Deuteronomy 7

Mien Bible (Thai Script) © Thailand Bible Society, 2007

← Chapter 6 Jump to: Chapter 8 →

1เฒี้ยว, เม่ย บัว เญย ทิน-ฮู่ง, อ๋อย ต้อ เม่ย บัว เปียะ, ต้ง อ๋อย เป๋น เม่ย บัว เญย ป่วน วั้ว นอม เต่ย-ปูง. นิ่น อ๋อย เยียม เม่ย บัว เญย วั้ว ด่าง แหมง หฒุ่น ธ้วด ธั้ม-ฝีง เมี่ยน, เซ ฮิดไท เมี่ยน, เกกาซี เมี่ยน, อาโมไล เมี่ยน, คานาอัน เมี่ยน, เปลิดซี เมี่ยน, ฮีไว เมี่ยน เหธา เยบุด เมี่ยน. น้าย เต๋ย เสี่ย ฝีง เก้า โฮล เก้า เฮ้น เม่ย บัว.

2เฒี้ยว, เม่ย บัว เญย ทิน-ฮู่ง, เฒาะ นิ่น บัว จิว ปุน เยียม เม่ย บัว เญย ปั์ว-เดี๊ย, เม่ย บัว หย่า เบ๊าะ ฮี่ง นิ่น บัว วั้ว หฒั่น, อ๋อย หฒุ เหมียด เหฑ่ง นิ่น บัว. ไม้ ตู๋ง เหธา นิ่น บัว เหลียบ หาย หญู่ง แหง่ง หว่า, หย่า ไม้ ตู๋ง ค้อ-เลี่ยน นิ่น บัว.

3ไม้ ตู๋ง เหธา นิ่น บัว โจ้ว เธียน, ปู๋ง เม่ย บัว เญย เซียะ ปุน นิ่น บัว เญย ตอน หล่ง ไฟ ล์อ นิ่น บัว เญย เซียะ ปุน เม่ย บัว เญย ตอน หล่ง.

4ฮนั้ง น้าย โหฒว ไฮ่ ปุน เม่ย บัว เญย ตอน เล่ย เฒี้ยว แอ๋ง หฒั่ง กั้น เต้า เฒี่ยน. เฒี้ยว ฯฒฯ เฉีย เจี์ย เม่ย บัว, เซี้ยบๆ เญย เหมียด เม่ย บัว.

5อ๋อย หฒุ ฮนั้ง น้าย โหฒว ปุน นิ่น บัว. อ๋อย หฒุ แธะ นิ่น บัว เญย เหฒี่ย-ต้อง, เบ๊าะ หม่วน นิ่น บัว หฒั่ง เฒี่ยน เญย หละเปย๊ย-ต่ง, ก๋อย อาเซลา เฒี่ยน เญ์ย เญย ฝัง, หย่า หล่ง โต์ว ปั๊ว นิ่น บัว เญย หมิ่ว-ฝัง,

6เหว่ย หฒุ เม่ย บัว เป๋น เฒี้ยว, เม่ย บัว เญย ทิน-ฮู่ง, เญย ธีง-เหฑ่ง เมี่ยน. เฒี้ยว, เม่ย บัว เญย ทิน-ฮู่ง, เยียม ลู่ง เดี๊ย เญย หม่าน ฝีง กิ๊น เม่ย บัว ธ้วด ต้าย เป๋น นิ่น กั้น เญย แปะ ฝีง.

7เฒี้ยว ฮนั้ม เม่ย บัว, กิ๊น เม่ย บัว, ไม้ เฒ์ย เหว่ย เม่ย บัว เญย เมี่ยน เก้า ธั้ม กั้น ฝีง. เป๊ย หม่าน ฝีง เม่ย บัว เก้า โหฒะ เจี๋ย.

8เฒี้ยว ฮนั้ม เม่ย บัว, เอย เจี๊ยน นิ่น เหธา เม่ย บัว เญย อง-ถาย โฮ้ว เจี๋ย เญย แหง่ง หว่า, หธีง หล่ง นิ่น เญย ต้ม ชะ ต้อ เม่ย บัว ธ้วด หย่า หฒัวะ เม่ย บัว หฑวน, เปย๋า ดุ๊ด โหฒว โน่ว เญย ต๋อง, อียิบ เต่ย-ปูง, ฟาโล ฮู่ง เญย ปั์ว-เดี๊ย.

