Jeremiah 17

Mien Bible (Thai Script) © Thailand Bible Society, 2007

← Chapter 16 Jump to: Chapter 18 →

1“ยูดา เญย ฒุ์ย หล่ง เฮลียะ-ปั๊ด, เตว๊ย-เมว์ย เซ แปะ เญย, ฑัง เญย, แหง่ง เจี๋ย เญย หละเปย๊ย, เฟี้ย เจี๊ยน นิ่น บัว เญย เฮญี้ยว ฮนั้ง ดี้ง หละเปย๊ย-เป๊น นอ, หย่า เฟี้ย เจี๊ยน เหฒี่ย-ต้อง เญย จอง.

2นิ่น บัว เญย ฝุเจว๊ย จั๋ง นิ่น บัว เญย เหฒี่ย-ต้อง เหธา อาเซลา เฒี่ยน เญ์ย เญย ฝัง เยียม ติ้วๆ เดี๋ยง-เญี์ยม กะเฮลน เหธา บง-ฮลัง กู้ หงว่าย,

3เหธา เยียม หล่ม-ฮวาง บุด๋ง เญย บง. เม่ย เญย ฒิ่น ฒ่อย เหธา เหยียด ฒู้ง จ๋าย เญย กะน้าย เยีย จิว ปุน เมี่ยน ลู้, หลาย เยียม ก๋อม เม่ย เญย เต่ย-ปูง เม่ย ป์าม เญย ฒุ์ย.

4เม่ย อ๋อย หฒุ ปู๋ง กวั่ง เยีย เหธย ปุน เม่ย หฑิบ เญย ป่วน. เยีย อ๋อย ปุน เม่ย เยียม ไม้ ฮิ้ว เญย เต่ย-ปูง ฟู-สู เม่ย เญย วิน-วั้ง, เหว่ย หฒุ เยีย เฉีย เจี์ย ฮนั้ง หฌบ โต์ว นอ, โต์ว หย่า อ๋อย เหยียด ลิ์ว เหฒียะ เจี๊ยน.”

5เฒี้ยว ฮนั้ง น้าย ก๊อง, “หาย เต้า เขา ป้าม เมี่ยน, หย่า ปั่ง อ๊อ ซิน โหฒว ชะ, นิ่น เญย เฮญี้ยว หย่า เล่ย ฆอย เฒี้ยว, น้าย หญู่ง เมี่ยน หฒุ เหฒียว อ๊ะ.

6นิ่น ฯฒฯ ฮนั้ง เยียม เต่ย-ปูง-ฮ์าน เญย เดี๋ยง-ตอน-ฟ้ม ไม้ ปวัด หาย หญู่ง หลง เญย เจ๊า เถา. นิ่น อ๋อย หฒุ เยียม เต่ย-ปูง-ฮวาง บ๋อง ฆาย เญย ต๋อง, เดา ฑ่าย, ไม้ ม่าย เมี่ยน เยียม เญย เต่ย-ปูง,

7“เขา เฒี้ยว เญย เมี่ยน, เซ หฒะเก้ง เขา นิ่น วั้ว เต๋ย, ฒู้ง อ๋อย ตุ๊ ออน-เหลาะ.

8นิ่น ฮนั้ง เดี๋ยง หฒวัง เจี๊ยน โด๊ะ-เฮลน, เดี๋ยง เญย ฑู่ง ธ้วด มี่ง เถา ววม. ยัวะ เญย เฒี่ยง โห่ นิ่น ไม้ กั้ม เหฑีย, เหว่ย หฒุ นิ่น เญย น่อม หฒั่นๆ แมง เญย. ฮ์าน เญย หฮญัง นิ่น หย่า ไม้ เฑ่า, เหว่ย หฒุ หฒั่นๆ เฒี่ยง เปี๊ยว ไม้ ตี้ง.

9เมี่ยน เญย เฮญี้ยว เก้า กู๊ ไกว๋ เจี๋ย หม่าน หมวด, หฒะเก้ง! หว่าย ไห่, หาย เต้า ไฮ่ ฮิ้ว ตุ๊ น้าย หญู่ง เฮญี้ยว?

10เยีย, เฒี้ยว, ฒ่า เมี่ยน ฮนั้ม เญย เจ๊า, หย่า เสย เมี่ยน เญย เฮญี้ยว. เยีย หฒิว เก๊าะ-เมี่ยน โหฒว เญย เจ๊า เหธา นิ่น โหฒว เญย สี่ วิ่น ปุน นิ่น.

