Jeremiah 9

Mien Bible (Thai Script) © Thailand Bible Society, 2007

← Chapter 8 Jump to: Chapter 10 →

1โอ เฝย ตุ๊ เยีย เญย มฆ้อง เป๋น ววม, เยีย เญย มฒีง เป๋น ววม-เหมว่ย เญย ฒี้ง, เยีย ฯฒฯ เหว่ย เยีย เญย แปะ ฝีง หฒุ ไต๋ ไต่ เญย เมี่ยน เฒี่ยง ฮนอย เฒี่ยง ม์วน เญี้ยม.

2เฝย ตุ๊ เยีย เยียม เต่ย-ปูง-ฮวาง ม่าย เจี๋ย เจ๊า เมี่ยน ฮิด เญย ต๋อง เหว่ย ปุน เยีย ไฮ่ เล่ย ฆอย เยีย เญย แปะ ฝีง, หย่า ไฮ่ เปย๋า ดุ๊ด นิ่น บัว. เหว่ย หฒุ นิ่น บัว เหยียด ฒู้ง เป๋น เหฮยียน เญย เมี่ยน, เป๋น กวั้น ไม้ เหฒียบ ฒัวะ เญย เมี่ยน.

3“นิ่น บัว โหฒว เบียด เงา ฮนั้ง จวัง-หฒิน, เซ จ๊า เญย เจ๊า ไม้ เฒ์ย เฒียน เล์ย เยียม เต่ย-ปูง เฮ้น เจี๊ยน ฝาว. เหว่ย หฒุ นิ่น บัว โหฒว น้าย หญู่ง เอ๊าะ สี่, แอ๋ง โหฒว วั้ว หญู่ง เอ๊าะ สี่, นิ่น บัว หย่า ไม้ ฮิ้ว ตุ๊ เยีย.” น้าย เซ เฒี้ยว ก๊อง เญย หว่า.

4“เต้าๆ เมี่ยน อ๋อย หฒุ บู้ง เจี๊ยน กั้น เญย จวั่ง ล์าง เมี่ยน. หย่า ไม้ ตู๋ง ปู๋ง เฮญี้ยว หาย เต้า ก๋อ-โย์ว. เหว่ย หฒุ เต้าๆ ก๋อ-โย์ว โหฒว ดั๊ว เมี่ยน เญย เมี่ยน, โม์ว เต้า จวั่ง ล์าง เมี่ยน เจี๋ย น้าย เจี๋ย วั้ว ก๊อง หว่า-ฮู้.

5เก๊าะ-เมี่ยน ดั๊ว เก๊าะ-เมี่ยน เญย จวั่ง ล์าง เมี่ยน, ไม้ ม่าย เหยียด ล่าน ก๊อง เฒียน หว่า. นิ่น บัว หฌาว นิ่น บัว เญย เบียด ก๊อง-แปะ, นิ่น บัว หล่ง เหฑ่ง ชะ ป์าม ฒุ์ย ไม้ ไฮ่ ก๊อย เฮญี้ยว หฑวน.

6นิ่น บัว เหฒย เมี่ยน แอ๋ง จา เหฒย, นิ่น บัว ดั๊ว เมี่ยน แอ๋ง จา ดั๊ว. นิ่น บัว แหง่ง เจี๊ยน ไม้ คั้ง ฮิ้ว ตุ๊ เยีย.” น้าย เซ เฒี้ยว ก๊อง เญย หว่า.

7เหว่ย น้าย เน่น เจี๋ย เญย เฒี้ยว ฮนั้ง น้าย ก๊อง, “หมั่ง ม่าะ! หลาย เยีย เญย แปะ ฝีง โหฒว เญย เอ๊าะ สี่ เยีย อ๋อย สิน นิ่น บัว, เค้า นิ่น บัว. เยีย ฝู่ง ไฮ่ กั้น หญู่ง โหฒว?

8นิ่น บัว เญย เบียด ฮนั้ง โตะ เญย ฟอง, ก๊อง หว่า ดั๊ว เมี่ยน. เก๊าะ-เมี่ยน หล่ง เก๊าะ-เมี่ยน เญย ฑุ่ย ก๊อง แป้ง ออน เญย หว่า ปุน นิ่น เญย จวั่ง ล์าง เมี่ยน, มป่า เยียม นิ่น เญย เฮญี้ยว นิ่น ต๊า หฒะเอ๋ย ห่อย.”

