Jeremiah 23

Mien Bible (Thai Script) © Thailand Bible Society, 2007

1เฒี้ยว ก๊อง, “เยียม เยีย เญย เมี้ย-เธี้ยง เหมียด หย่า ปุน เยีย เญย ปะกี ยู่ง หฑาน เญย โก๋ว ปะกี ยู่ง เมี่ยน อ๋อย หฒุ โค้ว อ๊ะ.

2เหว่ย น้าย เฒี้ยว, อิสะลาเอน เญย ทิน-ฮู่ง, ฮนั้ง น้าย ก๊อง โก๋ว นิ่น เญย แปะ ฝีง เญย เปย๊ย เฒ้ย, “เม่ย บัว ปุน เยีย เญย ปะกี ยู่ง กวั้น หฑาน หย่า หฒุ่น นิ่น บัว มี่ง. เม่ย บัว หย่า ไม้ โก๋ว นิ่น บัว. หลาย เม่ย บัว โหฒว เญย เอ๊าะ สี่ เยีย อ๋อย ตี่ง เม่ย บัว เญย ฒุ์ย.” เฒี้ยว ฮนั้ง น้าย ก๊อง.

3“เยีย อ๋อย เฒาะ ต้ง เยีย หฒุ่น มี่ง เยียม นอมๆ กั๊วะ เหฒ่ง เหฌี่ย เญย ปะกี ยู่ง กวั้น เซียว ฒุ้น, ต้อ นิ่น บัว หฑวน กั้น เญย ล่าน. นิ่น บัว ฯฒฯ หฮยาง เจี๊ยน ฝาว, ม่าย ตอน ธั้ม.

4เยีย อ๋อย พ้าย โก๋ว ปะกี ยู่ง เญย เมี่ยน กุ๊น นิ่น บัว, โก๋ว นิ่น บัว. เยียม น้าย มี่ง นิ่น บัว ไม้ กั้ม เหฑีย, ไม้ หฒุ ฮวาง, หย่า ไม้ ธา เหยียด เต้า.” น้าย เซ เฒี้ยว ก๊อง เญย หว่า.

5เฒี้ยว ก๊อง, “ฮนอย-เหญียะ อ๋อย เถา, เยีย อ๋อย เหว่ย ดาวิด เหลียบ แป้ง ฟิม เญย หธุน, นิ่น อ๋อย โหฒว ฮู่ง กุ๊น, หย่า หล่ง ธง-เม่ง โหฒว. นิ่น หย่า อ๋อย เยียม เต่ย-ปูง โหฒว แป้ง ฟิม, โหฒว ตุ๊ หอบ.

6เยียม นิ่น เญย ฮนอย-เหญียะ ยูดา ฒู้ง ตุ๊ เหฌียว. อิสะลาเอน เมี่ยน หย่า ตุ๊ ถาย-แป้ง เญย เยียม. นิ่น เญย บั๋ว ตุ๊ เห่ว, ‘ เฒี้ยว เซ เยีย บัว เญย แป้ง ฟิม.’”

7เฒี้ยว ก๊อง, “ฮนั้ง หน่าย, ฮนอย-เหญียะ อ๋อย เถา, เมี่ยน ไม้ ตุ๊ แอ๋ง ก๊อง, ‘เยีย เฒี้ยง เจี๊ยน เฒี่ยง เจี๊ยน เญย เฒี้ยว, ต้ง ต้อ อิสะลาเอน เมี่ยน เยียม อียิบ เต่ย-ปูง ธ้วด ต้าย,’

8มป่า นิ่น บัว อ๋อย ก๊อง, ‘เยีย อ๋อย เฒี้ยง เจี๊ยน เฒี่ยง เจี๊ยน เญย เฒี้ยว, ต้ง ต้อ อิสะลาเอน โต้ว ฒง เญย เฒ้ย-ฟุน เยียม ป๊ะ ปูง ฝาว ต้าย หย่า เยียม นิ่น หฒุ่น นิ่น บัว มี่ง เญย นอมๆ กั๊วะ ต้อ ธ้วด ต้าย.’ วั้ว หฒั่น นิ่น บัว ฯฒฯ ตุ๊ เยียม นิ่น บัว กั้น เญย เต่ย-ปูง.