11เมี่ยน โหฒว ไม้ แป้ง ฟิม ตุ๊ ฒิ่น ฒ่อย, เซ ฮนั้ง เหนาะ เจี้ย ต้อ ไม้ เฒ์ย กั้น ปั่ว เญย เจ๋า หฒุน เญย ตอน ต้าย ฒุ้น. เถา ฒง นิน เญย เฒี่ยง โห่, ฒิ่น ฒ่อย ฯฒฯ เล่ย ฆอย นิ่น. เซ้ด เมว์ย เญย เฒี่ยง โห่ นิ่น ปุน ธีง นิ่น เป๋น หฮงง เญย เมี่ยน อ๊ะ.

12เยีย บัว เญย สีง ติ่น เยียม เญย ต๋อง เซ ฌัง-หล่าง เญย เหว่ย ต้ง ธอ วั้ว เหลียบ เยียม ฮลัง เญย ต๋อง.

13“ เฒี้ยว อ่า, เซ อิสะลาเอน เมี่ยน ม่าย ลั่ม ฮนั้ม วั้ว เต้า, ตะฟ่าน กวั่ง เม่ย เญย เมี่ยน อ๋อย หฒุ ไญ้. เล่ย ฆอย เม่ย เญย เมี่ยน เญย บั๋ว หฒุ เฟี้ย เจี๊ยน เนีย-บูง, เหว่ย หฒุ นิ่น บัว กวั่ง เฒี้ยว, ต้ง โหฒว เฒี่ยง แหม่ง เญย ววม-ฒี้ง วั้ว เต้า.

14“ เฒี้ยว อ่า, โท้ หฒ่อ เยีย, เยีย ฯฒฯ ตุ๊ หฒ่อ หลง. โท้ เหฌียว เยีย, เยีย ฯฒฯ ตุ๊ เหฌียว, เหว่ย หฒุ เม่ย เซ ต้ง เยีย เธง วั้ว เต้า.

15นิ่น บัว ก๊อง บั๋ว เยีย, ‘ เฒี้ยว เญย หว่า เยียม หาย? โท้ ปุน ธ้วด ต้าย ม่าะ!’

16เยีย ไม้ เฒ์ย โท้ เม่ย ปุน เอ๊าะ เญย เหฒะ หน่าน ธ้วด. เยีย หย่า ไม้ เฒ์ย อ๋อย ปุน หฒุ โค้ว หน่าน เญย ฮนอย เถา, เม่ย กั้น ฮิ้ว เญย. เยีย เญย ฑุ่ย ก๊อง ธ้วด เญย หว่า หย่า เยียม เม่ย เญย หฑะเฮมียน.

17โท้ ไม้ ตู๋ง โหฒว หาย หญู่ง แฮะ เยีย กั้ม เหฑีย. หฒุ เหฒะ หน่าน เญย ฮนอย เม่ย โหฒว เยีย ด้าว เขา เญย ต๋อง.

18โท้ ปุน โหฒว โตะ เยีย วั้ว เต๋ย หฒุ ป่าย เฮมียน, มป่า ไม้ ตู๋ง ปุน เยีย ป่าย เฮมียน. โท้ ปุน นิ่น บัว กั้ม เหฑีย, มป่า ไม้ ตู๋ง ปุน เยีย กั้ม เหฑีย. โท้ ปุน นิ่น บัว หฒุ เธี้ยว เญย เหฒะ หน่าน เญย ฮนอย, ปุน นิ่น หฒุ เหมียด แอ๋ง จา หฒุ เหมียด.”

19เฒี้ยว ฮนั้ง น้าย ก๊อง บั๋ว เยีย, “เม่ย มี่ง โซ้ว เจี๊ยน แปะ ฝีง เญย แก้ง ด่าง, ต้ง ยูดา ฮู่ง เปียะ ธ้วด เญย แก้ง, หย่า เยียม เยลูซาเลม เญย เต้าๆ แก้ง ด่าง,

20ก๊อง บั๋ว ยั่ง น้าย เต๋ย แก้ง เปียะ เญย เมี่ยน, เซ ยูดา เญย ฮู่ง เหธา ยูดา เญย หฒวัง เมี่ยน เหธา เยียม เยลูซาเลม เญย เหยียด ฒู้ง เมี่ยน อ๋อย หฒุ หมวัง เฒี้ยว เญย หว่า,

21เฒี้ยว ฮนั้ง น้าย ก๊อง, ‘เม่ย บัว อ๋อย หฒุ ไฝ ฟิม เหว่ย กั้น เญย แหม่ง. ตี้ง กง ฮนอย ไม้ ตู๋ง เปี้ยน หาย หญู่ง กะน้าย ไฟ ต้อ เปียะ เยลูซาเลม เญย แก้ง.

