Jeremiah 38

Mien Bible (Thai Script) © Thailand Bible Society, 2007

← Chapter 37 Jump to: Chapter 39 →

1มัดทาน เญย ตอน, เซฟาทิยา, เหธา ปาดเฮ เญย ตอน, เกดาลิยา, เหธา เซเลมิยา เญย ตอน, เยฮูคัน, เหธา มันคีอา เญย ตอน, ปาดเฮ, ไฮ์ เยเลมี ก๊อง บั๋ว หฒวัง แปะ ฝีง เญย หว่า.

2นิ่น ก๊อง, “ เฒี้ยว ฮนั้ง น้าย ก๊อง, ‘หาย เต้า เยียม น้าย นอม ฒี่ง ฒู้ง อ๋อย หฒุ หฑุ ด๊าว, หฒุ หง่อ หฮนาง, หฒุ ววน-แป่ง ไต่. มป่า ธ้วด มี่ง ล์อ เคนเดีย เมี่ยน วั้ว เต๋ย ตุ๊ เฒี่ยง เจี๊ยน, เซ นิ่น ตุ๊ นิ่น เญย แหม่ง เป๋น เบ๊าะ จ๋า ตุ๊ ต้าย เญย ฒี่ง เหญ่ย, ตุ๊ แหม่ง เฒี่ยง.’

3เฒี้ยว ฮนั้ง น้าย ก๊อง, ‘น้าย นอม ฒี่ง ฒู้ง อ๋อย หฒุ จิว ปุน บาบีโลน ฮู่ง เญย จุน-แปง เญย ปั์ว-เดี๊ย. นิ่น บัว ฯฒฯ ธ้าง ตุ๊ หมี่ อ๊ะ.’”

4วั้ว เต๋ย เจียน ก๊อง บั๋ว ฮู่ง เตี๋ย, “โท้ ปุน น้าย ล่าน เมี่ยน หฒุ ไต๋ ไต่, เหว่ย หฒุ นิ่น เฒาะ น้าย หญู่ง หว่า บั๋ว ฒี่ง กะญั์ว เหฒ่ง เหฌี่ย เญย แปง เหธา หฒวัง แปะ ฝีง ฯฒฯ ปุน นิ่น บัว เญย ปั์ว เมา. น้าย ล่าน เมี่ยน ไม้ เฒ์ย อ๋อย ปุน น้าย เต๋ย แปะ ฝีง ตุ๊ หลง. นิ่น อ๋อย ปุน นิ่น บัว หฒุ โค้ว ฮนั้ง.”

5เสเดคียา ฮู่ง ก๊อง, “นิ่น เยียม เม่ย บัว เญย ปั์ว-เดี๊ย. ฮู่ง เตี๋ย ไม้ ไฮ่ โหฒว หาย หญู่ง แหง่ง เม่ย บัว.”

6นิ่น บัว ฯฒฯ เฒาะ เยเลมี, หล่ง ฮลาง ปู๋ง เหฌี่ย, ปุน นิ่น เยียม ฮู่ง เตี๋ย เญย ตอน, มันคีอา, เญย เซียว ววม ค้วด กะญั์ว, วั้ว เต๋ย เซี้ยว แกง เญย แปง เญย หลาด กะญั์ว. วั้ว นอม เซียว ววม เญย ค้วด ไม้ ม่าย ววม, ขูง ม่าย ววม-ปั่ม ด้อง. เยเลมี ฯฒฯ เฒ่ม เหฌี่ย ววม-ปั่ม หมี่ อ๊ะ.

7เยียม ฮู่ง ติ่น ม่าย เต้า อิม โต๊ เญย เอทีโอเปีย เมี่ยน, บั๋ว เห่ว เอเบดเมเล้ก. นิ่น ไฮ์ ก๊อง นิ่น บัว เฒาะ เยเลมี ปู๋ง เหฌี่ย เซียว ววม เญย ค้วด. วั้ว หฒั่น ฮู่ง เตี๋ย เฒว์ย เจี๊ยน เบนยามิน แก้ง ด่าง.

8เอเบดเมเล้ก ฯฒฯ เยียม ฮู่ง ติ่น ธ้วด มี่ง ก๊อง บั๋ว ฮู่ง เตี๋ย,

9“เยีย เญย เฒี้ยว, ฮู่ง เตี๋ย อ่า, น้าย เต๋ย เมี่ยน โหฒว ปุน โต่ว หว่า เมี่ยน, เยเลมี, เญย หญู่งๆ สี่ เซ เอ๊าะ ไห่. เยียม วั้ว นิ่น ฒู้ง อ๋อย หง่อ ไต่, เหว่ย หฒุ ฒี่ง กะญั์ว ไม้ ม่าย เหยียด เต๋ย หญั่น ฮบ อ๊ะ.”

