Jeremiah 34

Mien Bible (Thai Script) © Thailand Bible Society, 2007

← Chapter 33 Jump to: Chapter 35 →

1บาบีโลน ฮู่ง, เนบูคัดเน้ดซา, เหธา นิ่น เญย เหยียด ฒู้ง จุน-แปง, เหธา เยียม ลู่ง เดี๊ย นิ่น กุ๊น เญย นอมๆ กั๊วะ เหธา ฝีงๆ เมี่ยน เบ๊าะ เยลูซาเลม เหธา เว่ย ก๋อม เญย นอมๆ ฒี่ง วั้ว หฒั่น, เยเลมี ตุ๊ ฒิบ เฒี้ยว เญย หว่า ก๊อง,

2“ เฒี้ยว, อิสะลาเอน เญย ทิน-ฮู่ง, ฮนั้ง น้าย ก๊อง, ‘เม่ย อ๋อย หฒุ มี่ง เหธา ยูดา ฮู่ง, เสเดคียา, ก๊อง หย่า ก๊อง บั๋ว นิ่น, “ เฒี้ยว ฮนั้ง น้าย ก๊อง, หมั่ง ม่าะ! เยีย เฒาะ น้าย นอม ฒี่ง จิว เยียม บาบีโลน ฮู่ง เญย ปั์ว-เดี๊ย. นิ่น หย่า อ๋อย หล่ง โต์ว ปั๊ว.

3เม่ย เปย๋า ไม้ ดุ๊ด นิ่น เญย ปั์ว, ฒู้ง หฒุ เฒาะ จิว ปุน เยียม นิ่น เญย ปั์ว-เดี๊ย. เม่ย ตุ๊ ปวัด บาบีโลน ฮู่ง มฒีง ต๋อย มฒีง, หย่า ตุ๊ เหธา นิ่น เฮมียน ต๋อย เฮมียน ก๊อง หว่า. เม่ย หย่า อ๋อย หฒุ มี่ง บาบีโลน.”

4“‘มป่า ยูดา ฮู่ง, เสเดคียา อ้า! หมวัง เฒี้ยว เญย หว่า. เฒี้ยว ฮนั้ง น้าย ก๊อง เถา เม่ย, “เม่ย ไม้ หฒุ หฑุ ด๊าว ไต๋.

5เม่ย ตุ๊ แป้ง ออน เญย เกวย เสย. เมี่ยน ฮนั้ง หาย นอ เหว่ย ท่าย เม่ย เญย อง-ถาย ปั๊ว ดาง เญย กะน้าย, เซ เหว่ย เยียม ด่าง เม่ย วั้ว เต๋ย ฮู่ง เตี๋ย, นิ่น บัว อ๋อย ฮนั้ง วั้ว นอ เหว่ย เม่ย ปั๊ว ดาง เญย กะน้าย หย่า เหว่ย เม่ย เฑ่า เญี้ยม ก๊อง, ‘เฒี้ยว อ้า! โค้ว อ๊ะ.’ เหว่ย หฒุ เยีย ก๊อง ลิ์ว น้าย เต๋ย หว่า อ๊ะ.”’” เฒี้ยว ฮนั้ง น้าย ก๊อง.

6โต่ว หว่า เมี่ยน, เยเลมี, ฯฒฯ เยียม เยลูซาเลม เฒาะ น้าย เต๋ย เหยียด ฒู้ง หว่า ก๊อง บั๋ว ยูดา ฮู่ง, เสเดคียา.

7วั้ว หฒั่น บาบีโลน ฮู่ง เญย จุน-แปง เบ๊าะ เจี๊ยน เยลูซาเลม หย่า เบ๊าะ ยูดา เหฒ่ง เหฌี่ย เญย เหยียด ฒู้ง ฒี่ง, เซ ลาคี้ด ฒี่ง เหธา อาเซคา ฒี่ง, เหว่ย หฒุ เยียม ยูดา ขูง เหฒ่ง น้าย เต๋ย อี นอม เว่ย ว้วน เญย ฒี่ง ฮนั้ง.