9ก๊อง เถา วั้ว เต๋ย โต่ว หว่า เมี่ยน, เยีย ไฮ์ เฮญี้ยว หว่าย เหฑ่ง. เยีย เฒี่ยง ซิน หฒิน. เหว่ย เฒี้ยว หย่า เหว่ย นิ่น ธีง-เหฑ่ง เญย หว่า เยีย ฮนั้ง ติ๊ว ฆวิน เมี่ยน, ฮนั้ง หฒุ ติ๊ว ฮี่ง เญย เมี่ยน.

10ม่าย เหฮยียน เญย เมี่ยน ปวั๊ง เต่ย-ปูง. หลาย หฒุ เหฒียว, เต่ย-ปูง ฯฒฯ โค้ว อ๊ะ. เยียม เต่ย-ปูง-ฮวาง เญย เมี้ย-เธี้ยง, เมี้ย ฆาย เหฑ่ง. นิ่น บัว โหฒว เญย เจ๊า เซ เอ๊าะ เญย. นิ่น บัว เญย ชะ หย่า ไม้ หอบ.

11“เลี่ยม โต่ว หว่า เมี่ยน เหธา ไซ เมี่ยน ไม้ กัน หลง ทิน-ฮู่ง. ไม้ กุ๊น นิ่น บัว เยียม เยีย เญย เปย๊า, เยีย ปวัด นิ่น บัว โหฒว เญย เอ๊าะ สี่.” น้าย เซ เฒี้ยว ก๊อง เญย หว่า.

12“ฮนั้ง หน่าย เหว่ย นิ่น บัว, นิ่น บัว เญย เจ๊า โหย่ว บย่าง โหย่ว หฮมวัง. นิ่น บัว ฒู้ง หฒุ หฒุ่น เปียะ น้าย ติ้ว เจ๊า แอ๋ง ดิ๊ หฒุ ดอบ. นิ่น บัว หฒุ ตี่ง ฒุ์ย เญย หฮญัง, เยีย อ๋อย ปุน นิ่น บัว หฒุ เธี้ยว เญย เหฒะ หน่าน.” น้าย เซ เฒี้ยว ก๊อง เญย หว่า.

13เยีย เยียม สะมาเลีย เญย โต่ว หว่า เมี่ยน บุด๋ง, เยีย ปวัด หญู่ง กั้ม เฑี้ย ไห่ เญย สี่. นิ่น บัว เต๊ง บาอัน เฒี่ยน โต่ว หว่า, หย่า ต้อ เยีย เญย แปะ ฝีง, อิสะลาเอน เมี่ยน, มี่ง ต่อง เจ๊า.

14มป่า เยียม เยลูซาเลม เญย โต่ว หว่า เมี่ยน บุด๋ง เยีย ปวัด หญู่ง กั้ม เหฑีย ไห่ เญย สี่. นิ่น บัว เหฮยียน หย่า กัน ก๊อง-แปะ เญย เจ๊า. นิ่น บัว เถง เอ๊าะ เมี่ยน เญย ปั์ว เฮ้น, ฯฒฯ ไม้ ม่าย หาย เต้า กวั่ง ฆอย นิ่น โหฒว เญย หว่าย สี่. หฒิว เยีย หมั่ง, นิ่น บัว เหยียด ฒู้ง ฮนั้ง โสโดม, วั้ว นอม ฒี่ง เญย เมี่ยน หย่า ฮนั้ง โกโมลา.”

15เหว่ย น้าย เน่น เจี๋ย เญย เฒี้ยว ฮนั้ง น้าย ก๊อง เถา วั้ว เต๋ย โต่ว หว่า เมี่ยน, “เยีย อ๋อย เฒาะ ยั่ง เม์ว ปุน นิ่น บัว หญั่น, เฒาะ แหล่ง เมี่ยน เญย ววม ปุน นิ่น บัว ฮบ, เหว่ย หฒุ ไม้ กัน หลง ทิน-ฮู่ง เญย สี่ เยียม เยลูซาเลม เญย โต่ว หว่า เมี่ยน ธ้วด ก๋อม เต่ย-ปูง.”

