Deuteronomy 2

Mien Bible (Thai Script) © Thailand Bible Society, 2007

← Chapter 1 Jump to: Chapter 3 →

1เยียม เกา, บัว ฯฒฯ ต๋าว ซิน หฑวน เต่ย-ปูง-ฮวาง, ยั่ง มี่ง ค้อย-ซิ วั้ว ติ้ว เจ๊า ฮนั้ง เฒี้ยว บั๋ว เยีย โหฒว นอ. บัว หล่ง เฒี่ยง โห่ ด๊าว เญย โย่ว เจี๊ยน กัน เสอี บง มี่ง.

2โหฒว เกา, เฒี้ยว บั๋ว เยีย,

3“เม่ย บัว โย่ว มี่ง โย่ว ต้าย เยียม น้าย บง หฒั่ง เญย ต๋อง เล่า อ๊ะ, เก๋า อ๊ะ. ต๋าว ซิน ยั่ง ป๊ะ ปูง แหมง มี่ง อ๊ะ.

4อ๋อย หฒุ บั๋ว แปะ ฝีง, ‘เม่ย บัว เญย ก๋อ-โย์ว, เอซาว เญย เฒ้ย-ฟุน, เยียม เสอี เต่ย. เม่ย บัว หย่า อ๋อย หฒุ ยั่ง นิ่น บัว เญย กั๊บ-จ๋าย เจี๋ย. นิ่น บัว อ๋อย กั้ม เหฑีย เม่ย บัว, มป่า เม่ย บัว ฒู้ง อ๋อย หฒุ ไฝ ฟิม.

5ไม้ ตู๋ง เหธา นิ่น บัว เบ๊าะ จ๋า. นิ่น บัว เญย เดา, เลี่ยม เหยียด นอม เหฒา-เป๊น ธ้าย เญย ต๋อง, เยีย หย่า ไม้ ปุน เม่ย บัว, เหว่ย หฒุ เยีย เฒาะ เสอี บง จิว ปุน เอซาว หมี่ อ๊ะ.

6เม่ย บัว อ๋อย หฒุ หล่ง ญ่าน เถง นิ่น บัว ม์าย กะน้าย หญั่น, หย่า หล่ง ญ่าน เถง นิ่น บัว ม์าย ววม ฮบ.’”

7เฒี้ยว, เม่ย บัว เญย ทิน-ฮู่ง, เหธย ฟุ เม่ย บัว หล่ง ปั์ว โหฒว เญย หญู่งๆ กง. เม่ย บัว เจี๋ย ต้ม เต่ย-ปูง-ฮวาง นิ่น หย่า โก๋ว เจี๊ยน เม่ย บัว. น้าย เต๋ย เฝย เหฒียบ หฮญัง กะญั์ว, เฒี้ยว, เม่ย บัว เญย ทิน-ฮู่ง, เหธา เม่ย บัว เยียม. เม่ย บัว หย่า ไม้ ธา หาย หญู่ง.

8บัว ฯฒฯ เจี๋ย บัว เญย ก๋อ-โย์ว, เอซาว เญย เฒ้ย-ฟุน, เยียม เญย ต๋อง, เยียม เสอี บง วั้ว, แอ๋ง ธ้วด อาลาบา เต่ย-ปูง-ฮวาง เญย เจ๊า, ต้ง เยียม เอลัด เหธา เอซีโอนเกเบ ฝาว วั้ว ติ้ว เจ๊า, หูง เจี๊ยน โมอับ เต่ย-ปูง-ฮวาง มี่ง.

9เฒี้ยว แอ๋ง บั๋ว เยีย, “ไม้ ตู๋ง ธัวะ โมอับ เมี่ยน หย่า ไม้ ตู๋ง เหธา นิ่น บัว เบ๊าะ จ๋า เหว่ย หฒุ เยีย ไม้ ปุน เหยียด เต๋ย นิ่น บัว เญย เดา เม่ย บัว. เยีย เฒาะ อาน ฒี่ง ปุน โล้ด เญย เฒ้ย-ฟุน, เป๋น นิ่น บัว เญย ป่วน หมี่ อ๊ะ.”