8เสเดคียา ฮู่ง เหธา เยลูซาเลม ฒี่ง เญย หฒวัง แปะ ฝีง เหลียบ แหง่ง หว่า ก๊อง บั๋ว นิ่น บัว ฒุ่น ปู๋ง ฆอย เญย เล์ย ก๊อง,

9เก๊าะ-เมี่ยน อ๋อย หฒุ ปู๋ง ฆอย เก๊าะ-เมี่ยน เญย ฮิบลู โน่ว ไม้ กุ๊น มจั่ง มเซียะ, เหว่ย ปุน นิ่น บัว ไม้ หล่ง หาย เต้า ยิวไท เมี่ยน ก๋อ-โย์ว โหฒว โน่ว.

10นิ่น บัว ฯฒฯ หมวัง, เลี่ยม เหยียด ฒู้ง เจียน เหธา หฒวัง แปะ ฝีง, ตะฟ่าน จวั่ง เหลียบ แหง่ง หว่า แล์ง กั้น อ๋อย ปู๋ง กั้น เญย โน่ว, เลี่ยม โน่ว เก๊า โน่ว เป์ย, เหว่ย ปุน นิ่น บัว ไม้ หฒุ แอ๋ง โหฒว โน่ว อ๊ะ. นิ่น บัว ฯฒฯ เอย เจี๊ยน โหฒว, ปู๋ง นิ่น บัว เญย โน่ว ธ้วด.

11มป่า ฆะฮ้า นิ่น บัว ฮนั้ม-หฑวน แอ๋ง เฒาะ ต้ง นิ่น บัว ปู๋ง ฆอย วั้ว เต๋ย โน่ว เก๊า โน่ว เป์ย หฑวน, ปุน น้าย เต๋ย เมี่ยน แอ๋ง หฒุ นิ่น บัว อ๊าบ โหฒว โน่ว.”

12เยเลมี แอ๋ง ตุ๊ ฒิบ เฒี้ยว เญย หว่า ก๊อง,

13“ เฒี้ยว, อิสะลาเอน เมี่ยน เญย ทิน-ฮู่ง, ฮนั้ง น้าย ก๊อง, ‘เยีย ต้อ เม่ย บัว เญย อง-ถาย ธ้วด อียิบ เต่ย-ปูง หฒุ โหฒว โน่ว เญย ต๋อง วั้ว หฒั่น, เยีย เหธา นิ่น บัว เหลียบ แหง่ง หว่า ก๊อง,

14“เถา ตะเธี้ยด หฮญัง เก๊าะ-เมี่ยน อ๋อย หฒุ ปู๋ง หฒุ หม่าย ปุน เม่ย หล่ง โหฒว โน่ว เญย จวั่ง ฮิบลู ฝีง เญย เมี่ยน, ต้ง ฟู-สู เม่ย จุ๊ หฮญัง เญย เมี่ยน.” มป่า เม่ย บัว เญย อง-ถาย ไม้ หมวัง เยีย หย่า ไม้ แปง มน่อม หมวัง เยีย.

15เจี๋ย ต้าย ไม้ เล่า เม่ย บัว ก๊อย เฮญี้ยว โหฒว หฒิว เยีย เญย มฒีง หมั่ง ปวัด หอบ เญย, เหว่ย หฒุ เม่ย บัว ฒุ่น ก๊อง ปู๋ง ฆอย เญย เล์ย, เก๊าะ-เมี่ยน บั๋ว เก๊าะ-เมี่ยน เญย จวั่ง ล์าง เมี่ยน. เม่ย บัว เยียม ต้ง กัน เยีย เญย บั๋ว เห่ว วั้ว นอม เปย๊า, ตอง เจี๊ยน เยีย เหลียบ เจี์ย แหง่ง หว่า.

16มป่า เม่ย บัว แอ๋ง เบี๊ยน เฮญี้ยว ปุน เยีย เญย บั๋ว ม่าย หวุย เหว่ย หฒุ เม่ย บัว เฒาะ เม่ย บัว เญย โน่ว เก๊า โน่ว เป์ย หฑวน ต้าย, ต้ง เม่ย บัว หฒิว นิ่น บัว เญย เฮญี้ยว อ๋อย เญย ปู๋ง ฆอย วั้ว เต๋ย, แอ๋ง หฒุ เม่ย บัว อ๊าบ โหฒว โน่ว.’

