Jeremiah 6

Mien Bible (Thai Script) © Thailand Bible Society, 2007

← Chapter 5 Jump to: Chapter 7 →

1“เบนยามิน เมี่ยน อ้า! เปย๋า มี่ง เหว่ย เปย๋า ดุ๊ด. เปย๋า ธ้วด เยลูซาเลม. เยียม เทโคอา ปย๊ม จอง. เธีย จั๋ง-โห่ เญย เก้ เยียม เบดฮักเคเลม, เหว่ย หฒุ ม่าย ต้ม เหฒะ หน่าน เยียม ป๊ะ ปูง ต้าย, หย่า ม่าย ป่าย หว่าย เญย ต้ม สี่.

2เหฑว่ย ไห่ เญย เฝียว-ฒ่อย เซียะ, สิโอน, เยีย อ๋อย เหมียด เหฑ่ง.

3โก๋ว ปะกี ยู่ง เญย เมี่ยน เหธา นิ่น บัว เญย ปะกี ยู่ง กวั้น อ๋อย ต้าย เบ๊าะ นิ่น. นิ่น บัว อ๋อย ธอง นิ่น บัว เญย ด๊บ-ลิ่ว เว่ย ก๋อม นิ่น, เก๊าะ-เมี่ยน ฯฒฯ เยียม เก๊าะ-เมี่ยน เญย ต๋อง ปู๋ง ยู่ง.

4“อ๋อย หฒุ หลิ่ว เล์ย เหฒียง เหธา นิ่น เบ๊าะ จ๋า. เจี์ย ต้าย ม่าะ! บัว ลู่ง อ๋าน เญย เฒี่ยง โห่ มี่ง เบ๊าะ. บัว หฒุ โค้ว อ๊ะ, เหว่ย หฒุ ลู่ง ฮนอย เญย ฌัง เจี๋ย เจี๊ยน มี่ง, ลู่ง ม์าน-หฮมวัง เญย ต้ง ลิ่น กุ๊น โหฒว กุ๊น ด๊าว อ๊ะ.

5เจี์ย ต้าย ม่าะ! บัว ลู่ง ม์วน หฒั่น มี่ง เบ๊าะ, เหมียด เหฑ่ง ฒี่ง เญย ฮู่ง ติ่น.”

6เน่น เจี๋ย เญย เฒี้ยว ฮนั้ง น้าย ก๊อง, “อ๋อย หฒุ ก๋อย วั้ว นอม ฒี่ง เญย เดี๋ยง, ดุย เนีย เว่ย ก๋อม เบ๊าะ เยลูซาเลม. น้าย เซ หอบ หฒุ ตี่ง ฒุ์ย เญย ฒี่ง. เยียม ฒี่ง กะญั์ว ขูง ม่าย เหฒย เมี่ยน เญย สี่ ฮนั้ง.

7ฮนั้ง ววม-ค้วด ไม้ ตี้ง เญย ธ้วด ววม-ฑัง, น้าย นอม ฒี่ง ไม้ ตี้ง เญย ธ้วด เอ๊าะ สี่. หฒั่นๆ ม่าย โหฒว โตะ, ป่าย หว่าย เญย สี่ เยียม ฒี่ง กะญั์ว, หฒุ แป่ง, หฒุ มุน เญย เจ๊า หฒั่นๆ เยียม เยีย เญย หฑะเฮมียน.

8เยลูซาเลม อ้า! อ๋อย หฒุ หมวัง เม่ย หฒุ หฌาว เญย หว่า, เหฑีย เยีย เญย เฮญี้ยว โหยว เม่ย, เหฑีย เยีย ปุน เม่ย เป๋น ป่าย หว่าย เญย ต๋อง, ไม้ ม่าย เมี่ยน เยียม เญย เต่ย-ปูง.”

9เน่น เจี๋ย เญย เฒี้ยว ฮนั้ง น้าย ก๊อง, “นิ่น บัว อ๋อย กว๊าด เหฑ่ง เหฒ่ง เหฌี่ย เญย อิสะลาเอน เมี่ยน, ฮนั้ง แก๊ะ ลิ์ว แอ๋ง แก๊ะ เหฒ่ง เหฌี่ย เญย อะหงุ่น เปี๊ยว. ฮนั้ง แก๊ะ อะหงุ่น เปี๊ยว เญย เมี่ยน เญย ปั์ว แอ๋ง ฮลุด กัน เจี๊ยน อะหงุ่น ฆว่า มี่ง.”

10เยีย อ๋อย หฒุ เหธา หาย เต้า ก๊อง หย่า ขวิน นิ่น บัว หธีง ต้าย อ๋อย หมวัง? นิ่น บัว เญย มน่อม เหฒียด หมี่ อ๊ะ, นิ่น บัว ฯฒฯ ไม้ ไฮ่ หมวัง. หมั่ง ม่าะ! เฒี้ยว เญย หว่า, เป๋น นิ่น บัว ฮว้วด เญย กะน้าย, นิ่น บัว หย่า ไม้ อะเฮน้ย หมวัง.