10ฮู่ง เตี๋ย ฯฒฯ พ้าย เอทีโอเปีย เมี่ยน, เอเบดเมเล้ก. นิ่น ก๊อง, “อ๋อย หฒุ ต้อ เยียม น้าย เญย ปัว ล่าน เมี่ยน มี่ง โต่ว หว่า เมี่ยน, เยเลมี, วั้ว. นิ่น ไม้ แก้ง ไต่ อ๋อย หฒุ เยียม เซียว ววม เญย ค้วด เธีย นิ่น ธ้วด ด่าง.”

11เอเบดเมเล้ก ฯฒฯ ต้อ วั้ว เต๋ย เมี่ยน เหธา เจี๊ยน นิ่น มี่ง. นิ่น บัว มี่ง เถา ฮู่ง ติ่น, เถา เซียว ลุย-ฮู้ เญย ต๋อง, ล์อ โล์-เดีย เหธา ลุย-โหว-ฮู้. หล่ง ฮลาง ปู๋ง เหฌี่ย เซียว ววม เญย ค้วด ปุน เยเลมี.

12เอทีโอเปีย เมี่ยน, เอเบดเมเล้ก, บั๋ว เยเลมี, “เฒาะ ปะหญ่าย เหธา ลุย-โหว-ฮู้ ฟับ เจี๊ยน ฮลาง เหธา ปั์ว-เซย-เดี๊ย.” เยเลมี เอย เจี๊ยน โหฒว.

13นิ่น บัว ฯฒฯ หล่ง วั้ว เต๋ย ฮลาง เธีย นิ่น ธ้วด เซียว ววม เญย ค้วด. เยเลมี หธ่อ เยียม เซี้ยว แกง เญย แปง เญย หลาด กะญั์ว.

14เสเดคียา ฮู่ง พ้าย เมี่ยน มี่ง ต้อ โต่ว หว่า เมี่ยน, เยเลมี, ต้าย เถา หฒั่ง เฒี้ยว เญย เปย๊า ตะฟาม คัง แก้ง เปียะ เญย ต๋อง, ฯฒฯ เยียม หน่าย ปวั้ง นิ่น. ฮู่ง เตี๋ย ก๊อง บั๋ว เยเลมี, “เยีย อ๋อย หน่าย เหยียด หญู่ง เม่ย. ไม้ ตู๋ง ปี๋ง หาย หญู่ง ไม้ บั๋ว เยีย.”

15เยเลมี ก๊อง บั๋ว เสเดคียา, “สี ก๊อง เยีย บั๋ว เม่ย, เม่ย ด่ง หาย ฒู้ง ไต๋ เยีย ไม้ เฒ์ย? สี ก๊อง เยีย เถง เม่ย ธ่าง ล่าง, เม่ย หย่า ไม้ หมวัง เยีย.”

16เสเดคียา ฮู่ง ฯฒฯ ปี๋ง เจี๊ยน เหธา เยเลมี โฮ้ว หว่า ก๊อง, “เยีย เฒี้ยง เจี๊ยน เฒี่ยง เจี๊ยน เญย เฒี้ยว, ต้ง ปุน เยีย บัว ม่าย แหม่ง วั้ว เต้า, โฮ้ว หว่า ก๊อง, เยีย ไม้ ไต๋ เม่ย หย่า ไม้ จิว ปุน เม่ย เยียม ล์อ เม่ย เญย แหม่ง วั้ว เต๋ย เมี่ยน เญย ปั์ว-เดี๊ย.”

17เยเลมี ฯฒฯ ก๊อง บั๋ว เสเดคียา, “ เฒี้ยว, เน่น เจี๋ย เญย ทิน-ฮู่ง, อิสะลาเอน เญย ทิน-ฮู่ง ฮนั้ง น้าย ก๊อง, ‘สี ก๊อง เม่ย เหญี่ยม เซวย, เฒาะ กั้น ฝูง ปุน บาบีโลน ฮู่ง เญย เจียน, เม่ย ฯฒฯ ตุ๊ แหม่ง ธ้วด. น้าย นอม ฒี่ง ฯฒฯ หฒุ จิว ปุน เคนเดีย เมี่ยน. นิ่น บัว หย่า ไม้ หล่ง โต์ว ปั๊ว อ๊ะ. เม่ย เหธา เม่ย เญย เปย๊า ฒง เมี่ยน หย่า ตุ๊ เฒี่ยง เจี๊ยน.

18สี ก๊อง เม่ย ไม้ เหญี่ยม เซวย, ไม้ เฒาะ กั้น ฝูง ปุน บาบีโลน ฮู่ง เญย เจียน, น้าย นอม ฒี่ง ฯฒฯ หฒุ จิว ปุน เยียม เคนเดีย เมี่ยน เญย ปั์ว-เดี๊ย. นิ่น บัว ฯฒฯ หล่ง โต์ว ปั๊ว. เม่ย หย่า เปย๋า ไม้ ดุ๊ด เยียม นิ่น บัว เญย ปั์ว-เดี๊ย.’”