9เหว่ย น้าย เม่ย บัว อ๋อย หฒุ ฮิ้ว ตุ๊ เฒี้ยว, เม่ย บัว เญย ทิน-ฮู่ง, ขูง นิ่น กั้น เป๋น ทิน-ฮู่ง ฮนั้ง. นิ่น เซ เหฒียบ ฒัวะ เญย ทิน-ฮู่ง, เอย เจี๊ยน นิ่น แล์ง เญย แหง่ง หว่า โหฒว, ฯฒฯ ฮนั้ม ต้ง ฮนั้ม นิ่น, เอย เจี๊ยน นิ่น เญย เล์ย-หลัด โหฒว วั้ว เต๋ย, เถา เหยียด ธิน ต่อย.

10มป่า, ฑอง นิ่น วั้ว เต๋ย นิ่น อ๋อย วิ่น ปุน นิ่น บัว หฒุ เหมียด. นิ่น ไม้ ไง่, ฒู้ง อ๋อย วิ่น ปุน ฑอง นิ่น วั้ว เต๋ย.

11เหว่ย น้าย เม่ย บัว อ๋อย หฒุ กัน หลง เยีย อี้ ฮนอย จิว ปุน เม่ย บัว น้าย เต๋ย เล์ย-หลัด เหธา หลี่ง เหธา เล์ย.

12สี ก๊อง เม่ย บัว หฒวัง เมี่ยน หมวัง น้าย เต๋ย เล์ย-หลัด หย่า เหฒียบ ฒัวะ เญย เอย เจี๊ยน โหฒว, เฒี้ยว, เม่ย บัว เญย ทิน-ฮู่ง, ฯฒฯ ฮนั้ม เม่ย บัว หฒิว นิ่น เหธา เม่ย บัว เญย อง-ถาย แล์ง เจี๋ย เญย แหง่ง หว่า.

13นิ่น ฒู้ง อ๋อย ฮนั้ม เม่ย บัว, เหธย ฟุ ปุน เม่ย บัว, หย่า ปุน เม่ย บัว หฮยาง ธั้ม เจี๊ยน ฝาว. นิ่น อ๋อย เหธย ฟุ ปุน เม่ย บัว ตุ๊ ฝุเจว๊ย ธั้ม หย่า ปุน เม่ย บัว เญย ลี่ง เต่ย แกง-หฒวัง หลง, เลี่ยม เบย้า, เซียง-อะหงุ่น ติ๊ว เหธา กะลั้น โย่ว. เยียม เฒี้ยว โฮ้ว ปุน เม่ย บัว เญย อง-ถาย อ๋อย จิว ปุน เม่ย บัว เญย เต่ย-ปูง, เลี่ยม ง่ง ตอน, ยู่ง ตอน, ปะกี ยู่ง ตอน อ๋อย หฮยาง เจี๊ยน ฝาว.

14เม่ย บัว อ๋อย ตุ๊ ฟุ เก้า ธั้ม หม่าน ฝีง. เม่ย บัว เญย มจั่ง มเซียะ ไม้ ม่าย หาย เต้า ไม้ ไฮ่ ม่าย แซง-ยู์ง. แซง-คู้ หย่า ไม้ ม่าย หาย เต้า ไม้ ไฮ่ เหฌี่ย ตอน.

15เฒี้ยว ฒู้ง อ๋อย แฆะ เจี๊ยน, ไม้ ปุน เม่ย บัว ปุ๊ด แป่ง. เยียม อียิบ เต่ย-ปูง เม่ย บัว ฮิ้ว เญย วั้ว เต๋ย เธี้ยว ไห่ เญย แป่ง นิ่น ไม้ ปุน เม่ย บัว ปุ๊ด. ขูง ปุน ฑอง เม่ย บัว วั้ว เต๋ย ปุ๊ด ฮนั้ง.

16เม่ย บัว อ๋อย หฒุ เหมียด เหฑ่ง ต้ง เฒี้ยว จิว ปุน เม่ย บัว เญย ฝีงๆ เมี่ยน. ไม้ ตู๋ง ค้อ-เลี่ยน นิ่น บัว หย่า ไม้ ตู๋ง หฒั่ง นิ่น บัว เญย เฒี่ยน. น้าย ฒู้ง โหฒว โขว ฮลบ เม่ย บัว.

17ไม้ ตู๋ง เยียม เฮญี้ยว ฮนั้ม, “น้าย เต๋ย เมี่ยน เก้า ธั้ม เยีย บัว. เยีย บัว ฝู่ง ไฮ่ หฒุ่น นิ่น บัว ธ้วด?”

18ไม้ ตู๋ง กั้ม เหฑีย นิ่น บัว. อ๋อย หฒุ จั๋ง เจี๊ยน เฒี้ยว, เม่ย บัว เญย ทิน-ฮู่ง, ฮนั้ง หาย นอ โหฒว ปุน ฟาโล ฮู่ง เหธา อียิบ เญย หฒวัง เมี่ยน.