11เหว่ย น้าย เยีย เฉีย เจี์ย ฮนั้ง เฒี้ยว นอ, ฒู้ง ไฮ์ เญี์ยน ไม้ เจี๊ยน. “อ๋อย หฒุ โต๋ เหฌี่ย เยียม จาย-ห่อง เญย ฝุเจว๊ย เหธา กั๊บ ฒุ้น เญย เมี่ยน หลุน เมี่ยน. เลี่ยม เอ๊า เลี่ยม โหฆ หย่า อ๋อย หฒุ ต้อ มี่ง, เหธา เจี๊ยน หฮญัง-เจ๊ย ฮลัง เหธา เมี่ยน โก๋ เมี่ยน.”

12นิ่น บัว เญย เปย๊า, ลี่ง เต่ย เหธา เอ๊า ฒู้ง หฒุ เฒาะ ปุน กั้น เต้า, เหว่ย หฒุ เยีย อ๋อย ซูง เยีย เญย ปั์ว โหฒว ปุน เยียม เต่ย-ปูง เญย แปะ ฝีง.” น้าย เซ เฒี้ยว ก๊อง เญย หว่า.

13“เยียม โหฒว ไฝ เจี๋ย เญย เถา โหฒว โฮล เจี๋ย เญย เมี่ยน, เต้าๆ เม้า อ๋อย ตุ๊ ไม้ แป้ง ฟิม เญย เหล่ย ฒิ่น. เยียม โต่ว หว่า เมี่ยน เถา ไซ เมี่ยน, เต้าๆ ขูง โหฒว จ๊า สี่ ฮนั้ง.

14นิ่น บัว หฒ่อ เยีย เญย แปะ ฝีง มุน เญย ต๋อง ฮนั้ง ไม้ เฒ์ย มุน ธั้ม นอ. นิ่น บัว ก๊อง, ‘แป้ง ออน อ๊ะ, แป้ง ออน อ๊ะ’ ไม้ กุ๊น ไม้ ม่าย แป้ง ออน.

15นิ่น บัว โหฒว กั้ม เฑี้ย เญย สี่, นิ่น บัว ฮิ้ว ตุ๊ ไญ้ ไฟ? ไม้ เฒ์ย. นิ่น บัว เหยียด เต๋ย หย่า ไม้ ไญ้. นิ่น บัว ไม้ ฮิ้ว ตุ๊ ฮนั้ง หาย นอ หฒุ ป่าย เฮมียน. เหว่ย น้าย นิ่น บัว อ๋อย หฒุ คีง เหฌี่ย เยียม คีง เหฌี่ย เญย เมี่ยน บุด๋ง. เยีย ตี่ง นิ่น บัว เญย ฒุ์ย เญย เฒี่ยง โห่ นิ่น บัว ฯฒฯ หฒุ เหมียด อ๊ะ.” น้าย เซ เฒี้ยว ก๊อง เญย หว่า.

16เฒี้ยว ฮนั้ง น้าย นอ ก๊อง, “เม่ย บัว อ๋อย หฒุ โซ้ว เจี๊ยน เจ๊า หลงๆ เญย สัม หมั่ง. หน่าย เถา วั้ว เต๋ย โล์-ฮนอย เญย เจ๊า. หน่าย ก๋า วั้ว ติ้ว หลง เญย เจ๊า เยียม หาย หย่า กัน วั้ว ติ้ว เจ๊า ยั่ง. เม่ย บัว เญย เฮญี้ยว ฯฒฯ ล์อ ตุ๊ แป้ง ออน. มป่า นิ่น บัว ก๊อง, ‘เยีย บัว ไม้ ยั่ง วั้ว ติ้ว เจ๊า.’

17เยีย พ้าย เต๋ย เซี้ยว แกง เมี่ยน โก๋ว เม่ย บัว หย่า ก๊อง, ‘อ๋อย หฒุ หมวัง จอง เญย เฉีย.’ มป่า นิ่น บัว ก๊อง, ‘เยีย บัว ไม้ หมวัง.’

18หม่าน กั๊วะ เมี่ยน อ้า! เหว่ย น้าย อ๋อย หฒุ หมวัง. เม่ย บัว กั๊บ ฒุ้น เญย เมี่ยน อ้า! อ๋อย หฒุ ฮิ้ว ตุ๊ นิ่น บัว อ๋อย ปวั้ง เญย สี่.

19เดา อ่า, หมวัง ม่าะ! เยีย อ๋อย ปุน น้าย เต๋ย แปะ ฝีง หฒุ เธี้ยว เญย เหฒะ หน่าน, หลาย นิ่น บัว เอย นิ่น บัว ต๊า กู๊ ไกว๋ เญย หฒะเอ๋ย, เหว่ย หฒุ นิ่น บัว ไม้ หมวัง เยีย เญย หว่า. เยีย เญย เล์ย-หลัด แอ๊ะ, นิ่น บัว หย่า เฆ่ม.