9เฒี้ยว ก๊อง, “เยีย ไม้ เฒ์ย อ๋อย หฒุ เหว่ย น้าย เต๋ย สี่ ตี่ง นิ่น บัว เญย ฒุ์ย ไฟ? เยีย ไม้ เฒ์ย อ๋อย วิ่น ปุน น้าย เต๋ย กั๊วะ เญย เมี่ยน ไฟ?”

10เยีย อ๋อย หฒุ เหว่ย บง เฮญี้ยว มุน เญย เญี้ยม, หย่า เญี้ยม เหว่ย เต่ย-ปูง-ฮวาง เญย เมี้ย-เธี้ยง, หลาย หฒุ กวั่ง ฮวาง ไม้ ม่าย เมี่ยน เจี๋ย, หย่า ไม้ ไฮ์ แซง-คู้ เห่ว. เลี่ยม ด๊าม-ลู่ง เญย เหนาะ เหธา เฮยี่ย ฒ่อย เปย๋า เหฑ่ง.

11“เยีย อ๋อย ปุน เยลูซาเลม เป๋น บาง หว่าย เญย กะน้าย-ดุย, เป๋น เฮยี่ย จู๊ เยียม เญย ต๋อง. เยีย อ๋อย ปุน ยูดา เญย ฒี่ง เป๋น ฒี่ง ฮวาง, ไม้ ม่าย เมี่ยน เยียม.”

12หาย เต้า ม่าย ธง-เม่ง เก๋า เปียะ เฮญี้ยว น้าย เต๋ย สี่? เฒี้ยว เญย ฑุ่ย เหธา หาย เต้า ก๊อง เจี๋ย เหว่ย ปุน นิ่น ไฮ่ ก๊อง ธ้วด น้าย เต๋ย เจ๊า? เต่ย-ปูง เหว่ย หาย ติ่ว หฒุ ป่าย ฮวาง เหฑ่ง, ฮนั้ง เต่ย-ปูง-ฮวาง ไม้ ม่าย เมี่ยน เจี๋ย มี่ง เจี๋ย ต้าย?

13เฒี้ยว หย่า ก๊อง, “เซ หลาย นิ่น บัว กวั่ง เยีย เยียม นิ่น บัว เญย หฑะเฮมียน เหลียบ ต้าย เญย เล์ย-หลัด, ไม้ หมวัง เยีย เญย หว่า, ไม้ เอย เจี๊ยน โหฒว.

14นิ่น บัว แหง่ง เจี๊ยน เอย นิ่น บัว กั้น เญย เฮญี้ยว โหฒว หย่า หฒวด นิ่น บัว เญย อง-ถาย หฌาว เญย เจ๊า, มี่ง กัน บาอัน เฒี่ยน.

15เหว่ย น้าย เน่น เจี๋ย เญย เฒี้ยว, อิสะลาเอน เญย ทิน-ฮู่ง, ฮนั้ง น้าย ก๊อง, “หมั่ง ม่าะ! เยีย อ๋อย ปุน น้าย เต๋ย แปะ ฝีง หญั่น ยั่ง เม์ว แอ๋ง ปุน โตะ เญย ววม นิ่น บัว ฮบ.

16เยีย อ๋อย ปุน นิ่น บัว ฟ้าด หฑาน มี่ง เยียม ต้ง นิ่น บัว กั้น เหธา นิ่น บัว เญย อง-ถาย ไม้ ฮิ้ว วั้ว เต๋ย กั๊วะ เญย เมี่ยน บุด๋ง. เยีย หย่า อ๋อย หล่ง หฑุ ด๊าว หฒุ่น นิ่น บัว เถา เยีย เหมียด เหฑ่ง นิ่น บัว.”

17เน่น เจี๋ย เญย เฒี้ยว ฮนั้ง น้าย ก๊อง, “หลงๆ เญย ฮนั้ม! อ๋อย หฒุ เห่ว เถง เฑ่า เญี้ยม เญย มเซียะ ตอน ต้าย, เซ พ้าย มี่ง ล์อ เก้า ไฮ่ เจี๋ย วั้ว เต๋ย.

18เห่ว นิ่น บัว ก๊าน ต้าย เหว่ย เยีย บัว เญี้ยม, เหว่ย ปุน เยีย บัว เญย มฒีง ธ้วด ววม-เหมว่ย หลุๆ เญย, หย่า ม่าย ววม-เหมว่ย เหลี่ยว ธ้วด เยีย บัว เญย มฒีง-ด๊บ.