16เน่น เจี๋ย เญย เฒี้ยว ฮนั้ง น้าย ก๊อง, “ไม้ ตู๋ง หมวัง วั้ว เต๋ย โต่ว หว่า เมี่ยน โต่ว บั๋ว เม่ย บัว เญย หว่า. นิ่น บัว ปุน เม่ย บัว ม่าย ลั่ม ฮนั้ม เญย เจ๊า หย่า ขูง-ม่อง เญย. นิ่น บัว ก๊อง หิ่น ย่าง เญย สี่ เยียม นิ่น บัว กั้น เญย เฮญี้ยว ธ้วด ต้าย, ไม้ เฒ์ย เยียม เฒี้ยว เญย ฑุ่ย ธ้วด.

17นิ่น บัว หฒั่นๆ ก๊อง บั๋ว หมั่ง เผีย เยีย เญย หว่า วั้ว เต๋ย เมี่ยน ‘เม่ย บัว อ๋อย ตุ๊ หลง.’ นิ่น บัว แอ๋ง บั๋ว เหยียด ฒู้ง แหง่ง เจี๊ยน เอย กั้น เญย เฮญี้ยว โหฒว เญย เมี่ยน, ‘เม่ย บัว ไม้ หฒุ หาย หญู่ง เธี้ยว เญย เหฒะ หน่าน.’

18นิ่น บัว หาย เต้า โซ้ว เจี๊ยน เยียม เฒี้ยว เญย หวุ่ย บุด๋ง ตุ๊ ปวัด, ตุ๊ ไฮ์ นิ่น เญย หว่า? ไฟ ม่าย หาย เต้า หล่ง เฮญี้ยว หมวัง หย่า เอย เจี๊ยน นิ่น เญย หว่า โหฒว?

19หมั่ง ม่าะ! เฒี้ยว เญย กะเฉีย แป๊ด ธ้วด ฮนั้ง ต้ม หฑยาว, ฮนั้ง หฑยาว-หฒุ่น, ฒู้ง เนี้ยว เจี๊ยน เยียม เอ๊าะ เมี่ยน เญย มฆ้อง กู้ หงว่าย.

20เฒี้ยว เญย กะเฉีย ไม้ ฟิว เถา หฒิว นิ่น เญย เฮญี้ยว ตี่ง โหฒว เญย โหฒว เหฒียง เหฑ่ง. เถา ฆะฮ้า ลาย เญย ฮนอย-เหญียะ เม่ย บัว ฯฒฯ เม่ง แปะ โถว อ๊ะ.

21เยีย ไม้ พ้าย วั้ว เต๋ย โต่ว หว่า เมี่ยน, มป่า นิ่น บัว กั้น ถิว มี่ง. เยีย ไม้ ตุ๊ เหธา นิ่น บัว ก๊อง, มป่า นิ่น บัว หธ่อ โต่ว หว่า.

22สี ก๊อง นิ่น บัว ตุ๊ โซ้ว เจี๊ยน เยีย เญย หวุ่ย, นิ่น บัว ฯฒฯ ฒุ่น เยีย เญย หว่า ปุน แปะ ฝีง หมวัง. นิ่น บัว ฒู้ง ปุน แปะ ฝีง ฮวิน หฑวน, กวั่ง ฆอย นิ่น บัว เอ๊าะ เญย เจ๊า, เหธา นิ่น บัว โหฒว เญย หว่าย สี่.”

23เฒี้ยว ก๊อง, “เยีย โหฒว นิด ฟัด เญย ทิน-ฮู่ง หย่า ไม้ เฒ์ย เยียม โก เญย ทิน-ฮู่ง ไฟ?”