10(ฒิ่น ด่าง ม่าย เอมิม เมี่ยน เยียม วั้ว นอม ต๋อง, เซ เหยียด ฝีง ธั้ม เญย เมี่ยน, โหย่ว โฮล โหย่ว ฮลัง ฮนั้ง อาน้าก เมี่ยน.

11น้าย เต๋ย เอมิม เมี่ยน หย่า ฮนั้ง อาน้าก เมี่ยน นอ. เมี่ยน ฝุน นิ่น บัว โหฒว เลฟาอิม เมี่ยน, มป่า โมอับ เมี่ยน เห่ว นิ่น บัว โหฒว เอมิม เมี่ยน.

12ฒิ่น ด่าง โฮลี เมี่ยน เยียม เสอี เต่ย มป่า เอซาว เญย เฒ้ย-ฟุน หฒุ่น นิ่น บัว ธ้วด, เหมียด เจี๊ยน นิ่น บัว มี่ง ฯฒฯ เยียม เจี๊ยน นิ่น บัว เญย เต่ย-ปูง ฮนั้ง อิสะลาเอน เมี่ยน เยียม เฒี้ยว จิว ปุน นิ่น บัว เญย เต่ย-ปูง วั้ว นอ.)

13เฒี้ยว ก๊อง, “อ๋อย หฒุ ธ้วด เจ๊า เจี๋ย เฒเล้ด ฮ์อง.” เยีย บัว ฯฒฯ เจี๋ย เฒเล้ด ฮ์อง หมี่ อ๊ะ.

14เยียม บัว ธ้วด คาเดดบาเนีย เถา เจี๋ย ลิ์ว เฒเล้ด ฮ์อง หล่ง เฒี่ยง โห่ ฟ่า เหฒียบ เป๊ด หฮญัง, ฒั้ว เยียม เธี้ยง ไฮ่ โหฒว ตุ๊ แปง เบ๊าะ จ๋า วั้ว ต่อย เมี่ยน ไต่ เหฑ่ง หฒิว เฒี้ยว โฮ้ว เญย หว่า.

15เซ เฒี้ยว กั้น โหฒว ปุน น้าย เต๋ย เยียม เธี้ยง เญย เมี่ยน เถา นิ่น บัว หฒุ เหมียด เหฑ่ง.

16ฮนั้ง หน่าย, ฒั้ว เยียม หฒวัง เมี่ยน กะญั์ว ไฮ่ โหฒว ตุ๊ แปง น้าย เต๋ย เมี่ยน ไต่ เหฑ่ง,

17ฆะฮ้า เฒี้ยว ก๊อง บั๋ว เยีย,

18“อี้ ฮนอย เม่ย บัว อ๋อย หฒุ ยั่ง อาน ฒี่ง เจี๋ย โมอับ เญย กั๊บ-จ๋าย.

19เม่ย บัว เจี๋ย เถา อัมโมน เมี่ยน เญย เต่ย ไม้ ตู๋ง ธัวะ นิ่น บัว หย่า ไม้ ตู๋ง เหธา นิ่น บัว เบ๊าะ จ๋า เหว่ย หฒุ เยีย ไม้ เฒาะ เหยียด เต๋ย อัมโมน เมี่ยน เญย เดา ปุน เม่ย บัว. น้าย นอม เต่ย-ปูง เยีย จิว ปุน โล้ด เญย เฒ้ย-ฟุน เป๋น นิ่น บัว เญย ป่วน หมี่ อ๊ะ.”