19หมวัง ไฮ์ ม่าย เญี้ยม เญย เฉีย เยียม สิโอน ธ้วด. ‘เยีย บัว หฒุ ป่าย เหฑ่ง อ๊ะโล่ะ! เยีย บัว หฒุ ไญ้ เถา ต้าว อ๊ะ. เหว่ย หฒุ เยีย บัว เล่ย เต่ย-ปูง, เยีย บัว เญย เปย๊า หย่า หฒุ นิ่น บัว ป่าย หว่าย เหฑ่ง.’”

20มเซียะ ตอน อ้า! อ๋อย หฒุ หมวัง เฒี้ยว เญย หว่า. ปุน เม่ย บัว เญย มน่อม ฒิบ เฒี้ยว เญย ฑุ่ย ก๊อง เญย หว่า. อ๋อย หฒุ หฌาว เม่ย บัว เญย เซียะ ป๋าว หน่าน ฒี่ง ฑูง, เก๊าะ-เมี่ยน หฌาว เก๊าะ-เมี่ยน เญย จวั่ง ล์าง เมี่ยน ป๋าว เฑ่า เญี้ยม เญย ฑูง.

21เหว่ย หฒุ ปุน เมี่ยน หฒุ ไต่ เญย เจ๊า ฝาว ต้าย เปียะ เยีย บัว เญย ฟง ม่วน, หย่า เปียะ เยีย บัว เญย ฮู่ง ติ่น, ปุน ฝุเจว๊ย เยียม จาย-ห่อง เหธา เมี่ยน หลุน เมี่ยน เยียม ต้ม หฒวัง หฒ่าม หฒุ ไพ กวั่ง.

22เม่ย อ๋อย หฒุ ก๊อง, “ เฒี้ยว ฮนั้ง น้าย ก๊อง, “‘เมี่ยน เญย เซย อ๋อย คีง เหฌี่ย เยียม วั้ว เดา-ฌัง ฮนั้ง ไฆ้ นอ, ฮนั้ง ก๊าด เบย้า เมี่ยน ก๊าด เญย เบย้า เฒ้ย คีง เหฌี่ย หย่า ไม้ ม่าย หาย เต้า เฑ์า.’”

23เฒี้ยว ฮนั้ง น้าย นอ ก๊อง, “ไม้ ตู๋ง ปุน ธง-เม่ง เมี่ยน ปู๋ง หว่า-เหมา เธง นิ่น กั้น เญย ธง-เม่ง. ไม้ ตู๋ง ปุน เฮ้น เญย เมี่ยน ปู๋ง หว่า-เหมา เธง นิ่น กั้น เญย ชะ. ไม้ ตู๋ง ปุน ปุ๊ด-ฒ่อย เมี่ยน ปู๋ง หว่า-เหมา เธง นิ่น กั้น เญย ฒิ่น ฒ่อย.

24มป่า อ๋อย หฒุ ปุน ปู๋ง หว่า-เหมา เญย เมี่ยน ฮนั้ง น้าย ปู๋ง หว่า-เหมา, เหว่ย นิ่น เม่ง แปะ หย่า ฮิ้ว ตุ๊ เยีย, เซ เฒี้ยว, เยียม ลู่ง เดี๊ย เหฒียบ ฒัวะ เญย ฮนั้ม เมี่ยน, โหฒว แป้ง ฟิม, โหฒว หอบ. เหว่ย หฒุ น้าย เต๋ย สี่ เยีย หอบ เฮญี้ยว ไห่.” น้าย เซ เฒี้ยว ก๊อง เญย หว่า.

25เฒี้ยว ก๊อง, “หมั่ง ม่าะ! ฮนอย-เหญียะ อ๋อย เถา เยีย อ๋อย ตี่ง เหยียด ฒู้ง เจี๋ย ก๊าด เญย เล์ย มป่า ฮนั้ง ไม้ เจี๋ย ก๊าด เญย เล์ย วั้ว เต๋ย เมี่ยน เญย ฒุ์ย นอ,

26เซ อียิบ เมี่ยน, ยูดา เมี่ยน, เอโดม เมี่ยน, อัมโมน เมี่ยน, โมอับ เมี่ยน เหธา เหยียด ฒู้ง เยียม เต่ย-ปูง-ฮวาง จั๊บ บะเปยย แป้ง เญย ฮวีง ก๋อม มฆ้อง เญย เมี่ยน. เหว่ย หฒุ น้าย เต๋ย นอมๆ กั๊วะ เญย เมี่ยน เยียม ซิน เจี๋ย ก๊าด เญย เล์ย มป่า นิ่น บัว เหธา อิสะลาเอน เญย หฒวัง เฒ้ย-ฟุน, ไม้ เยียม เฮญี้ยว เจี๋ย ก๊าด เญย เล์ย.

← Chapter 8 Jump to: Chapter 10 →