24เฒี้ยว ก๊อง, “ม่าย หาย เต้า ไฮ่ ปี๋ง เจี๊ยน เบว์ย เญย ต๋อง เหว่ย ปุน เยีย หมั่ง ไม้ ปวัด นิ่น ไฟ?” เฒี้ยว ก๊อง, “เยีย ไม้ เฒ์ย เยียม ปวั๊ง ลู่ง ปวั๊ง เดา ไฟ?

25“เยีย ไฮ์ วั้ว เต๋ย โต่ว หว่า เมี่ยน เต๊ง เยีย เญย บั๋ว โต่ว จ๊า หว่า. นิ่น บัว ก๊อง, ‘เยีย เบ๋ย ปวัด. เยีย เบ๋ย ปวัด หมี่ อ๊ะ.’

26โต่ว ก๊อง-แปะ เญย หว่า วั้ว เต๋ย โต่ว หว่า เมี่ยน, เซ หฒิว นิ่น บัว กั้น เญย เฮญี้ยว หฒุ ดั๊ว วั้ว เต๋ย โต่ว หว่า เมี่ยน, อ๋อย ม่าย ก๊อง-แปะ เญย หว่า เยียม นิ่น บัว เญย เฮญี้ยว ด่ง หาย เล่า?

27นิ่น บัว ฮนั้ม ต้าย ไฮ่ หล่ง นิ่น บัว เก๊าะ-เมี่ยน, ล่าน ก๊อง บั๋ว ล่าน เญย เบ๋ย, ดั๊ว เยีย เญย แปะ ฝีง หละคุ เยีย เญย บั๋ว, ฮนั้ง นิ่น บัว เญย อง-ถาย หละคุ เยีย เญย บั๋ว มี่ง กัน บาอัน เฒี่ยน.

28ปุน เบ๋ยๆ เญย โต่ว หว่า เมี่ยน ก๊อง นิ่น บัว เญย เบ๋ย, มป่า หาย เต้า ตุ๊ เยีย เญย หว่า, ปุน นิ่น เหฒียบ ฒัวะ เญย ก๊อง เยีย เญย หว่า. เบย้า ฆ้าว ม่าย หาย หญู่ง ไฮ่ เป๊ย ตุ๊ เถา เบย้า วิด?” เฒี้ยว ฮนั้ง น้าย ก๊อง.

29เฒี้ยว ก๊อง, “เยีย เญย หว่า เซ ฮนั้ง โต์ว หย่า ฮนั้ง เบ๊าะ หละเปย๊ย ฮู้ เญย เฮลียะ-เฒว่ย ไม้ เฒ์ย?”

30เฒี้ยว ก๊อง, “เหว่ย น้าย เยีย อ๋อย เหธา น้าย เต๋ย โต่ว หว่า เมี่ยน ต๋อย-เตก, ต้ง นิ่น บัว ล่าน เฒาะ ล่าน เญย หว่า ต๋อง เยีย เญย หว่า โต่ว.”

31เฒี้ยว ก๊อง, “เยีย อ๋อย เหธา น้าย เต๋ย โต่ว หว่า เมี่ยน ต๋อย-เตก, ต้ง หล่ง นิ่น บัว เญย ฑุ่ย ก๊อง, ‘น้าย เซ เฒี้ยว ก๊อง.’”

32เฒี้ยว ก๊อง, “เยีย เหธา ก๊อง เบ๋ย จ๊า เญย โต่ว หว่า เมี่ยน ต๋อย-เตก. นิ่น บัว ก๊อง น้าย เต๋ย เบ๋ย หล่ง นิ่น บัว ก๊อง-แปะ เญย หว่า เหธา ปู๋ง เญย หว่า-เหมา ต้อ เยีย เญย แปะ ฝีง มี่ง ต่อง เจ๊า. เยีย หย่า ไม้ เห่ว, ไม้ พ้าย นิ่น บัว โหฒว. ฮนั้ง หน่าย นิ่น บัว เถง ไม้ ตุ๊ เหยียด เต๋ย เยีย เญย แปะ ฝีง.” น้าย เซ เฒี้ยว ก๊อง เญย หว่า.