20เยียม เชบา ต้าย เญย ฮูง ไฟ เยียม โก เญย เต่ย-ปูง ต้อ ต้าย เญย หลาบ หลิ่ว ฝูง ปุน เยีย เหว่ย หาย หญู่ง เอ๋ย เล์ย? เม่ย บัว ปั๊ว เหฒี่ย เญย กะน้าย เยีย ไม้ ไฮ่ ฒิบ, เม่ย บัว เหฒี่ย เญย กะน้าย ไม้ หอบ เยีย เญย เฮญี้ยว.”

21เหว่ย น้าย เฒี้ยว ฮนั้ง น้าย ก๊อง, “เยีย อ๋อย เฒาะ กะน้าย อัน เจี๊ยน น้าย เต๋ย แปะ ฝีง เญย หฑะเฮมียน ปุน นิ่น บัว ดิ๊ หฒุ ดอบ. เลี่ยม เตีย เลี่ยม ตอน ฟี่ ฮนั้ง เญย เหธา เจี๊ยน จวั่ง ล์าง เมี่ยน เหธา โล์-แกง ต่อย อ๋อย หฒุ เหมียด.”

22เฒี้ยว ฮนั้ง น้าย ก๊อง, “หมั่ง ม่าะ! ม่าย เหยียด ฝีง เยียม ป๊ะ ปูง กั๊วะ ต้าย, เป๋น เหยียด ต้ม กั๊วะ เมี่ยน เยียม ลู่ง เดี๊ย โก เจี๋ย เญย ต๋อง หฒุ โธะ เจี์ย ต้าย.

23นิ่น บัว นั้น จวัง-หฒิน เหธา ธัง, นิ่น บัว โหย่ว เธี้ยว โหย่ว โตะ, ไม้ ค้อ-เลี่ยน เมี่ยน. นิ่น บัว เญย เฉีย บุย ฮนั้ง ค้อย เจี์ย หล่าง บุย โฒ์ๆ เญย. นิ่น บัว เก้ ม์า, ไบ้ เจี๊ยน ต้าย เบ๊าะ จ๋า, เหว่ย เบ๊าะ เม่ย, สิโอน ฒี่ง.”

24เยีย บัว หมวัง ไฮ์ นิ่น บัว เญย เฝียน ฮนั้ง, เยีย บัว เญย ปั์ว เมา เหฑ่ง หมี่ อ๊ะ. เยีย บัว เฮญี้ยว หฒะเก้ง! มุน ไห่, ฮนั้ง มเซียะ ตอน มุน กู้งว์า โค้ว นอ.

25ไม้ ตู๋ง ธ้วด มี่ง วั้ว เด่ย ไฟ กัน เจ๊า ยั่ง, เหว่ย หฒุ วิน-วั้ง ม่าย หฑุ ด๊าว, หย่า ม่าย กั้ม เหฑีย ไห่ เญย สี่ เว่ย ก๋อม.

26เยีย เญย แปะ ฝีง อ้า! อ๋อย หฒุ ไซ เจี๊ยน ล่าม่า เดีย-โธว, หย่า หฌัง เจี๊ยน ซ้าย กะญั์ว. อ๋อย หฒุ เฮญี้ยว มุน เญย เญี้ยม ฮนั้ง เญี้ยม กั้น เญย โดะ ตอน นอ, เหว่ย หฒุ โหฒว เหมียด วั้ว เต้า อ๋อย เลี่ยม เฒ่ย เถา บัว.

27“เยีย ปุน เม่ย เยียม เยีย เญย แปะ ฝีง บุด๋ง เสย หย่า เค้า นิ่น บัว เหว่ย ปุน เม่ย ฮิ้ว หย่า เสย ตุ๊ ธ้วด นิ่น บัว เญย เจ๊า-โหล่ว.

28นิ่น บัว เหยียด ฒู้ง เฮญี้ยว แหง่ง เญย ฟ้าน หลุ่น, เจี๋ย น้าย เจี๋ย วั้ว ก๊อง หว่า-ฮู้. นิ่น บัว ฮนั้ง ต้ง ซิ, ฮนั้ง เฮลียะ, นิ่น บัว เหยียด ฒู้ง โหฒว หว่าย สี่.

29โล่ว ธุย ตุ๊ เสย ไห่, จู์ง หฒุ โต์ว ปั๊ว ชุย. สิน เจี๊ยน มี่ง หย่า ไม้ ลั่ม หล่ง เหว่ย หฒุ ไม้ ตุ๊ เฒาะ เอ๊าะ เมี่ยน ธ้วด.

30นิ่น บัว หฒุ เห่ว เป๋น ญ่าน ไฆ้, เหว่ย หฒุ เฒี้ยว เฆ่ม นิ่น บัว.

← Chapter 5 Jump to: Chapter 7 →