22ตี้ง กง ฮนอย หย่า ไม้ ตู๋ง เปี้ยน หาย หญู่ง กะน้าย ธ้วด กั้น เญย เปย๊า, ไฟ โหฒว หาย หญู่ง กง. อ๋อย หฒุ เซียว ตี้ง กง ฮนอย เป๋น ธีง-เหฑ่ง เญย ฮนอย, หย่า ไม้ ตู๋ง หล่ง วั้ว นอม ฮนอย โหฒว หาย หญู่ง กง ฮนั้ง เยีย หัด เม่ย บัว เญย อง-ถาย นอ.

23มป่า นิ่น บัว ไม้ หมวัง เยีย, ไม้ แปง มน่อม หมวัง. นิ่น บัว แหง่ง เจี๊ยน เฮญี้ยว. นิ่น บัว ไม้ หมวัง หย่า ไม้ เอย เจี๊ยน หฌาว เญย หว่า.’

24“มป่า สี ก๊อง เม่ย บัว หมวัง เยีย, ตี้ง กง ฮนอย ไม้ เปี้ยน หาย หญู่ง เปียะ น้าย นอม ฒี่ง เญย แก้ง, มป่า เซียว ตี้ง กง ฮนอย เป๋น ธีง-เหฑ่ง ฮนอย, หย่า ไม้ หล่ง วั้ว นอม ฮนอย โหฒว หาย หญู่ง กง,

25วั้ว หฒั่น ฯฒฯ ม่าย เฒว์ย เจี๊ยน ดาวิด เญย เหว่ย เญย ฮู่ง เหธา นิ่น บัว เญย เจียน เปียะ น้าย นอม ฒี่ง เญย แก้ง. นิ่น บัว เฒว์ย เจี๊ยน ม์า-เธีย ไฟ เก้ ม์า, เซ นิ่น บัว กั้น, เหธา นิ่น บัว เญย เจียน, เหธา ยูดา เญย เมี่ยน, เหธา เยียม เยลูซาเลม เญย เมี่ยน. น้าย นอม ฒี่ง ฯฒฯ เหยียด ลิ์ว ม่าย เมี่ยน เยียม.

26แปะ ฝีง อ๋อย เยียม ยูดา เญย ฒี่ง เหธา เว่ย ก๋อม เยลูซาเลม เญย ต๋อง ต้าย. นิ่น บัว หย่า เยียม เบนยามิน เต่ย เหธา บง-จั๊วะ เหธา บง-ไอ๊ ต๋อง เหธา เนเกบ เต่ย ต้าย. หย่า ต้อ เจี๊ยน ฝ่ง ห่อ ปั๊ว เหฒี่ย เญย กะน้าย เหธา เหฒี่ย เหว่ย จิว ทง เญย กะน้าย, เหฒี่ย เญย ล่าง หฒิ เหธา ฮูง หย่า ต้อ ฝ่ง ห่อ เหฒี่ย เหว่ย แล์ง ฒี่ง เญย กะน้าย เถา เฒี้ยว เญย เปย๊า.

27มป่า สี ก๊อง เม่ย บัว ไม้ หมวัง เยีย, ไม้ เซียว ตี้ง กง ฮนอย เป๋น ธีง-เหฑ่ง ฮนอย, หย่า เปี้ยน กะน้าย ต๋อย ตี้ง กง ฮนอย เปียะ เยลูซาเลม เญย แก้ง, เยีย ฯฒฯ เยียม แก้ง เตี๊ยม โต์ว. โต์ว ฯฒฯ ปั๊ว ชุย เยลูซาเลม เญย ฮู่ง ติ่น. หย่า ไม้ ม่าย หาย เต้า เบ๊าะ ตุ๊ ไต่.

← Chapter 16 Jump to: Chapter 18 →