33“หาย หฒั่น ม่าย เต้า น้าย เต๋ย แปะ ฝีง ไฟ โต่ว หว่า เมี่ยน ไฟ ไซ เมี่ยน หน่าย เม่ย, ‘ เฒี้ยว เญย หว่า ฮนั้ง หาย นอ ก๊อง?’ เม่ย อ๋อย หฒุ บั๋ว นิ่น บัว, ‘เม่ย บัว เซ ดาม เฮนี้ย เญย กะน้าย. เยีย หย่า อ๋อย ฒอย เม่ย บัว กวั่ง. เฒี้ยว ฮนั้ง น้าย ก๊อง.’

34โต่ว หว่า เมี่ยน ไฟ ไซ เมี่ยน ไฟ หาย เต้า แปะ ฝีง ก๊อง, ‘ เฒี้ยว ดาม เฮนี้ย เญย กะน้าย’ แอ๊ะ, เยีย อ๋อย ตี่ง วั้ว เต้า เมี่ยน เหธา นิ่น เญย เปย๊า ฒง เมี่ยน เญย ฒุ์ย.

35เม่ย บัว อ๋อย หฒุ ฮนั้ง น้าย นอ หน่าย, เก๊าะ-เมี่ยน หน่าย เก๊าะ-เมี่ยน เญย จวั่ง ล์าง เมี่ยน, เก๊าะ-เมี่ยน หน่าย เก๊าะ-เมี่ยน เญย ก๋อ-โย์ว, ‘ เฒี้ยว ฮนั้ง หาย นอ เตา?’ ไฟ ‘ เฒี้ยว ฮนั้ง หาย นอ ก๊อง?’

36มป่า ‘ เฒี้ยว ดาม เฮนี้ย เญย กะน้าย เม่ย บัว ไม้ ตู๋ง แอ๋ง ก๊อง เถา,’ เหว่ย หฒุ เก๊าะ-เมี่ยน ดาม เฮนี้ย เญย กะน้าย เซ เก๊าะ-เมี่ยน กั้น เญย หว่า. เม่ย บัว หย่า อ๋าว เฒี่ยง เจี๊ยน เญย ทิน-ฮู่ง, เน่น เจี๋ย เญย เฒี้ยว, เยีย บัว เญย ทิน-ฮู่ง, เญย หว่า.

37เม่ย บัว อ๋อย หฒุ ฮนั้ง น้าย นอ หน่าย โต่ว หว่า เมี่ยน, ‘ เฒี้ยว ฮนั้ง หาย นอ เตา เม่ย?’ ไฟ ‘ เฒี้ยว ฮนั้ง หาย นอ ก๊อง?’

38มป่า สี ก๊อง เม่ย บัว ก๊อง, ‘ เฒี้ยว ดาม เฮนี้ย เญย กะน้าย,’ เฒี้ยว ก๊อง, หลาย เม่ย บัว ก๊อง น้าย โจ๋ว หว่า, เซ ก๊อง ‘ เฒี้ยว ดาม เฮนี้ย เญย กะน้าย,’ ไม้ กุ๊น เยีย พ้าย เมี่ยน มี่ง เม่ย บัว หน่าย ก๊อง, ‘เม่ย บัว ไม้ ตู๋ง ก๊อง, “ เฒี้ยว ดาม เฮนี้ย เญย กะน้าย.”’

39เหว่ย น้าย เยีย ด่ง หาย ฒู้ง อ๋อย เฒาะ เม่ย บัว โป้ว เจี์ย ต้าย ฒอย กวั่ง, ไม้ ปุน เยียม เยีย เญย หฑะเฮมียน, เลี่ยม เม่ย บัว, เลี่ยม เยีย จิว ปุน เม่ย บัว หย่า จิว ปุน เม่ย บัว เญย อง-ถาย เญย ฒี่ง.

40เยีย อ๋อย ปุน เม่ย บัว เหยียด ลิ์ว หฒุ เฆ่ม, เหยียด ลิ์ว หฒุ ไญ้, ฒู้ง ไม้ ไฮ่ หละคุ.

← Chapter 22 Jump to: Chapter 24 →