20(น้าย นอม เต่ย-ปูง เซ ฝุน เป๋น เลฟาอิม เมี่ยน เญย เต่ย-ปูง เหว่ย หฒุ ฒิ่น ด่าง นิ่น บัว เยียม เจี๋ย, มป่า อัมโมน เมี่ยน เห่ว นิ่น บัว โหฒว สัมซุมมิม เมี่ยน.

21นิ่น บัว โหฒว เหยียด ฝีง ธั้ม เญย, โหย่ว โฮล โหย่ว ฮลัง ฮนั้ง อาน้าก เมี่ยน นอ. มป่า เฒี้ยว เยียม อัมโมน เมี่ยน เญย วั้ว ด่าง แหมง เหมียด น้าย เต๋ย สัมซุมมิม เมี่ยน. อัมโมน เมี่ยน ฯฒฯ แฑง นิ่น บัว เญย เต่ย-ปูง แอ๋ง เยียม เหฌี่ย.

22เฒี้ยว หย่า ฟี่ ฮนั้ง เญย เยียม เอซาว เญย เฒ้ย-ฟุน เญย วั้ว ด่าง แหมง เหมียด โฮลี เมี่ยน. เอซาว เญย เฒ้ย-ฟุน ฯฒฯ แฑง ตุ๊ วั้ว นอม เต่ย-ปูง เยียม เหฌี่ย เถา อี้ จ๋า ฮนอย.

23อับวิม เมี่ยน เยียม น่าม ปูง เหฌี่ย เถา กาซา ฒี่ง บุด๋ง เญย ฟิ้ว-ล์าง. แอ๋ง ม่าย เยียม เคลี้ด ค้อย-โฑว ต้าย เญย เมี่ยน เหมียด เหฑ่ง นิ่น บัว ฯฒฯ เปียะ มี่ง เยียม เจี๊ยน.)

24เฒี้ยว แอ๋ง บั๋ว บัว, “อ๋อย หฒุ ธ้วด เจ๊า เจี๋ย อานโนน ฮ์อง. เยีย เฒาะ อาโมไล เมี่ยน, เฮ้ดโบน ฒี่ง เญย สิโหน ฮู่ง, เหธา นิ่น เญย เต่ย-ปูง จิว ปุน เม่ย บัว. เม่ย บัว อ๋อย หฒุ เจี์ย กอน เหธา นิ่น บัว เบ๊าะ จ๋า, ธ้าง นิ่น บัว เญย เต่ย-ปูง.

25เยียม อี้ ฮนอย มี่ง เยีย อ๋อย ปุน ลู่ง เดี๊ย หม่าน ฝีง กั้ม เหฑีย ไห่ เม่ย บัว, ฒู้ง ไฮ์ เฮญี้ยว หว่าย เหฑ่ง. เมี่ยน เยี้ยด ไฮ์ ก๊อง เถา เม่ย บัว เญย เจ๊า-โหล่ว นอ, นิ่น บัว กั้ม เหฑีย, ซิน หฒิน, เฑ่า ตุ๊ โค้ว ไห่.”

26เยียม เคเดโม้ด เต่ย-ปูง-ฮวาง เยีย พ้าย เมี่ยน มี่ง เฮ้ดโบน ฒี่ง เญย สิโหน ฮู่ง, เหธา นิ่น ก๊อง แป้ง ออน เญย หว่า,

27“โท้ ปุน เยีย บัว เจี๋ย เม่ย เญย เต่ย-ปูง. เยีย บัว ขูง ยั่ง ต้ม เจ๊า เจี๋ย ฮนั้ง, ไม้ มี่ง หฒาย, ไม้ มี่ง บย่าว.

