Jeremiah 11

Mien Bible (Thai Script) © Thailand Bible Society, 2007

← Chapter 10 Jump to: Chapter 12 →

1เยเลมี ตุ๊ ฒิบ เฒี้ยว เญย หว่า ก๊อง,

2“เม่ย อ๋อย หฒุ หมวัง น้าย เต๋ย แล์ง เญย แหง่ง หว่า หย่า ก๊อง บั๋ว ยูดา เมี่ยน เหธา เยียม เยลูซาเลม เญย เมี่ยน.

3เม่ย อ๋อย หฒุ ก๊อง บั๋ว นิ่น บัว, ‘ เฒี้ยว, อิสะลาเอน เมี่ยน เญย ทิน-ฮู่ง, ฮนั้ง น้าย ก๊อง, “หาย เต้า ไม้ หมวัง น้าย เต๋ย แล์ง เญย แหง่ง หว่า ฒู้ง หฒุ เหฒียว.

4น้าย เต๋ย แหง่ง หว่า ต้ง เยีย เฒาะ เม่ย บัว เญย อง-ถาย ธ้วด อียิบ เต่ย-ปูง, เซ เยียม เฮลียะ-โล่ว ธ้วด ต้าย หัด นิ่น บัว เญย หว่า.” เยีย ก๊อง, ‘หมวัง เยีย ก๊อง เญย หว่า หย่า เอย เจี๊ยน เยีย หัด เม่ย บัว เญย เหยียด ฒู้ง หว่า โหฒว. เม่ย บัว ฯฒฯ เป๋น เยีย เญย แปะ ฝีง. เยีย หย่า เป๋น เม่ย บัว เญย ทิน-ฮู่ง,

5เหว่ย เอย เจี๊ยน เยีย โฮ้ว เจี๊ยน เหธา เม่ย บัว เญย อง-ถาย แล์ง เญย แหง่ง หว่า. เยีย ก๊อง เยีย อ๋อย เฒาะ นอม เดา-โท้ว หลง เญย เต่ย-ปูง เหธย ปุน นิ่น บัว ฮนั้ง อี้ ฮนอย นอ.’” เยีย เตา, “ เฒี้ยว อ่า, โท้ ปุน ฮนั้ง หน่าย อ๊ะ.”

6เฒี้ยว ก๊อง บั๋ว เยีย, “เม่ย อ๋อย หฒุ เยียม ยูดา เญย ฒี่ง เหธา เยลูซาเลม เญย จาย-ห่อง ฒุ่น น้าย เต๋ย เหยียด ฒู้ง หว่า ก๊อง, ‘เม่ย บัว อ๋อย หฒุ หมวัง น้าย เต๋ย แล์ง เญย แหง่ง หว่า หย่า เอย เจี๊ยน โหฒว,

7เหว่ย หฒุ เยีย ต้อ เม่ย บัว เญย อง-ถาย เยียม อียิบ เต่ย-ปูง ธ้วด ต้าย วั้ว หฒั่น, เยีย เฮนี้ยๆ เญย ต๊น นิ่น บัว. เถา อี้ ฮนอย เยีย ไม้ ตี้ง เลี่ยว เญย ขวิน นิ่น บัว. เยีย ก๊อง, “อ๋อย หฒุ หมวัง เยีย เญย หว่า.”

8ไม้ กุ๊น ฮนั้ง หน่าย, นิ่น บัว ไม้ เอย เจี๊ยน โหฒว หย่า ไม้ แปง มน่อม หมวัง. มป่า เต้าๆ หฒิว กั้น เญย เอ๊าะ เฮญี้ยว แหง่ง เจี๊ยน โหฒว. หลาย นิ่น บัว ไม้ เอย เจี๊ยน เยีย หัด นิ่น บัว เญย แหง่ง หว่า, เยีย ฯฒฯ ปุน นิ่น บัว หฒุ หฒิว น้าย เต๋ย เหยียด ฒู้ง แหง่ง หว่า เญย สี่.’”

9เฒี้ยว แอ๋ง ก๊อง บั๋ว เยีย, “ยูดา เมี่ยน เหธา เยียม เยลูซาเลม เญย แปะ ฝีง ต๊า หฒะเอ๋ย แหง่ง เจี๊ยน.

10นิ่น บัว ฮวิน หฑวน ต้าย โหฒว ต้ง นิ่น บัว เญย อง-ถาย ไม้ หมวัง เยีย เญย หว่า ป์าม เญย ฒุ์ย. นิ่น บัว กัน เหญี่ย เญย เฒี่ยน หย่า ฟู-สู นิ่น บัว. อิสะลาเอน เญย เฒ้ย-ฟุน เหธา ยูดา เญย เฒ้ย-ฟุน โหฒว ต่อง เยีย เหธา นิ่น บัว เญย อง-ถาย แล์ง เญย แหง่ง หว่า.

11เหว่ย น้าย เฒี้ยว ฮนั้ง น้าย ก๊อง, ‘หมั่ง ม่าะ! เยีย อ๋อย ปุน นิ่น บัว หฒุ เอ๊าะ สี่. นิ่น บัว ไม้ ไฮ่ เปย๋า ไม้ ดุ๊ด. ไม้ กุ๊น นิ่น บัว เห่ว เยีย, เยีย ไม้ หมวัง นิ่น บัว.

12ยูดา เญย ฒี่ง เญย เมี่ยน เหธา เยียม เยลูซาเลม เญย แปะ ฝีง ฯฒฯ มี่ง เห่ว ต้ง นิ่น บัว ปั๊ว ฮูง ปุน วั้ว เต๋ย เฒี่ยน. มป่า หฒุ โค้ว เญย เฒี่ยง โห่, น้าย เต๋ย เฒี่ยน เหฌียว ไม้ ตุ๊ นิ่น บัว.

