย ปั์ว ฒง นิ่น ด่าง. ฆะฮ้า หฒวัง เมี่ยน เถง เจี๊ยน ฒง. ฮนั้ง หน่าย ฯฒฯ ปุน เยียม เม่ย บัว บุด๋ง เญย เอ๊าะ สี่ หฒุด เหฑ่ง.

8สี ก๊อง เยียม เม่ย บัว เญย มู้ง ม่าย อะ ตุ๊ ตุ๋น เญย สี่, เซ เมี่ยน ไต๋ เมี่ยน นิ่น บัว ธะ-โป่ว ไต๋ ไฟ ป่าๆ ไต๋, แฑง จา-ตี้ง กะน้าย, ไฟ โหฒว ปุน เมี่ยน หฒุ มุน เญย สี่, อ๋อย หฒุ ต้อ มี่ง เฒี้ยว, เม่ย บัว เญย ทิน-ฮู่ง, อ๋อย กิ๊น ต้าย เญย ต๋อง.

9มี่ง ล์อ เลวี ไซ เมี่ยน เหธา ต๋อย วั้ว หฒั่น โหฒว เซี้ยม ฒุ์ย เจียน วั้ว เต้า, โท้ นิ่น บัว เถง. นิ่น บัว ฯฒฯ เถง เม่ย บัว ตุ๋น สี่.

10เยียม เฒี้ยว, เม่ย บัว เญย ทิน-ฮู่ง, อ๋อย กิ๊น ต้าย เญย ต๋อง นิ่น บัว ฮนั้ง หาย นอ บั๋ว เม่ย บัว, อ๋อย หฒุ ฮนั้ง วั้ว นอ โหฒว. อ๋อย หฒุ ไฝ ฟิม, เอย เจี๊ยน นิ่น บัว พ้าย เหฒียง เญย เหยียด ฒู้ง หว่า โหฒว.

11อ๋อย หฒุ หฒิว นิ่น บัว หฌาว เม่ย บัว เญย เล์ย เหธา นิ่น บัว ตุ๋น เญย หว่า. อ๋อย หฒุ เอย เหฑ่ง, ไม้ ตู๋ง แหง่ง หาย ติ้ว.

12สี ก๊อง หาย เต้า แหง่ง เจี๊ยน, ไม้ หมวัง เยียม วั้ว ฟู-สู เฒี้ยว, เม่ย บัว เญย ทิน-ฮู่ง, เญย ไซ เมี่ยน ไฟ เซี้ยม ฒุ์ย เจียน, วั้ว เต้า ฒู้ง อ๋อย หฒุ ไต๋ ไต่. ฮนั้ง หน่าย ฯฒฯ ปุน เยียม อิสะลาเอน เมี่ยน บุด๋ง ไม้ ม่าย น้าย หญู่ง เอ๊าะ สี่.

13หฒวัง เมี่ยน ไฮ์ น้าย เต๋ย สี่ ฯฒฯ กั้ม เหฑีย, ฆะฮ้า ไม้ ม่าย หาย เต้า ก๊าม แหง่ง.

14เม่ย บัว ตุ๊ เปียะ มี่ง เยียม เจี๊ยน เฒี้ยว, เม่ย บัว เญย ทิน-ฮู่ง, จิว ปุน เม่ย บัว หฑิบ เญย เต่ย-ปูง วั้ว หฒั่น, เม่ย บัว ฯฒฯ ก๊อง, “บัว อ๋อย หฒุ เหลียบ เต้า ฮู่ง กุ๊น บัว ฮนั้ง เว่ย ก๋อม บัว วั้ว เต๋ย กั๊วะ เญย เมี่ยน นอ.”

15เม่ย บัว อ๋อย หฒุ เหลียบ เฒี้ยว, เม่ย บัว เญย ทิน-ฮู่ง, กิ๊น ต้าย เญย เมี่ยน ฮนั้ง. อ๋อย หฒุ เหลียบ เต้า เม่ย บัว กั้น เญย ก๋อ-โย์ว. ไม้ ตู๋ง เหลียบ กั้น ฝีง เมี่ยน, ต้ง ไม้ เฒ์ย อิสะลาเอน ฝีง เญย ก๋อ-โย์ว, โหฒว ฮู่ง กุ๊น เม่ย บัว.

16โหฒว ฮู่ง เญย เมี่ยน ไม้ ตู๋ง เหว่ย กั้น ม่าย ม์า ธั้ม, หย่า ไม้ ตู๋ง ปุน แปะ ฝีง แอ๋ง หฑวน อียิบ เต่ย-ปูง เหว่ย ทิบ ม์า ธั้ม เจี๊ยน ฝาว, เหว่ย หฒุ เฒี้ยว บั๋ว เจี๋ย เม่ย บัว, “ไม้ ตู๋ง แอ๋ง หฑวน อียิบ เต่ย-ปูง.”

17โหฒว ฮู่ง เญย เมี่ยน หย่า ไม้ ตู๋ง ม่าย เอ๊า ธั้ม. เหฑีย ไฮ่ โหฒว ปุน นิ่น เล่ย ทิน-ฮู่ง. หย่า ไม้ ตู๋ง เหว่ย นิ่น กั้น เซียว เจียม ญ่าน ธั้ม.

18นิ่น ฝาว นิ่น เญย กั๊วะ เญย เหว่ย โหฒว ฮู่ง เญย เฒี่ยง โห่, อ๋อย หฒุ เหว่ย กั้น เธว เลวี ไซ เมี่ยน โก๋ว เจี๊ยน วั้ว หฌุ่น เล์ย-หลัด โซว.

19เธว ต้าย อัน นิ่น วั้ว ปุน นิ่น เหยียด เสย หฒั่นๆ โตะ, โหะ หลิ่น ท่าย เฒี้ยว, นิ่น เญย ทิน-ฮู่ง. นิ่น อ๋อย หฒุ หลงๆ เญย กัน น้าย เต๋ย เล์ย-หลัด เญย โจ๋วๆ หว่า เหธา ติ้วๆ เล์ย,

20เหว่ย ปุน กั้น ไม้ เธง-โฮล ฝุน กั้น เก้า หลง ก๋อ-โย์ว ฯฒฯ แหง่ง น้าย เต๋ย หาย ติ้ว เล์ย. ฮนั้ง หน่าย นิ่น เหธา นิ่น เญย เฒ้ย-ฟุน ตุ๊ กุ๊น อิสะลาเอน กั๊วะ เล่า เญย.

← Chapter 16 Jump to: Chapter 18 →