28โท้ หม่าย กะน้าย ปุน เยีย บัว หญั่น, หม่าย ววม ปุน เยีย บัว ฮบ, หล่ง เยีย บัว เญย ญ่าน. เยีย บัว ขูง โท้ เม่ย ปุน เยีย บัว ยั่ง เจ๊า เจี๋ย ฮนั้ง,

29ฮนั้ง เยียม เสอี เต่ย, เอซาว เญย เฒ้ย-ฟุน เหธา เยียม อาน ฒี่ง เญย โมอับ เมี่ยน ปุน เยีย บัว เจี๋ย วั้ว นอ, เถา เยีย เจี๋ย จอแดน ด้าย เปียะ เฒี้ยว, เยีย บัว เญย ทิน-ฮู่ง, จิว ปุน เยีย บัว เญย เต่ย-ปูง.”

30มป่า เฮ้ดโบน ฒี่ง เญย สิโหน ฮู่ง ไม้ คั้ง ปุน บัว ยั่ง นิ่น เญย เต่ย-ปูง เจี๋ย, เหว่ย หฒุ เฒี้ยว, เม่ย บัว เญย ทิน-ฮู่ง, โหฒว ปุน สิโหน ฮู่ง เญย เฮญี้ยว แหง่ง, ไม้ คั้ง หมวัง, เหว่ย เฒาะ นิ่น จิว ปุน เยียม เม่ย บัว เญย ปั์ว-เดี๊ย ฮนั้ง อี้ จ๋า ฮนอย นอ.

31วั้ว หฒั่น เฒี้ยว บั๋ว เยีย, “หมั่ง ม่าะ! เยีย เฒาะ สิโหน ฮู่ง เหธา นิ่น เญย เต่ย-ปูง จิว ปุน เม่ย บัว. อ๋อย หฒุ เปียะ มี่ง กุ๊น แอ๋ง เยียม เหฌี่ย เป๋น เม่ย บัว หฑิบ เญย ป่วน.”

32สิโหน ฮู่ง เหธา นิ่น เญย หฒวัง แปง ธ้วด ต้าย เยียม ยาฮ้าด ฒี่ง เหธา บัว เบ๊าะ จ๋า.

33เฒี้ยว, บัว เญย ทิน-ฮู่ง, เฒาะ นิ่น จิว ปุน เยียม บัว เญย ปั์ว-เดี๊ย. บัว ฯฒฯ เบ๊าะ ฮี่ง สิโหน ฮู่ง เหธา นิ่น เญย หฒวัง แปง.

34วั้ว หฒั่น บัว ธ้าง เหฑ่ง นิ่น บัว เญย นอมๆ ฒี่ง เหมียด เหฑ่ง, เลี่ยม นิ่น บัว เญย มจั่ง มเซียะ เหธา ฝุเจว๊ย. ไม้ เลี่ยว เหยียด เต้า.

35มป่า แซง-คู้ เหธา เยียม นอมๆ ฒี่ง ธ้าง ต้าย เญย กะน้าย บัว ต้อ มี่ง เลี่ยว เจี๊ยน เป๋น บัว กั้น เญย.

36เยียม อานโนน ฮ์อง กะเฮลน เญย อาโลเอ ฒี่ง เหธา เยียม อานโนน ฮ์อง กะญั์ว วั้ว นอม ฒี่ง มี่ง เถา กิเลอาด, ไม้ ม่าย เหยียด นอม ฒี่ง หลาด ฮลัง เจี๋ย ด่าง บัว เบ๊าะ ไม้ ตุ๊. เฒี้ยว, บัว เญย ทิน-ฮู่ง, เฒาะ น้าย เต๋ย เหยียด ฒู้ง ฒี่ง จิว ปุน บัว.

37มป่า หฒิว เฒี้ยว, บัว เญย ทิน-ฮู่ง, หัด เญย หว่า, บัว ไม้ มี่ง ฟัด อัมโมน เมี่ยน เญย กั๊บ-จ๋าย เญย หาย นอม ต๋อง, เซ ไม้ กัน ยับบอก ด้าย เฮลน เญย เหยียด ฒู้ง เดา เหธา บง หฒั่ง ต๋อง เญย ฒี่ง.

← Chapter 1 Jump to: Chapter 3 →