17“เหว่ย น้าย, เฒี้ยว ฮนั้ง น้าย ก๊อง, ‘เม่ย บัว ไม้ หมวัง เยีย เหว่ย หฒุ เม่ย บัว เก๊าะ-เมี่ยน ไม้ ฒุ่น ปู๋ง ฆอย เญย เล์ย ปุน กั้น เญย ก๋อ-โย์ว เหธา จวั่ง ล์าง เมี่ยน. หมั่ง ม่าะ! เยีย ฒุ่น บั๋ว เม่ย บัว, “เม่ย บัว ตุ๊ ปู๋ง ฆอย” เหว่ย ปุน เม่ย บัว หฒุ หฑุ ด๊าว, หฒุ หง่อ หฮนาง, หฒุ ววน-แป่ง. เยีย แอ๋ง ปุน เม่ย บัว เหว่ย ลู่ง เดี๊ย หม่าน กั๊วะ เป๋น แฮะ เมี่ยน กั้ม เหฑีย เญย กะน้าย.

18ยูดา เญย เจียน, เยลูซาเลม เญย เจียน, เหธา อิม โต๊ เญย เมี่ยน, ไซ เมี่ยน, เหธา เต่ย-ปูง เญย หฒวัง แปะ ฝีง, ต้ง ยั่ง พิ โหฒว อี แหมง วั้ว เต้า ง่ง ตอน บุด๋ง เจี๋ย เหธา เยีย เหลียบ เจี์ย แหง่ง หว่า. มป่า นิ่น บัว ต่อง เยีย เญย แหง่ง หว่า, ไม้ เอย วั้ว เต๋ย แหง่ง หว่า โหฒว. เยีย ฯฒฯ อ๋อย โหฒว ปุน นิ่น บัว ฮนั้ง นิ่น บัว โหฒว ปุน วั้ว เต้า ง่ง ตอน นอ.

20เยีย อ๋อย เฒาะ นิ่น บัว จิว ปุน เยียม นิ่น บัว เญย วิน-วั้ง เญย ปั์ว-เดี๊ย หย่า จิว ปุน เยียม ล์อ นิ่น บัว เญย แหม่ง วั้ว เต๋ย เมี่ยน เญย ปั์ว-เดี๊ย. นิ่น บัว เญย เซย ฯฒฯ เป๋น ด๊าม-ลู่ง เญย เหนาะ เหธา เดา-เป้ย เญย เฮยี่ย ฒ่อย เญย หญั่น ฮบ.

21“‘ยูดา เญย ฮู่ง, เสเดคียา, เหธา นิ่น เญย เจียน เยีย อ๋อย จิว ปุน เยียม นิ่น บัว เญย วิน-วั้ง เญย ปั์ว-เดี๊ย เหธา ล์อ นิ่น บัว เญย แหม่ง วั้ว เต๋ย เญย ปั์ว-เดี๊ย, หย่า จิว ปุน ถุย เล่ย ฆอย นิ่น บัว มี่ง วั้ว เต๋ย บาบีโลน ฮู่ง เญย จุน-แปง เญย ปั์ว-เดี๊ย.’

22เฒี้ยว ก๊อง, ‘เยีย อ๋อย หัด นิ่น บัว, ต้อ นิ่น บัว หฑวน ต้าย เถา น้าย นอม ฒี่ง. นิ่น บัว อ๋อย เบ๊าะ น้าย นอม ฒี่ง หย่า ธ้าง ตุ๊ ฯฒฯ หล่ง โต์ว ปั๊ว ชุย. เยีย อ๋อย ปุน ยูดา เญย ฒี่ง เป๋น ป่าย ฮวาง เญย ต๋อง, ไม้ ม่าย เมี่ยน เยียม.”

← Chapter 33 Jump to: Chapter 35 →