19เสเดคียา ฮู่ง ก๊อง บั๋ว เยเลมี, “เยีย กั้ม เหฑีย เปย๋า มี่ง เปียะ เคนเดีย เมี่ยน วั้ว เต๋ย ยิวไท เมี่ยน. เหฑีย เคนเดีย เมี่ยน เฒาะ เยีย จิว ปุน วั้ว เต๋ย เมี่ยน, นิ่น บัว ฯฒฯ โหฒว โตะ ปุน เยีย.”

20เยเลมี เตา, “เม่ย ไม้ หฒุ จิว ปุน นิ่น บัว. โท้ เม่ย หมวัง เฒี้ยว หล่ง เยีย ก๊อง บั๋ว เม่ย เญย หว่า, เม่ย ฯฒฯ ตุ๊ หลง. นิ่น บัว หย่า เลี่ยว เม่ย เญย แหม่ง.

21มป่า สี ก๊อง เม่ย ไม้ เหญี่ยม เซวย, น้าย เซ เฒี้ยว หล่าว ย่าง ปุน เยีย ปวัด เญย สี่.

22หมั่ง ม่าะ! เยียม ยูดา เญย ฮู่ง ติ่น เหฒ่ง เหฌี่ย เญย มเซียะ ตอน หฒุ ต้อ ธ้วด จิว ปุน บาบีโลน ฮู่ง เญย เจียน. วั้ว เต๋ย มเซียะ ตอน ก๊อง, “‘ต้ง เม่ย ปู๋ง เฮญี้ยว เญย ก๋อ-โย์ว ดั๊ว เม่ย หย่า ฮี่ง เม่ย หมี่ อ๊ะ. อี้ หฒั่น เม่ย เญย เหฒา เฒ่ม เหฌี่ย ววม-ปั่ม, นิ่น บัว ฯฒฯ กวั่ง เม่ย อ๊ะ.’

23“นิ่น บัว อ๋อย เฒาะ เม่ย เญย เหยียด ฒู้ง เอ๊า เหธา น่าม โญ์ว จิว ปุน เคนเดีย เมี่ยน. เม่ย กั้น หย่า ไม้ ไฮ่ เปย๋า ดุ๊ด นิ่น บัว เญย ปั์ว-เดี๊ย, ฒู้ง หฒุ บาบีโลน ฮู่ง เฒาะ. น้าย นอม ฒี่ง หย่า อ๋อย หฒุ โต์ว ปั๊ว ชุย.”

24เสเดคียา ก๊อง บั๋ว เยเลมี, “ไม้ ตู๋ง ปุน หาย เต้า ฮิ้ว ตุ๊ น้าย เต๋ย หว่า, เม่ย ฯฒฯ ไม้ ไต่.

25สี ก๊อง วั้ว เต๋ย เจียน ไฮ์ ก๊อง เยีย ตุ๊ เหธา เม่ย ก๊อง หว่า ฯฒฯ ต้าย ล์อ เม่ย ก๊อง, ‘บั๋ว เยีย บัว ม่าะ! เม่ย ฮนั้ง หาย นอ ก๊อง บั๋ว ฮู่ง เตี๋ย? ฮู่ง เตี๋ย หย่า ก๊อง หาย หญู่ง บั๋ว เม่ย? ไม้ ตู๋ง ปี๋ง หาย หญู่ง เยีย บัว, เยีย บัว ฯฒฯ ไม้ ไต๋ เม่ย,’

26เม่ย อ๋อย หฒุ บั๋ว นิ่น บัว, ‘เยีย ชะ โท้ ฮู่ง เตี๋ย ไม้ ตู๋ง ฝูง เยีย หฑวน โยนาทาน เญย เปย๊า เยียม วั้ว ไต่.’”

27ฆะฮ้า หฒวัง เจียน ต้าย ล์อ เยเลมี หน่าย นิ่น, นิ่น ฯฒฯ หฒิว ฮู่ง เตี๋ย บั๋ว เหฒียง เญย หว่า บั๋ว นิ่น บัว. นิ่น บัว ฯฒฯ ไม้ เหธา นิ่น ก๊อง หาย หญู่ง อ๊ะ, เหว่ย หฒุ ไม้ ม่าย หาย เต้า ไฮ์ นิ่น เหธา ฮู่ง เตี๋ย ก๊อง หว่า.

28เยเลมี เยียม เจี๊ยน เซี้ยว แกง เมี่ยน เญย หลาด กะญั์ว เถา เยลูซาเลม หฒุ เคนเดีย เมี่ยน เฒาะ วั้ว ฮนอย.

← Chapter 37 Jump to: Chapter 39 →