19เม่ย บัว กั้น เญย มฒีง ปวัด เจี๋ย นิ่น บัว หฒุ โฮล ไห่ เญย สี่ เสย นิ่น บัว, เซ บัวะ ฮ่อง เญย สี่ เหธา จั๋ง-โห่, ปวัด เฒี้ยว, เม่ย บัว เญย ทิน-ฮู่ง, ซูง นิ่น เฮ้น ไห่ เญย ปั์ว ต้อ เม่ย บัว ธ้วด ต้าย. เฒี้ยว, เม่ย บัว เญย ทิน-ฮู่ง, อ๋อย ฮนั้ง วั้ว นอ โหฒว ปุน เม่ย บัว อี้ หฒั่น กั้ม เหฑีย วั้ว เต๋ย เมี่ยน.

20ไม้ ตาน บัวะ น้าย. เฒี้ยว, เม่ย บัว เญย ทิน-ฮู่ง, อ๋อย ปุน นิ่น บัว หลุ่น เถา เหฒ่ง เหฌี่ย เญย เมี่ยน เหธา ปี๋ง เม่ย บัว วั้ว เต๋ย หฒุ เหมียด เหฑ่ง.

21ไม้ ตู๋ง กั้ม เหฑีย น้าย เต๋ย เมี่ยน เหว่ย หฒุ เฒี้ยว, เม่ย บัว เญย ทิน-ฮู่ง, เยียม เม่ย บัว บุด๋ง. นิ่น เซ โฮล ไห่, อ๋อย หฒุ กั้ม เหฑีย เญย ทิน-ฮู่ง.

22เฒี้ยว, เม่ย บัว เญย ทิน-ฮู่ง, อ๋อย เฒาะ เยียม เจี๊ยน น้าย เต๋ย ฝีงๆ เมี่ยน หมั่นๆ หฒุ่น ธ้วด เม่ย บัว เญย วั้ว ด่าง แหมง. เม่ย บัว ไม้ ตู๋ง เลี่ยม เฒ่ย เหมียด, ปุน นิ่น บัว หฒุด เหฑ่ง. เหฑีย เฮยี่ย ฒ่อย ไฮ่ หฮยาง เจี๋ย ด่าง, ห่อย เม่ย บัว.

23เฒี้ยว, เม่ย บัว เญย ทิน-ฮู่ง, อ๋อย เฒาะ นิ่น บัว จิว ปุน เม่ย บัว, หย่า อ๋อย ปุน นิ่น บัว หลุ่น เหฑ่ง เถา หฒุ เหมียด หมี่ อ๊ะ.

24นิ่น แอ๋ง อ๋อย เฒาะ นิ่น บัว เญย หฒวัง ฮู่ง จิว เยียม เม่ย บัว เญย ปั์ว-เดี๊ย. อ๋อย หฒุ เหมียด นิ่น บัว, ปุน เยียม น้าย ลู่ง เดี๊ย ไม้ ม่าย หาย เต้า จั๋ง ตุ๊ นิ่น บัว. ไม้ ม่าย หาย เต้า ไฮ่ แหง่ง ตุ๊ เม่ย บัว เถา เม่ย บัว เหมียด เหฑ่ง นิ่น บัว.

25เม่ย บัว อ๋อย หฒุ หล่ง โต์ว ปั๊ว นิ่น บัว เญย เฒี่ยน เญย หมิ่ว-ฝัง. หย่า ไม้ ตู๋ง เหมว่ย เจี๊ยะ ปวัง หมิ่ว-ฝัง เญย เจียม ไฟ ญ่าน. ไม้ ตู๋ง เฒาะ ต้าย เป๋น กั้น เญย. กั้ม เหฑีย เป๋น โขว ฮลบ เม่ย บัว. น้าย เซ เฒี้ยว, เม่ย บัว เญย ทิน-ฮู่ง, โหยว! ไห่ เญย กะน้าย.

26ไม้ ตู๋ง ต้อ น้าย เต๋ย โหยว ไห่ เญย กะน้าย เปียะ เปย๊า. เหฑีย เม่ย บัว ฯฒฯ ฮนั้ง น้าย เต๋ย กะน้าย หฒุ เหฒียว. เม่ย บัว อ๋อย หฒุ ฑอง ไห่ หย่า โหยว เถา เดี๊ย เหว่ย หฒุ เป๋น ทิน-ฮู่ง เหฒียว เญย กะน้าย.

← Chapter 6 Jump to: Chapter 8 →