13ยูดา เมี่ยน อ้า! เม่ย บัว เญย เฒี่ยน เหธา เม่ย บัว เญย ฒี่ง ฟี่ บัวะ เญย. เม่ย บัว เหว่ย กั้ม เฑี้ย เญย บาอัน เฒี่ยน เหลียบ ปั๊ว ฮูง เตี้ย ด่ง เยลูซาเลม เญย จาย-ห่อง ธั้ม.’

14“ไม้ ตู๋ง เหว่ย น้าย เต๋ย แปะ ฝีง เต๋า เก๋า. ไม้ ตู๋ง เหว่ย นิ่น บัว เห่ว เจี๊ยน โท้ ไฟ เถง นิ่น บัว เต๋า เก๋า, เหว่ย หฒุ นิ่น บัว ปวั้ง หฒุ โค้ว เญย เฒี่ยง โห่ เห่ว เยีย, เยีย ไม้ หมวัง นิ่น บัว.

15“เยีย ฮนั้ม เญย เมี่ยน โหฒว เอ๊าะ ไห่ เญย สี่, นิ่น ฝู่ง ม่าย เล์ย เยียม เยีย เญย เปย๊า? โฮ้ว หว่า ไฟ เหฒี่ย เญย แซง-คู้ อ๊อ ไฮ่ เถง เปย๋า ดุ๊ด ไม้ หฒุ ตี่ง ฒุ์ย ไฟ? วั้ว หญู่ง เม่ย ไฮ่ เฌียน-โย่ว เญย ไฟ?”

16ฒิ่น ด่าง เฒี้ยว ก๊อง เม่ย ฮนั้ง ติ้ว กะลั้น เดี๋ยง เญี์ยม เญย, เหฑว่ย เญย, หย่า เฒี่ยง เปี๊ยว หลง. มป่า ฮนั้ง ต้ม หฑยาว เญย เฉีย บุย, เยีย อ๋อย เตี๊ยม เหฒียะ โต์ว ปุน นิ่น เญย ฆว่า หฒุ ปั๊ว ชุย เหฑ่ง.

17เน่น เจี๋ย เญย เฒี้ยว, เซ หฒวัง เม่ย วั้ว เต้า, ก๊อง ธ้วด อ๋อย ปุน เม่ย หฒุ เหฒะ หน่าน, เหว่ย หฒุ อิสะลาเอน เญย เฒ้ย-ฟุน เหธา ยูดา เญย เฒ้ย-ฟุน โหฒว เอ๊าะ สี่ ปั๊ว ฮูง ปุน บาอัน เฒี่ยน ธัวะ เยีย เฉีย เจี์ย.”

18เฒี้ยว ปุน เยีย ฮิ้ว ตุ๊ น้าย เต๋ย สี่ เยีย หธีง ต้าย ฮิ้ว. นิ่น ปิ๋ว เม่ง ปุน เยีย ฮิ้ว ตุ๊ นิ่น บัว ต๊า เอ๊าะ เญย หฒะเอ๋ย ห่อย เยีย.

19เยีย ฮนั้ง เต้า ส่วน เญย ปะกี ยู่ง ตอน หฒุ ต้อ มี่ง ไต๋ เญย ต๋อง. เยีย ไม้ ฮิ้ว ตุ๊ นิ่น บัว ต๊า หฒะเอ๋ย ห่อย เยีย. นิ่น บัว ก๊อง, “บัว อ๋อย หฒุ เฒาะ เลี่ยม เดี๋ยง เลี่ยม เปี๊ยว เหมียด เหฑ่ง. บัว อ๋อย หฒุ เฒาะ นิ่น เยียม ย่าง เกน ไพ กวั่ง เหว่ย ปุน เมี่ยน เหยียด ลิ์ว ไม้ จั๋ง นิ่น เญย บั๋ว.”

20มป่า เน่น เจี๋ย เญย เฒี้ยว อ่า, เม่ย แป้ง ฟิม เญย เซี้ยม หย่า เสย เมี่ยน เญย เฮญี้ยว เหธา ฮนั้ม เญย สี่. โท้ ปุน เยีย ปวัด เม่ย วิ่น ปุน นิ่น บัว, เหว่ย หฒุ เยีย เญย เจ๊า เยีย จิว ปุน เม่ย หมี่ อ๊ะ.

21“เหว่ย น้าย เฒี้ยว ก๊อง เถา ล์อ เม่ย เญย แหม่ง วั้ว เต๋ย อานาโท้ด เมี่ยน. น้าย เต๋ย เมี่ยน ก๊อง, ‘ไม้ ตู๋ง เต๊ง เฒี้ยว เญย เม่ง โต่ว หว่า. ไม้ เฒย แอ๊ะ, เม่ย ฯฒฯ หฒุ เยีย บัว เญย ปั์ว ไต๋ ไต่.’

22เหว่ย น้าย เน่น เจี๋ย เญย เฒี้ยว ฮนั้ง น้าย ก๊อง, ‘หมั่ง ม่าะ! เยีย อ๋อย ตี่ง นิ่น บัว เญย ฒุ์ย. นิ่น บัว เญย เมี่ยน หลุน เมี่ยน อ๋อย หฒุ หฑุ ด๊าว ไต๋. นิ่น บัว เญย น่าม โญ์ว หฒุ หง่อ หฮนาง ไต่.

23นิ่น บัว ไม้ เหฒ่ง เหยียด เต้า เหว่ย หฒุ เยีย ตี่ง อานาโท้ด เมี่ยน เญย ฒุ์ย เญย หฮญัง-ต้าว เถา, เยีย ฯฒฯ ปุน นิ่น บัว หฒุ เหฒะ หน่าน.’”

← Chapter 10 Jump to: Chapter 12 →